Тесэ ды тосо (2013)/Ламбамо нартемкс/1
[181]
| Алтави Марюшнень |
| ЛАМБАМО НАРТЕМКС |
| Келей ёвтнема |
Виряз видемтизе нуемадонть каназкадозь рунгонзо ды, тарвазонть кедьстэнзэ апак нолда, варштась удалов — чивалгома ёнов. Чипаесь, якстере мокшнасонзо тандавтнезь, теке марто мизолдозь, ваннось эстензэ удома тарка. Чинь-чоп эльниця, сюронь певердиця вармась прядынзе тевензэ, меельцеде келейстэ лекстясь ды, якстере паргонть лангс ванозь, ношкстась та-ков оймсеме.
«Саты течис, шказо кудов, — кармавтозь мерсь эстензэ нуицясь, теезенть лангс ванозь. — Ловт, тедедень нуеманок изнявсть. Кадови сурось. А мезть «ловомс», эйстэнзэ аламо. Ванды кундама пултонь усксеме. Истя вана: ве тевенть прядсак, ушодт омбоце, мельганзо, а стака редямс, чии лия».
Уманть трокс-келес ветень-ветень аравтнезь товсюронь пулттнэ, прок сырнень кудынеть, кецневтсть сельмть. Кизэсь летькель ды лембель. Менелесь видицянть мелензэ витизе. Товсюронь стака прятне пулттнэстэ нурьгезь нурьгсть. Эрьва копонястонть таргавсь сундерьёнксонь сулеень сэнь кувака леха. Качадсь кенерезь сюронь, олгонь ды модань чинесэ. Овсе а умок Пиргужонь умаст копачазель ожо тюссо, варма шкасто лымбиця велькссэ, ней сон неявсь кудопотмокс, конань азоронзо анокстызь курмост-кармост васоло эрямо таркав туемстэ.
[182] Виряз атя, панар ожасо ливезев чаманзо нардтнезь, апак капша ютась тарвазонзо марто ума пес, ярсамо-симема таркинезэнзэ; комась, ведьмеде кепедизе чаво, эйсэнзэ кедьгеденть калдордыця пешторонзо ды каизе лавтовонзо трокс. Меельцеде оймень витезь варштась ваньксстэ нуезь, прок наразь, уманть лангс, нолажтсь кельпрястонзо «окойники» валось, ды сыргась уматнень юткова яннэванть покш кинть ёнов.
Молема талай. Колмо вайгельпеде ламо. Онкстнемстэст шкась юты байтяк. Ськамот улемстэ прясонть сюлмавить-чачить ды текекс ёмить эрьва кодат арсемат. Удемесь ансяк веть оймси эйстэст. Лиясто те шкастонтькак таркас-эземс а пракшныть. Седеесь мейсэяк пицеви, сови эйзэнзэ ризкс-мелявкс, вень перть сави велявтнемс, керш боканть лангс мадемс, витенть... Верень пиди арсематнеде весь маряви кувакадояк кувака чопода пингекс — калавтат, калавтат киренть, пе тензэ а неяви.
«Сисем иеть уш, сисем... Арась, аволь «уш», — велясть, лытасть, сиземань апак сода, Вирязонь превсэ ледстнематне. — Пинге, маряви, кода туинь эсь кудостон, туинь, виде, эйкакшон кастомадост мейле, ловт, сыречисэнь. Кирдевсь мельсэнь вейке: муян сэтьме, вейкень-вейкень марязь-чарькодезь эрямо, а карман марямо эрьва чистэ покордамонь валт, сёвномат, рангомат монськак а содан мезень кис. Мартон свал эрясь: туемс, туемс оймень лембевтеме те эрямостонть, куш куломадон икеле меельце иетнень эрямс ломанькс, валдо эрямосо. Кеминь...»
Неень эрямосонть ды ютазь иетнесэ сокарязь, мельтнень тей-тов кайсезь, нуемстэ сыцясь эзизе редяяк кинть кувалмонзо; кепедизе вановтонзо — икелензэ кудозо.
Панжизе кузтемпень кенкшенть. Каршонзо, эль эзть эртеве, — Элюва, эриця ялгазо. Виряз сонськак а соды, кода тензэ меремс ды кикс сонзэ ловомс: ялга, ни? Аванть кедьсэ ведра — сыргась кудост икеле лисьмантень ведьс.
— Мекс чавонь кедть?! Куш пултке кандовлить! Мезеяк а теи монтемень, мезеяк тензэ а эряви, ансяк мон, мон эрьва тевентень кундазан... — мотордозь, капшазь тусь лисьманть ёнов.
