Тесэ ды тосо (2013)/6
[34]
| * * * |
| Котоце сёрмась |
Эрицянь Масторов, Учаень Валдайнень, умонь ялганень
Шумбрат-парт, Валдай!
Моньгак, Валдай, седейсэнь пинеть раздесть седе, мезе лиссь сестэ минек ютксо. Кода-бути весть чокшнеланга ледсь мелезэнь васень вастовоманок, кизэнь маней се чокшнесь. Сон, се ледстнемась, матракшнызе зярс-бути седеень раздиця ризксэнть.
...Кода свал, пурнавинек, Пичепень од ломанть, Пупоронь вальмалов. Вете стенас покш кудось чаволь. Азоронзо эрясть косо-бути васоло ёно. Удомат а кинь ульнесь сезнемс. Секскак тесэль куринкань киштема-морамо кужонок, пелеведе мейлес вастневема тарканок. Зяро тесэ морот морсевсть, зяро киштемат киштневсть, зяро седейть вешнесть-вечксть вейкест-вейкест! Кие сынст ловсынзе? Кинень эряви те ней? Ваясть, булдыркак эзь маряво, шкань леентень. Мекев а таргасыть. Эрямось мурдамот а соды. Ней — содан, кадык Тоначинь ломанянгак, — од ломантне минекекс а пурнавкшныть. Гармониясь умок стувтызе Пупоронь вальмалов тикшинесэ вельтязь кинть, умок, арсян, кандызь музейс.
А марят, пилеть зяро инеть стявтне, морынеяк. А кинень сонзэ ушодомс-таргамс. Чамсь велесь. Кадовикстнэнень рангить, сизема а содыть, эрьва кодат магнитофонт-мезть. Секскак [35] неень одтнэ, зяро кадовсть пельсчаво велентень, а маштыть а морамо-киштеме, а ломанькс кортамо. Вал тенст а ёвтави! А эрзякс, а рузкс. Вана мезес пачтизь одтнэнь неть «электро-вайгельтне» ды лиятне. Мезеяк а эряви теемс, маштомс, максомс, содак вейке: сайть, сайть, сайть.
Ужока, Валдай, мон ламодояк ламо иеть Тоначинь ломанян. Паряк, а видеть валон? Кадовинь? А? Вере, тынк эрямосо, меельце шкастонть лия койть эзть пургонда? Велесэнть эрямонь леесь лиякс чудеме эзь ушодо? Паряк, лиякс тынь, эрицят, кармиде шканк ютавтомо? Седе превейстэ, эсь прянк апак кольневте? Моротнень марто оякс одс эзиде тееве?
...Се чокшнестэнть сыть минек юткс васенцеде. Араселить седе икеле велесэнть. Талай араселить. Иешка. Сыть — абунгавтымизь. Лангсот — ашо, прок лов, парсеень панар, пильгсэть — ашо котат. Тюнихань тевть! Карень, якстере потмо колошань, дёготьсэ ваднезь кедень кемень таркас — котат, ды... ашот. Тевесь аволь ансяк оршамопельтнесэ. Тон куронь од цёранок коряс ульнить, редякшныя, валсо-мельсэяк лия. Теде башка, лангсот ульнесть истят ванькс-мазый — питнейтькак, бешоконь, — понкст-панарт. Ошонь цёра, мезть кортамс!
Тон аштить озадо чочко лангсо. Чатьмонить. Ванныть, кунсолыть. Минь, мон ды малавикс ялгам Паксютонь Марюш, зярдо сась кирданок, лисинек киштеме-морамо. Киштема кирькссэнть чарамсто кепедия вановтом лангозот, ды кивчк ютась пачкан вечкевикс лембине ялтке. Совить превезэнь ды оймезэнь. Сеске... Лип мерезь. Мельганок лиссть киштеме лият; чокшнесь эскелясь эсензэ кива.
