Тесэ ды тосо (2013)/9
[46]
| * * * |
| Вейксэце сёрмась |
Тосо эрицянтень, Лемаень Виянанень, Валскень тештем туртов Паро ёжо теть, Вияна!
Вечкилитинь, Вияна? Маряви, кевкстнемскак аволь эряво, неявсь сельмень конязьгак. Неяви нейгак. Ялатеке седеем мекс-бути кодаяк а ойми. Паряк, те ульнесь лей велькска сравтневезь валскень сув? Лиссь-кепететсь чись, ды сон аламонь-аламонь срадсь, кадызе леенть мештензэ. Мезеяк а мерян, ансяк сеть чахрань панжовома шкатне, цёковонь гай моротне кадовсть тень Пазонь пельде казезь ловмакс. Тундось те казнеденть мейле сакшнось ламоксть, ламоксть сакшность чачома [47] масторозост цянавтнеяк. Тень лангс апак вано, сеедьстэ сакшныть мелезэнь ашосо оршазь, тантей чинесэ лексиця ламаресь, велькссэнек келей чама нусманя ковось ды чуросто вастневиця тонь вайгелеть. Весть, мельсэнь, аштинек вечкевикс чувтонок ало. Стиксэлинь ваксстот ламарь панжовкссто-цицькасто пусмонь пурнамо. Унгякшныя уш тантей чинесэ лексиця тарадонть алов. Тон тень: «Иля синдтре, сонсь чувтось — пусмо; иля тее тензэ Сэредькс... Самай мазый шказо».
«Иля синдтре...»
Содавлитькак, зяро тонь валтнэде мейле мерькасть, синдтресть монь. Шпанк-шпанк — пачколесь седеезэнь. Арась, эзь лисе тевест кежень кандтниця вийтнень, кода пейсэст эзть чикордо, эзинь пореве!
«Сонсь пусмо...»
Вайгелеть жойниця-эчке, потсто лисиця. Тон аволь ве-тердицятнень эйстэ. Кортыть апак капша. Кой-кить вечкить сельметь, лиятне — мизолкст, турват. Монь мельс весемеде пек тукшнось вайгелеть. Тусто, гайгиця. Аволь умок велесэ улемстэнь совсинь сазороть туртов, Кастушнень. Кемть-иля, совсинь, видькстан, вайгелензэ кунсоломо. Аштинь аламошкас кедьсэнзэ. Марявсь тень, ульнинь тынк кудосо, вастовинь Виянам, валдо-сэнь балягинем марто. Истят вейкеть тынк, патят-сазорт, вайгеленк — превс а саеви! Кикс туиде? Аволь авакс? Мельсэнь сон эзь кирдеве, кулось, ёвтнекшнить, шкадо икеле, одсто. Кастушонь чачтомадо мейле сеске. Ужо, ужока! Тетять каня а жойницяль вайгелезэ?
Тонсь, Вияна, путнить вастовома шкат-таркат. Мельсэть? «Леенть чиресэ каленть ало...» — тошкстылить тень ялгадот салава ды невтемань кис ськамот туилить аштем-кужосто кудо ёнов. Истя, манчигай ривезне? Монгак теке кудов туилинь. Модамарень озавтовкстнэнь удалга-удалга, лейненть чирева тей-тов менчевиця яннэсь сеске ветилимизь сыре, рацяня, лейненть латокс копачиця каленть алов. Вень каштсонть седеяк ваньксэль, седеяк гайгицяль чольдерькай вайгель лейненть морынезэ. Минь ульнинек сонзэ кунсолыцякс. Ульнесь, эзия стувто, лия тарканокак — пиресэнк [48] рацяня, уш аволь од ламаресь. Кемилинь теть, штатолнэм, педе-пес кемилинь кенярксонь уцясказон, тонь ванькс, валдо ёжотненень.
