Тесэ ды тосо (2013)/7
[42]
| * * * |
| Сисемеце сёрмась |
Тоначив, Лемаень Виянанень, певтеме ламотнестэ вейкенень
Сырнекс цитниця тештеть теть, Вияна!
«Вечкилитинь-арась?» — ламонень содавикс неть валтнэсэ прядык меельцекс кучозь сёрмат.
Вечкилимик? Эно кода! А мезть, монень маряви, кевкстнемс. Лиякс кавто иеть мартон аволить яка, шка аволить ёмавтне. Кирин марто лисезенть кис, мезесь кадсь седейзэнь а ютыця румовкс, чумондомот а арсянгак. Монськак чуман. Теевлиньгак седе лиякс, куш кортавлинекак седе тов улемадонок, кеман, нарьгамс прят те шаншилэнтень аволик максо. Теяк: ули ушодкс ды ули пе. Теде ковгак а туят. «Кавтосто ансяк вейкесь чумо а эрси», — таго ледстясынь Дандай покштять валонзо. Моньгак ули чумонь таликам! Ули, ули...
Лиякс теемаль...
Кода? Стувтомс тонавтнемадо мелем ды кадовомс велес? Арась, арась, истя иля корта! Пазось тень лия ки невтекшнесь. Урьвакстомс ды саемс тонь, Вияна, мартон ошов? Паряк, истя теемальгак. Содави, чачтовлить. Мезе лангс кармавлинек эрямо? Кодаяк эрявлинек. Ногодон истя кайсезь, сан вана истямо аволь кецневтиця мельс: вечкеманок, Вияна, аволь нардевтнедель, стакачитне тензэ эзть изняво. Седе пек вечкинь, сави меремс, эсь прям. Секс явовомань пес-чирес пачкодинекак.
Валонть ёвтамс шождыне. Топавтомс алтазенть...
Мезе лиссь — лиссь. Вечкеманок эзь ванстово, эзь цидярдо.
Мурнемс? Тень кис а мурнекшнить.
Сюдомс? Тень кис а сюдокшныть.
Лезэ карми-арась теде?
Кинь мурнемс? Кинь сюдомс?
[43] Эрьванть эсензэ уцясказо. Эсензэ бажамонзо, изнявксонзо, потавксонзо ды мартост сюлмавозь ильведьксэнзэ. Эйстэст ковгак а туят, ковгак а оргодят.
Уцяскадонть, мерема, улить-аштить кавто мельть. Васенцесь: кодамояк уцяска, лия масторонь кельсэ ёвтазь, фатализма, Моданть лангсо арась. Эрьвась, келя, эрямокинзэ сонсь теи-валакавтни эсензэ кедьсэ-превсэ, эрьвась сонсь азор эсензэ лангсо. Омбонстнэнь мелесткак арась кунсоломс васенцетнень «теорияст». «Ули уцяска!» — кемекстыть сынь. Кияк эйстэнзэ, кортыть, а кекшеви.
Мон, Вияна, седе чиреман омбонстнэнь ёнов. Ули уцяска. Сон, лован, максови ломанентень чачомстонзо. Чачсь эйкакшось, мертяно, салыцянь-колыцянь эли ордакшонь пувозсо — те уш уцяска, ветямонзо, рисьмесэ кирдемензэ карми куломазонзо. Эли шкадо икеле, Вияна, кулось триця-кастыця ават, савсь теть кувать эрямс кежпарго, аксун од авать марто. Те каня а уцяска? Каня сон, зяро иля псилгале, каяви лангстот? Кие мерсь, оргодеват эйстэнзэ?
Кода илязо уле, ашосо артозь сундерьковонь се чокшнесь чопода ледстнемакс тень эзь кадово. Шкантень эзь олавтово. Ютасть иеть. Ниленьгеменде ламо иеть. Якстерестэ кувтолдыця седтне умок вельтявсть куловсо. Ялатеке се вастовомась ульнесь прок улкоть. Тонь лангсоль, кадовсь мекс-бути мелезэнь, сёксень нурька, чопода-сэнь пальтыне; лавтовот ланга нолдазель валдо-тюжа, чирева цёкине марто лембе паця. Мельсэть?
Сельметь а стакалгалить? А нувсят, ледстнеман ловнозь? Аволь кувакасто сёрмадан? Пачколить-арась седейзэть валон? Ёвтак, сяткинем, сы сёрмасот, иля визде. Иля янксе ютксонок лисезденть. Уцяскань кись валаня, кода содат, а эрси. Апак пракшно, апак пупорькшне сон, секень вант, киненьгак а изнявкшны.
Мезе а истя тапаринь, нолдык чумочим.
...Ней минек тесэ тикшень касома-кенерема шка. Лугатне учить пшти пелюмат, тикшень урядыцят, усксицят. Венельксэсь маней, омбоце тарго сэнь сулика менелесь эзь правто сельведнеяк. Ледезесь коськи чинь ютазь.
[44] Ютыть колмо ковт. Сы чувтотнень ожосо элякалема шкаст. Эзия стувто, ожоковонь 10-це чись — тонь чачома чить. Топодевельть теть кодгемень ниле. Сыречинть мазый шказо. Арась, эзь саво теть сонзэ тешкстамс Течисэ. Кемнилее иеть уш, кода Тосат, шкань а содыця Масторсат. Мезе теть арсемс? Улезэ теть седе паро Тосонь, эсетекс эрямосот.
Сакшнок мельсэ-арсемасо минек юткскак.
Паронь арсезь, икелекс вечкицят Валдай.
Масторланго,
1999-це иень аштемковонь 20-це чи.