Эринек ве куринкасо. Кужодо мейле кудотнень икельга таргавозь яннэсь ды велькссэнек сэняжа тюс келей чама ковось ветимизь, эзимизь кевкстнеяк, минек кузтемпес. Мельсэть? Эзик стувто? Кеман, арась. Озынек эземнентень. Кортазевинек теде-тонадо. Вечкемадо валнэяк эзинек ёвта. А мон, а тон. Ковоськак теде эзь ледстне, вансь чатьмонезь. Кодат видькстамот васенцеде вастовомсто?
Шкась мольсь, ковонть эзь кунсоло. Савсь ёвтамс [36] «вастомазонок» истя а вечкевикс валонть. Явовомадонок мейле кудос совинь аволь ськамон — седейсэнь кирдевить тон.
Выр-вар кайсинь ды эцинь велькс алов. Кувать эзинь матедеве. Яла гайгсь, пилень кутькавтсь вайгелеть, аштесть сельмень икеле парсеень ашо панарот, чамат, зяроцеде уш ютасть пряван кортамонь валот.
Истя, сяткинем, кизэнь тештев вестэ панжовкшнось, прок лугасо тундонь якстере баляга, минек вечкеманок. Чачома Масторсо эрямосон ды тесэ, Тоначисэ, кадовсь се талай чокшнесь весемеде валдо, седеень весемеде эждиця тешксэкс.
Ней, зярдо Тоначись умок уш, кемнилее иеде ламо ютасть, теевсь тень эрямо масторокс, шкань-шкань содавтнесамам мель: «Вечкилитинь? Эли те мезе-бути лия ульнесь? Валсо а ёвтавиця? Мезе?».
Вастневинек се чокшнеденть мейле сёксень нусманя ожо шкатнестэ, тельня, тундонь нурькине, цёковонь моросо морыця ветнестэ; явновинек ашолгадома ланга. Кодат веть вечкицятненень панжиковонь ветне? Ве зорясь мади, кирвази, Якстерть мери, омбоцесь, валскенсесь. Ансяк варштат вечкемат сельмс — явома. Валске марто... Ули-арась мелеть — стяма, тевтне учить, сынь теемат.
Умок, Валдай, оймасть минек цёковонок. Экше, ванькс, ламарень чинесэ лексиця коштсонть вайгелест, марявсь сестэ, кайсететсть масторонть келес. Ней сынст цёкордомаст эрить ансяк а токныця седейсэнь, пачколить тень сэняжа тюс сувонть ды кевень, лепштиця потолоконть пачк. Кулынь талайде, талайде мештесэнь а чави оймсемань а содыцясь. Тонь марто ютавтозь сеть мазый, ванькс читне-ковтне кадовить мельсэнь шкадо икеле сезезь куконь эрьгекс.
Тесэ, Тоначисэ, ламось икеленсестэнть неяви лиякс, седе манеекс ды кенярксонь раштыцякс, секскак тагояк кевкстнян эсь прям: «Вечкилитинь?». Тесэнь кевень менеленть ало эрязь, ламодояк ламо иень ютазь, апак арсе мезеяк а ёвтави. Маряви, вечкилитинь. Бажинь улемс мартот, марямс вайгелеть, ваномс сельмезэть. Содылитинь эскельксэнь коряскак. Теде башка, ульнить тень оякс, кеме [37] нежекс, кецнемань лисьмапрякс. Видестэ кортан, Валдай? Авань превсэ, теке марто, а изняви лиясь: мекс эно сестэ эзть пра вейс эрямонь чудикерьксэнек?