Ёвтык, макснесь-арась теть монь вечкемась чансть? Мукшныть-эзить кецнемань, седеень витиця товнеть минек вастневематнестэ? Мезть теде кортамс! Вечкицясь, малав эрьвась, тагояк мерян, — васняяк эсь прянь вечкиця; эрьвась васняяк вечксы эсь вечкеманзо. Явиндеряйть тензэ, теде башка, вечкема каршо ёндо, сон карми эйсэнзэ экшелямо; пильгензэяк якамсто а кармить токшевеме модас. Седе покшокс кармить неявомо тензэ кецнезь сияждыця тештетне, панжовиця балягатне, нимилявтне... Вечкема... Ве ёндо сон медь, омбоце ёндо — нартемкс. Кадык, кадык сэпесь пицесы кургоменеленть, ансяк варчамс те ёжонть танстензэ! Содаса, содаса тенстьке пря, судос эциця чине те тикшенть растензэ.
Эрьвась эйстэнек киньгак ды вечки. Кадык вечкема пельксэсь теде а содыяк. Эрьвась, цёрась эли авась, киньгак ды кирди седейсэнзэ. Сон чаво а эрси. Салава вечкицясь оймензэ бажи а панжтнемс. Вечки эсь пачканзо, чатьмонезь, содазо ансяк сонсь. Вечкеманзо пельде мезеяк а учи, эйзэнзэ а кеми, мартонзо вастовомадо а арсияк. Лови эсь прянзо берянекс, а мазыекс. Варштамс лангозонзо, неемс истямо вечкевикс чачонзо, марямс вайгелензэ... — лия мезеяк тензэ а эряви. Мезеяк! Неемс ды марямс... Весе. Лемезэ тень — васолдонь, ансяк седейсэ вечкема. Паряк, сон улияк алкуксонсесь? Аволь сондензэ кортась, мельть сравтнесь кезэрень философось Платон?
Ёвтык, кодамо салава вечкицятнень эрямост Тоначисэ? Кодамо ёнксос, козонь сынст аравтнесызь? Кодамо эземга озавтнесызь? Тесэ мон сынст, васолдо, башка-башка вечкицятнень, лован видечинь чартявксокс.
Ней кунсолок, Вияна, седеень кунсолозь эрицятнеде...
Вастневить истяткак. Ды аволь аламо. Сынь свалшкань вечкема а содыть. Мельсэсткак те арась. Полавтневи сынст вечкемась, прок тундонь варма: чикуншкава пуви ве ёндо, чокшнеланга — лиясто. Эрить истятнэ прев лангс апак [49] нежеле. Сынст превс путыцяст — седеесь. Течи, ванат, се низэ, ванды — лия. Вандыде мейле... Теке истя эрявияк. Васов а ускить вечкемань крандазонть. Мезекс, алкукскак, зярдо сон чамсь? Беряньстэ теить? Пек. Теке марто... парсте! Сынь кенгелема а содыть. Аволь кода ламот: эрить-удсить вейсэ, теке алкукскак паро эрицят, сынсь чинек-венек сюдыть вейкест-вейкест меельце валсо. Пачколить мокшнаскак. Вечкемадо, чарькодеви, ледстнемскак а мезть. Те каня а кенгелема? Каня а нарьгамо сехте валдо ёжонть лангсо? Мон истятнэнень, манчезь эрицятненень, Тоначисэ чевте таркине муевлинь. А тон? Муевлить? Шожда меремс... Кенгелезь вечкицятнеде Модамасторонть лангсо зняро, паро таркинетне весенень, пелян, а сатстовить.
Ламот Масторлангонь эрицятнестэ арсить ды кемить: Тов пачкодезь, «нарасызь» весень вейкетьстэ. Весе улить петнявкскень пес вейкеть! Тенсек, инязор, президент, генерал, прапорщик, шахтёр, певтеме сюпав, вальмалга якиця-пурныця... — весе вейкеть. Монь койсэ, а истя: вейкетьксчи косояк арась. Мик Тоначисэяк. Ве сёрмасот, виде, ушолить теде кортамо. Ялатеке, витик мелем, сёрмадык: кода алкукс тынк Тосо тень кувалма? Блат, кода кортыть рузтнэ, ули-арась?
