Тесэ ды тосо (2013)/Ламбамо нартемкс/2
[186]
— 2 —
Валскень чопода. Виряз атя ды Элюва уш пильге лангсольть: арсесть сявордомс покш ды шкастонзо теемань мелявкс — усксемс паксясто нуезь сюронть тингелангс, вачкамс пулттнэнь одонияс. Туиндеряй пиземе, ментеть пелензэ, мерть, ёмавтсак. Теде башка, сави теемс ламо верьга-ланга тевть.
Азоравась васня потявтынзе скалонзо. Ней кундась каштомикельксэнь тевезэнзэ. Ватксесь модарькат. Тедедень. Куроккестэ «лапшакс» керсинзе пачалгс, чулгсь лангозост колмо алт, почодынзе салсо ды путынзе рестамо.
[187] Те — валскень ярсамопель. Чикуншкантень модарькатнеде ватксема седе ламо. Зяро иляст уле, те тевеськак теезь. Керсинзе ды — пакшс. Каясь тозонь ловсо, аламошка велькс, сал, тавадызе кшнинь пачалгсо. Шкань ютазь те пакшонть путома явазь каштомс. Явавтоманть учомга анокстась ям. Сывелень, мезесь велесэ те шкава, умарьковонь куншкава, эрси чуросто.
Сеедьстэ цёраломантнень кургсто истят кортамот марсевить: «Тынь, аватне, чинь-чоп кудосо лужалетядо. Мезде тенк сиземс, паряк, чакштнеде-чугунтнэде?.. Минь вана, паксянь кирдийтне...». Содавольтькак самай неть «кирдийтне», зяро вийть, нарде, «неврат», кода кортыть Эрьмезьвелесэ, эрявить кавксо-кемень кургонень ямонь, ансяк ямонь пидемантень! Сестэ, содазь, авольть карма прянь шнамо-лавгамо, «минь» сеерицятне келест нилевлизь.
Элюва течи пиди-пани ветенень. Малав свал — ансяк эстест. Ялатеке содасы ярсамопелень анокстамонть, кудоюткова-кардазга лиеманть «танстензэ». Пенчтнень-вакантнэнь шлямост-нардамост ансяк мезе ашти: калдордат, калдордат эйсэст. Чакштнеде-чугунтнэде кортамскак а мезть. А кенерят андомо веенстнэнь — кирьгапарест раздить, вешить лиятне. Скалт, реветь... Весе рангить: эрь монень васня. Весень андт. Ансяк кенерть, вишка Элюва, топавтомо мелест. Ды кенери: чары-нерьги кизна чоподасто чоподас, тельня — чоподаваяк. Теке штере вели. Текеде, секень вант, теевськак нимилявнекс — алкине, човине, коськана. Оршневельгак цёракс, меревлить — икелеть цёрыне. Мейсэ ансяк оймезэ кирдеви? Ды теке басом мейсэ ансяк мунизе-колдовизе, кудозонзо ветизе сыре Вирязонь?
Кудозо Пиргужонь Элювань якстере кирьпецень. Велесэнть истятнэде ансяк кавто. Икельть-удалт. Вельтязь лазсо — истятнэдеяк аламо. Ловт, весе велесь эри олгонь лато ало. Кой-кинь, виде, кудост вельтязь розень чуказь пултсо. Латонть ланга, ладсемадост мейле, валови тусто сёвонь ведь. Пиргужонь икельга ютамсто ламот кепсить лавтовост эли чаравтыть пряст: «Кудотненень кудо! Те кинь истямось?». Кудось сельме икеле — эрьванень неяви. Кода, [188] кодамо вийсэ, кодамо превсэ путозь — соды ансяк путыцязо. А лисят жо, алкукскак, велекуншкас, а кармат чинек-венек рангомо — прянь идеме, косто саить ярмактнень. Ёвтнемс чоподасто чоподас паксясо-кудосо ливезькалемадонть, чулксетиця кедтнеде-пильгетнеде? Стяко. Тень кияк а несы, а марясы, а чарькодьсы. Кудось вана...
Ялатеке кой-кить содасть, кодамо вийсэ лиссь, прок модапотсто, мазый, эрямс эрьва ёндо паро те кудось. Содасть: Вишкайня важодеме машты, прамозонзо тевензэ теи. Велесэнть истятнэде зярыя, аволь ськамонзо. Мекс кияк эзь путо кевень кудо? Васень мирдензэ пельде цёразо важоди ошсо покш начальникекс. Лездась. Авазояк аволь рукшна лопа, аволь олгонь ломань, эсензэнть а менстясы, вакска а юты. Машты ведьметнень кирдемеяк — ветямс тевенть тов, ков эряви, таргамс лезэ тосто, косто киненьгак а саеви. Мезеяк а мерят, Элюва авась превей, тевень теиця ды ёжов. Ансяк...
Виряз тупор-тапор оршнесь, ёрвалдызе-нардызе сакалов чаманзо, кудыкеле карсесь ды лиссь вальмалов.
Ашолгадсь. Чилисемась кирвазтизе качамовтомо тол-пандянзо. Коштсонть марявсь сёксень кодамо-бути тансть. Атякштне кецнесть од чинь самонтень ды граж вайгельсэст тердсть мартост кецнеме лиятненьгак. «Саты тенк човсемс кирьгапаренк, Тынтеменкак умок стинь, — ульнесь мелезэ кардамс жойсэ морыцятнень, — умок кецнян чинь чачомантень!» Те меленть марто лиссь ушов ды, сонськак а соды мекс, варштась васня Алопев, мейле — Верепев. «Кода эрят Эрьмезьвеле, кодамо ёжот? Кодат онт неить?» Аштесь-тейсь, шождасто лекстясь ды сыргась росадонть начко луганть ланга Урайнень. Кудост Пиргужтнеде ниле-вете кудонь ютазь, ушкс.
