Кизонда шинясь
Псиня, валдоня,
Морай менельса
Мази нармоння.
Нармонь мороти
Полюсь аварди,
Кинди пеняцяй,
Горянц азонды?:
Стакаль тейнза
Баярть паксяса
Сери розь нумась,
Стак работамась.
Нуй сонь вакссонза
Сире бабаня,
Корхтай Полюти
Йофси саворне:
— Стирняй-мазиняй
Эздон тят пеле,
Монга тонь лацот
Улень од стирня.
Нинге ёмлалень
Кулось алязе,
[ 71 ]
Стака тефненди
Кулось тидязе,
Баярть кядь ала
Йотась векозе,
Ашезь топотькше
Сюдуф пекозе.
Плетьса-локшеса
Пиксыхть эсонок,
Тянемс сярядихть
Кисна копсонок.
Нуйхть, синць авардихть,
Ваныхть ластя сай...
— Бабай, бабаняй,
Управляющайсь...
Ардсь сон малазост,
Кармась сюцема,
Плетьса, локшеса
Эсост пиксома.
— Мес кржа нуде,
Пинет — ине-куйхть?!
Кафтошкань крда
Вакскантт ломатть нуйхть! —
Нумолкс комотни
Полють сединяц,
Мялезонза лядьсь
Кулоф тидяняц.
— Ухай, тидяняй,
Менди шачфтомайть?
Ухай, аляняй,
Менди касфтомайть?
Кардак тюремда,
Родной бабаняй,
Мярьган, тидяняй,
Мярьган, аканяй!..
Тяфта пикссекшнезь
Сёра видихнень,
Волясь синне ульсь —
Веронь симихнень.
Векснон ётафнезь
Кштизне-моразне,
Салазь колазне,
Медень нолазне.
|