Истят мельтькак пачколить превезэнь.
Тынк Кулава Пазонтень улема аволь превкептернекс — превень сэрейдеяк сэрей пандокс. Сон, монь арсемга, истямо улияк. Ламонь содыця, а талакалиця, кельме седей, васов неиця, видечинь кирдиця... Эно кода лиякс? Паз — теньсэ ёвтазь весе. Тынк раськенк Модалангонсенть коряс ламоксть седе покш, те кода иневедесь ды ведьбайгинесь. Кияк а соды, зяро эрицянк. А лововить. Секскак прязо Кулазораванк, улема, покш паргошка! Содык эрь, ков кучомс, кодамо таркас совавтомс тень эли тонань. Кода улемс, зярдо ве пизэсэ эрить вечкемась ды пень а содыця, пейсэ чикордыця кежтне, салыцясь ды визьксэнь содыця эрицясь? Савиндеряй теть вастовомс кодаяк апак учо Мартонзо, кевкстик: кодамо тарка-эзем аноксты тень Кулозень Масторсонзо? Коррупциякс, томбалькс кельсэ ёвтазь, те а ловови Тоначисэ? Ужо, ужо, [50] атя, иля эрязкале, а мезть кевкстнемс! Кадовсь тарномс тень аламо, сан — Сонсь ёвтасы. Эстень.
Вана теть ёвтнеминеть, невтемань кис, эрьва кода — пижестэ, якстерестэ, сэньстэ... — артозь «вечкемадонть». Мекс «кечказнэсэ» пирия валонть, арсек.
...Тон эзик стувто Керькужонь Витюшонь? Сон минденек сырель. Войнасто сакшнось ве пильгевтеме. Эрясть Керькужт Пичепень песэ. Чарькодить, киде кортан, ледсь мелезэть? Кеман, эзик стувто, кода вечкилизе ды прянь ёмавтомас ёколк-ёколк пансесь Витюш Вачаень Маруся мельга. Весе велесь содась сынст ютксо гувныця толдонть. Витюш аноколь омбоце пильгензэяк максомс тейтеренть кис! Мельганзо якась, мандынензэ лангс нежелезь, теке сулей.
Маруся — кеман, эзик стувто — тетянзо-аванзо мелест каршо салава-салава веть оргодекшнесь вечкевиксэнстэнь, Керькужтненень. Велесь лажнось те кулядонть. Кода а лажномс: тейтерь лаш веть салава оргодсь чачома кудостонзо алужонстэнь. Мельсэть?
Ды мезе тень эйстэ, те ине, те гурсо палыця вечкемастонь лиссь?
Урьвакстсть. Эрясть ие, омбоце. Сонськак цёрась эзизе редя, кода теевсь кияксонь шлякшныцякс. Варчика тень теемс ве пилысэ! Шкань ютазь Витюш пачкодсь нинзэ нуланзо-палянзо муськенемас. Ков эно молят, алтакшныть кедь лангсо кандтнемс вечкемат — кандтник! Тусть эйкакшт. Вейке, мельганзо омбоце, колмоце... Нурькинестэ ёвтазь, прядовсь «гувныця вечкемаст» ченькс мельга чийнемасо. Паро, эзь тонадокшно тенень кармавтниця, цёлак Маруся. А вана Витюшонь виензэ эзть сато. Яжизе палыця ведесь. Шкань ютазь та-кодамо ормадо кулось Марусяяк.
Те теть вейке «сортонь» вечкема... Шашттано седе тов.