Комсешка иеде икеле путозь покш, пичень чапо кудонтень совамсто нулгодезевсь. А ютават. Кузтемпесь наксадсь, чиремсь, ков а варштат — рудаз ды шукшпрят, куш потомдык судот наксадомань ды куштамонь чинетнеде.
Тесэ эри Ураень Юртай.
Кудыкельганть пелезь ютазь, валскень якицясь совась [189] кудос. Стенатнесэ шпалертнэ нулныть, теке апак муське понгавтнезь муськемат. Кияксось мерят тенсть эзь некшнеяк. Голландка кургось потолокс сод потсо. Ансяк панжсак кенкшенть, вить ёно — коник. Эйсэнзэ «оймси» сонсь кудонть азорозо.
Мекс а велявтнить, куш аламос, тоначистэ? Ве сельмсэ куш варштавольть Урайтне, мезе лиссь кудост-чист, эйкакшост марто Тов туемадост мейле. Юртаень тетянзо-аванзо дошузольть. Оно кодамо кудо путокшность! Юртай соды, зяро вийть эрявсть стявтомстонзо, зяро чить-веть стомамосо ютавтозельть, якасть мельганзо, прок вишка Юртай мельга зярдо-бути. Каня совсесь превезэст: сисем тейтерде мейле муезь цёрынест пачтьсы юртост ёмамос? Васня ушоды эсь прянзо аламонь-аламонь ченькссэ ёмавтомо, мейле кадсы ёмамо кудонтькак. Азортомо кудось — а кудо. Превейстэ теить тоначинь эрицятне, теке содыть: варштындерят ормадо-сыречиде куломадот мейле икелень эрямозот, сави куломс омбоцеде — визькстэнть.
Вальма суликатне цийнить ды Дзинь-дзинь сорныть корномадонть. Лездыть тенст бизнэмасост эрьва покшолмань карвотне. Кудазоронть рудазов, кепе пильгензэ венстезь кониктенть кувакасто, эль эзизь пиря совамо тарканть. Васоньпеельтне допрок стувтызь алянть пильгекенжензэ ды чопода-тюжа сакалонзо.
— Юртай, стяк, саты теть удомат тетьксемс! — верьга вайгельть пшкадсь валске марто яксицясь ансяк панжизе стака кенкшенть.
Каршо — ко-р-р-р!..
— Мельгат сынь, марят-арась?! — серьгедсь седе пек Виряз ды, нулгодеманть изнязь, весть-кавксть ноцковтызе корныцянть пильгень покш сурдо.
Окойники марявсь бу-бу-бу моткодема ды дёготь раужо тюс, сэксэв тодовонть лангсто кепедевсь пондакш, апак судря пря. Улевельгак чопода-тюжа черензэ-сакалонзо мельга аламошка, мельде-валдо яксема, натой мельс туевельть. Ней вана...
— Мельган, мерят? Ух, содавлитькак, кода прям лоскаи. [190] Ух-ух, мезде чокшне глянкадинек, монськак а содан... — кортазевсь болдордозь, теке басом нолдынзе кияксос кепе пильгензэ ды, сельмензэ нардтнезь, стясь коникстэнть. — Учомак аламос. Васняяк, теня, витема лоскаеманть.
— Адя седе курок, теде тевесь а лотки.
— Тон азё, мон счас, мельгат, — алтась Юртай ведте пешксе ведрантень ютамсто. Амольдясь кече ды симизе лекстявксонь апак полавто. Мейле начтызе сакалов чаманзо.
Виряз лиссь овтонь пизэстэнть ванькс коштс, кона, марявсь, састыне-састыне чудсь маласо пиче вирьстэнть. Атясь кувакасто таргизе оймензэ ды марямга ёвтынзе арсеманзо:
— Эри, лемезэ, сисем тейтерде мейле муезь цёрынесь. Мезес пачколи, мерема, ломанесь...
Эрязасто, прок тензэ аволь кодгеменьгак, валгсь валскень якицясь кузтемпестэнть, лиссь куринканть юткова кинтень ды сыргась Верепев, Шорянь Олдайнень, Элювань аванзо ёндо васолдонь малавиксэнзэ туртов. Мольсь — кецнесь чилисемадо икелень вечкевикс экшентень.
Эрясь Олдай вишка кудынесэ. Ськамонзо. Мирденень эзь лисне. Мекс? Паряк, сонськак а соды. Лангс ваномс, авась кода ава: весемесь мартонзо, ули мезе лангс варштамс, мезе токшемс. Сэрейкс а ловсак, Элювадо алкинеяк а ули. Сонзэ коряс седе эчкела. Тюжала тюс чамазояк седе келей.
Кудосонзо кирдсь уряд. А паро чинеть, кода Ураень кедьсэ, эзть маряво. Прянзо лангс авась эзь пеняця. Вастызе сыцянть паро мельсэ. Пеедькшнезь. Ялатеке Элювань ёвтнемавтомояк редявсь — палыця веденть вечксы.
— Лездамо тердеметь сынь. Элюва патят учи. Паксясто пултонь усксеме арсетяно. Молеват? — шкань апак ёмавтне ёвтызе Виряз самонь тувталонзо.
— Мезть кевкстнят? Молян, кода а молян. Лездамс эряви, — валаня вайгельсэ пештизе кудонть пиже валскева якицянть икеле стядо аштиця авась.
