Тесэ ды тосо (2013)/10
[56]
| * * * |
| Кеменце сёрмась |
Тоначив, Лемаень Виянанень, ансяк сонензэ ды шкань апак таргсе
Паро мельть-арсемат, Вияна!
Топавтан алтазенть: шкань апак таргсе кучан омбоце,
ледстнемадо тыц пешксе, сёрма.
[57] Пиземетнеде мейле телесь окойники теевсь телекс, совась вийс. Ушосонть течи цят якшамо. Чись-чипаесь тандавтни — мокшнат сювори-невтни. Ловось, ков а варштат, сияжды, сулей таркатнева мик сэнь. А вановат. Иля лиснеяк лембе норастот, Якшаматясь сеске «чочатанзат». Судопрят, марясак, цирьк-цирьк мери, курокке копачасак варьгасот. Пилетькак ванстт.
Кудосо аштезь, саинь мель топавтомс мерезенть — сёрмадомс ледстнемат жойсэ морсевикс од шкань мородонок, чокшнеденек ды ялгадонок. Мезе лиссь тень эйстэ — питне максомс тонеть. Иетнеде, Вияна, ютасть — улав. Секень вант, аволь вейкеяк. Секскак ламо мезе удемень сормсевкстнэсэ эзь кирдеве, стувтовсь. А истя ледстязденть — сёрмадт. Плестядемак, манявиндерян, кода од шкастонок налксемстэ, коняс. Сюконян теть модас.
Превсэнь седе нардевстэ ванстовсть нурька, чаразь киштемстэ моравиця морыненк. Частушкат мерильть тенст. Рузкс. Ниленьгеменце-ведьгеменце иетнестэ косо ды зярдо ансяк эзть гайге! Клубсо, школасо, кудосо, фермасо, паксясо... Поэттнэде башка, сынст сеедьстэ ладсесть сынсь морыцятнеяк. Кодат ансяк арасельть: шныцят, пицицят-сялдыцят, вечкемадо, кадомадо, ояксчиде, комбайнёрдо...
Гармонистэсь, содат, велесэнть ульнесь сехте мельвановикс, сехте содавикс ломанекс. Васень цёра! Кодамо тейтерень чиявтома сонтемензэ? Кодамо аштемкужо? Вастомат, ильтемат, покшчить... Теде, эсь питнедензэ, гармониянь азорось содыль. Секскак весть мерезь аволь эрьвась озыль, саилизе элезэнзэ викникаензэ. Васня менчевиль. Теиль а марицякс. Савкшнось энялдомс, икелензэ пря комавтнемс.
Пупоронь вальмало васень киштевтицянок ульнесь Паулонь Костюш. Мельсэть? Кода эно, кода — мель путнесь мельгат якамо! Эзик стувто? А мезть кевкстнемс! Якстере тюс гармониянзо марто Верепестэ свал пачколесь курынезэнек. Кой-зярдо лия ёнкссто, Алопестэ, сакшнось Дудоконь Эчкур. Сеяк аволь чавонь кедть сакшнось, маштсь лакордомо. Сонгак теке басом сельмть кайсесь лангозот, чарась перькат, теке гулька.
[58] ...Кизэнь опаня чокшне. Проминек свалшкань аштемкужозонок, Пупоронь вальмалов. Костюш кортавсь. Путызе, кадык мельтеме, киштевтицянзо кумажанзо лангс. Апак эрязкале каинзе лавтовонзо ланга кшнатнень. Кепедизе вановтонзо икелензэ тейтертнень лангс. «Ну, саразкеть, кие ушодыцясь?» — серьгедсь тенст аволь пек марявиксстэ, теке марто тетькинзе мехтнень, эрязасто ютавтынзе суронзо перламутрань повнетнень ланга вить ды керш ёндо. Кунсолы. Видестэ вети мелодиянть? Кода седе мазылгавтомс сонзэ? Кодат аккордт саемс?