...Чадыведь шкава чирестэнзэ лисниця леесь чипаенть вановтто сырнекс кувтолды. Келей-келей! Сельметь а саевить иневедекс сравтовозь веденть эйстэ. Седеяк васов тукшны-сравтневи лосьсэ валыця пиземе шкасто. Лиясто натой а кемеви: кирдиця пирявксстонзо лисемстэ истямо мазый, сельмень кецневтиця леесь ваявтни-копачакшны [51] ламо ломанть, велеть, ошт, яжи-калавты кудот-чить, уцяскат.
Вечкемаськак...
Вана омбоце, невтемань кис, ёвтнемине самай те вечкемадонть.
... Содавиксэнек — тонь ды монь — Чевгеня, минденек байтяксто од ава, тердимим инжекс. Тувталось — мирденстэнь, Микольнень, топодсть кодгемень иеть. Ну кода а тешкстамс истямо датанть! Ломантнеде серьгедсть зярыя, колмо столь экшс цяк кельгинек. Ойсинек. Цёратне пештизь цирькунонь пильгень эчкесэ бокалтнэнь човов симемапельденть. Сонзэ эйстэ, чововстонть, кода сеедьстэ тейнить, ушодовсь серьгедезь чокшнесь. Валт-арсемат ёвтасть Чевгеня, содавиксэст, Миколень ялганзо, эйкакшонзо... Кода свал, морамот, киштемат.
Прядома малав Чевгеня сайсь мель кепедемс бокал ды ёвтамс инжетненень сюкпря самост кис. Эзь кенере авась кургонзо панжомо, дирнезевсь совамо кенкш велькссэ баягинесь: дирь-рь-рь, дирь-рь-рь... Виевстэ, марявиксстэ, прок кияк кирвазсь. Та-кие панжсь. Серьгедизь азораванть. Чевгеня путызе кедьгензэ, лиссь. Лиссь... ды ёмась. Учотано — арась, учотано — арась. Мезень тамаша?
Иланть ветясь Миколь. Кортась, пеедькшнесь, згилясь. Ялатеке неявсь — седейсэнзэ киштсть анамазт, сыремтсть а паро ёжот. Окойники эзь кирдеве, лиссь аванть мельга. Васня ульнесь а куш а каш. Аламос аштезь каятотсть пижнема вайгельть, зэрть. Совась, кода мерить рузтнэ, юбилярось. Чамазо якстере, кедензэ сорныть. Бажась пря а невтемс, пеедькшнезь-згилязь ютась икелев. Кодат а невтемат! Совась низэяк. Столь экшка аштицятне теизь пряст а редицякс. Снартнесть мик серьгедемс моро. Ялатеке... «Мезе лиссь? Мезе теевсь кенкшенть тона ёно?» — кирдевсь, марявсь, эрьвань превсэ. Зярыя шкань ютазь кудонь прявтось мерсь пештямс рюмкатнень ды теке басом ёвтась зярыя валт, нинзэ сялгонезь, кодамо-бути азгун, ансяк эстест нитненень-полатненень содавикс, вельть копордазь, кода мерсь юбилярось, алядо.
[52] Лиссь колазь, беряньстэ прядозь се чокшнестэнть, мезде пачтясь келянь радиось, оно кодамо а мазый тев.
Од шкастонзо велесэ эрямсто Чевгенянь ульнесь алужозо. Кода сеедьстэ эрси, лиссь тейтересь, сась шказо, лиянь экшс. Аволь аламо иеть эрясть вейсэ. Эзь кадово, содазь, ськамонзо Чевгенянь вечкевикс оязояк. Урьвакстсь, тусь од нинзэ марто чачома велестэнзэ паро эрямонь вешнеме ошов. Шкань ютазь Чевгеняяк мирдензэ марто пачкодсть тей важодеме-эрямо. Эрясть семиятне вейкедест-вейкедест васоло. Ошось аволь вельть уш покштнеде. Секскак те «васолось» вечкицянтень а пирявкс. Зярыя иень ютазь муизе Чевгенянь умонь шкань алужозо. Ютасть ковт-иеть, ды кись, ков эряви понгомс, муевсь. Салава-кекшнезь кармасть, кадык чуросто, вастневеме. Вечкема... Мутанзат, кирвазиндеряй, ков иля кекше.