— Паро, паро. Прядсынек пултонь усксеманть, тосо, вант, пивсэма шкаськак шашты, таго тевть, — икелень [191] тевтнеде арсезь, поладынзе валонзо лездыцянь вешницясь; теке басом чарькодизе: икелень тевтнеде ледстнемс аволь эряво, а мезть келенть олячис нолдтнемс.
— Мейле мезе, — сезизе янксемань мелензэ аванть вайгелезэ, — пивсэсынек, чей аволь васенцеде!
— Паро, паро, — валтнэнь таргсезь, арсезевезь мерсь Виряз.
Олдай икелев ютамо эзизе терде. Аштесть карадо-каршо каштлангс кузтеминенть вакссо. «Вай, илязо уле пежетекс, ды сон авинесь эйпаро: сэрьскак, келескак... Потензэ, потензэ кода лексить!.. Токшицяст-вадяшицяст вана арась», — ёндолкс ютась умок уш аволь од цёранть превга икелензэ аштиця, корязонзо байтяк од аванть лангс ваномсто.
— Эно истя, Олдай. Пурнак-сэрняк — ды миненек. Ярсатано-тейтяно — ды паксяв, — гайгиця вайгельсэ прядызе кортамонзо Виряз ды кутьмерьсэнзэ нежедезь панжизе удалонзо кенкшенть.
— Козонь ёмсить? Мекс истя кувать? Тон ансяк куломань тердеме кучнемат — сядо иеть карми ломанесь эрямо. Мезеяк теть ломанькс а тееви, мезеяк теть а эряви. Шказо несак зяро?! — вастызе полазо-ялгазо ламоксть морсезь моросонзо.
Виряз марикскак эзь тее.
Сисем иеть содамокс эрямонзо перть, икелень нинзэ ледстнезь, содась: педсемс сезьган пулотнень марто а мезть, тон — вал, сынь — кемень. А кардавить а превэ, а мейсэ лиясо. Те сынст вечкема сускомост: рангомс-пижнемс поласт лангс, ловомс сонзэ менчевиця кедьёнксокс. Малав эрьва авась бажи теемс мартонзо эрицянть сулеекс, истямокс, кодамо сонсь. Кортазо, яказо, пейдезэ, теезэ тевтнень... ансяк сонзэкс. Секскак а мезть ёмавтнемс валт, кадык тыжны. Псизэ юты — ойми.
Валонь таркас Виряз озыксэль стувор экшс. Эзь кенере.
— Пенчть-вакант таргак. Иля удо. Путт кавто цяркат. Ужо-ужо, аволь кавто — колмо. Нилецесь — стопка. Юртайнень. Цяркасонть кельпрязояк а начтови, — Элюва [192] сонсь кармавтсь, сонсь чарась-велясь каштомикеле. — Кши печкить? Совавтт кудыкельде, мусак чапакс очко алдо. Лыкак седе, лыкак, иля удо!
Зярс нить-полат эвтсть-анокстасть стувор, калдорк совась Юртай, мельганзо — учомс эзь саво — кеверезь кеверсь Олдай. Шкань апак таргсе озасть стувор экшс, ды цяркань вайгельтнеде мейле сеске калдордозевсть пенчтне.
Кода Пиргужт эзть бажа лисемс седе икеле, росав шкастонзо, эзть лисеве. Чипаесь уш теевсь азорокс, мельспаросо вансь кардазонь келей кенкшка лисицятнень лангс. Икеле крандазсонть — Элюва, омбоцесэнть ведьметнень кирди Юртай, вакссонзо — Олдай. Виряз атя пекстызе покш-келей, прок пейтеме панжадо курго, кенкшенть, капшазь ютась икельце крандазонтень, кузсь эйзэнзэ ды саинзе нинзэ кедьстэ ведьметнень. Аламнеде хропадизе эйсэст лишменть. Тона тусь ласьказь. Крандазось цярнозевсь.
— Сэтьместэ, сэтьместэ седе! — рангстась, лекстясь Вирязонь пилес Элюва, лекшкадсь лавтовзонзо. — Истя потмоткак лиси.
Ветицясь валгак эзь ёвта. Кирдсь ведьметнень. Тештинень кавто чить ковгак эзизь кильдтне, сон тошнакадсь олячинть кис ды правтсь ардомо.
— Саты, саты! — рангсь Элюва, цирнезь цирнесь аволь истя пелемадонть, кода мельспародонть. Паряк, умонь-умонь эйкакшпингезэ ледстявсь? Тетянзо марто паксяв-ков ардтнематне? Кополсо ардомадонть вадря, мелень витиця, марявкшнось тензэ, мезеяк арась.
Васолот, васов кадовсть пиже пакшань, эрямонтень совамонь сеть иетне. Тештинень тов а пурдасак. Пингень кись соды эсензэ, чии ансяк ве ёнов.
Эзь кадово юргозь-вешкезь ардыцятнеде омбоце улавоськак. Истямо ёжосо, кодамосо ульнесь Юртай стопканть «зэрневтемадо» ды тантей — секень вант, келеть нильсак — сывель ямдонть мейле, каня кадоват?! Чиськак паро ёжонтень лездась: маней, сэтьме, алтни седе тов, чикуншкава, псияк. Кодамо копорькай Юртай илязо уле, косо-бути васоло-васоло [193] потсонзо эрясь цёрань ёжо. Вакссонзо аштицясь, Олдай, паряк, валдомтызе эль липниця те ёнксонть.
