Колхозонь эряф/1941/03/Аф удалаф ки
| АФ УДАЛАФ КИ |
Эрясь-ащесь фкя цёра. Сон тусь лия велес работникокс сиводема, якась велева мянь илядти и решил удомс козянь пяле. Сувась кудпотму и пшкядсь:
— Нолдамасть удома!
Козять кудса ульсь ава и итть.
— Ожу, мирдезень кизефтьса! — мярьгсь авась и лиссь пирьфи. Мирдец пирьфса тии эши.
— Кульхте! Вов цёра сась, кизефни удома васта.
— Нолдак! Катк уды.
Авась сась меки и корхтай:
— Кайсить щапнень и матт полка лангс.
Цёрась кайсезень щамонзон и куцсь полка лангс.
Ушесь шоподсь.
Сувась азорсь куду и мярьги аванцты:
— Кульсак! Пидек сиволь мархта цёмарат.
— Ладна! — отвечась рьвац.
Азорть ульсь од цёрац, сон сась кати-коста и мадсь ваймама.
Авась стирнянц мархта пидесь цёмарат. Озсесть сембе шрать ваксс и ушедсть танцти цёмарада ярхцама. Полка лангста цёрати макссть аньцек фкяня. Сонь аньцек дразнявсь седиец. Тяфтамда сон порель комозьшка. Ярхцасть цёмарада и мадсть ваймама, а од цёрасна тусь ульцяв.
Сембе удыхть.
Полка лангста цёрась ванць авать мельге, коза путозень ляды цёмаратнень. Сон арьсесь веть синь сивомс. Пялевешкада марясы, сембе удыхть. Стясь и ушедсь лапаня лангста цёмарань вешендема. Чарпай. А тоса путфоль вайвелез сяканя. Токазе кати-кода сяканять и прафтозе мастору. Пяярьф вайвелезсь валозе марнек мяштенц. Авась марязе калдорфть, но ашезь шарьхкоде. Сон арьсесь, што тя катось.
— Брысь! Стама, тяфтама!
Цёрась саворне мадсь меки вастозонза. Цёмарада таки изь порев.
Аф ламос ащезь сась ульцяста цёрасна.
— Тядяй, мезьда ярхцан?
— Вона лапаня лангста ляды цёмаратнень сифть!
Цёрась крьвястезе лампать, ваны кияксса колаф сяканя, а вайвелезсь шудеф келес.
— Тядай! Катось вяйвелезть пяярдсь!
Эряскодозь стясь тядяц и абондозь мярьгсь:
[ 81 ]— Коса катось?! Вешеме эряви! Конянцка тапаса!
Ушедсть катоть вешендема. Стясь и алясновок. Ламос вешендезь катоть, да изь мув сон. Эста цёрасна корхтай:
— Варжасть полка лангста, цёрать ваксса, можёт, катось?
Авась куцсь цёрать малас и штафтозе сонь вельхксонц алда. Дивандазь ювадсь:
— Э-э-э! Вов, маряк, катось, кафта пильгса!
Цёрась ульсь валф вайвелезса. Стяфтозь сонь и ушедсть сюцемонза. Алясь нльне каясь цёрать пилезонза.
— Архт пякстак, цёрай, тоза сонь... Катк нолсесазь, — кошардозе алясь эсь цёранц.
— Аде мельган, — пшкядсь азорть цёрац.
Цёрать пякстазь шобда карду. Ащесь тоса аф ламос, мольсь тейнза кати-мезе и ушедсь сонь нолсемонза. Цёрась эводсь. Мусь кядь ваксса олга пе и кодак яфоди ся шири, коса ульсь нолсись!
— М-о-о-о, — аньцек марявсь тяда меле.
— Фкя ули! — мярьгсь цёрась.
Тяфта веньберьф сон шавондозень сембе нолсихнень.
Шобдава цёрать серьгядезь куду. А авась тусь карду вазнянзон симдема. Мольсь тоза, вазнянза ульсть сембе шавонтфт. Ласьксь меки куду:
— Эх, атяньке, мезе лиссь! Ведьма цёрась шавондозень сембе вазнятнень!
Азорсь ласьксь эстокиге карду и няезень кула вазнятнень. Кяженза састь. Ласьксь куду и давай цёрать пикссемс. Пикссемда меле вятезе велень старостати. Тейнза азондозе, што цёрась шавондозень вазнянзон. Велень старостась кизефнезе цёрать, мезе сонь мархтонза ульсь. Цёрась азондозе...
— Молодец! — мярьгсь цёрати. — Ужяльхть ульсть синь цёмарасна!
Пеняндайть панезе старастась куду, а цёрати макссь колма гривенникт ярмак и указовась:
— Архт ярхцак и тук тяста эсь велезт.
Сявозе цёрась ярмакть и тусь лия велес.
Моли велева. Ваны, вальмя ала ёмла идня ярхцай лофцта. Мольсь идть малас пине и ушедсь сонь лофцонц сивома. Цёрась сявсь байдек и ёрдазе пинети. Пинесь изь пова, а иднять шавозе. Ласьксть алят, ават. Кундазь цёрать и кармасть пикссемонза. Пикссемда меле тонгозь шава боцькас, пингодезь боцькять и ёрдазь оцю ляйс: мзяра пинге ётазь сась цёрать ёжец. Марясы, уенди ведьге. Лисемс боцькаста аш кода.
Тяфта уендсь колма шит и колма вет. Сяльде вии волнась ёрдазе кати-кода боцькять ляй трвав. Ащи цёрась станяк боцькять потмоса и марясы, кати-мезе порьсы боцькя потмаксть. Пяльсь аф оцю варя и тонгозе пулонц варява потму. Цёрась эстокиге фатязе пулода. Аф содаф чудась ушедсь боцькять арфтома. Арфтозе-арфтозе — лунзясь сонь потмаксоц. Цёрась лиссь боцькаста и ванцы, инголенза кула врьгаз.
— Хоть и кулоть, но монь идемайть!
[ 82 ]Тусь цёрась вирьге эсь велезост. Мольсь-мольсь, ушесь шоподсь. Мусь вирьста шава кудня и сувась ся кудняв удома. Куднясь ульсь шава. Мадсь цёрась полка лангс. Удось аф ламос, сргозсь: кульсы, кати-кит сайхть. Сувасть кудняв. Цёрась эводсь. Сон кирендсь топонякс полка лангса, киндиге аф няеви.
Сувасть стирь мархта цёра. Крьвястезь лампать. Цёрась таргась зепстонза вина и пива и танцти закускат. Озасть шрать ваксс и ушедсть симома-ярхцама. Синць корхнихть и рахсихть. Иредсть стирть мархта цёрась, кайсезь питни щамснон и мадсть ацамть лангс.
Полка лангса ащи цёрать изь кирде седиец, ёрась сон ваномс, месендихть стирть мархта цёрась. Сон шаштсь крайняти, полка лангонь седяфне прасть, синь мархтост курьгодсь алу цёраське. Стирсь и цёрась тусть ёжефтома ласькозь.
Полка лангста прай цёрась сявозень питни щапнень, симозе ляды винать и тусь эсь кудозонза.
Оду изь яка козонга.
| Сёрмадозень Г. И. Ельмеев. (Рузаевскяй р-нь Сузгярьгя велеса). |