Се чачома чись, мейле маринь, туемадонок мейле прядовсь сельведьсэ, покордамосо, вейкень-вейкень певтеме инзамосо. Мокшнатнеяк, секень вант, эстест тев мукшность. Куроксто, пачкодсть тень кулят, Чевгеня ды Миколь мирдезэ, вейсэ эрязь ламо иетнень лангс апак вано, эйкакшост апак кунсоло, явсть.
Вана теть, Вияна, мезе алтакшнынь, — омбоце «сортонь» вечкема. Ну, кода тон арсят теде ды тонадо? Мезе мерят самай те прясто пильгс шназденть?
Кирдть, иляк лавшомгавто нардеть, казян теть, дугинем, «колмоце» вечкема. Кунсолок.
Ульнесь велесэнек истямо уликсчияк.
Кирдевсь-эзь мельсэть Аржаень Алёнь уцясказо? Покш куринкань. Содылик, содылик.
...Сакшнось армиясто — кадовсь ледстнемакс, ванынь лангозонзо сельмень сявадозь — сэрей, погон марто шинельсэнзэ седеяк мазый, стёжна, вересь эйсэнзэ налксезь налкси, натой чама киськезэ Якстерть мери, мерят ушосонть цятор якшамо. Мизолды — маряви, чипаесь сёксень пельтнень удалдо кончтни, мартот налксеме арси.
Чиявтокшнызе цёрась Кандянь Танянь. Низэ Алёдо эзь кадовкшно: а шумбрачисэ, а мазычисэ. Тевсэ — [53] поладонзояк дошузоль, эрьва тевесь налксезь налксесь кедьсэнзэ: колмо ават мельганзо эзть кенере.
Мезе лиссь тевсэ-чачосо мазый кавто неть ломантнень марто — менелесь соды. Ды, паряк, сонсь Таня. Але каякшнось, марсить, кирьгаванзо килькш. Эрякшностькак кавто-колмо иеть. Ансяк. Ды вант мезе лиссь! Келятнеде кодат ансяк эзть яка велеванть. Истямояк злыдардсь: Але стардызе нинзэ фермань прявтонть марто. Таня, парсте содылить, андсь тосо вазт. Неть, превть иля яжа, лытагай кортамот. Теде-аволь ёмавтызе прянзо мазый, дёр цёрась, содык азё. Мирдензэ Тов туемадо мейле Таняяк кувать эзь эря. Те чахраськак шкадо икеле рипакадсь, нолдызе прянзо. Мезе ютксост ульнесь, алкукскак, сынсь содасть. Вана теть... вечкема.
Вана кодат латкос нолажтомат лиснить, ды аволь чуросто, эрьва кода шназь-моразь, кинотнесэ ды книгатнесэ менельс кепедезь вечкемадонть. Ромео ды Джульетта? О-о! Тристан ды Изольда? О-о! Онегин ды Татьяна? О-о! Мейсэ прядовить книгасо ёвтнезь инеде ине неть вечкематне? Кевкстнемс а мезть.
Паряк, тон, Тоначинь ломань, ёвтасак: превей, ве лувсо, парос ветиця вечкемат улить эли ульнесть зярдояк Модамасторсонть? Эли те арсевкс? Содавлия тень коряс мелеть.
.. .Я! Допрок стувтокшныя: тон, Вияна, энялдокшныть пачтямс кулят-кулинеть Паксютонь Марюшто, од шкань-налксемань ялгинедеть. Нолдык, кстыйнем, чумом — стувтокшныя ёвтамс. Вариясь, сави видькстамс, колганось. А кирди. Сувтемекс велявтсь. Иетне монь, парсте содат, аволь тундонь, ды уш умок аволь сёксеньгак, мезеяк а теят.
