Колхозонь эряф/1941/06/Коняга
| Н. Щедрин
|
| КОНЯГА |
Конягась матф кить ваксс и стакаста нувай. Мужичоксь аньцек шта прьгафтозе и нолдазе ярхцама. Но Конягать аш ярхцамшкацка. Умась повсь стака, кевня мархта: лама вий путсть синь мужикть мархта, штоба сон сяскомс. Конягась — мужиконь обыкновеннай жувата, мучендаф, тапаф, тяйняня мяште, ирдезонза лисьфт и плечанза пифт, пильгонза пульзяфт-тапафт.
Прянц Конягась кирдьсы комафтфста; гривац крганц лангса ащи веляфста; сельмонзон и шалхковарянзон эзда шуди навла; вярде трвац нюрги, кода пача. Аф лама тяфтама жуватать лангса тиеви, а работамс эряви. Ши-шишка Конягась ашкстонза аф лисенди. Кизонда шобдаваста илядьс мода сокай-урядай; тялонда, мянь соламати, „произведеният“ ускси.
А вий сявомс Конягати аш коста: стама сонь кормац, конань эзда аньцек пейхне тапавихть. Кизонда, мзярда ночнойс сявондьсазь, хоть ляпе тишеняда ярхцси, а тялонда базару ускси „произведеният“ и кудса ярхцси керсеф кушфтаф шужярьда. Тунда, кодак жувататнень паньцазь паксяв, сонь пильге лангс байдекса кепсесазь; а паксяса фкявок тишеня аш; аньцек кой-коса сякокс ащи наксада тишесь, конань ётай сёксеть аф стак ётазе вакска жуватань пейсь.
Кальдяв Конягать эряфоц. Цебярь нинге, што мужиксь повсь добрай и стак ащемда аф калечендасы сонь. Лисихть кафцьке сокаснон мархта паксяв: ну, матаняй, нежетть! — марясы Конягась содаф вайгяльть и шарьхкоди. Сембе эсь осал остовонц мархта таргави, ингольде пильгонзон мархта нежеди, фталдотнень — аськолдасыне, няренц мяштенцты мяндьсы. Ну, каторжнай, уск! А сокать фтала сонць мужичоксь мяштенц, кядензон мархта, кода клящаса, педсь сокати, пильгонза мода покольхнень ёткс тушендыхть, сельмонзон мархта ваны, каба сокац афоль тара, ёшма афоль тие. Фкя песта омбоце пети молемс ётайхть борозда — и кафцьке трнатыхть: вов сон, смертсь, сась! Кафцьконди смерть — и Конягати, и мужикти; эрь шиня смерть.
Мужицкяй пулю кись тяйняня лентакс велеста вели ласьки; чёпафты посёлкав, лиси меки и тага аф содави, коза туй ласькозь. И пезонза молемс, кафцьке ширде, сонь паксятне ванцазь. Паксятнень аш песновок; сембе васттнень синь [ 37 ]пяшкодезь; нльне тоса, коса модась менельть мархта шоворсь, и тосонга коль паксят. Золотакс пиндолдыхне, сянгярятне, штадотне — синь кшнинь кольцяса фатязь велеть, и сон козонга аф лисеви, паксянь тя пиндолды безднада башка. Вона сон, ломанць, ичкозе моли; пади, пильгонза сонь вишкста якамать эзда пульзясть, а ичкозде няеви, што сон фалу фкя вастса тапай, мярьгат, аф мяневи паксянь пространствать люпштаманц эзда. Аф сяда тов тушенды тя ёлма, цють-цють няеви точкась, а аньцек аф ламда шобдалгочни. Шобдалгоды, шобдалгоды и вдруг апак учт юмай, мярьгат, пространствась эстейнза сонь шокшезь-шокшсы.
Векста векс аф кашторды паксянь грознай, фкя вастса ащи громадась, кода сказочнай вий эсь кядьсонза пленца кирди. Кие пленцта нолдасы воляс тя вийть? кие тердьсы сонь валдти? Кафта существатнень лангс прась тя задачась: мужикть и Конягать. И кафцьке шачемстост сявомок и куломозост шавондыхть тя задачать лангса, веры ливозь пяярдихть, а паксясь нинге тянемс сониень сказочнай вийнц ашезе макса, — ся вийть, кона решандалезень мужикть тевонзон, а Конягать пчкафтолезень ба сяряди плечанзон.