Эзизь редяяк, кода лиссть велепес, ды икелест сравтовсь умань-умань явнозь Пиче паксясь. Сыре ломантнень ёвтнемаст коряс, умоктояк умок сонзэ таркасо ульнесь сэрей чопода вирь. Ледстнить ней сеть умонь, сувсо копачазь иетнеде ансяк кеменьшка а кутмордавиця, рашков эчке пичеть. Сынь кассть Пиргужтнень умадо пельвайгельпешкань тарка чивалгома ёно. Пачкодсть матразь шканть пачк неень шкантень истят куляткак: сеть пичетнень ало кезэрень калмазырь. Калмсесть тозонь Инешкипазнэнь озныцятнень. Сестэ «Кристосто», бачкатнеде, церьковатнеде эзть марсеяк. Сакшность тей, калмазыренть малас, озномо. Тесэль репештяст. Озность Инешкипазонтень. Пшкалесь тензэ озатясь велень весе эрицятнень пельде. Энялдсь сон: максозо Инешкипазось паронь паросо, сюронь сюросо, ванстозо ломантнень ды сынст ракшаст ормадо-тарводо, цярахмандо-даволдо, пурьгинеде-ёндолдо... Умок те ульнесь, колмосядт иеде икеле. Ней уш эрзятне стувтызь Пазонтень васень пшкадема валосткак. Костояк а марят: «Паз, чангодть!».
Вана Пиргужтнень умасткак.
Кундасть тевс.
Васень улавонть вачкасть сынсь азортнэ. Омбоценть — Юртай ды Олдай. Крандазтнэнь потмакска сравтнесть-ацасть чаво кескавт — певерезь товтне иляст пра масторов. Алга пулттнэнь путнесть крандазонть кувалт. Путнесть ёжомарязь — иляст чукаво. Крандаз потмотне пешкедсть. Цёратне кузсть улавтнес пулттнэнь трокс-трокс ладсеме-аравтнеме. Аватне сайсть сянгинеть ды ушодсть копонятнестэ вачкицятненень пултонь кепсеме.
— Кирдть, полай! — каятотсь салмукспря човине Элювань вайгелезэ васень пултонть венстемстэ. — Седе парсте ладсек. Вант, прятнень лангс иля чалгсе, допрок пивсэсыть. Кирдть!
Пулт, омбоце, колмоце...
— Тон овсе лоткить чеерень кундсемадо! — згилясь [194] Ураень Юртай лангсо Олдай. — Иеть аволь сядо. Кирдть! Вант, понксот иляст новоле!
— Саты теть лавгамс! Седе ливчанясто макснек! — марявсь Юртаень вайгелезэ.
— Мон теть максан, тюжа пона! — раказь серьгедсь Олдай. — На, кундык! Вант, чить тештеть а ловнокшныть!
Виряз атя та-кода нолажтсь, пильгензэ понавсть — вере, олго лангсо, рунгонть кирдемс а шождыне, — ды озавсь. Се шкастонть верка, эрьва тевсэ палозь палыця Элюва весе вийсэ венстизе-шикадизе пултонть верев. Пачканзо лисезь сянгосюрось нерьгставсь атянть лавтовс. Сэредькстэнть тона салавине вайкстась. Пря эзь невте.
— Тон мезе, аволь сутямить?! — рангстась Элюва, верев ванозь.
— Сутямат тонь марто, — ноднозь мерсь Виряз сэредьксэнь изнязь пильге лангс стямсто. — Несак, мезе лиссь?
Лавтовдо алга коцтонь панаронь ожась якстерьгадсь.
— Те сянгосонть? Мон? Ха-ха-ха! — цяхазевсь Элюва визьксэнь апак сода. — Ха-ха-ха!..
Атясь эзь муе тень каршо валгак. Талакадсь. Эзь маряво сэредьксэськак. Седеензэ пачк налокс ютась те ракамось. «Те кода истя, кода? Седеймарямонь, лездамонь, чевте валонь таркас — эльдекс цяхамо. Аволь васенцеде истя теи. Седейтеме ломань, паронь парот иля учне пельдензэ. Ёрттанзат кудостонзо — «вай» а кенерят мереме. Кенерть тарка лангс прамо, тейсы тень...» — ций-буй ютасть пряванзо ламоксть сакшныця неть мельтне.
— Мезе? Мезе лиссь? — сялгизе сянгонзо модас ды вырк сась Элюва ваксс Олдай.
— Мезеяк эзь лисе, истяко, — нусманясто ёвтынзе валонзо ды мекев озась пулттнэнь лангс улавонь вачкицясь.
— Виряз леляй, нейке валгт. Валгт, тапардаса сялговксот! — серьгедсь Олдай.
— Валгт, алкукскак, а мезть тосо теть тарномс! — аламнеде чумонь марязь серьгедсь мельганзо Элюваяк.
Олдай каизе прястонзо ашо пацянть ды цирь сезизе васня кавтов, мейле лехань-лехань.
[195] Виряз венстезь ведьме пе вельде састыне-састыне валгсь улавонть прясто. «Дохтурось» ёроковсто тапаризе верев тарканть. Меельцекс ютавтызе леха пенть кирьганзо перька ды сюлмизе, козонь сатотсь.
— Весе! Седе эрязасто улав пряс! — пеедькшнезь-кенярдозь, верьга вайгельть яволявтсь ормань менстицясь ды автордызе а васоло модас нерьгстазь сянгонзо. Ютась эсь улавонзо ваксс.
— А удат, Юртакай-дугай? Вант монь! — цельця тейтерькс серьгедсь Олдай вачкиця ялганстэнь.