Марюшто...
Ютазь кизна пачколинь велев. Савсь кудов молемстэ ютамс Келей курова. Паксютонь ней тосо эрить. Эскелян асфальтсо вельтязь, венежасто веревпандт кузиця кияванть Понкспе ёнов. Ваннан, велявтнян прям вить-керш пелев. Снартнян ледстямс, кинь те, кинь тона кудось. Стяко. Чуросто, пек чуросто содавить. Сетнеяк юртонь коряс. Минек шкань кудотне, Вияна, ваясть шкань ведентень, лепиясть.
[54] Паряк, сыньгак пачколить тынк Масторс? Олгонь лато ало кукорьгадозь кудот тынк Тосо кодаяк эзть ванстово? А? Арась, маряви. Улевельгак истя, сёрмадовлить: «Эрян чувтонь (эли кевень) кудынесэ». Чачома веленек, дугинем, ёмась. Сон ванстовсь ансяк превсэнек од шкадонок ледстнемакс. Течинь велесь — велесь а минек. Сон — ят веле.
Ким ёнов, ванан, эскели аваломань. Лангсонзо, кизэнть лембензэ лангс апак вано, лембе ковта, пилысэнзэ кумажа видьга понань покш кемть, эйзэст тонгозь колошат. Прязо тапардазь нулав лембе шальсэ. Прок нецяй. Тандадат эйстэнзэ. «Те кие, кие истямось?» — арсезевинь неезденть, вановтом апак сае. Кинек чекавсть. Вастовинек. «Инешки, кие те аваломанесь?» — яла тень эзь кемеве, юв-яв ютась пряван омбоцеде.
— Марюш, тон? — кавтолдозь пшкадинь матразь, эль а тошкиця вайгельсэ.
— Валдай, тон? — кевкстимим сон теке кевкстемасонть ды теньсэ амзордымим: каня монгак истямо сырян, истя тандавтнян? Вай, авакай!
Раужо сельмечирькетнень алдо лангозон вансть раужо пупиця сельметь. «Вай, ды те алкукскак Паксютонь Марюш!» — окойники сынь мельс. Сельмензэ... Мазычистэнзэ лия мезеяк эзь ванстово. Мезеяк. Бути невак вайгелезэ. Сормсевезь чамазо прок вакан, келейгадсь, турванзо эчкелгадсть, улозо новольсь. Шаленть алдо неявсть пилензэ велькссэ шержей черензэ. Тандадат! Лангозонзо ваномсто тюнголькс ёжотне эйзэть эцезь эцить. Эх, сыречи-сыречи! Ульнесь куронь тейтеренек ютксто сехте редявикс, сехте мазый, ней... Ашайнень — сэрей, мазый чачо-рунго, валдо черь цёрантень — савкшнось келямс, мельганзо яксезь, аволь аламо. Кода а пансемс истямо мазыйненть мельга?! Ней вана...
Иеть-иеть, мезе тынь тейтядо! Допрок полавтынк веленть, кудотнень, чувтотнень, полавтынк, теинк а содавиксэкс ломантнень... Лиякстомсь натой кудотнень удалга свал ков-бути капшиця, озязтнэнень кумажа видьга лейнеськак.
[55] Ковгак а молят — одось сыречивтеме вий а ташты, а эряви. Мезе сон, одось, теевель, аволь улеяк сыречись? Косто саевель?
Ламодо тенек, куро куншкасо аштезь, кортнемс эзь саво. Паксютонь Кодатольть — содат: валсо сувтницят, а менят эйстэст. А учовиль, зярдо сувтневильть куляст. Ней вана... Путнесь Марюш валтнэнь, прок кирьпецть. «Инешки, мезе теевсь ломаненть марто?» — эзь лисне превстэнь каршонзо аштемстэ. Секскак ламо-ламо иень ютазь вастовоманок нурькинель. Мейле уш, кудосо, поладыя те аванть уцяскадо исковамом патянь пельде.
