Колхозонь эряф/1940/11/Ордаткш

←

Колхозонь эряф (1940), № 11 Ноябрь
edited by Игнатьев Г. А., Дурнов Ф. С.

→

Колхозонь эряф. Эрь ковонь литературно-художественнай и общественно-политическяй журнал. Мордовскяй Советскяй писателень союзть органоц. — № 11 Ноябрь 1940. — с. 66—70

273926Колхозонь эряф (1940), № 11 Ноябрь — Ордаткш1940Безбородов, Михаил Ильич

[ 66 ]

Михаил Безбородов

ОРДАТКШ

Пьеса—шутка, фкя налхксемаса.

НАЛХКИХНЕ:

Кевонь Петрясь — колхозник, бригадир, 23 кизоса;
комсомолец.

Проса — сонь авац, ордаткшни, 24 кизоса.
Феда баба — Петрянь тядяц, кирди Просань ширенц.
Аксю — комсомолка, ударница, 21 кизоса.
Стёпа — Петрянь ялгац, 25 кизоса.
Уштор Митясь — 22 кизоса, ВЛКСМ-нь ячейкать секретарец

Тевсь моли кизонда, сёра урядамань пингть.
Недяляши, илядь. Петрянь кудса.

1-це лисемась

(Феда баба цюланцта кандсь сяканя. Сувай Проса, ордатф)

Проса

Сяда ламос аф сави ни кирдемс,
Кли ёрай кафту эсон сяземс.
Керозь керы, бта афи мирде...

(Думай)

Мезе тиемс? Кода сафтомс кяжец?

Феда баба

Мес, авакай, алу нолдать нярцень?
Али кивок сединяцень колазе?

Проса

Кие коласы, кда аф эсь полазе...
Сембе ширде шоряйкс арань тейнза,
Колма шит ни пезфни эзон пейнзон.

Феда баба

(Абондозь)

Мезе тага, сюдуфт, тячи тиеде?

[ 67 ]

Кодам пине ётась ётковант?
„Васце фкя-фкас лиезь лиеде,
А тяни мельгант сяконь ватт...
Сивода сивос фатямс мяленте.

Проса

Пяк ни ёнюкс арась цёраце...
Сембе велесь рахай эсон...
У-у-ух-ух-ух!
(Аварьгоды)

Феда баба
(Эводезь басяй Просань)

Идняй, лоткак, лоткак, шивалдоняй!
Пяк тят пеле... аран ширезот.

Проса
(Бойкаста)

Мон аф анан лезкс тонь ширдет,
Кда эряви — саты виезе!
Но думака, кинне мирдец
Рахамакс эсь аванц тиезе?
Кинне мирдец кели пакся лангса,
Мзярда пуромфт марса сембе нуйхне,
Кармай аванц колхозса нуманкса
Сюцема?

Феда баба

У-ух, катк шокшсазь инекуйхне!

Проса

„Сембонь коряс цёлак авась тон, —
Корхтай, — лама мельгат лятф розь пряда“.
Сембе ваныхть...толхт комотнихть шамастон
А сон: „Инксот рахафтомс бригадать?“
Сюци монь, аф сюцесы Настанять,
Кона шити аньцек сяда нуй.
Миннеть перьфке шары, кода ласканя...

(Думай)

Мирде мархтан, но аф няян паваз,
Цебярь эряф мархтонза аф порят.
Сембе тевса луви монь виноватокс,
Трудшит тяшни аф лиятнень коряс.
Тя изь сата, тяштезь стенгазетас:
„Кевонь Просась кальдявста работай“...
Тяни ёфси кяжне монь аф ётайхть.

[ 68 ]

Феда баба

Стенгазетас? Вай, авака-а-ай!

Проса

Тяда меле кода паксяв якамс?
Ломань ёткс аш кода тяни лисемс...
(Калтади, ортанясь. Проса ваномать каршеса кармай петне-
ма руцянц).

2-це лисемась

(Сувай Петря, корхтай бта эстейнза)

Петря

Шумордамс тялямать шобдавас, сисем...

(Няйсы Просань)

Ага! Проскась тячи лятфтась ваномать.
Ваныть, ваныть мази щёка прятнень.

(Феда бабати)

Тон мес тяфта кяжда ванат?
Мес трнатыхть сире кяттне?
Проскась тожа, кода таяскотф...

Феда баба

Мес рьвянять алу ваяфтат?

Петря

Кода ваяфтан?