— Арась, арась. Лездыть атянтень?
— Лездынь, лездынь. Кирдть, эрь!
Виряз панст ведьмеде ветизе лишменть лия копоня ваксс.
— Сэреди? — тошказь ладсо кевкстизе низэ.
— Арась, — кежень кирдезь мерсь тона, — саик сянгот.
Атясь крандазонть удалга, таго ведьме пес кундсезь, кузсь пеледензэ ламо вачказь улавонть пряс.
Тевесь лаказевсь одс.
Крандазтнэ вачкавсть. Илязо каладо улавось, пулттнэнь нардевстэ лепштизь бастриксэ крандазонтень. Виряз покштясь ды Юртай саизь кедезэст ведьметнень, сыргасть велев. Аватне сялгизь модас, эрьвась эсензэ копонянзо каршо, сянгинест; апак эрязкале, эсь ютковаст кортнезь, ютасть уманть чирева пижелдыця лугиненть лангс. Тесэ симема-ярсамопелест, кой-кодат оршамопельть. Тесэ учосызь лишметнень мекев самост. Васенцекс сравтозь нулынензэ лангс озась Элюва, мельганзо — Олдай. Вал, мельганзо омбоце, ды ушодовсь, зярс а мурдыть усксицятне, велень кулятнеде ёвтнемась.
Пиргужт усксесть тедедень товсюронь ментест чоподас. Усксемс — те пельтев. Тингелангс пачтязь пулттнэ вачкамат одонияс — илязо юта, пиземе пры, пачкаст начко. Ладсемат истя — ведесь потс илязо сова, туезэ ланга. Велень куринкасонть дошуз тень коряс Пиргужтнень шабраст — Куляз атя. Путнесь сон стака, товдо пешксе пулттнэнь истя — [196] одониясь неявиль сырнесэ валозь ёвксонь башнякс. А саевиль а пиземенень, а варманень.
Юронь тееме кундасть кавто атят: Виряз ды Куляз. Юртай мельгаст эль кенерсь. Мельс прасть улавтнень а сявордомс — ламо товт певерить. Тень таркас Юртай ёроковсто юксизе тертенть ды кундась шержейтненень сянгинесэ пулттнэнь венстнеме. Эзь марявояк, кода чамсь ве крандазось, мельганзо одониянть малас Юртай ветизе омбоценть.
— Капшак, цёра! — кепедизе вановтонзо цёранть лангс, пеедькшнезь серьгедсь Куляз атя.
— Чарак, чарак седе, аля! — эзь кадово, поладызе Вирязгак.
Омбоце улавонтькак тарканзо муизь. «Башнясь» теевсь неявицякс, ушодсь сэрьс касомо.
Усксицятне, шкань апак таргсе, ёлдорсо кайсизь чаво крандазтнэс кедьёнксост, ведьметнень — кедьс ды таго тов, Пиче паксяв. Зярс псись вийс эзь сова, маней — капшак. Чикуншкава пулттнэнь пелят токамскак — товтне поцерьсэ певерить.
Куляз атя аламошкас перьгедсь тевдензэ, видемтизе рунгонзо ды талай вансь вармакс ардыцятнень мельга, вансь мизолксонь кирдезь. Ледсть мелезэнзэ умонь-умонь од иензэ. Шкантень эзь нардтневе чись, зярдо сон — кемзисемге иесэ цёра — зэрнезь ардокшнось веленть кувалт Эрьгела мазый тейтеренть марто. Косот, косот сеть читне? Ков салынзе, козонь кекшинзе шкань вармась?
Элюва ды Олдай, лугине лангсо озадо аштезь, сувтнесть велень келятнень. Учость усксицятнень самост.
...Важодемстэ, тевенть олячисэ, мельспаросо теемстэ, шкась ливтязь ливти. Ансяк, маряви, ульнесь валске марто, кудотнень икельга тикшесь шержеель ведень човалятнеде, ней уш, вант, чипаесь, прок якстере сувтеме, сизезь новольсь моданть вельксэс. Ваннось удома тарка. Умась чамсь. Кудов пурныцятнень-сэрницятнень сулеест кувалгадсть. А васоло латкось лекстясь вень экшесэ.
Паксясто састь чинзэ валгома шкава. Сеске, кудос апак [197] совсе, кундасть улавтнень чамдомо, одонияс пулттнэнь вачкамо.
— Састо, састо! — Элюва рангстась Вирязнэнь, улавонть прясто сянгинесэ пулттнэнь максницянтень. — Каня а марят, сэрякс певерить товтне?! Оно сень венстик! Аволь сень, оно сень! Сень, сень! Мезеяк а чарькоди. Венстик, мерян, васенценть!
Виряз эзь кирдеве. Сельгсь ды мезе вий вырновтызе пултонть — кодамо понгсь сянгонзо алов — одониянь вачкицянть икелев. «Тонавтомасонзо превстэ ливттянзат», — тешкстызе эськанзо улавонть прясо псилгалицясь ды апак тално поладызе тевензэ.
Аватне кавто пире юткова янганть ютасть тингелангсто кудов. Эрявсть симдемс-андомс ракшатне, потявтомс скалтнэ, эземга-таркава ладсемс ловсонть, анокстамс стувор. Каня лововить авань тевтне?
Цёратне тейсть эсь тевест. Чамдсть крандазтнэнь, макснесть вачказенть верев, одониянть пряс, Куляз покштянтень. Сон ёроковсто, тевень содазь путнесь таркаваст пулттнэнь, цёцякавтсь одониянь прянть.