Видестэ редязь: эрямонь чанстесь аволь свал ды аволь ансяк мазычисэ. Марюш, Ашайгак, мирдезэ, оно кодат мазыельть! Кинь эзть сявале сельмензэ, лангозост ванозь? Эрямокист вана эзь ацаво. Путсть кудо. Аволь кудо — горниця. Вальманзо кемень, покшт, ваныть лембе ёнов. Ансяк вана эрить ней эйсэнзэ... кавонест.
Чачтокшнось Марюш кавто цёрат. Эсест кондят: покшт, шуморкст, мазыйть. Чамас тусть тетякс — валдо, ашолт мериця черть. Сельместкак тетянть — сэнть. Кавонест кенерсть нолдамо эйкакшт. Лиссь, мезентень лисемаль. Покшось важодсь тракторсо, понгсь, симезь ульнесь, тракторонзо алов. Кадовсть тетявтомо кавто цёрынеть. Те Марюшмезнень ульнесь шумбрачист ланга васень эшкевкс, виень солавтыця ризкс. Омбоце цёраст туекшнесь ошов. Тосо «бутрав шкатнестэ» маризе ярмаконь чиненть. Весть никстясь, омбоцеде... Мелезэнзэ тусь. Ушодсь бизнэме. Ну и... Мезе тейнить ней, а сестэ седеяк, ярмактнень кис? А содат? Тоначисэ теде те шкас а содыть? Визькс ёвтамс: леднить вейкест-вейкест, печксить. Маштызь бизныцянть. Те ульнесь Марюшнень ды Ашайнень эрямонь киртиця омбоце риштямокс. Вана мекс, тейтерь, сехте малавикс ялгинеть коськсь ды сеске тень эзь содаво.
Азаргадсть, Вияна, ломантне. Минек од шкастояк, седе икелеяк — эрявсть ярмакт. Свал эрявкшность ды свал эрявить. Эрьва кинень ды эрьва косо. Ансяк сестэ, Советтнэнь шкасто, сынст эйсэ эрямось эзь прядовкшно, васень таркасо [56] чондатне арасельть, та-кода ве ёнольть. Мезе ней моли... сынсь пазтнэяк а содыть! А эрзянсесь, а евреенсесь. А менеленсесь, а модаалксонсесь. Косто тенст содамс? Тевтнень тарказост яксевтить ятост, эрзянь Идемевсесь ды рузонь Бесэсь. Сынь моданть ды велькссэнзэ сэнь латонть лангсо прявттнэ. Секс истя даволокс чаразь-велязь тусь эрямось.
Кевкстнят од шкань мородонок... Те сёрманть мельга сеске кучан омбоце. Эйсэнзэ улить ледстнемат Пупоронь вальмало морсезь моронь «репертуардонок», ледстнемат сеть зярдояк а стувтовиця, кизэнь маней, коввалдодо пешксе чокшнетнеде.
Зярс, Вияна-чивалдынем, саты. Сельминень, марян, оймсеме тердить. Мендердинь теть велькска кептерь. Ловнок ды ловнок. Мезе а истя, ёвтак; иля визде, иля пеле.
...Тынк Тосо, алонок, а содан, мезе моли. Улить, эрсить кодаткак полавтовкст? Тесэ, Вияна, менель ало... Течи якшамковонь сисемеце чи, телень седей, а ушосонть, мереват, тундо, тундокс валы пиземе. Паксятне кой-кува штавтовсть. Меляткак те шкастонть текекс кольгсь менелесь. Мезе карми седе тов, ломантне мекс-бути а мелявтыть. Мекс сынь истят казямо седейть, мекс истят эсь прянь вечкицят ды аволь сюпавт, визькс ёвтамс, превсэ? Мекс эрить ансяк течинь чисэ?
Умонь-умонь вечкицят Валдай. Тесэньчи, 2000-це иень якшамковонь 7-це чи.