Эскельдясь киштема кирьксэс, кончтась теть, Вияна, Марюш ялгат. Лангсонзо вечкевикс оршамопелензэ: ашо ковта ды теине, цяк кумажадо алга раужо юбка. Варштась тонь пелев ды верьга вайгельть серьгедсь, каршот стядо аштезь, морыне. Истя ушодокшнынк се чокшнестэнть, тейтерть, «концертэнк».
Листь киштеме, Виян ялгай, |
Прядынзе Марюш валонзо. Кармась пильгензэ кайсеме, шешкеме-киштеме. Каршонзо кончтась ды лиссь кирьксэс Лемаень Вияна. Марят? Содасак, кие те, а? То-та... Кеман, кеман... Вайгелеть алкине, аволь кода ялгать — цийниця. Лангсот кумажадо алга пижела тюс платия, каркске марто. Штапелень коцтозо мазылгавтозь ашине, прок ламарень, цицькинесэ. Пильгсэть раужо кедень... тапочкат. Мельсэть? Лововсть сестэ истят карсемапельтне сехте парокс. Те ней аватнень пильгстэ кодат ансяк кемть-котат, кодат кочкарят а неят! Сестэ... Кедьсэть ашолды пацине.
Ужка молян киштеме, |
[59] видькстыть ды тень эйсэ прядыть валот. Кармить киштеме.
Ней чиполась таго Марюшонь. Сон стясь каршот, прясонзо чиртнезь, тонь лангс ванозь, чамдызе потмонзо, ёвтызе, мезе ёвтыксэль:
Монь оинем Вияна |
Прядык пилысэ томбамонь коволнэть ды, пацинесэть юхаезь, стить раужо черь-сельме Марюшонь каршо. Эзить талакадо, муить валт. Мезе ёвтыксэлить каршо, ёвтык. Морамсто порезь порить ялгать валсот ды мизолкс марто вановтсот.
Вармась пуви, чувтт чирькавты, |
Истя, вейкенк-вейкенк шназь ды пупсезь, киштиде киштема кирькссэнть, зярс эзь прядово сеедькаень — рузкс, частушкань — пусмонк. Прядомань кис стиде киштевтицянть каршо ды кавто вайгельсэ моразь ёвтыде тензэ паронь пандома валт:
Эрьга, эрьга, ялгинем, |
Меельце валонк ёвтазь, вейсэ сюкониде ды совиде ялганк юткс.
Неть нурькине, ветердезь моравиця морынетнесэ тынь, кужонь тейтеренек, путыде мель ёвтнемс седейёжодонк, невтемс морамосо колчинк, невтемс эсь прянк, туемс, [60] содави, цёратнестэ киньгак мельс. Ульнесть сеедькайтнеде эрьва кодат: згилямонь-раксемань, пеняцямонь, шнамонь. Лиясто понгонесь «парямс» каштангалиця седицяськак:
Седяк, седяк, гармония, |
Тынк мельга, текекс кавтонь-кавтонь, лиснесть кирьксэс явозь кудонь сазорот Нюта, Черькай Лиза, Сыресень Надя... Ды истя. чивалдынем, пелеведе мейлес! Превсэяк киньгак арасель: валске стяма эрявикс шкасто. Удомат а яви? Кадык а яви! Киштемат-морамот, пеедькшнемат... Самс аштемкужос симезь эли мик копордазь? Превсэяк истямонь кондямо арасель! Койтеме «коське кой» ульнесь. Яла мерить, беряньстэ эринек...
Поксарян превпаргинесэнь ды арсян: морсинек-арась эрзянь, кувакасто моравиця лужаня морот? Зяро эзинь вешне, паргинестэнть мезеяк эзь таргаво. Маряви, морсинек. Кода а кода «Авкай, молян мон вирев», «ДаУтяша», «Пандо прясо од килей» моротне минек шкасто пек содавиксэльть. А кемеви, тынь, минек куринкань, минек кужонь тейтертне, сынст а морсилиде! Морсилиде — тунь а кавтолдан. Ансяк вана шержей прянтень зняро шкань ютазь лемест эзть ванстово. Кеняркс, Вияна, теят, ёвтындерясыть сы сёрмасот стувтозь моротнень лемест.