[183] Марязденть Виряз атянь теке стака мокшнасо лоштизь коня ланга, шик-шик — марявсь пштикс седейсэнзэ. «Туян, туян, саты, зняро кирдемс, паро вал пельдензэ а марят...» — ютасть превганзо валтнэ, аванть мельга серьгедсь:
— Мезекс теть пултось?! Ванды лишмесэ усксесынек!
Элюва, кудазоравась, — ёлганя, сэрьс аволь сэрей ломань, коськана рунго. Сыречинь сормсевкстнэ чаманзо пек эзизь нарьга. Кодгемень иеть тензэ а максат. Мейсэ, кодамо толнэсэ сисем иеде икеле эждекшнизе эседензэ седе сыре «пулттомо сыцянть»? Паряк, мизолксозо ды ашо кумбря мазый пеензэ кецневтекшнизь седеензэ? Эли, паряк, сэняжа сельмензэ? Ней уш сонськак атясь тень а ёвтасы — шкадонть оно зяро ютась. Эждекшнизе, эли лия кодамояк сюлмо ульнесь, ледстик ней азё. Эрямосонть мезть а эрсить.
Элювань лангсо мазыйстэ кемельдязь покай. Пулай карксни ансяк покшчистэ ды тейтерень чиявтомо молемстэ. «Вельть стака монь сталмом коряс», — яла пеедькшнезь мери кевкстницятненень эсь прянь идемга. Покшчикс, ваньксстэ оршнемстэ мель явсь пангонтень — аламнеде сэрейгавтсь рунгонзо. Пилысэнзэ ней карть. Прясонзо, пангонь таркас, конякакс сюлмазь ашо паця.
Виряз атя ацирьгалезь юхадсь кедьсэнзэ ведьс молицянть мельга ды эрязасто эскелязь совась кудыкелев. Озась кенкшенть вакссо эземнентень, юксинзе пильгензэ, карензэ-пракстанзо путынзе аксялов. Кепе ютась удало кудов. Ёрвалдызе, потолокс понгавтозь ведрастонть ведень амолязь, ливезев-сэксэв чаманзо, кирьганзо. Нардась. Ютась каштомикелев ды чошк таргизе каштомсто ям марто чакшонть.
Совась «кудонь прявтось».
— Тон васня лишметнень лангс варштавлить — ули-арась мезеяк икелест. Мейле уш тонсь... — пшкадсь каштомикеле чарыцянтень.
— Юртай кильд тнинзе. Каня мезеяк тенст эзь кая? — машнетезь кевкстизе ведра марто совицянть паксясто сыцясь.
— Юртай, Юртай... А содат сонзэ кирьгапарде? Сась чикуншкава. Чарькодеви — симезь. Пания, — пештинзе стена юткотнень цийниця човине вайгельсэнзэ Элюва.
— Эли тон, атя, превстэ лисить? Сядоксть теть мернинь: а симицянтень пандт целковой, симагаесь трёшникентеньгак кеци. Чарькодить? Ко-осто... Варштак эно лишметнень лангс... — седе чевтинестэ, прок арасельтькак ёвтазь казямо валт, чольдердсь Вишкайнянь, кода велесэнть ламот сельме удалга мерить Элюванень, гайгиця пшти вайгелезэ. Аволь эрьванть сатыть виензэ теемс прянть сонзэ а марицякс.
Элюва кундась стуворонь анокстамо, полазо-ялгазо тонгсь кардазонь кузтемпестэ полда видьга керязь кедень ташто кемть ды пилысэнзэ чошкаезь ютась Вишкайнянь валонзо топавтомо.
«Зяроцеде мон туян те ёзнэнть эйстэ... Пе сакшны, куш килькш каяк кирьгазот! Яла туян, туян... Вант, таго потан, таго таркастон а сыргаван. Кодамо вий кирди — монсь а содан. Сон, бешоконь, алкукскак, колдовимим. «Эждинзеть», — яла кортыть. А содан, а содан, авань седеесь чопода. Пазоськак а соды, кодат прякат ды кинень паневить тосо. Ансяк пинекс ирнэсь лангозон, пулт тензэ, ванодояк, сявдикс лангсо эряволь кандомс, ней уш цёковокс цёкорды. Кургоськак мизолкстонть а пекстави. Тук азё... Истя меревлинь: авась — поптнень пазаваст, ве ёнкссонзо паз артозь, омбоце ёнкссонзо — идемевсь».
