Правосла́вный мл҃твосло́въ/Тропарѝ и҆ кондакѝ всеѧ̀ седми́цы

А҆́ще бꙋ́кви непра́вилнѣ зрѧ́тсѧ, грѧдѝ сѣ́мо, да грамматоси́ры є҆́млеши.

←Тропарѝ и҆ кондакѝ воскрⷭ҇ны

Правосла́вный мл҃твосло́въ Тропарѝ и҆ кондакѝ всеѧ̀ седми́цы

Тропарѝ, кондакѝ, задосто́йники и҆ вєлича̑нїѧ дванадесѧ́тыхъ пра́здникѡвъ→

This page contains Church Slavonic text. Without proper font support, you may see question marks, boxes, or other symbols instead of letters and diacritics. Click here to download required fonts.

Тропарѝ и҆ кондакѝ

всеѧ̀ седми́цы.

Въ недѣ́лю ве́чера и҆ въ понедѣ́льникъ ᲂу҆́тра,
нбⷭ҇нымъ чинѡ́мъ безплѡ́тнымъ.

Тропа́рь, гла́съ д҃:

Нбⷭ҇ныхъ во́инствъ а҆рхїстрати́зи, мо́лимъ ва́съ при́снѡ мы̀ недосто́йнїи, да ва́шими мл҃твами ѡ҆градитѐ на́съ кро́вомъ кри́лъ невеще́ственныѧ ва́шеѧ сла́вы, сохранѧ́юще на́съ припа́дающихъ прилѣ́жнѡ, и҆ вопїю́щихъ: ѿ бѣ́дъ и҆зба́вите на́съ, ꙗ҆́кѡ чинонача̑льницы вы́шнихъ си́лъ.

Конда́къ, гла́съ в҃:

А҆рхїстрати́зи бж҃їи, слꙋжи́телїе бжⷭ҇твенныѧ сла́вы, а҆́гг҃лѡвъ нача̑льницы, и҆ человѣ́кѡмъ наста̑вницы, поле́зное на́мъ проси́те, и҆ ве́лїю млⷭ҇ть, ꙗ҆́кѡ безпло́тныхъ а҆рхїстрати́зи.

Въ понедѣ́льникъ ве́чера и҆ во вто́рникъ ᲂу҆́тра,
прⷪ҇ро́кꙋ і҆ѡа́ннꙋ прⷣте́чи.

Тропа́рь, гла́съ в҃:

Па́мѧть првⷣнагѡ съ похвала́ми, тебѣ́ же довлѣ́етъ свидѣ́тельство гдⷭ҇не, прⷣте́че: показа́лъ бо сѧ є҆сѝ вои́стиннꙋ и҆ прⷪ҇ро́кѡвъ чⷭ҇тнѣ́йшїй, ꙗ҆́кѡ и҆ въ стрꙋѧ́хъ крⷭ҇ти́ти сподо́билсѧ є҆сѝ проповѣ́даннаго. Тѣ́мже за и҆́стинꙋ пострада́въ ра́дꙋѧсѧ, бл҃говѣсти́лъ є҆сѝ и҆ сꙋ́щымъ во а҆́дѣ бг҃а ꙗ҆́вльшагосѧ пло́тїю, взе́млющаго грѣ́хъ мі́ра, и҆ подаю́щаго на́мъ ве́лїю млⷭ҇ть.

Конда́къ, гла́съ то́йже:

Прⷪ҇ро́че бж҃їй, и҆ прⷣте́че бл҃года́ти, главꙋ̀ твою̀ ꙗ҆́кѡ ши́покъ сщ҃е́ннѣйшїй ѿ землѝ ѡ҆брѣ́тше, и҆сцѣлє́нїѧ всегда̀ прїе́млемъ: и҆́бо па́ки ꙗ҆́коже пре́жде въ мі́рѣ проповѣ́дꙋеши покаѧ́нїе.

Во вто́рникъ ве́чера и҆ въ сре́дꙋ ᲂу҆́тра,
чⷭ҇тно́мꙋ крⷭ҇тꙋ̀.

Тропа́рь, гла́съ а҃:

Сп҃сѝ, гдⷭ҇и, лю́ди твоѧ̑, и҆ бл҃гословѝ достоѧ́нїе твоѐ, побѣ̑ды правосла̑внымъ хрⷭ҇тїа́нѡмъ на сопроти̑вныѧ да́рꙋѧ, и҆ твоѐ сохранѧ́ѧ крⷭ҇то́мъ твои́мъ жи́тельство.

Конда́къ, гла́съ д҃:

Вознесы́йсѧ на крⷭ҇тъ во́лею, тезоимени́томꙋ твоемꙋ̀ но́вомꙋ жи́тельствꙋ, щедрѡ́ты твоѧ̑ да́рꙋй хрⷭ҇тѐ бж҃е, возвеселѝ на́съ си́лою твое́ю, побѣ̑ды даѧ̀ на́мъ на сопоста́ты, посо́бїе и҆мꙋ́щымъ твоѐ ѻ҆рꙋ́жїе ми́ра, непобѣди́мꙋю побѣ́дꙋ.

Въ сре́дꙋ ве́чера и҆ въ четверто́къ ᲂу҆́тра,
а҆пⷭ҇лѡмъ, и҆ ст҃и́телю нїкола́ю.

Тропа́рь а҆пⷭ҇лѡмъ, гла́съ г҃:

А҆пⷭ҇ли ст҃і́и, моли́те млⷭ҇тиваго бг҃а, да прегрѣше́нїй ѡ҆ставле́нїе пода́стъ дꙋша́мъ на́шымъ.