Конягась ащи боком пси шить каршеса, перьфканза аш фкявок шуфтоня, а кожфсь сяшкава псилгодсь, нльне ваймоце тарксемс аш кода. Кой-коста велетнень ёткста кинява вихорькс пульсь ётай, но вармась, кона кепсесы сонь, канды аф эшеня, а псинь од и од кожф. Пуропне и каруфне, кода пяляст, лиендихть Конягать вельксса, эцихть сонь пилензонды и шалхка варянзонды, сускондыхть тапаф васттненди, а сон — аньцек пилензон апак шарьхкотть шерфни сускоматнень эзда. Нувай ли Конягась, или кулси — аф шарьхкодеви. Сон пеняцямонга аф машты, што сонь сембе потмоц пси кожфть и веры натугать эзда пись. И тя утехасонга валонь аф содай животинати шкайсь ашезь лезда.
Нувай Конягась, а мучительнай сярятьфть вельксса, кона тейнза ащи ваймамать вастс, аф отт лиендихть, а бессвязнай люпштай хмара. Хмара, конань эса аф аньцек обраст, но нльне чудищатка аш, а улихть пяк оцю пятнат, то равчт, то толоннет, конат и фкя вастса ащихть, и шаштыхть марса мучендаф Конягать мархта, и усксазь сонь эсь мельгаст сембе сяда и сяда ичкози потмаксфтома крхкати.
Паксять пецка аш, козонга аф туват сонь эздонза! Яказе сонь Конягась соканц мархта туркс и квалмос, и все-таки тейнза аш аф пе, аф край. И штада, и панжи, и аф кашторды акша саван ала — сон властнайста келемсь сембе шири, и аф эсь каршезонза тюрема терттянза, а видеста сявонттянза кабалас. Аш кода сон аф содамс, аф сяскомс, аф осалгофтомс: ванат, сон — кода кула, ванат — тага живондась. Аф шарьхкодеви, кона тяса смертсь и кона эряфсь. Но и куломаса, и эряфса васенцесь и аф полафневи свидетельсь — Конягась. [ 38 ]Паксясь сембонди раздолья, поэзия, простор; Конягати сон — кабала. Паксясь люпштай сонь эсонза, нельгондьсыне сонь мекольдень вийнзон и все-таки аф лувондсы эсь прянц топоцьтокс. Якай Конягась заряста заряс, а инголенза сонь моли-шерьхки равжа пятна и уски, и уски эсь мельганза. Вов тяни сон шерьхконди инголенза, и тяни тейнза, нувамбачка, маряви юватькшнема: ну, матаняй! ну, каторжнай! ну!
Мзярдонга аф мады толонь тя шарсь, кона заряста заряс валонды Конягать лангс пси цильфонь потокт; мзярдонга аф лоткайхть атям и ёндол мархта пизепне, вишке варматне, моросне... Природась сембонди — тядя, ськамонза Конягати сон — бич и сязендема-нозондома. Эряфса всякай проявлениясь ащи тейнза муцямакс, всякай панчфокс-панжись — отравакс. Тейнза аш аф цебярь эряф, аф вайгялень ладяма, аф фкя лаца тюст; кодамовок ощущеният сон аф содай, сярядемань, сиземань, злосчастьянь марямда башка. Катк шись природать пяшкодьсы лямбса, валдса, катк сонь цильфонза тердихть эряфти и кенярдемати — беднай Конягась сонь колганза содай аньцек фкя: што сон прибавай од отрава ся пефтома отраватненди, конатнень эзда кодаф сонь эряфоц.