— Весе, атят-сэрдят! — меельце пултонть аравтомадо мейле, мельспародонть кенярдозь — прядовсь тевесь, — серьгедсь верде Куляз атя. — Валгстсамизь-арась?!
— Минь кудов, тон тоско, Пазонтень седе малав, кадовт, — згилязь мерсь Ураень тюжа сакало алясь ды кода эряви аравтызе ологань сэрей кузтеманть. — Саты теть, Куляз покштяй, Инешкинть марто калярдомс, валгт!
Кардаз кузтемпесэ цёратнень учось Олдай. Турвасонзо мизолкс, сельмензэ цитнить. Прок чинь-чоп рунгояк эзь яжа. Кедьсэнзэ ведра, лавтовонзо трокс нардамо.
— Садо тей, атят! Вана тенк ведне. Лембине-лембине. Вана кечесь. Эрде валнан тенк. Шлядо-нардадо, кудос совадо!
Вайгелезэ ваньксстэ гайгиця, валаня. А стяко куринкань аватне мерить тензэ «чольдерькай». Мезе-мезе, сынь маштыть лемень путнеме!
Васенцекс венстинзе кедькоморонзо ды ёрвалдызе [198] ливезев чаманзо, кирьганзо азорось. Нардась-тейсь, ютась кудос.
— Азёка, атя, ведьс васняяк! — вастызе, каштомикельде серьгедсь совиця поланстэнь Элюва.
Ансяк «атясь» саинзе ведратнень, од кармавтома:
— Азё васня пенгинеть совавтт.
— Куш весть сеске меревлить, валот аволить полавтне, — мерсь кучозесь ды калдорк путынзе тарказост ведратнень.
— Иля стувто кандомс баняскак. Вант, васня трубанть панжик! — мельга-мельцек кармавтсь-тонавтсь Элюва.
— Баняс а кенертяно. Шказо ве уш... — ёвтызе мелензэ Виряз атя.
— Курок, курок седе, мезть вазокс лыкат. Ломантне учить, андомс-симдемс эрявить. Теня, кандтаяк васня ведь, ведем прядовсь.
— Пту! — кежень сазь сельгсь атясь ды чатьмонезь мекев саинзе ведратнень. «Кодат нерват эрявить мартонзо! Кшнинь. Сетнеяк сезевить, секень вант».
Аламос аштезь велявтсь мекев. Ведратнень эземс путомсто кавтошка пенчень туро эйстэст валовсь.
— Вант, вант, мезе теи! Саик седе курок нуланть, нардык. Эрязасто седе, эрязасто. Ломантне учить, — цянкаесь Элювань вайгелезэ.
Элюва ды Олдай лездыцязо каясть ям — сывелень, чоп каштомсо кирдезь. Эйстэнзэ мольсь тантей, судоварянь кутькавтыця чине. Чинедензэ, яла мерить, пешкедят! Виде, велень каштомсо кувать кирдезь сывель ямдо тантей мезеяк арась.
«Те вана эрить, кизнаяк сывельде порить...» — ям ваканонть неезь, тешкстызе эсь пачканзо Юртай, судоварянзояк чинеденть кинететсть.
— Ярсадо, шабрат-оят, ярсадо, — гайгезевсь Элювань сиянь гайть вайгелезэ, ды теке марто боцк путсь шержей прятнень икелев лавкань ашо вина. — Изнявсь покш тев, кастозесь, мерть, урядавсь. Атя, тон мезе ванат, мекс а нуртнят? Теяк теть а чарькодеви...
«Те вана тев, те минекекс», — мериксэль суликанть [199] неемстэ копордамонь вечкиця лездыцясь, ды мекс-бути эзь мере. Сон, Юртай, кода а кода Пиргужтнень васень нежест.
Виряз атя ливчанясто таргизе потомксонть ды пештинзе цяркатнень. Эсензэнть вить кедьсэнзэ кирдезь, стясь ды пшкадсь стуворонть экшсэ аштицятненень:
— Инешкипазось сы иестэяк максозо истямо жо менть, кодамоль тедеде! Тень кис копордатанояк. Течинь покш тевенть сявордоманзо кисэяк. Одониясо — те, мерть, утомсо. Пиземенень а пореви. Лезэкс туезэ.
Цяркатнень чамдызь.
Валонь кирдицясь ды азоравась ансяк токавтызь турвазост. Лиятне — чамдызь потмаксос.
— Я, тынь истя мезе?! — стясь таркастонзо Олдай. — Ломанькс минек а ловтадо? Истя а лади, васень цярканть эряви копордамс.
— Арась, арась, Олдакай, содат, монень симнемс а эряви. Олдакай, инжеть-важот, минек лангс илядо вано. Мезе теят, атяськак вана коське курго. Ярсадо мезе Пазось макссь, мезе ули, — каванясь, велясь стуворонть перька азоравась.
Олдаень мелезэ неть валтнэсэ эзь витеве, варштась Виряз лангс:
— А тон, содамо, мекс эзик чамдо цяркат? Нулгодят? Эли тон алкукскак «коське курго»? Карязонь истямо яжамодо мейле пежетекс, иля пеле, а ули. Паряк, кувака черень кандтницясь а мери? Иля пеле. Симик. Тонтеметь монгак а кепедьса. Эрь вейсэ.