А вана патянок морсесть эрзянь морот. Мельсэнь сынь. Авадонок кортамскак а мезть. Сынь рузонь морот а содыльтькак. Те ней...
Минек курос лиясто кадновсь Понкспестэ цёра, Ашакаень Митя. Минденек кавто-колмо иеде седе покшоль. А стяко истямо кудонь лем кандтнесь. Сынст буень весе ломантне чамас ашотольть. Митяяк. Сакшнось юткозонок, эряви меремс, а стяко. Кие-бути тейтертнестэ седеензэ пицекшнизе. Кие? Азё содык ней. Теня. сонгак, маринь, умок уш Тоначинь Масторсо. Вайгелезэ цёранть човинель, прок [61] Лемешевень. Музыкас чарькодицяль. Пилензэ марицяльть. Сон эйсэнек тонавтыль. Тонавтыль, ней тень визькс, рузонь моронь морамо... Течис эзия стувто эйстэст вейкень:
Горят костры далёкие, |
Сизи гармониясь нурька морынетнеде. Сыненст, тейтертненень, куш иля лотксеяк. А содыть оймамо. Седяк, седяк... Окойники прядовить номерэст киштезь морыцятненьгак. Гармониясь општы. Аратано кеменынканек, морамо вечкицятне, эземень таркас чочкотнень каршо ды поладсынек Митянь моронзо. Сон ютксонок лувонь ветиця, дирижёронок. Кунсолотано вайгелензэ.
Глаза у парня ясные, |
Рузкс, рузкс, рузкс...
Сеске войнадо мейле радионь «пачалгонть» марто вейсэ ушодокшнось сэвеме-пореме эрзянь моротнень кинось. Тосто чудезь чудсть эрьва кодамо лувсо моравиця, эрьва кодамо тюсонь, жанрань, эрьва кинень алтазь рузонь моротне, прянь шназь айгсть эрзянсетнень. Кие эйстэнек эзизе морсе «Гибель Варяга» киностонть «Варят» моронть? Кие а содылинзе «Кубанские казаки» фильмастонть «Ой, цветёт калина» ды «Каким ты был» мазый, шождасто моравиця моротнень? Морась сынст, илязо уле прянь шнамокс, весе СССР-сь. Морасть «Весёлые ребята», «Трактористы», «Свинарка и пастух» ды ламодояк ламо лия фильматнестэ моротнень.
Вечкилинек «Мой костёр» романсонть. Мекс — а содан. Паряк, эйсэнзэ нусманячинть кис?
Умок, коввалдынем, те ульнесь. Пек умок.
Ойсилинек, мельсэнь, теке чавкалевкст, чочкотнень ланга ды састыне, эль марямга, вейкень-вейкень кунсолозь, [62] ушодылинек вечкемадо, валскень чиденть, кодамо-бути васоло ёнксто нусманя, эрьванень малавикс ёвтнеманть. Алкуксонь лемезэ те романсонть «Песня цыганки».
Мой костёр в тумане светит, |
Кунсолы эрицявтомо кадовозь Пупоронь кудост, кунсолыть икелензэ кальтне, чатьмонить, кунсолыть велесь, велькссэнзэ мазый чама ковось.
Ночь пройдёт — и спозаранок |
Ужо-ужо! Те, арсят, весе? Эзик стувто, мельсэть «Спят корабли...» морось? Кодамо моро! Чачома ёнксозо сонзэ, Вияна, Италия. Неаполь. Оно костонь! Васня сонзэ марсия симфониянь оркестрасо топавтозь. Сонзэ кунсоломсто, маряви, понгат сэньсэ копачазь иневедь чирес, панжовить икелеть певтеме-певтеме келейчить, сювордасы седееть кодамо-бути а содавикс, пачкат ютыця сэтьме ризкс. Сыть мелезэть нувара арсемат умоктояк умок ютазь, мекев зярдояк а велявтыця шкатнеде. Минь, содат, морсинек сонзэ вал марто. Вана эйстэнзэ зярыя кикст:
Спят корабли в порту чудесном, |
[63] Лиясто истят мельтькак содавтнесамизь: теде мазый, седеень пачк ютыця, элезэнзэ саиця моро моданть лангсо арась.
