Эрзянь Мастор/2003/15/Евсевьев М. Е. "раськень ят"?

←Нарочно не придумаешь

Эрзянь Мастор, № 15 (166), 12 августа 2003 редактор Нуянь Видяз, Кшуманцянь Пиргуж Евсевьев М. Е. "раськень ят"? сёрмадызе Нуянь Видяз

"Республика разрушается с помощью православия"→

Статья на сайте газеты: № 166, 12.08.2003, Евсевьев М.Е. "раськень ят"?

 

Евсевьев М. Е. "раськень ят"?

140-це чачома чизэнзэ

2004 иень якшамковонь 18 чистэ топодить 140 иеть Евсевьев Макар Евсевьевичень, эрзянь ине тонавтыцянть, ламонь содыцянть, эсь раськензэ вечкицянть, чачома чистэнзэ саезь. Те датанть тешкстамга 2003 иестэ Саран ошсо лиссь книга: “М.Е. Евсевьев: просветитель, ученый, педагог”. Сермадыцянзо Е.Г. Осовский ды И.А. Зеткина.

Евсевьев М.Е. кулось 1931 иень панжиковонь 10-це чистэ. Кулось апак учо. Кавто чинь ютазь туемаль тензэ семиянзо марто Московов эрямо-важодеме. Тень таркас савсь туемс тов, косто кияк мекев эзь сакшно. Калмазель Казанень Арс калмазырьсэ. Сеске куломадонзо мейле нинзэ, Агрипина Ермолаевнань, колмо иесэ церынензэ марто панизь квартирастонзояк.

Сескень куломась, нинзэ марто казямосто улемась, раштыть арсемат-кавтолдомат.

Анатолий Макарович, Евсевьевень церазо, евтнесь: “Авам кемсь, Макар Евсевьевич, тетям, кулось аволь эсензэ ормасо”. “Сонзэ травизь (отравили)”, — витькстась сон церанстэнь куломадонзо зярыя чиде икеле. Агрипина Ермолаевна кода маштсь ванстсь эсь прянзо ды эйкакшонзо пансемадо. Секскак кувать эрясть Чуважонь масторонь Вишка Карамалка чачома велесэст. Ансяк 1955-1957 иетнестэ састь эрямо Саран ошов. 1960-це иетнень куншка шкас бажасть Макар Евсевич марто малавикс чидест а евтнемс. Анатолий Макаровичнэнь савкшнось мик полавтомс аламнеде фамилиянзояк — Евсеев.

Ават-церат, пельсть, маряви, а стяко.

20-це иетнестэ Евсевьев М.Е. дневникстэнзэ ды блокнотстонзо сезнинзе-нардтнинзе “классовой вановтнеде” тешкстнэнь. Комсеце иетнень прядомга од, политика марто сюлмавозь ломантне чумондсть Евсевьев М.Е. кадовиксэкс, ташто мельсэ ваныцякс эрзянь культуранть ды содамочинть (образованиянть) лангс.

Кемемс-арась Евсевьев М.Е. нинстэнь: куловтызь мирдензэ?

Арсиця, васов ваныця-неиця, превей ломантне Россиясо свал ульнесть “ашо варакакс раужотнень ютксо”, свал вансть лангозост кода ят лангс. Сынст тапасть, леднесть, повсесть, кекшнесть кода маштсть. Ансяк кавто примерт. Тюрьмасто тюрьмас пансесть лелят-ялакст эрзятнень Дмитрий ды ялаксонзо Малышевтнень (Дмитрий Морскоень ды ялаксонзо). Наксавтызь тюрьмас Клюев Николаень, Есенин Сергеень ялганзо, маштызь Горький Алексеень церанзо, 18 иеть кирдсть ды ормалгавтызь тюрьмасо Кулдуркаев Яковонь, эрзянь Ине поэтэнть. “Органтнэ” содасть кодамо нежекс, виекс уливель эрзянь культуранть кепедемасо Евсевьев М.Е. ды сонзэ оймесэ-кедьсэ пурназь сюпавдояк сюпав материалтнэ.

Кемеват Агрипина Ермолаевнань валс тедеяк. Вельть ве енов молить, малавикст 1937-38 иетнестэ леднезетнень ды Евсевьевень семиятнень уцяскаст. Путозельть вийть: кекшемс сюлмавкстнэнь тетятнень-аватнень марто, теемс эйкакшост урозокс, кардамс сынст “ят” тетястост, кастомс тетянь-покштянь авечкицякс. Сайсынек, невтемань кис, Рябов А.П. семиянзо. Церазо, Ричард, эзь сакшно, кода эзинек терде, натой тетянзо 100-иень чачома чизэнзэяк.

Умонь шкань верев тевтне, кода кортыть, лангсот: Акай Боляй — сезнезь, Эрзямасонь Олена — пултазь, Елушев Бажат — повазь, Васильев Несмеян — пултазь, Кузьма Алексеев — нарьгазь ды куловтозь Сибирсэ.

Варштатано 1990-це иетнес ды неень шкас. Эсь раськест кис пшкадицятне мекс-бути ламот тусть тоначив шкадост икеле. Апак учо кулось Надькин Д.Т. (1934-1992), Клементьева В.И (1936-1994), Чиняев Н.И. (1928-1995), Люлякина С.М. (1922-1993), Тихонова Т.М. (1941-1995), Ромашкин В.И. (1951-2002). Кодаяк а кемеви: весе сынь тусть эрямостонть эсь ормадост.

Секскак кемезеват. Россиясь лепштясь ды лепшти виень апак вансто аволь рузонь культуратнень, мадсти эйстэст лисиця валдонть. 200 малава Россиясо эриця раськетьне — донорт рузонь культурантень: налогост, содамочист, талантост, модань сюпавичист саевить сонензэ. Мезде корты ансяк Кадышевань “путовксозо” эрзянь культурантень. Куш пель морыне мораволь чачома кельсэнзэ! Арасть “вишка” раськетнень эсь радиост, телевиденияст, газетаст, школаст…

Кавтолдомс, сави витькстамс, а савкшны: лездасть Евсевьев Макар Евсевичнэнь туемс те эрямостонть, саемс эсь раськестэнзэ Ине содыдеенть.

Анокстызе Нуянь Видяз.