Аш пе работати! Работаса ётни сембе сонь эряфоц; тянкса сон тядянц потмос эвондась и шачсь, работафтома сон аф аньцек киндиге аф эряви, но, кода корхтайхть расчестливай азорхне, тии ущерб. Сембе обстановкась, конань эса сон эряй, ладяф аньцек сянди, штоба аф кадомс кулома Конягать ся мускульнай вийнц, кона лихни эсь эздонза физическяй трудонь возможность. И корма, и ваймамс пинге макссихть тейнза аньцек сняра, штоба сон улель способнай пяшкодемс эсь уроконц. А сяльде катк паксясь и стихиясь калечендакшнесазь сонь — кинге аш тевоц сянди, мзяра од рана прибавась сонь пильгонзонды, плечанзонды и копорезонза. Сонь аф благополучияц эряви, а эряфоц, кона способнай кирдемс муцямать и работать. Мзяра вект сон каннесы тя муцямать, сон аф содасы; мзяра вект ингольпяли сави сон каннемс — аф лувондсы. Сон эряй, кода шобда пефтома лоткс вайси, и сембе ощущениятнень эзда, конат доступнайхть жуватань организмати, содай аньцек аф кирдемшка сярядемать, конань тиендьсы работась.
Сонць, эряфоц, Конягать, ащи бесконечностень клеймакс. Сон аф эряй, но и афи кулы. Паксясь, кода головоног, фатязе сонь пефтома щупальцаса и аф нолдасы урочнай полосать эзда. Кодама ба наружнай огличкат афоль макса тейнза случайсь, сон фалу ськамонза и стама жа: тапсеф, муцяф, цють живой. Тя паксять лаца, конань валондсы сон эсь версонза, сон аф лувондсыне аф шитнень, аф кизотнень, аф векнень, а содасы аньцек вечностть. Сембе паксява сон срадсь, и тосонга, и тясонга фкя лаца сембе эсь жалкай остовонц мархта венемкшни, и сембе вастса фалу сон, коль ськамонза и стама жа, [ 39 ]лемфтома Коняга. Целай масса эряй сонь эсонза, кона аф кулы, аф явфтови и аф машфтови. Эряфть аш пец — аньцек тякось тя массати и шарьхкодеви. Но мезе стамсь сонць тя эряфсь? мезенди сон тапарязе Конягать бессмертиянь сюлмоса? Коста сон сась и коза моли? — эряви арьсемс, што мзярда-мзярда тя кизефксти отвечай будущайсь... Но, пади, сонга отнесется стане жа немойста и участияфтома, кода и ётафть ся шобда безднац, кона населяндазе мирть привиденияса и максозе тейст жертванди живойхнень.
Нувай Конягась, а сонь ваксканза пустоплясне ётнихть. Васенцеда варжакстозь, кивок аф мярьги, што Конягась и Пустопляссь — фкя аляннет иттне. Однака, преданиясьтя родствать колга нинге аф ёфси маштсь.
Эрясь кати-мзярда сире алаша, и ульсть сонь кафта цёранза: Конягась и Пустопляссь. Пустопляс цёрац ульсь вежливай и чувствительнай, а Конягась — неотесаннай и чувствафтома. Ламос кирдсь атясь Конягать неотесанностенц, ламос кафцьке цёранзон лувондозень фкя лаца, кода эряви идень кельги аляти, но, мекпяли, кяжиясь и мярьгсь: „вов тейть навеки вечные монь волязе: Конягати — шужярьхть, а Пустоплясти — пинепт“. Тяфта ся пингста сявомок и кармась. Пустоплясть лямбе вастс путозь, алонза ляпе шужярнят ацасть, медовайняда симдезь и ямкскат теинза ясляв каясть; а Конягать вятезь карду и ёрдасть инголенза бярема кушфтаф шужярь: эрьхнить пейхнень, Коняга! А симомс — вона ся рдазу веднять эзда.
Пцтай ёфси юкстазе Пустопляссь, што светть лангса эряй сонь брадоц, да вдруг кати-мес кармась ризнама и лятфтазе. „Мольфтезе, корхтай, монь мялезень лямбе вастсь, аердавонь топотьфти медовайть эзда, аф тяльги кргапарезон ямкссь; молян, варжаса, кода монь браткязе эряй!“
Ваны — а сонь браткац бессмертнай! Пикссесазь мезьса повсь, а сон эряй; андсазь шужярьда, а сон эряй! И паксять кона ширезонза тят варжакста, сембе вастса браткясь орудовондай; сейчас тон няить сонь тяста, а чпордайть сельмоцень — сон вона коса ни аськоляй. Кода няеви, добродетель кодамовок сонь эсонза ули, аф стак сонць байдексь эздонза синневи, а сонь машфтомс не может!