Кунсолат кунсоловлить. Теке одс чачат. Маряви, кода перьгедить кияксстонть пильгеть ды састо-састо ушодат кепедевеме та-ков сэняжа пельтнень ёнов. Лемезэ те моронть «Неаполитанские ночи». Натой снартнинь сеть шкатнеде мейле ламо иень ютазь ютавтомс валтнэнь рузонь кельстэ эрзякс.
Явовтано, мари седеем, — |
Истя, Вияна, ледстика, ютавтнинек аштемкужонок? Кадовськак ансяк ледстнемс! Ней моротнень таркас велетнесэ зэрнезь зэрнить дискотекань кодат-бути сееремат. Арась, те уш лия «пакся», лия эрямо. Малавгак аволь минек.
...Теке валскень сэняжа сув пакшкеть, кадовсть ледстнематне покшчитнеде, конатнень покштянок шкинекшнизь ды казекшнизь мельгаст сыцятненень. Миненек. Ютксост Тундонь ильтема чись: эрьвела, мазыйдеяк мазый, моротнеде гайгиця-зыйниця. Сонзэ зэмезэ педе-пес сюлмавозель те шканть, пертьпелькссэнть полавтовоматнень марто. Анок сёрмадозь опера! Арият, хорт, дуэтт... Ансяк кунсолок! Ули те покшчинть лия лемезэяк: Кизэнь вешнема чи. Моронь кодамо гайгема маряви неть колмо валтнэсэ!
Вальмалдо вальмалов яказь, кавто тейтерть киштевтсть парсеень лентасо, артозь конёвсо-мейсэ мазыйстэ ёролдозь, ломанень сэрьсэ килей тарадт. Килеесь — Тундо. Киштевтсть эйсэнзэ, ильтясть Тундонть, кавто тейтертнеде башка, пельвеле ваныцят.
Лотки киньгак вальмалов ошмось, аравтыть эзем, озавтсызь гармонистэнть, ды куринкань келес каятыть тейтертнень васов марявиця ванькс вайгелест. Серьгедить мельцек-мельцек нурька морынеть. Киштемстэ лыйк-лыйк тёкаить велькссэст, васолдо неявить, килеень тарадтнэ. Прядови тесэ «концертэсь», сыргить лиянь — кеменьшка [64] кудонь ютазь — вальмалов. Састо-састо молезь, мазыйстэ оршнезь тейтерень ошмось ды ваныцятне серьгедить вейсэнь моро. Вейкесь эйстэст ванстовсь колгансон!
Вай, пиже садсо, |
Истя ютавильть велень весе ниле куротне. Зярдо чипаесь чиремиль валгома ёнов, пачкодильть веленек куншкасо сэденть лангс. Тесэ эрсильть килейтнень марто меельце киштемат-кеняркст. Теде мейле кавто тейтертне ютыльть сэдень балясатнень ёжос ды, нусманя ёжонь марязь, ёртылизь прястост каштазтнэнь ды ёролдозь килейтнень — Тундонть — ведьс. Весе! Тюссо-гайтьсэ лажныця Тундось ильтевсь, Кизэсь муевсь. Тусь, кадовсь удалов од шкась, полавтсы сонзэ седе сэтьместэ молиця, мелявксто пешксе покшонь эрямось.
