Священная история Ветхого завета (мокшень)/О/27
27. Моисейти Шкайть купинаса тихтедемац.
Весть Моисейсь учанзон мархта тусь ичкози шава паксяв. Тяса сон Хорив пандть лангста няйсь толса палы каль-нал, конац палсь, а толсь эзонза ашезь педенде. Моисейсь тя чудать ванома ёралексоль шаштомс сяда малав. Аньцек Моисейсь ушедсь шаштома, Шкайсь толть потмоста пъшкядсь: Моисей, Моисей! тят шашне се, тя вастсь святой, васенда юксонт, сальде шаштт. Моисейсь юксондсь дъ шаштсь. Шкайсь мярьгсь теенза: Мон Авраамть, Исаакть, Иаковть Шкайснан. Мон няйса Египетса народозень мучениянц: арт Фараонти дъ лихтьк народозень Египетста. Моисейсь мярьгсь: а къда кизефтсамазь, кие монь кучемань, эста мезь корхтан? Шкайсь мярьгсь: а тон мярьк: кучемань монь минь аляньконь Шкайсна. Моисейсь мярьгсь: а къда синь монь аф кулхцондсамазь? Эста Шкайсь кизефтезе сонь: мезь тонь кядьсот, ёрдак сонь мастору. Моисейсь ёрдазе байдеконц мастору, байдекоц арась оцю куйкс. Моисейсь эводсь куйть эзда дъ тулексоль ласькозь. Шкайсь мярьгсь теенза: сявк сонь пулода. Моисейсь сявозе куйть пулода, куйсь тага тиевсь байдекокс. Сальде Шкайсь мярьгсь теенза кяденц повозонза путомда дъ эстокиге меки таргамда. Кядец сярятькстсь проказаса. Шкайсь танга мярьгсь кяденц повозонза путомда: повозонза путомда меле, кядец тага пъчкясь.
Тяда меле Шкайсь мярьгсь Моисейти: арт няфтить Фараонти ня чудатнень, сон нолдасы народозень; къда тяда меле аф нолдасы, няфтть теенза нинге фкя чуда: сяфт Нилста ведь, пяяртк масторть лангс, ведсь эстокиге арай вяркс. Моисейсь тяда меленге атказакшнесь; сон мярьгсь Шкайти: мон пяле-кялян. Шкайсь мярьгсь: ки лангса тон васьфтсак эсь братцень, Ааронть, сявк сонь мархтот, сон вастозт корхтай Фараонти дъ ломатненди. Тяда меле Моисейсь тусь.