Содылинь: тонь мелеть ульнесь кемень классонь школат прядомадо мейле поладомс тонавтнемат. Ледстнить, ёвтнить а весть. Чарькодевиль тень, мезес те пачтясамизь, валтомояк. Ялатеке седеем эзь маря, эзь кеме. Мелезэньгак эзь сакшно: юты шка, келемтьсыть сёлмот ды, прок карго, туят васов ошов эсь уцяскат вешнеме, мелеть топавтомо. Эрьвась соды: эрямонть кинзэ аволь певтеметь, Тоначись весень учи. Ялатеке кияк а арси теде. Теке Сон араськак. Эрьвась теи ды теи эсь тевензэ. Моньгак сестэ истя ульнесь, эзинь арсеяк, вейсэ якамонь кинек карми нурькине. Варштамояк эзть совсе мельтне: тон арсят тонавтнеме седе тов, а монь классон ансяк... Вечкицятне, бульчом, весе истят: валскень чиденть а пек арсить.
Лиссь сёрмасот сёрмадозенть коряс.
Кадовинь чачома велезэнь. Ськамон. Минек бажамотнень-арсематнень, чокшнетнень-вастневематнень весе-весе саить мартот тов, покш, шалтто пешксе сэнь ошов. Кадовинь ськамон. Эзинь сода, мезе теемс. Тошначись сюворясь седеем эрьва кода. Кортан ялгам марто — вайгелесь маряви тонь. Икелень кить иляст уле, неян тонь сельметь, рунгот, молевксэть. Ютан кудонк икельга, учан — лисят. Ёмавтынь, прась эйстэнь, марявсь тень, мезе-бути покш, вельть эрявикс. Маринь прям киненьгак а эрявиксэкс. Зяроксть онстон некшнитинь, а ёвтавияк.
Аламонь-аламонь карминь «аразентень» тонадомо. Лездасть кудоютконь ды вейсэнь-колхозонь тевтне, ялгань марто вастневематне. Сынтемест, некак, врадовлинь. Содат, Валдай, мезес ансяк а тонады ломанесь! Превс а саеви!
Ютась ков, мельганзо омбоце...
Ульнесь сёрмав, ашо-раужо рунго сёксь, ульнесь Ине Октябрянь покшчи.
Сыть васоло ёнксонь тонавтнема ошстот тонгак. Кода пачкодить, кодат стакачить печтить, сёрмасот ёвтнить.
[38] Вастовинек, мельсэнь, чокшне, од ломанде пешксе клубсо. Лангсот ульнесь сёксень раужо пальто, прясот фетрань чоподасэнь шляпа, пильгсэть котат. «Ошонь ломань! — ютась пряван, зярдо неитинь. Мон, кода мерить, колхозница... Киштнематне-морсематне, гармониянь викнемась, шалтось тенек эзть эряво. Лисинек ушов.
Тон уш, Валдай, теде сёрмадыть. Нолдык чумом, мелем ёвтнемс аламнеде лиякс, эсексэнь. Вадря? Истя эно.
...Пракшнось, паряк, ваньксчидензэ виздемадонть куроксто солыця васень лов. Сон валдомтсь сёксень чопода чокшненть. Ютынек Крёст сэденть. Кедте кедьс кундазь эскелинек Пичепень кудотнень юткова киванть. Лисинек, апак капша эскелязь, велепес. Кортамот, кортамот... Прок аволь кавто ковт эзинек вастневе — кавто иеть.
Саты. Омбонь кирда а мезть ледстнемс.
Тон уш, Валдай, кой-мезе сёрмадыть сёрмасот од ловсо мазылгавтозь сэтьме се чокшнестэнть эйсэнь редязь полавтовкстнэде. Сельмень ды турван, а кавтолдан, ламодо кортасть. Содат, визькстэнть эзинь сода ков теемс прям, аноколинь туемс модань пачк. Седеем, марявсь, ангорясть пинеть. Весе потмом лакась. Ялатеке мель путынь алкуксонь ёжом а невтемс, кармавтыя эсь прям кортамс пеедькшнезь.
Монень маряви, тон сестэ ламо мезе эзить чарькодекшне...
Мон тонь... эзинь учо. Седеяк — само шкат малава. Пелинь...