Тропа́рь ст҃и́телю нїкола́ю, гла́съ д҃:

Пра́вило вѣ́ры, и҆ ѡ҆́бразъ кро́тости, воздержа́нїѧ ᲂу҆чи́телѧ, ꙗ҆ви́ тѧ ста́дꙋ твоемꙋ̀, ꙗ҆́же веще́й и҆́стина: сегѡ̀ ра́ди стѧжа́лъ є҆сѝ смире́нїемъ высѡ́каѧ, нището́ю бога̑таѧ. Ѻ҆́тче сщ҃еннонача́льниче нїко́лае, молѝ хрⷭ҇та̀ бг҃а, сп҃сти́сѧ дꙋша́мъ на́шымъ.

Конда́къ а҆пⷭ҇лѡмъ, гла́съ в҃:

Твє́рдыѧ и҆ бг҃овѣща̑нныѧ проповѣ́датели, ве́рхъ ᲂу҆ч҃нкъ твои́хъ гдⷭ҇и, прїѧ́лъ є҆сѝ въ наслажде́нїе бл҃ги́хъ твои́хъ и҆ поко́й: болѣ̑зни бо ѻ҆́нѣхъ, и҆ сме́рть прїѧ́лъ є҆сѝ па́че всѧ́кагѡ всепло́дїѧ, є҆ди́не свѣ́дый сердє́чнаѧ.

Конда́къ ст҃и́телю нїкола́ю, гла́съ г҃:

Въ мѵ́рѣхъ, ст҃е, сщ҃еннодѣ́йствитель показа́лсѧ є҆сѝ, хрⷭ҇то́во бо, прпⷣбне, є҆ѵⷢ҇лїе и҆спо́лнивъ: положи́лъ є҆сѝ дꙋ́шꙋ твою̀ ѡ҆ лю́дехъ твои́хъ, и҆ сп҃слъ є҆сѝ непови̑нныѧ ѿ сме́рти. Сегѡ̀ ра́ди ѡ҆ст҃и́лсѧ є҆сѝ, ꙗ҆́кѡ вели́кїй таи́нникъ бж҃їѧ бл҃года́ти.

Въ четверто́къ ве́чера и҆ въ пѧто́къ ᲂу҆́тра,
чⷭ҇тно́мꙋ крⷭ҇тꙋ̀.

Тропа́рь, гла́съ а҃:

Сп҃сѝ, гдⷭ҇и, лю́ди твоѧ̑, и҆ бл҃гословѝ достоѧ́нїе твоѐ, побѣ̑ды правосла̑внымъ хрⷭ҇тїа́нѡмъ на сопроти̑вныѧ да́рꙋѧ, и҆ твоѐ сохранѧ́ѧ крⷭ҇то́мъ твои́мъ жи́тельство.

Конда́къ, гла́съ д҃:

Вознесы́йсѧ на крⷭ҇тъ во́лею, тезоимени́томꙋ твоемꙋ̀ но́вомꙋ жи́тельствꙋ, щедрѡ́ты твоѧ̑ да́рꙋй хрⷭ҇тѐ бж҃е, возвеселѝ на́съ си́лою твое́ю, побѣ̑ды даѧ̀ на́мъ на сопоста́ты, посо́бїе и҆мꙋ́щымъ твоѐ ѻ҆рꙋ́жїе ми́ра, непобѣди́мꙋю побѣ́дꙋ.

Въ пѧто́къ ве́чера и҆ въ сꙋббѡ́тꙋ ᲂу҆́тра,
всѣ̑мъ ст҃ы̑мъ, и҆ за ᲂу҆поко́й.

Тропа́рь ст҃ы̑мъ, гла́съ в҃:

А҆пⷭ҇ли, мч҃нцы и҆ прⷪ҇ро́цы, ст҃и́телїе, прпⷣбнїи и҆ првⷣнїи, до́брѣ по́двигъ соверши́вшїи, и҆ вѣ́рꙋ соблю́дшїи, дерзнове́нїе и҆мꙋ́ще ко сп҃сꙋ, ѡ҆ на́съ того̀ ꙗ҆́кѡ бл҃га моли́те сп҃сти́сѧ, мо́лимсѧ, дꙋша́мъ на́шымъ.

Дрꙋгі́й за ᲂу҆поко́й, гла́съ то́йже:

Помѧнѝ гдⷭ҇и, ꙗ҆́кѡ бл҃гъ, рабы̑ твоѧ̑, и҆ є҆ли̑ка въ житїѝ согрѣши́ша, простѝ: никто́же бо безгрѣ́шенъ, то́кмѡ ты̀ могі́й и҆ преста́влєннымъ да́ти поко́й.

Конда́къ, гла́съ и҃:

Со ст҃ы́ми ᲂу҆поко́й хрⷭ҇тѐ дꙋ́шы ра̑бъ твои́хъ, и҆дѣ́же нѣ́сть болѣ́знь, ни печа́ль, ни воздыха́нїе, но жи́знь безконе́чнаѧ.

Мч҃нченъ, гла́съ то́йже:

Ꙗ҆́кѡ нача́тки є҆стества̀, насади́телю тва́ри, вселе́ннаѧ прино́ситъ тѝ гдⷭ҇и бг҃онѡ́сныѧ мч҃нки: тѣ́хъ мл҃твами въ ми́рѣ глꙋбо́цѣ, цр҃ковь твою̀, жи́тельство твоѐ бцⷣею соблюдѝ, многомлⷭ҇тиве.

This is a translation and has a separate copyright status from the original text. The license for the translation applies to this edition only.
Original:
Translation: