Святое Евангелие (эрзянь)/В/Лукань/13

[ 186 ]

Глава 13.

¹Се шкастонть састь та-кить да ёвтасть Тензэ Галилеень ломатьнеде, конатьнень верест Пилат човоризе жертваст верь маро. ²Тень карчо Іисус мерьсь тенст: арситядо-ли тынь, што неть Галилейтне весе Галилейтнеде пежетевть ульнесть, секс сынь истя кулость? ³Арась, мерян теҥк; пежетеҥк а кадсыҥкдеряй, весе истя ёматадо. ⁴Или, арситядо-ли, што сеть кемьгавксово ломатьне, конатьнень лаҥгс саворьсь Силоамонь башнясь да маштынзе, весе Іерусалимсэ эрицятьнеде пежетевть ульнесть? ⁵Арась, мерян теҥк: пежетеҥк а кадсыҥкдеряй, весе истя ёматадо. ⁶Мейле ёвтызе те притчанть: Ве ломанень виноградниксэнзэ ульнесь озавтось смокомницязо. Сась сон лаҥгстонзо умарень вешнеме; да эзь муйть. ⁷Да мерьсь виноградникень ваныцястень: вана мон колмоце іе сакшнан те смоковницянть лаҥгсто умарень вешнеме, да а мукшнан; керикь сонзэ; мезень кис сон стяко мода кирьди. ⁸А се мерьсь каршонзо: азором! кадык сонзо те іестень-гак; мон чувса сонзэ юрзо да навоснэ валяса. ⁹А канды ли умарьть; сестэ-як а кандыньдеряй, сы іестэ керясак сонзэ.

[ 187 ] ¹⁰Субута чине Сон тонавтсь ве синагогатьнень эснэ. ¹¹Тосо ульнесь ава, кона кемьгавксово іе амазынь колавцо сэредсь, сон ульнесь кичкерьгадозь, да видьстэ-як а аштевиль. ¹²Іисус, сонзэ неезь терьдизе, да мерьсь тензэ: ава, тон меньстезят ормадот, ¹³да путынзе лаҥгозонзо кедензэ: авась сеск видемсь, да кармась Пазонть шнамо. ¹⁴Синагогань прявтось, кежіявтозь, мейсь Іисус субута чине (ломаньсть) віемтизе, мерьсь народстень: улить тевень теемс кото чить, сетьнестэ пряҥк віемтлеме-як сакшнодо, а аволь субута чине. ¹⁵Іисус каршонзо мерьсь: Эх лицемер! эрьва ки тыҥк ютксто ара а укстьсазо субута чине очксто буканзо, или осёлонзо да а ветясазо симдеме? ¹⁶А те Авраамонь тейтерьсть, конань вана кемгавксово іе уж, кода сюлмсизе амазысь, ава аволь эрявт субута чине нолдамс не сюлмсевкснэде? ¹⁷Нень кортамсто весе каршонзо молицятьне визделгатьсьть, а весе народсь радувакшнось Сонзэ весе паро тевенстэнь.

¹⁸Мерьсь Сон: мезе ёнов моли Пазонь Инязорокс чись? Мезе вакс сонзэ ладяса? ¹⁹Сон моли горчицянь видсьть ёнов, конатань саизе ломань да видизе эсь садозонзо. Сон кайсь да теевсь покш чувтокс, менелень нармутьне-як кекшневсть тарад потмозонзо. ²⁰Таго мерьсь: Мезе ёнов ладяса Пазонь Инязорокс чинть? ²¹Сон моли чапавтума ёнов, конань саизе ве ава, да каизе колмо оҥкст почт юткс, весемест чапаськадмозост. ²²Сон тонавтозь ютась ошнэва да велетьнева, кинзэ Іерусалим ёнов кирьдезь. ²³Ве ломань мерьсь [ 188 ]Тензэ: Господи! ара аламо идевицятнеде? Сон мерьсь тенст: ²⁴Правтодо теине ортаванть совамс; мерян теҥк: ламо вешнить совамс да а совавить. ²⁵Знярдо куд-азорось сти да кеҥкшензэ пекстасынзе, тынь карматадо ушосо аштеме да, кеҥкшентень зэрьказь, кортамо: Господи, Господи! панчт тенек; а сон мери каршозоҥк: а содатадызь костоньдядо. ²⁶Сестэ карматадо кортамо: минь тонть икеле ярслинек да симнинек, минек ульця ютксоно-как Тон тонавтыть. ²⁷А сон мери: мерян теҥк, а содатадызь костоньдядо, туеде вакстон, весе а паронь теицятне. ²⁸Ули тосо авардима да пейень чикордома, кода нейсыҥк Пазонь Инязорокс чистэнть Авраамонь, Исааконь, Іаковонь, да весе пророкнэнь, а тыньсиҥк ушов паньманть. ²⁹Сыть чинь лисьма ёндо, чинь валгума ёндо, пеле ве ёндо да обед ёндо, да Пазонь Инязорокс чистень совить. ³⁰Вана, конат ульнесть меелькст, сетне улить васеньцекст, а конат ульнесть васенькст, сетне улить меельксэст.

³¹Се чистэнть састь конат конат фарисейтьне да мерьсть Тензэ: листь да тук тестэ, ведь Ирод Тонть маштомот арьси. ³²Сон мерьсь тенст: азьдо, ёвтадо се ривеськестень: вана чече да ванды (аньсяк) амазытьнесэ паньсян да орматьнесэ пичкавтлян, а колмоце чистэ прятсынь. ³³Истя улезь-гак Монень эряви чече-як, да ванды-як да вандыде мейле чистэнть-как якамс: ведь а эри, штобу пророк косо-як Іерусалимде башка куловоль. ³⁴Іерусалим! Іерусалим! пророкнэнь машлиця да тенть кучозетнень кевсэ чавныця! зняро раст Монь [ 189 ]мелем ульнесь пурнамс тонть эйкакшот, кода клукницька пурнакшносынзе эсь левксэнзэ сёлнонзо алов да мелеҥк арасель. ³⁵Вана кадови теҥк кудоҥк чавосто. Мерян теҥк: а нейсамизь Монь се шкастень, знярдо серьгедтядо: баславазь Пазонь лемс сыцясь!