Эсь мелявксонзо марто, седей ёжонь колазь, валгсь Элювань ялгазо-полазо кардазс, совась кардос, варштась очкотнес — Пинеме каязель сатышка, вадяшизе Тештине пичкавтозь айгоронть, тошказь, прок вечкемадо, ёвтась колмо-ниле валт Варманень ды лиссь пельсчопода кардостонть.
Паникудонь стуворось полавтовсь, мазылгавтызь сонзэ церепкань вакансо сывель ям, чапамо ловсо, ловсос пидезь модарькат. Вакашкесэ — рошксень печтть. Ямстонть судоварятнес эцесь тантей, кутькиця чине. Истямо качадокшны ансяк каштомсо пидезь ды тосо кувать кирдезь ямсто. А стяко, лисни, кой-кува тензэ мерить «велень ям». Танте-е-ей, секень вант, келетькак нильсак.
— Озак, — окойники тердизе столь экшс азоравась.
— Ярсак.
— Ярсан, — икеле ладсо пеедькшнезь ёвтызе валонть кудонь кирдиесь пенчень ды кшинь саемстэ.
— Ярсамсто чартьчинь содыця ломантне келест а невтнить. Ярсамсто болдордомась лезэ а канды. Содат? — превть макссь мирдензэ каваницясь.
— Содан. Тонь весе?
— Весе.
— Ней совак икеле кудос. Поладса ярсамом чатьмонезь. Мелеть коряс, — кургсонзо чевелязь, мизолксонь пачк мерсь Виряз каршонзо стядо аштиця нинстэнь. Лиссь аймельгадомань тев: Элюва топавтызе атянзо меленть — вал эзь правто, кадызе ськамонзо. Чуросто истя эрси, чуросто.
Прядовсь ярсамонь кирдась. Пенчтне-вакантнэ, шлямодост-нардтнемадост мейле, путнезельть таркаваст. Стуворось нардтнезель. Кавонькирда. «Ней мезе, атя? Оймсеме? Одирьванть ваксс?.. Течи аволь аламо теезь. Ванды таго чи ули. Пиземе илязо туе. Вана мезде, атя, пельть. Кеман, а туи. Чизэ валгсь манейстэ, теке каштомсо тол якстердсь...»
Совась пешксе пеке атя кудонть ванькс пельксэзэнзэ. Низэ уш таркасоль. Тодовось прянзо ало чачк мендязь, седе сэрей улезэ. Вечкеви тензэ истя.
— Я! Ёвтыка, кодат кулят туить паксясто? — ансяк Виряз пекстызе мельганзо кенкшенть, гайгезевсь Элювань вайгелезэ.
— Паксянь, кодат лият... Товсюронь умась прядовсь. Копонятне теке лагоря ават пезнавтнезь. Ванат вановлить. Эрьва пултось — пондо. Сэрьскак меште малава. Истямо менть, истямо норов умок арасель...
— Ва, иля уле сезьганокс, иля чикордо. Сёксесь кадык валонзо ёвтасы, — каясь трокс вал, кардызе мирдензэ Элюва.
— Те истя, дугай, — ве мельс прамга мерсь панаронзо каямсто Виряз. — Седеем аламнеде а таркасонзо. Содат, [186] Нороваванень апак нуе панкске эзинь кадо. Кода истя лиссь?..
— Ризнэмс а мезть, суронть урядамсто панкске кадтано. Норовавань каванямо, эно кода... Шабратнень ламо кадовсть нуемкаст?
— Тон жо улкоть тосолить.
— Се улкоть...
«Одсто, ловт, ведьгеменьшка иесэ, марявсь тень: кинень кодгеменде ламо, зяро ней эстень, сеть а вечкить, а талнокшныть, а кулелить. Арсекшнинь: пе, кодамояк ава истямо цёранть верензэ а кирвазтьсы, весе, прядовсь паломапелезэ. Ильвелинь. Тевесь лиякс ашти, лиякс. Одолинь, а содылинь, кодат чадыведть лиясто лажныть сыретнень мештесэ...» — неть арсематнень марто Виряз кайсесь, путынзе оршамопелензэ коникенть песэ табуретэнть лангс ды чопавтсь нинзэ ваксс.
— Кавто чис мезеяк пек эзь полавтово.
— Тон вандынь чиденть арсят-арась? — яла исковась Элюва.
— Эно кода! Кеман, лиси тевенек.
— Ломанть эрявить.
— Эно кода, — мерсь Виряз ды нежедизе прянзо нинзэ лавтовс, конинзе сельмензэ.
Удоманть учомс эзь саво.