Кяжи варматне.
Галышкодсь вирнясь,
Лопанянза прасть,
Начка модать лангс
Ацамня ацасть.
Полюсь вирь усксесь,
Пяле веста сась,
Вастозонза сон,
Кода кула прась.
Стирнясь кунф уды,
Штада мяштеняц,
Мяштенц кепсесы
Тотнай сединяц.
Управляющайсь
Тячи иредьста,
Полють няезе
Йофси сизефста.
Эряскодозь сон
Моли Полюти,
Кода карьхциганць
Лии цёфкскяти.
Кармась од стирнять
Пинесь стяфнема;
— Стяка, од стирня,
Мази щёканя,
Круглай шаманя.
Кда кельгсамак,
Аф работафтте,
Шуфтонь сокаса
Тонь аф сокафтте.
Хоть и танцтиель
Полють ваймамац,
Пинесь стяфтозе,
Танцти удоманц
Подлайсь эвфтезе.
Сюдуф од стирнять
Шарьхкодсь сединяц,
Мезе сон тии...
Но аш лездыняц.
Йорась ласькозь тумс —
Пинесь фатязе.
— Ой, ой, месендят?..
Сязевсь паляняц, —
Полють марязе
Кельгом бабанянц.
Управляющайсь
Ашезь шарьхкоде,
Кода бабанясь
Пеельть максозе.
Полюсь печкозе
Управляющайть.
Тяфта мянць стирнясь
Пинеть кядь алда,
Но изь мяне сон
Баярть латалда.
Дворонь ваныхне
Кундазь од стирнять,
Сотнезь перьфканза
Баяронь пикскять.
Сюдуф од стирнять
Грознай судоц сась,
Кемонь кизот сонь
Панезь каторгас.
