Правосла́вный мл҃твосло́въ/Тропарѝ и҆ кондакѝ воскрⷭ҇ны
| ←Пѣ̑сни трⷪ҇чны ѻ҆смѝ гласѡ́въ | Правосла́вный мл҃твосло́въ Тропарѝ и҆ кондакѝ воскрⷭ҇ны |
Тропарѝ и҆ кондакѝ всеѧ̀ седми́цы→ |
| This page contains Church Slavonic text. Without proper font support, you may see question marks, boxes, or other symbols instead of letters and diacritics. Click here to download required fonts. |
Гла́съ а҃.
Тропа́рь:
Ка́мени запеча́танꙋ ѿ і҆ꙋдє́й, и҆ во́инѡмъ стрегꙋ́щымъ пречⷭ҇тое тѣ́ло твоѐ, воскрⷭ҇лъ є҆сѝ тридне́вный сп҃се, да́рꙋѧй мі́рови жи́знь. Сегѡ̀ ра́ди си̑лы нбⷭ҇ныѧ вопїѧ́хꙋ тѝ, жизнода́вче: сла́ва воскрⷭ҇нїю твоемꙋ̀ хрⷭ҇тѐ: сла́ва црⷭ҇твїю твоемꙋ̀: сла́ва смотре́нїю твоемꙋ̀, є҆ди́не чл҃вѣколю́бче.
Конда́къ:
Воскрⷭ҇лъ є҆сѝ ꙗ҆́кѡ бг҃ъ и҆з̾ гро́ба во сла́вѣ, и҆ мі́ръ совоскр҃си́лъ є҆сѝ, и҆ є҆стество̀ человѣ́ческое ꙗ҆́кѡ бг҃а воспѣва́етъ тѧ̀, и҆ сме́рть и҆счезѐ: а҆да́мъ же ликꙋ́етъ влⷣко, є҆́ѵа ны́нѣ ѿ ᲂу҆́зъ и҆збавлѧ́ема ра́дꙋетсѧ зовꙋ́щи: ты̀ є҆сѝ, и҆́же всѣ̑мъ подаѧ̀ хрⷭ҇тѐ воскрⷭ҇нїе.
Гла́съ в҃.
Тропа́рь:
Е҆гда̀ снизше́лъ є҆сѝ къ сме́рти, животѐ безсме́ртный, тогда̀ а҆́дъ ᲂу҆мертви́лъ є҆сѝ блиста́нїемъ бж҃ества̀. Е҆гда́ же и҆ ᲂу҆ме́ршыѧ ѿ преиспо́днихъ воскр҃си́лъ є҆сѝ, всѧ̑ си̑лы нбⷭ҇ныѧ взыва́хꙋ: жизнода́вче хрⷭ҇тѐ бж҃е на́шъ, сла́ва тебѣ̀.
Конда́къ:
Воскрⷭ҇лъ є҆сѝ ѿ гро́ба всеси́льне сп҃се, и҆ а҆́дъ ви́дѣвъ чꙋ́до, ᲂу҆жасе́сѧ, и҆ ме́ртвїи воста́ша: тва́рь же ви́дѧщи сра́дꙋетсѧ тебѣ̀, и҆ а҆да́мъ свесели́тсѧ, и҆ мі́ръ сп҃се мо́й воспѣва́етъ тѧ̀ при́снѡ.
Гла́съ г҃.
Тропа́рь:
Да веселѧ́тсѧ нбⷭ҇наѧ, да ра́дꙋютсѧ земна̑ѧ: ꙗ҆́кѡ сотворѝ держа́вꙋ мы́шцею свое́ю гдⷭ҇ь, попра̀ сме́ртїю сме́рть, пе́рвенецъ ме́ртвыхъ бы́сть, и҆з̾ чре́ва а҆́дова и҆зба́ви на́съ, и҆ подадѐ мі́рови ве́лїю млⷭ҇ть.
Конда́къ:
Воскрⷭ҇лъ є҆сѝ дне́сь и҆з̾ гро́ба ще́дре, и҆ на́съ возве́лъ є҆сѝ ѿ вра́тъ сме́ртныхъ: дне́сь а҆да́мъ ликꙋ́етъ, и҆ ра́дꙋетсѧ є҆́ѵа, вкꙋ́пѣ же и҆ прⷪ҇ро́цы съ патрїа́рхи воспѣва́ютъ непреста́ннѡ бжⷭ҇твеннꙋю держа́вꙋ вла́сти твоеѧ̀.
Гла́съ д҃.
Тропа́рь:
Свѣ́тлꙋю воскрⷭ҇нїѧ про́повѣдь ѿ а҆́гг҃ла ᲂу҆вѣ́дѣвшѧ гдⷭ҇ни ᲂу҆ч҃ни̑цы, и҆ пра́дѣднее ѡ҆сꙋжде́нїе ѿве́ргшѧ, а҆пⷭ҇лѡмъ хва́лѧщѧсѧ глаго́лахꙋ: и҆спрове́ржесѧ сме́рть, воскр҃се хрⷭ҇то́съ бг҃ъ, да́рꙋѧй мі́рови ве́лїю млⷭ҇ть.