...Виряз атя зярдояк эзь правто симемантень. Иезэнзэ, паряк, колмоксть-нилексть кедезэнзэ стопка саиль. Ансяк кой-кона покшчитнестэ. Ды вана уш комсешка ие, кода ёртынзе превстэнзэ покшчинь тешкстамотненьгак. Теке араськак модамасторонть лангсо палыця ведь. Лиясто кевкстнить эйсэнзэ: мекс? Сэтьместэ, вайгелень апак кепеде, апак эрязкале яла мери: «Чарькодия: пансемс ченькс мельга — теевемс тензэ урекс, а ловомс эсь прянть ломанекс. Аволь пек сюпавтанояк превсэ, кадовозтнеяк шлявить те ведьсэнть...».
[200] Юртай ды Куляз атя аштесть стуворонть экшсэ шабрацек. Пек эзть кунсоло Олдаень пеняцямонзо ды лия кортамотнень. Копордызь васенцекс кандозенть, педясть пси, тантей ямнеде корштнеме. Натой псилгадсть. Коняст ливезькадсть. Куляз атянь вейке ялгазо, умок-умок те ульнесь, ярсамсто-кортамсто повавкшнось тувонь куяс. Эзь идеве. Сельмензэ икеле кулось. Теде, эли, паряк, мездеяк лиядо, ярсамсто кургозо содась ансяк пенч.
Нуртясть омбоцень-омбоцень. Симизь весе. Эзь кадово, кортамонзо лангс апак вано, Олдайгак. Таго калдоргадсть пенчтне. Суликась чамсь. Тень редязь, Элюва юрк совась икеле кудос. Серьгедизе атянзояк.
— Кирдть, — тошкстась Элюва поланстэнь ды венстсь аволь пешксе сулика. — Соват удало кудос ды салавине пештьсак кельме ведте. Путсак икелест.
— Кодамо «ведте», эйсэнзэ ведтемеяк ведь, — машнетезь мерсь Виряз атя каршонзо аштиця кармавтыцянтень.
— Мезе мерсть, сень тейть. Лавшомгадсть, а чарькодитькак, — превс путызе поланзо Элюва ды лавтовс токазь ильтизе удалце кудов.
Виряз ютась каштомикелев. Вишка кечинесэ нуртясь вете-кото пенчень турошка ведь. «Мекс манчемс ломантнень, пежетьс совсемс? — арсезевсь каштомикеле котьмамсто. — Чинь-чоп карязт яжасть, ней истя теемс. Истякак вецакавтозь седе а ков...»
— Кайсек, Куляз леляй, — мерсь азорось ярсыцятнень икелев суликанть путомсто, — кайсек, ярсадо, илядо визде. Мекс тон, Ураень тарад, истя нусмакадыть? А?
— Ды мон мезеяк, мон истяк... — мельде-валдо, симезденть мокнозь мерсь Юртай.
— То-та, вант!
Совась Элюва.
— Вай, тынь овсе а ярсатадо. Тень кодамо ладозо, Куляз леляй? А тон, Юртай, мекс судот нолдык? Мекс пенчеть нузялгавтык? Пештинк пекенк, — кортась Элюва валаня кельсэ, невтсь прянзо анелицякс.
Превтне лавшомгадсть — кельтне вийс совасть. [201] Эрьвась бажась киньгак апак кунсоло ёвтамс эсензэ седе паро, седе превей мель эли кодамояк куля. Кортамось та-кода ушодовсь течинь апародонть — Виряз атянь сянгосо нерьгстамодонзо.
Куляз атя калдорк путызе пенчензэ. «Весе, мон ярсавинь», — ёвтызе тень эйсэ мелензэ. Нардызе вейсэндязь сурсонзо кургонзо, ахолдынзе кедькоморос сакалстонзо кши паморькстнэнь, каинзе кургозонзо ды кортазевсь:
— Те мезе, Виряз атянь нерьгстамось. Революциядо икеле, мельсэнь, те ульнесь. Эрьмезьвелень тунь од цёра ялгам, Шалань Паксяй, истя жо, кода тынь течи, усксесь пултт. Вачкасть тензэ пандошка улав. Лишмеськак, меремс, улавонть коряс. Зяро иля вачка, сыргавтсы крандазонть, прок тона чаво.
Эскели Паксяй, вети лишмензэ, крандазонть вакссо молезь. Мезе, кода теевсь апарось, кияк а соды. Учить Паксяень — арась, учить — арась. Учить тингелангсояк, учить паксясо пултонь максницятнеяк. Сыргасть вешнемензэ. Муизь ки лангсто. Кись мольсь пандочаминева, мезде, паряк, сяворськак улавось. Лишмесь улавонть вакссоль, ведьметне пулттнэнь алольть. Неизе тень Паксяень тетязо, вешницясь, ды пильгензэ лавшомсть, пачканзо ютась соркс. Каявсь, теке превстэ лиссь, улавонть калавтомо, пулттнэнь тей-тов ёртнеме. Муизе цёранзо. Эзь лексеяк. Мазый, виев, иензэ ульнесть кемгавксово. Мезть ансяк а эрсить эрямосонть! Умок те ульнесь. Тынь, Юртайть-Олдайть, сестэ элесэ трёнкаиде, Элюваяк эйкакшоль. Ламо иеть ютасть. Тынк велесэ те ульнесь, Виряз атя. Мельсэть?
— Кода эно, кода!
— Тон уш, Куляз леляй, — каясь вал Элюва, — вельть седейризксэнь ёвтнема ёвтнить. Мездеяк лиядо, паряк? Розенек-товсюронок нардавсть паксясто. Те вадря. Ней эряви кодаяк изнямс омбоце мелявксонть — пивсэманть.