Палымик чамас, турвас. Турват ульнесть псить, ансяк паламот паламосо эзия пандо. Марявсь, теке кияк саизе ойме вием. Тон, мездеяк апак сода, снартнить, кода маштыть, идемс монь те ёжодонть: кутморить эйсэнь, палсить, бажить вельмевтемс кортамосот. «Кадомак, кадомак, пайстомо, тон мезеяк а содат!» — ульнесь превсэнь. Ульнесь мелем, аволь кода икеле, седе курок прядомс вастовоманок.
Кизэнь се вестэнть мартот явомадо мейле ковшкань ютазь вастовинь весть, омбоцеде, колмоцеде... лия марто.
[39] Вастневинек тонавтнеме туемадот мейле ожоковонь перть. Вечкилимим-арась седеень од эждицям, теде седе тов теть сёрмадан, те, чивалдынем, лия кортамось. Сёпомо а карман, тон сонзэ, лангозон сельмень каицянть, содасак — Шалань Кирин. Кода а содасак? Каршонок эрясь. Сэрей, теке палмань, аволь кода тон. Одёр цёра. А стяко удалга мерилинек тензэ Буринань Кирин.
Покштям, Лемаень Дандай, истя мериль: чумонь теицянтень чумось ськамозонзо а тееви. Превеель атясь, васов неицяль.Теевиндеряй, келя, кавтотнень ютксо лазкске, чумот кармить кавонест. Минекак истя лиссь. Тон туить тонавтнеме. Урьвакстомс лангозон вал эзить максо. Мон тапавинь, нолдык чумом те берянь валонть кис, лия марто. Кие чумось? Монсь, васняяк. Кие эно? Свал-свал ушодома эсеть эйстэ. Кинь-кинь, тонь тазямс а мезень кис. Тон лия ульнить.
Кирин?
Сонгак. Содат, Валдай, те алясь теке чопода вень буря каявкшнось лангозон. Аволь кода тон.
Тонь обуцят содаса: седеймариця, мелень ваныця, манчемань а содыця. Лиясто мик мурниньгак эйсэть эсь пачкан тень кисэ. Тонсь арсек, кавто иень перть паро ладсо, псистэ эзимик палсеяк. Пачколинь кавтолдомаскак: кодат вечкемат истямонть пельде? Прок пели эйстэнь. Превсэнь теке марто кирдевсь лия, чарькодилинь: тон кецнят кедьсэть кирдевиця пусмонтень, ванстат тейтерьксчим, ванстат монь, монь мазычим. Секскак каилик кедеть лавтовом ланга ды палылимик салавань паламосо, прок эйкакш, виздезь ды теке пелезь.
Тон, Валдай, аволь кода кой-кить — чарькодить, киде ледстнян? — ловить ояксчинть, вечкеманть пазонь казнекс. Мелеть валдольть, ансяк празь ловонть кондят ваньксэльть. Секс истя арнимик, истя дёлялимик.
Ней, Модалангонь морон морамодост мейле, истя меревлинь: вечкимик алкуксонь, кенгелемань а содыця вечкемасо. Ульнинь теть кувтолдыця Валскень тештекс. Янксян, Тоначисэяк янксян: тонь вечкеманть валдозо тень [40] эзь ванстово. Эзь кирдеве. Стакаль. Сёлмот вельть келеельть. Вельть уш правтыть содамочитнес.
Аватне, ламонь пельде марсинь, ваньксстэ, седеень витезь вечкицятнень а стувтнить. Куломадост мейлеяк. Мон эйстэст вейкесь.
Истят мельтькак содавтнесамизь: улевлитькак седе набой, паряк, аволинек явояк.
Кода тон арсят?
...Се васня тантей, ламбамо, мейле сэпей-сэпей весь, тусто чопода пельсэ копачазь се менелесь эзть стувтово куломадон мейлеяк. Кирин алясь, тагояк мерян, атон. Тон, Валдай, ливтницятнень эйстэ. Бажить куземс пельтнеде верев. Та-кодамо вий тердсь эйсэть икелев, васов, чанстте пешксе сэнь масторов. Кирин... Вай, стувтыя теть ёвтамс: сонгак тесэ, Тоначисэ, уш зяроце ие. Ды мезть вайкстнемс! Тонськак, кеман, теде умок содат.