Феда баба

Паксяса сюцят,
Равжа доскас лемнянц тяшнефтьсак.
Мезень пара тянь ширде учат?
Васянь-полань седис кяшт сафнят.

Петря

Вов тон мезе! Ха-ха-ха-ха-ха!
Тядяй, тячи танга рахафтат.

(Боку)

Тяни содаса, мес тяфта Проскась
Шарфты ширезон эсь копонц эса.
Содаса, мес корхтамда сон лоткась
И мезе кирди оржа кяленц песа.

[ 69 ]

Феда баба

Стенгазетас! Мялезт пара тя?
Кольфтят-калафтат кудпотмозень...

Петря

Саты, тядяй...

Феда баба

Норак нинге паряфтте,
Кли повоть. Кие потясь лофцозень?
Тон. Касфтонь эсот, пеставань...
Сясы кулхцонтт, мезе корхтай тядяце.
Тяни азка тейне, мес авать
Кинц юмафтат?

Петря

Сяс, мес тяряфни
Марстонь тевса работамс эсь лацонза.

Проса

Кода тага тейть эряви?

Петря

(Феда бабати)

Проскась пели сизихть казьфонза,
Розь прянкса сон лишнайксть ни аф комай
Но кельги курокть, ласькозь ласькоманц.
Сяс сонь трудоц лувфоль кальдявнякс
Трудшит тяштень аф ялганзон коряс.
Сон изь петев, мянцесь кафту сялдасканц,
Ялгань валхнень кяжда шири ёрясь.

Проса

Лоткак, лоткак! Мес тон васькафнят?
Мзярда корхтать пара валса? Мзярда?

Петря

Афи визькс? Али кяшт сафнят?

Феда баба

Катк корхтай, аф эряви кардамс.
Рьвяня, корхтак!

Проса

Сон аф кули. Мон аф Настась...

[ 70 ]

Петря

Да, Настать кальдявонц аф васьфтьсак,
Сонь работанц аф сялдсы ни кивок.
Нуйхнень ёткста аньцек сон и Аксясь
Васень вастсот тячинь шис мянь.
А трудшида мзяра сявсть синь?

Феда баба

Тота. А тон рьвянять эвфнить,
Работанц лангса аньцек рахсеть.

Проса

Мон нолан, нумань лад аф содан,
Стак путт тейне трудошит тон.

Петря

Эх, Проска, пинге шарьхкодемс и содамс,
Кода оцю трудшить питнец, —
А тон Аксянь коряс вешат.
Кда тяштемс, коза кяшат
Сельмотнень тон нуйхнень эзда?
Вдь работацень сембе содасазь.

Феда баба

(Дразнязь)

Содасазь! Мярьк весть кяжда,
Вов и лоткальхть сембонь кяльсна.

Петря

Кда работамс тонь мяльсот,
Пяк ни уцесь трудшись кармай улема.
Эста саволь эрь гектарти лихтемс
Сняра шит, конат...

Феда баба

Мезе конат! Минь тянь кулеме!
Мяляфтк, пеедезь эсь седизт ласькфтят!

(Тянь лангс и сязеви
М. И. Безбородовть „Ордаткш“ пьесац).

Печатьс аноклазе Иван Чумаков.

This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:

its creator didn't fight or work for Soviet Union victory during the Great Patriotic War — so the 70-year protection term is applied;
and the creator died before January 1, 1954 (more than 70 years ago), and has been not posthumously rehabilitated since that date;
and this work was first published before January 1, 1954 (more than 70 years ago).

This work is in the public domain in the United States because it was first published outside the United States (and not published in the U.S. within 30 days), and it was first published before 1989 without complying with U.S. copyright formalities (renewal and/or copyright notice) and it was in the public domain in its home country on the URAA date (January 1, 1996 for most countries).
This work was in the public domain in Russia on the URAA date January 1, 1996, according to the Law 09.07.1993 No 5351-1 which was enacted on that date:

its creator didn't fight or work for Soviet Union victory during the Great Patriotic War — so the 50-year protection term was applied;
and the creator died before January 1, 1946 (more than 50 years ago from 1/1/1996), and has been not posthumously rehabilitated since that date;
and this work was first published before January 1, 1946 (more than 50 years ago from 1/1/1996).

The author died in 1935, so this work is also in the public domain in other countries and areas where the copyright term is the author's life plus 88 years or less (if applicable), or the copyright term is 83 years or less since publication for posthumous works (if applicable).