— Тынь, аватне, вейкень содатадо: курок ды седе ламо. Мезе теят, истямокс Пазось човоридизь-ичидизь. Ды теемскак мезеяк а эряви. Кода а капшамс, кода а таштамс, авантень эряви ливтемс пизэстэнть левкскензэ, сон пизэнь [202] прявтось, сонензэ мелявтомаяк весемеде, — ёвтызе мелензэ Куляз атя, кортась, сонсь вадяшась ашо, мештензэ келес сакалонзо. — Пивсэматне прядовить, эрямось — эряви, тень эйстэ ковгак а кекшат.
— Мезе пивсэмась? — апак учо пшкадсь чатьмониця Юртай. — Пурнавтано, вана кода течи, тейсынек те тевентькак.
— Виде, виде, Юртай-парочи. Шка ладяк, Элюва патяй, — поладызе кортамонть, ёзмолдозевсь таркасонзо Олдай, — шка ды вейкешка, минденек башка, ломань серьгедть.
Комавтозь рюмкатнеде кортыцянть чамаумарензэ палсть валскень зорякс, сельмензэ налксезь налксесть. А меряткак, тензэ ведьгеменде ламо.
«Вантака, вантака, кодамо эрьгана, кодамо мельс туиця! Прок од тейтерь. Авань мазычитне весе эйсэнзэть, потензэ теке тодовнеть, — велясть кудазоронть прясо мельтне. — Истямо ава, истямо эрьмечи — мирдевтеме. Мекс, кода — содык азё...»
— Вансынек, Олдакай. Инешкипазось лезды — таргошкань ютазь, паряк, таго истя пурнавтано. Сюконян течинь сакшноманк кис. Покш тев правтынек.
Кортамось таго лаказевсь пивсэмань тевтнеде. Лаказевсь ды сеске энгамсь. Пе тензэ путсь Куляз атя.
— Те весе паро, од ломанть, — тешкстызе, сакалонзо вадяшазь, ды варштась Элюва лангс, — ансяк шкаяк эряви содамс. Стяма валскень чоподава азортнэненьгак, миненекак. Сыргатано эно, — видемтизе рунгонзо, лиссь стуворонть экшстэ. Мельганзо тапор-тупор стясть, кадызь озамо таркаст лиятнеяк.
Кудось општ мерсь. Элюва кундась урядонь тееме, шлямо-нардамо. Атязо лиссь важотнень ильтеме.
— Мезть лабордат мартост зняро?! Тевтне кирьгава, тон шка ёмавтнят. Лыкак седе. Эрь, шляк кедьгетнень. А те мезе? Те мекс карсезь ботат кудованть? Мон уряд кирдян, тенсть, нула кедьстэнь а нолдтнян, тон...
Атясь мезеяк эзь мере. Ютась кенкшенть пелев, юксинзе пильгензэ, тонгсь кудоютконь алка кемть. Теде мейле [203] кундась мерезенть топавтомо, пенчень-ваканонь шлямо-нардтнеме.
— Эряволь зярояк пандомс ломантненень, — аламос чатьмонемадо мейле ёвтызе мелензэ, варштась нинзэ пелев кедьгетнень марто котьмицясь.
— Вантака, пандомс! Кинень? Тонеть? Шабрантень минсь зярдояк мольтяно лездамо. А нетне, Юртайть-Олдайть, тененьгак кецнить — лопавтемс кирьгапаренть. Сыненст лия мезеяк а эряви, — эзь вешне каршо валт, путызе тарказонзо превень максыцянть низэ.
— Лисемстэ Ураенсесь ледстизе: арсинь, келя, сулики-нес куш максы, — ёвтынзе Юртаень валонзо Виряз.
— Вай, авакай! Ураенсесь, те злыдаресь, ярмакт веши! Содазь, симемс. Каня монсь а симдьса? Каня аламо тевтнеде? Теить — симть. Кандт, ускт мезеяк — симть. Куш куломазот.
— Вай, Элюва! Тон арсят, мезть кортат?! — мерсь Виряз ды, седей сэредьксэнь марязь, капшазь поладызе тевензэ.
«Содавлиньгак, понган истямо казямо, кельме оймес, истямо а пештявицяс, каня, кодамо стака аволь уле, кадовлия эсь кудом? Вейке мельсэнзэ: тевсэ пивтема, ярмакт-сюпавчи. Мезекс, кинень? Цёранстэнь? Авадонзо ламоксть эрьмев. Эстензэ? Од шкасто... те эно кадык. Ней тензэ кодгеменде ламо. Кинень? Мартот кандолазс? Кода ногодтнэнь иля кайсе, эрьвань эсензэ эрямонь лувозо, эсензэ чартьчизэ. Те ков маштови, ченькс стопкадо рамсемс сявдиксэнь яжицят? Те ломанькс? Лади-арась истя тейнемс ломань марто? Вай, вай, мезес пачкодинек...» — яла ризнэсь Виряз.
«Эрьвань эсензэ эрямонь лувозо... Виряз, зяро эзь эря, эзизе чарькоде: микшницявтомо рамсицят а улить. Микшниндеряй кияк эсь виензэ, мезде илязо уле, мекс а рамамс? Берянь, седеень а марямо? Виде. Истя. Ансяк ков ношкстат те «берянденть», бути те сонсь эрямось?» — арсесь эськанзо Элюва.
Шказо чарась пелеве малава.
Тевтне окойники прядовсть. Кудонть пештизе каштмолема, кона кортась икеле кудосо понгавтозь частнэнь [204] кельсэ. Шкань-шкань та-косто аксялдо лездась тенст цирниця пшти вайгельсэнзэ цирькунось. Элюва сынст эзь маря — удось ламо тевень теицянь, сизезень домка удомасо.