Мазыель, ваньксэль, кенярксонь кандыцяль-раштыцяль Тундонь ильтема чись! Арась, эзь ванстово тенек. Визьксэнь а содыця бачкатне полавтызь сонзэ мезе мартояк а чарькодевиця Троицясо. Максынек. Кадынек. Чаво таркат, кода содат, Вияна, эрямось а вечки. Ёмавтозенть таркас мезеяк ды муеви, сы, эци. Сась. Васня рангставтызь «Боже, Царя храни» оймень лепштиця-сювориця моронть, шкань ютазь тень полавтызе лия — «Партия — наш рулевой». Ней раужо пелекс ливтни раськетнень велькска, «Славься, Единая наша Россия» моронть морсезь, кавто пря марто куцьканось!.. Састь сынь, нельгизь тейтертнень кедьстэ килеенть, ды ломантне теевсть вайгельтемекс. Допрок, теке келест кершизь, лоткасть морамодо. Эзть сова, ков эряволь, вельть уш ламо превтькак. Якамонтькак полавтызе «Жигулись». Лездыть тензэ, вий путыть томбалькскайтне. Кода седеесь — ойминень содыцясь? Сонгак лиякстомсь, аволь истя [65] чави. Тень кис ламот тонадсть... кирьгапарень начтнеме.
Вана теть омбоце артовкске кезэрень, аволь ве пингень перть валакавтнезь-витнезь ды ней отьмас панезь покшчинь койтнестэ.
...Ванды эйсюрков. Ковкерьксэнь коряс телесь прядовсь. Кадык читне кувалгадсть ды менелесь сэнь вановтсо ваны тундокс, тундокс те шканть а лемдьсак. Ков а варштат, цитни-кувтолды, сельмть кери сэншть мериця лов. А вановат лангозонзо! Шушмотне латос. Пейди, мезес-бути кецни кирьксала, теке покш пачалго, якстере-ожо чипаесь. А стяко, а стяко пертьпельксэнь содыцясь-вечкицясь, Пришвин Михаил рузонь сёрмадеесь лемдекшнизе эйсюрковонть валдочинь ковокс.
...Течи Мастя. Телень ильтема чи. Куринка ютко. Кирьксэс стясть минек пень «исень саевть одирьватне». Лангсост аватнень якстере-тюжасто ды раужосто артозь кувака шубат. А кельмат, кодамо якшамо ушосонть илязо уле. Пильгсэст кевердезь, понань лембеде лембе кемть. Прясост лембе шальть.
«Исень саевть...» — истя мерить нусманя, ризкстэ пешксе ушодозь моронтеньгак. Эйсэнзэ ёвтневи аванть мирдензэ эсь масторонзо кис вейке недявкссо маштовомадо. Ушодови сон истя:
Вай, исень саевть одирьвась, |
Морыть аватне, вейкест-вейкест лангс ванозь, ламо вайгельсэ, эрзянь умонь-умонь шкань морамо лувсо. Кунсолыть, кияк илязо кола мелодиянть, илязо сае а се нотанть. Сэрей-човине вайгельтне, мартост эчкетнеяк, таргавить-усковить вейсэ, вейсэ теить ламо тюсонь музыкань картина. Жойниця гайтесь а кельги ловсо копачазь, чипайсэ валдомтозь кудотнень-латотнень юткс; бажи эйсюрковонь ванькс-ванькс, сэнь-сэняжа менелентень.
[66]
...Мон истя сырган бояронь паксяв, |
Морось пеняци, аварди, ризны, мелявты, терди. Эйсэнзэ, маряви, эрзянь умонь ды неень весе сельведтне. Умок се, мезде морави, ульнесь! Ней уш, Вияна, кияк а сти моданзо саеме, кияк а сти ловсо вельтязь велекуншкас моронь морамо-кунсоломо, кияк а велявтсынзе Мастянь моротнень, конатнень морсесть покштянь покштянок.
А карман ламо ёвтнеме войнань иетнестэ тикшень ледемстэ моразь сыця аватнеде. Ансяк колмо-ниле валт.