Те алясь, куроксто карминь содамо, ульнесь, кадык истя ули ёвтазь, «яксицятнень» эйстэ: эзь вечке кувать кирдевемс ве таркасо, эзь сорно те эли тона сэнь баягине тикшенть сеземстэ. Мон сеске, васенце чокшнестэнть чарькодия, ков правты, кодат мельть-арсемат прясонзо. Чарькодия, ды...
...Весь чоподаль. Поцердсь сёксень човине, нузякс пиземе. Коволонь-ковол пувась шканзо коряс лембе варма. Васня аштинек минек кузтемпесэ. Косо тонь марто вастневинек. Мейле муинек седе коське тарка — совинек тикшень кирдема латалов. Озынек. Кортнинек эрьва мезде, пачкодинек чиявтомань тевтнес, зярдо-кода, кодамо чистэ кучи тень Кирин кудат, зярдо ютавтома свадьбанть, кинь тердема, зяро каванямкат-мезть эрявомо кармить... Кортавтынек икеле шкань мелявксто пешксе тевенть эрьва ёндо, штельксэнь пес.
Эзинь фатяяк, кода Кирин, аламнеде виень путозь мадстимим тикшень алксонть лангс ды каявсь, прок превстэ лиссь, палсемень: турван, сельмень, чамам, коням, прям... «Мезе, мезе истя теят мартон, кадомак!» — кирдинь превсэнь, ёвтамс мезеяк эзинь ёвта. Чатьмонинь. Превень [41] веляськадсть. Эзть сато виень тутмадемс штапо пильгень ёжова нолдазь казямо, кельме кедензэ, стямс. Каршо эзинь моле. Кадымим ёжом. Мария ансяк, кода аламнеде сэредьксэнь пачк совась потмозон цёрань вий. «А-а-а...» — меревинь, оймем кувакасто таргазь.
Вай, Чипаз-Верепаз! Мезекс теде цёранень ёвтнемс? Сёрмадан, сёрмадан... Допрок визьксэм ёмавтыя! Седе пароль а ледстнемскак чопода-пиземев се венть. Улевельтькак сынь, ледстнематне, сёлмовтомот, ней вана... А кунсолыть, куш зярдо ды куш косо стардтадызь.
Содавлитькак, зяро сельведть седе мейле валынь, зяро покордамонь ды сёвномань валт маринь. Кемекшнинь, кемекшнинь! Паряк, аволинь тееве истямо пайстомокс, аволияяк стувто эрзянь кезэрень коенть: цёратне прянь а ванстыця тейтертнень никс эзть сайне, весть манявицясь маняви, кортасть сынь, омбоцедеяк.
Видеть валтнэ. Байгинень пес.
Вана кодамо питне савсь тень пандомс кемемам кис. Ды кода а кемемс? Кортазель мик чиявтомань чиськак! Ды вант мезе лиссь... Вант мезе тейсь мартон... Киненьгак сестэ, лисни, а кемема? Теяк а тев. Кода эно улемс? Кода эрямс? Тонеть, тыненк, Течисэ эрицятненень, те кевкстемась. Миненек тесэ ней ялатеке. Кемть-иля, теде тенек а пси, а кельме. Манямс, кенгелемс... Минь тесэ неть валтнэнь а содасынекак. Вана истя, Валдай.
...Сёксень покшчис сакшномстот, меельцеде вастовомстонок, коштонь эрьва зэхельде ванстовиця тейтереть, васень вечкемат, уш пешксесэль. Сон, вакссот Пичепень кудотнень икельга молицясь, кандтнесь седеензэ ало лиянь пельде сюлмавкске, лиянь пельде нилькске. Секс кевкстнянгак: вечкилитинь-арась?
Ванонзат Инешкипазось. Тонь Вияна. Тоначи.