И вов ушедсть пустоплясне Конягать перьф шарондома.
Фкясь мярьги:
— Тя сяс аш кода сонь пенц самс, мес фалу работать эзда тейнза лама здоровай смыслада пуромсь. Шарьхкодезе сон, што пилетне конядот вяри аф касыхть, што плетьса узерь шовть аф тапасак, и эряй сетьмоняста, кода христозть повсонза, сонць сембе тапаряф пословицаса. Ульхть шумбра, Коняга! Тик эсь тевцень, работак!
Омбоцесь корхтай:
— Ах, ёфси аф здоровай смыслать эзда тяфта кемоста [ 40 ]тиевсь сонь эряфоц! Мезе стамсь здоровай смыслась? Здоровай смыслась, тя — мезе-бди обычнай, пошлостти молемс яснай, кона лятфни математическяй формула или приказ полициять эзга. Конягать эса кирди несокрушимость аф тя, а ся, што сон эсь эсонза канни духонь эряф и эряфонь дух! И мзярс сон эсь эсонза кармай кирдемост ня кафта сокровищатнень, кодамовок байдек сонь аф сявсы!
Колмоцесь азсы:
— Кодама тинь, однака, галиматья корхтатада! Духонь эряф, эряфонь дух — мезе тя тяфтамсь, кда аф содержанияфтома валонь фкя вастста омбоце вастти стак ащемда путнема? Ёфси аф сяс Конягась мезьсонга аф сявови, а сяс, мес сон „настоящай труд“ эстейнза мусь. Тя трудсь максси тейнза душевнай равновесия, мирендафтсы сонь и сонцень личнай совестенц мархта, и массать совестенц мархта, и максси тейнза стама кемоши, кона нльне рабствань векненди ашезь сясков! Трудендак, Коняга! нежетть! аськоляк! и амоляк трудть эса ся душевнай ясностть, конань минь, пустоплясне, юмафтоськ прокс.
А нилецесь (кода няеви, видеста кабатчикть конюшняста) полаткшнесы:
— Ах, господат, господат! тинь фалу сурса менельти повфнесасть! ёфси аф сяс Конягать пец аф сави, мес мезе-бди сонь эсонза особеннай ули, а сяс, мес сон спокон-век эсь тевозонза тонатф. Тяни хоть целай шочка сонь лангозонза синнек, а сон коль живой. Вона сон боком ащи — няемс, и ваймовок сонь эсонза ашезь иляда, — а бодрайгофтк цебярняста локшеса, сон и тага пильгонзон мархта аськоляма ушеды. Кие кодама тевс путф, ся стама тев и тии. Лувосте, мзяра синь эздост, тяфтама калекада, паксять келес срадсь — и сембе кода фкя. Калечендада тяни синь эздост мзяра угодна — синь вов тнярняска аф убавайхть. Тяни — сон аш, а ванат — сон тага модать алда лиссь.
И сяс, мес сембе ня корхнематне аф настоящай тевть эзда срхкасть, а ризнамать эзда, то корхтайхть, кортайхть пустоплясне, а сяльде и фкя-фкянь апрякама ушедыхть. Но, павазти, как раз ся пингть сргози мужиксь и решандасыне сембе спорхнень тяфтама валса:
— Н-но, каторжнай, шерьхк!
Тяса ни сембе пустолляснень ваймосна марса кенярдезевихть.
— Ванодова, ванодова! — ювадихть синь фкя вайгяльса и кенярдезь: — ванода, кода сон венемкшни, кода сон ингольде пильгонзон мархта нежетькшни, а фталдотнень мархта загребает! Вов, няйсак, именна тевсь мастярда пели! Нежетть, Коняга! Вов кинь эзда эряви тонафнемс! вов кинь лаца эряви тиендемс! Н-но, каторжнай, н-но!
 This is a translation and has a separate copyright status from the original text. The license for the translation applies to this edition only.
| ||||
| Original: |
| |||
| Translation: |
| |||