...Вачот, коськанат-дёкушт, эйсэст ансяк ирдезт, косо ансяк оймест пиштякатнень кирдеви. Лавтовост лангсо пелюмат. Эскелить Пичепень кувалт, эль Пильгест кандтневить... сынсь веленть келес жойсэ морыть! Морось тенст, кеман, лездась изнямс стакачитнень. Сон макссь вий а мендявомс, а нолдамс прянть. Мезе ней? Кадовсь вейке: певтеме, теке Ковонть лангсо, каштмолема. Косотадо, эрзянь морыця вайгельть ды ойметь? Ков ёмиде? Калмидизь? Косо калмолангонк? Чумонк мейсэ? Кода эрямс тынтеменк — ёвты кияк?..
Шкань варматненень, кода эзть пува, кода эзть иерде, ламо ледстнеман эзть костяво. Радио арасель. Ульнесть велесэнть кавто-колмо патефонт. Рузонь моротнень-кортамотнень а мезе вельде ульнесь шолодемс-нерьгемс эрзянь удемтнес. Секс эрясь эрзянь морось, эрзянь кортамось-валось; покшчитне, калмамонь ды лемень кундамонь койтне шождасто-стакасто ялатеке лексесть. Мейле... совась кудотнес, те ульнесь сеске войнадонть мейле, рузонь «пачалгось»-радиось, мельганзо уцорсо эцесть телевизоронть марто компьютерэсь. Сынь ды седеяк сынст азорост-прявтост келейстэ панжизь вишка раськетненень калмазырев кенкшенть. Тов, тов, косо эрят ней тон ды косто кись... тонсь содасак кодамо! Эзь лезда моронтень, чарькодеви, пешксе пеке эрямоськак.
[67] Минек од шкава чокшне ланга велесь, кодамо пиземе, варма, чопода илязо уле, кода рудазось илязо шлеберде, моротнеде оймсема эзь сода, жойниль. Ней аволь эрзякс, рузкс морыцяяк а муят. А муят чить толвалдосояк! Кармавтыть азё неень од ломантнень стопкавтомо серьгедемс моро. Иля снартнеяк! Икеле а морыцяськак кургонзо автниль, снартнесь невтемс прянзо — монгак марий пиле! Визькс ульнесь — вайгелеть а нолдави.
Ней... Мезть теде кортамс!
Монь «морамон», Вияна, моравсть. Истяяк-истяяк. Весе. Мезе таштавкшнось эрямонь книгазон — чамдыя. Ламо мезе, содави, эзь ледстяво, кулось, эзь кирдеве удемень менчевкстнэсэ. Иетнеде оно зяро эскелявсть. Неень машинатнесэяк а лововить. Чумот эно аволь ансяк иетне, ламонь кувалт — минсь. Каня эсенек кельме седеесь эзь лезда — ды лезды — калмонь чувицятненень? Ды васняяк — эрзянь? Марят ней косояк гармониянь вайгель? А кисэнзэ пшкадиця? Ёртык превстэтькак! Истямо, дугай, а муят.
Мезе тень эзь вельмевтеве, мезе ёмавтынь ледстнемань кескавстон, снартык муемс тон. Вешнемс, содави, ули мезе.
...Стувтокшныя. Нолдык чумом. Рузонь моротнень, рузонь келенть нерьгезь нерьгсь эйкакштнень превс, ванькс оймезэст, радиодонть ды кинодонть башка, школась. «От колхозного вольного края...», «Ну-ка, солнце, ярче брызни...», «Наверх вы, товарищи...» ды лиятне костязь костясть эрзянь моронть, мартонзо — эрзянь ойменть.
Энялдомат, дугай, топавтыя. Кодат морот морсинек лембе шкатнестэ, кода од шканок ютавтнинек, ёвтния. Мезе а истя — сёрмадт.
Оно мезе, тынк ютксо, Тоначисэ, маринь, морамонь пелькстамот-конкурст эрсить. Те алкукс? Эли...
Модамастор. Паламонь мель марто, Валдай. 2000-це иень якшамковонь 18-це чи.