Конда́къ:
Сп҃съ и҆ и҆зба́витель мо́й, и҆з̾ гро́ба ꙗ҆́кѡ бг҃ъ воскр҃сѝ ѿ ᲂу҆́зъ земнорѡ́дныѧ, и҆ врата̀ а҆́дѡва сокрꙋшѝ, и҆ ꙗ҆́кѡ влⷣка воскр҃се тридне́венъ.
Гла́съ є҃.
Тропа́рь:
Собезнача́льное сло́во ѻ҆ц҃ꙋ̀ и҆ дх҃ови, ѿ дв҃ы ро́ждшеесѧ на сп҃се́нїе на́ше, воспои́мъ вѣ́рнїи и҆ поклони́мсѧ: ꙗ҆́кѡ бл҃говолѝ пло́тїю взы́ти на крⷭ҇тъ, и҆ сме́рть претерпѣ́ти, и҆ воскр҃си́ти ᲂу҆ме́ршыѧ сла́внымъ воскрⷭ҇нїемъ свои́мъ.
Конда́къ:
Ко а҆́дꙋ сп҃се мо́й соше́лъ є҆сѝ, и҆ врата̀ сокрꙋши́вый ꙗ҆́кѡ всеси́ленъ, ᲂу҆ме́ршихъ ꙗ҆́кѡ созда́тель совоскр҃си́лъ є҆сѝ, и҆ сме́рти жа́ло сокрꙋши́лъ є҆сѝ, и҆ а҆да́мъ ѿ клѧ́твы и҆зба́вленъ бы́сть, чл҃вѣколю́бче. Тѣ́мже всѝ зове́мъ: сп҃сѝ на́съ гдⷭ҇и.
Гла́съ ѕ҃.
Тропа́рь:
А҆́гг҃льскїѧ си̑лы на гро́бѣ твое́мъ, и҆ стрегꙋ́щїи ѡ҆мертвѣ́ша: и҆ стоѧ́ше марі́а во гро́бѣ, и҆́щꙋщи пречⷭ҇тагѡ тѣ́ла твоегѡ̀. Плѣни́лъ є҆сѝ а҆́дъ, не и҆скꙋси́всѧ ѿ негѡ̀: срѣ́тилъ є҆сѝ дв҃ꙋ, да́рꙋѧй живо́тъ. Воскр҃сы́й и҆з̾ ме́ртвыхъ, гдⷭ҇и сла́ва тебѣ̀.
Конда́къ:
Живонача́льною дла́нїю, ᲂу҆ме́ршыѧ ѿ мра́чныхъ ᲂу҆до́лїй, жизнода́вецъ воскр҃си́въ всѣ́хъ хрⷭ҇то́съ бг҃ъ, воскрⷭ҇нїе подадѐ человѣ́ческомꙋ ро́дꙋ: є҆́сть бо всѣ́хъ сп҃си́тель, воскрⷭ҇нїе и҆ живо́тъ, и҆ бг҃ъ всѣ́хъ.
Гла́съ з҃.
Тропа́рь:
Разрꙋши́лъ є҆сѝ крⷭ҇то́мъ твои́мъ сме́рть, ѿве́рзлъ є҆сѝ разбо́йникꙋ ра́й: мѷроно́сицамъ пла́чь преложи́лъ є҆сѝ, и҆ а҆пⷭ҇лѡмъ проповѣ́дати повелѣ́лъ є҆сѝ: ꙗ҆́кѡ воскрⷭ҇лъ є҆сѝ хрⷭ҇тѐ бж҃е, да́рꙋѧй мі́рови ве́лїю млⷭ҇ть.
Конда́къ:
Не ктомꙋ̀ держа́ва сме́ртнаѧ возмо́жетъ держа́ти человѣ́ки: хрⷭ҇то́съ бо сни́де сокрꙋша́ѧ и҆ разорѧ́ѧ си̑лы є҆ѧ̀. Свѧзꙋ́емь быва́етъ а҆́дъ, прⷪ҇ро́цы согла́снѡ ра́дꙋютсѧ: предста̀, глаго́люще, сп҃съ сꙋ́щымъ въ вѣ́рѣ, и҆зыди́те вѣ́рнїи въ воскрⷭ҇нїе.
Гла́съ и҃.
Тропа́рь:
Съ высоты̀ снизше́лъ є҆сѝ бл҃гоꙋтро́бне, погребе́нїе прїѧ́лъ є҆сѝ тридне́вное, да на́съ свободи́ши страсте́й, животѐ и҆ воскрⷭ҇нїе на́ше, гдⷭ҇и сла́ва тебѣ̀.
Конда́къ:
Воскр҃съ и҆з̾ гро́ба, ᲂу҆ме́ршыѧ воздви́глъ є҆сѝ, и҆ а҆да́ма воскр҃си́лъ є҆сѝ, и҆ є҆́ѵа ликꙋ́етъ во твое́мъ воскрⷭ҇нїи, и҆ мїрсті́и концы̀ торжествꙋ́ютъ, є҆́же и҆з̾ ме́ртвыхъ воста́нїемъ твои́мъ, многомлⷭ҇тиве.
 This is a translation and has a separate copyright status from the original text. The license for the translation applies to this edition only.
| ||||
| Original: |
| |||
| Translation: |
| |||
