Колхозонь эряф/1940/03/Павазонь и радостень республика

 

Павазонь   и   радостень   республика

Мордовиянь трудящайхне тя кизонь февраль ковть 25-це шистонза празновандазь эсь оцю празникснон — Мордовскяй автономнай областть 10 кизонзон топодемаснон и Мордовскяй Автономнай Советскяй Социалистическяй Республикать образованиядонза меле 5 кизотнень топодемаснон.

Мордовскяй народти автономиять максозе Октябрьскяй Социалистическяй революциясь, родной коммунистическяй партиясь ленинско-сталинскяй национальнай политикать эряфс ётафтоманц вельде.

Мордовскяй народсь Октябрьскяй Социалистическяй революцияда инголе, кода Россиянь и лия нароттне, эрясь кафтонь крда угнетенияса, горяса и нужаса. Мокшетне и эрзятне ворьготькшнесть вирьхненди, ёрасть хоть тоса мумс ломанень эряф, но угнетательхне везде синь мушендозь, покойс эряма ашезь кадонда.

„Ох, пяк шобдаста эрясть инголи,
Вирьге панцевольхть ташта пингова.
Паршить кяшендезь пине баярда,
Кудснон пякснекшнезь злодей мурзада.
Сембе эряфсна ётнесь эвотьфста,
Исть ётне ветне парста ваймафста.
Синь сёра видельхть — сёроть тапалезь,
Эрзят вирь керольхть — вирьснон нельголезь,
Мокшет калхт кундальхть — калснон сявондезь.
Кинди пеняндамс тя нельгоманкса?
Кинди жаловамс тя разбоенкса?
Азсак баярти, баярсь — локшеса,
Молят мурзати, мурзась — розгаса.
Меле мокшетне вирева срадондсть,
Меле эрзятне видефснон кадондсть“.

Сембода пяк стакаль эряфсь авати. Общай правафтомашидонза башка сонь положенияц семьяса ульс рабынянь. Сонь стака эряфонц колга народсь сельмеведень кольгозь морсесь ризнай морот, коса авась лемневи „сюдуфокс“.

„Сазан паксяса
Алдась аварди...
Зойфоц кулеви
Сазан паксяти,

Сазан ульцяти —
Крайса кудняти“.

Авать павазфтома эряфонц пяк яркайста няфтезе мокшень поэтсь Михаил Безбородов „Колма пинкт“ произведениясонза.

„Сака азонца
Стака пингозень,
Шамдса потмостон
Оцю ризфозень...
Удалань, акай,
Шачеманяда,
Ашень удала
Касоманяда“.

Минь народоньке сембе обидатнень, угнетениять инкса Россиянь нароттнень мархта марса примсесь участия освободительнай движенияса, Степан Разинонь, Емельян Пугачевонь руководстваснон ала крестьянскяй войнатнень эса.

„Трудяй ломаттне — руссне, татархне,
Синне мархтост ульсть мокша-эрзятне,
Разинонь мельге сембе кепотькшнесть,
Сонне перьфканза сембе пуромкшнесть,
Кода лефкскятне нарвайть перьфканза,
Коста синь вельфкаст кавалсь лиенди,
Лефкснень кенчсонза фатямс арьсекшни.
Волгать малава Разин вятезе,
Симбирь ошть малас войскать лифтезе.
Баярхнень каршес, мурзатнень каршес
Воляшить инкса пуромфне арсефт“.

Но народть эряфоц шиста-шис сядонга стакалготкшнесь, угнетениясь касондсь.

„Плеткат, вачашись — ульсь судьбац трудяйть,
Конац вестевок павазши изь няй“.

Россияса трудовой народсь шачфтсь кафта великай ломатть — Ленинонь и Сталинонь, конат нароттнень пуроптозь эсь перьфкаст, большевиконь партиять перьфке, штоба ёрдамс рабствать, трудящайхненди сатомс павас.

„Кармась тюрема богатырькс народсь,
Арась фкя семьякс муцяф ломань родсь,
Вирьге аськолдай — стенакс веляфтсы,
Моли пандова — рангозь калафтсы.
Эздонза народть вию соколхт шачсть —
Ленин аляньке, Сталин ялганьке,
Конат сембонь минь марняс кочкамазь,
Павазть инкса минь бойти вятемазь.
Мастороньке минь эста мазелгодсь,
Панчфу садса сон сембе наряжась,
Панчфонь щамса сон эста щась-карясь“.

А мзярда тя сатф павазоньконь лангс пяляс пинекс врьгядсть родинаньконь врагонза — белогвардейщинась и тейст лездыхне — 14 державань капиталисттне и помещикне, минь народоньке марса лия нароттнень мархта кемоста пуромсь советскяй властть — павазоньконь аралама.

„Миньге мокшетне, миньге эрзятне
Алашаньконь лангс ластя озсеме,
Якстерь армияв вармакс лиеме,
Эсь отрядоньконь тоза кучсеме.
Бойга вятнемазь Сталин ялганьке,
Да Чапаеньке — минь героеньке...
Родинать инкса миньге тюреме,
Оржа шашкаса вракнень керсеме.
И свободнайста таргавсь ваймоньке“.

Кармась касома минь народоньконь культурац:

„Кажнай велеса валдот школаньке,
Эсост тонафнихть минне иденьке.
Книгать вельксс комафт нльне сиретне,
Образованнайхть мокшень стирнятне“.

Тяни аш ни сире велесь. Колхознай крестьянствась навсегда освободиндаф кулацкяй кабалать эзда, нищайшить эзда.

„Сире велеть вастс, косоль нищайши,
Тифт козя колхост — эсост лама кши.
Косольхть шяйхть да лоткт — тяни панжихть сатт,
Мезе Ленинць мярьгсь, няйсаськ, тяни сатф“.

Минь республикасонк тиф промышленность, касыхть национальнай кадратне.

„Минне иденьке, родной брадоньке,
Йотксонок тонафтф инженероньке
Лиякс полафтозь Саранск ошоньконь,
Строязь, мазептезь минне центраньконь.
Строясть фабрикат, синь завотт строясть.
Сембе странати молихть пиксоньке,
Золтакс пиндолды канцер ваеньке,
Танцтида танцтихть минь консерваньке“.

Радостна эряй минь народоньке. Сон эсь павазу эряфонц инкса Ленинонь—Сталинонь партиянцты, кельгома вожденьконди Сталин ялгати азонды седивакскань валхт:

„Морак, тон гармония,
Морак тонга гармонист.
Тя миндейнек Сталин ялгась
Тяфтам цебярь эряф тись“.

Минь народоньке преданнай коммунистическяй партияти вожденьконди Сталин ялгати.

„Седи ваксстонь валхт вождти астама
Панчфу эряфонь тейнек сатомда,
Оцю павазонь тейнек максомда.
Кельгсаськ вожденьконь — Сталин ялганьконь,
Конац валдопты шидонга валдста.

Эряк ламоняс, минне аляньке,
Эряф максыньке — минь радноеньке.
Ащетяма минь перьфкат кемоста.
Ленинонь киге минне вятьсамасть,
Сядонга цебярь эряфс пачфтьсамасть“.

Мордовскяй народсь сатсь оцю сатфкст сембе фронтова — и культурнай и хозяйственнай строительстваса. Сталинскяй Конституциять лучензон ала сон панжезь-панжи и моли сядонга павазу эряфти.

„Мази панчфокс панжезь панжи
Минь странасонк виде кись.
Масторти пяк пара максы
Кремлять эзда Сталин—шись“.

 

---