Того́же ст҃а́гѡ є҆фре́ма, наказа́нїе.
слоⷡ҇
і҃
Бра́те, подвиза́йсѧ ꙗ҆́кѡ до́бръ во́инъ і҆и҃съ хрⷭ҇то́въ, до́ндеже и҆́маши вре́мѧ. сѐ вѣ́дый, ꙗ҆́кѡ нетлѣ́ннагѡ тѝ вѣнца̀ дѣ́лѧ, преⷣлежи́тъ сїѐ подвиза́нїе, на ѡ҆чище́нїе грѣхѡ́въ. и҆ на жи́знь вѣ́чнꙋю. сотворѝ ᲂу҆́бѡ смире́но цѣломⷣрїе всѣ́ми дѣ́лы свои́ми, є҆́же є҆́сть мт҃и послꙋша́нїю. ѿве́рзи же ѿ себѐ к꙼рꙋп꙼одꙋ́шїе,
м꙼ал꙼одꙋ́шїе и҆ ѡ҆блецы́сѧ вѣ́рою всѧ́чески, ꙗ҆́кѡ да ви́дѣвъ гдⷭ҇ь твоеѧ̀ дш҃ѝ є҆динодꙋ́шїе, всѣ́ми ᲂу҆крѣпи́тъ тѧ. воⷥненави́ди же ѕѣлѡ̀ лѣ́ность, и҆ ненавидѣ́нїе, и҆ всѧ́къ ѕо́лъ нра́въ, и҆ за́висть гдⷭ҇а ра́ди, ꙗ҆́коже є҆сѝ ѡ҆ста́вилъ по плотѝ роди́тєлѧ своѧ̑, дрꙋ́ги же и҆ и҆мѣ́нїѧ. а҆́ще бо въ нача́лѣ посла́виши по́мыслꙋ своемꙋ̀, трꙋ́дъ и҆́маши и҆мѣ́ти и҆ тщетꙋ̀. а҆́ще и҆ приключи́тсѧ на́мъ когда̀ потрꙋди́тисѧ ма́лѡ вы́ше си́лы, тогда̀ не ро́пщемъ гдⷭ҇а ра́ди. ропща́й бо, и҆счезнове́нїе себѣ̀ твори́тъ, ꙗ҆́кѡ не ѿ своегѡ̀ преⷣложе́нїѧ дѣ́лаетъ. ты́ же ꙗ҆́кѡ мꙋ́дръ сы́й, не воⷥненави́ди слабѣ́йшыѧ бра́тїи, ни ревнꙋ́й въ беⷥстра́шїи бж҃їи ходѧ́щымъ. сѐ вѣ́дый и҆спы́тнѡ, ꙗ҆́кѡ ѿпа́даѧй, са́мъ сѧ ѿмета́етъ. и҆ побѣжда́ѧй вѣнча́ємь быва́етъ. и҆ па́ки, ты̀ не воⷥненави́ди бра́та своего̀, є҆да̀ ка́кѡ стра́сть ѡ҆бошла̀ є҆го̀ є҆́сть, є҆ѧ́же ты̀ не вѣ́си, и҆ сегѡ̀ ра́ди не́мощь прино́ситъ. сего̀ подоба́етъ па́че поми́ловати и҆ моли́тисѧ за́нь, и҆ не ѡ҆скорби́ти є҆го̀, ꙗ҆́кѡ не ми́лостива сꙋ́ща. ты́ же подвиза́йсѧ до́брѣ, вѣ́дый къ комꙋ̀ и҆зше́лъ є҆сѝ. се́ бо преⷣлежи́тъ ти вре́мѧ наро́чито, на собра́нїе бога́тства неги́блемагѡ, слꙋже́нїемъ и҆ плодоноше́нїемъ, є҆́же къ бра́тїи. тѣ́мже, воⷥлю́бленне, а҆́ще потреблѧ́еши гно́й и҆з̾ сре́днѧгѡ дворца̀, потребѝ и҆ внꙋ́трєнїѧ мїрскі̑ѧ пѡ́хоти. а҆́ще ли же помета́еши пе́пелъ ска́льный, со мно́гимъ смире́нїемъ соверша́й дѣ́ло. помина́й прⷪ҇ро́ка гл҃юща:
ѱаⷧ҇ р҃а занѐ пе́пелъ ꙗ҆́кѡ хлѣ́бъ ꙗ҆дѧ́хъ, и҆ питїѐ моѐ съ пла́чемъ растворѧ́хъ. поразꙋмѣ́й же, воⷥлю́бленне, сего̀ тли́маго ѻ҆гнѧ̀, и҆ воспомѧнѝ ᲂу҆́бѡ вѣ́чный пла́мень, хотѧ́щїй поѧ́сти грѣ́шники. пла́чисѧ, зане́же согрѣши́лъ є҆сѝ, кꙋ́пнѡ же и҆ за мѧ̀ грѣ́шнаго, ꙗ҆́кѡ да ѡ҆ставле́нїе грѣхѡ́въ да́рствꙋетъ на́мъ гдⷭ҇ь. є҆мꙋ́же сла́ва во вѣ́ки, а҆ми́нь.
This is a translation and has a separate copyright status from the original text. The license for the translation applies to this edition only.
