Эрзянь Мастор/2003/16/Эрязо эрзянь раськесь!

←Закрыли "Сияжар"

Эрзянь Мастор, № 16 (167), 28 августа 2003 редактор Нуянь Видяз, Кшуманцянь Пиргуж Эрязо эрзянь раськесь! сёрмадызе Кшуманцянь Пиргуж

Афоризмы→

Статья на сайте газеты: № 167, 28.08.2003, Эрязо эрзянь раськесь!

 

Эрязо эрзянь раськесь!

Ялгат! Монгак пшкадян Пазонок туртов.

Инешкипаз, Веречипаз! Сюкпря евтан Теть эсень ды весень пельде: 12-це ие максат пек паро чить ютавтомс монень Велень ды Раськень озкстнэнь.Сюкпря евтан — эзик максо кольстямс те Озксонтькак, аванень меельце кавто читнестэ максыть седе паро ежо. Мон Тонь эзитень стувто, эзитинь мие, эзитень полавто Иисус лангс, Буда лангс, Мухаммед лангс. Энялдан, макст аванень шумбрачи седе товгак.

Тонь леметь пек мазый эрзянь кельсэ — Инешкипаз: чачтыця, эрямонь максыця. Веречипаз — максыця валдо, лембе, эрямо.

Инешкипаз! Велявтыть эрзятнень эрзякс. Неень ламот эрзятне руздо рузт. Рузтнэ истя а мелявтыть рузонь культуранть кис, православиянть кис, рузонь империянть кис, кода эрзятне. Сень кис тунь стувтызь Эрзянь Масторонть, сонзэ келензэ, коензэ–иланзо. Ванькскавтыть эрзятнень сельмест, пряудемест, кастык чартьчист.

Паз, чангодть! Паз, чангодть! Паз, чангодть!

Покштят-покшават! Пшкадян тыненкак.

Лездадо ды арседе теемс неень эрзятнень эсенк эйдекс — нуцькакс.

Шумбратадо, вечкевикс Ташто Кшуманцянь эрицят, ялгат! Течинь Озкс марто. Кадык те чись юты парсте, мазыйстэ, эрявикстэ-превейстэ ды кадовозо тенк кецнемакс, эрямосонк ледстнемакс. Кадык вана те вишка штатолонь толнэсь кирвазти эрьвань седейсэ покш тол ды эрьвась кармазо паломо-мелявтомо эсенек раськенек кис, сонзэ ванстоманзо ды сюпалгавтоманзо кис. Ды кадык те толнэсь валдомтсынзе сельменек ды пряудеменек, седе касозо чартьчинек. Ней, ялгат, ютавтсынек Озксонь омбоце пельксэнть-промксонть. Минь течияк а коласынек покштянок коенть, пурнатано атянь эзем. Эйсэнзэ арсетяно кортамс Ташто Кшуманцянь, Игнатбуень ды эрзя раськень тевтнеде. Течинь Озксонь теицятне прасть вейке мельс, тердемс атянь эземс неть атятнень:

1. Тужинкань Сергей атянь,

2. Идинкань Леня атянь,

3. Кшуманцянь Пиргуж атянь,

4. Велень прявтонть — Мокей Сашань,

5. Нуянь Видяз атянь — “ЭМ” газетань редакторонть,

6. Джак Рютерэнь, Саран ошсо эрзянь келень тонавтыцянть, вечкицянть ды ванстыцянть.

Течи пуви Ташто Кшуманцява лембе варма ды Тюштянь Торамозо парсте гайги, тень маринк тынь ды пурнавиде велень кужос. Тень кис тыненк сюкпря модас. Ютасть колмо иеть меельце озкстонть мейле. Маныть арасель — мон те шкане сэрединь. Те монь пек талновты — арась полавтыцям. Мелят эзинь муе ярмакт букат рамамс. Вешнемась — те пек стака тев, ламот покордатадызь, сялгавтадызь, манятадызь — седей озавтома тев. Лезды тенень государствась–империясь. Виев раськесь муевиль ярмакт ламо тежат букань рамамс. Секс, эрзят, эряви виевгадовомс! Те иестэ муевсть паро ломанть, пурнавсть ярмакт букань рамамс ды ютавтомс те озксонть. Неть ломантне малав весе тесэ. Сюкпря, евтан тенк весень пельде! Ды сеске евтан: тердян тынк Озксонь прядомадо мейле авань кудо ваксс — морга экшс. Ташто кшуманцят! Кепедиде кор, тынь прок пионерт, васенцекс невтинк лия эрзянь велетненень — ютавтнемс Велень Озкст.

Кеман, течи эрзянь виев ды мазый вайгельсэ лазови коштось ды те гайтесь срады Эрзянь Масторга, те паро тевенть поладсызь ламо велетнева.

Велень тевтнеде. Васняяк, евтан сюкпря велень прявтонтень. Сон кундась пек паро тевс: калмазыренть ванькскавтомонзо, лездадо тензэ. Сюкпря буень прявтонтень ды ПМК-нь прявтонтень: эрязасто кундасть кинть тееме, арсезель покшчинтень прядомс, пиземесь эзь максо. Озксонь васенце пелькссэ евтазель: кулость велесэнть 3 меельце иетнестэ 40 ломать, а чачсть — 12. Карминдеряй истя седе товгак, 30 иень ютазь тесэ кармить эрямо арабт или китаецт. Теде, васняяк, арсизевиде, од ломанть.

Игнатбуень тевтнеде. Содадо, 2004 иень медьковонь 10-це чистэ Чукалсо ютавтови Эрзянь Раськень Озкс. Эряви тенень Игнатбуентень ушодомс анокстамо. Меркушкин Н.И., Республикань прявтось, алатсь ютавтомга 500 тежат целковойть. Игнатбуесэ эряви кочкамс комитет. Сон мелявтозо раськень тевтнень кис, кепедезэ эрзякс марямо ежонть.

Эряви кочкамс комиссияс мельвановикс ломанть, тынк вайгеленк кочкамотнесэ аволизь фальсифицирова. Моли, кода чарькодян, пропаганда сетнень кис, кить салымизь, манчимизь ды нейгак манчить. Сынст кис вайгеленк илинк максо. Мон Чечнясо войнанть лоткавтомга кортамотнень кис. Чавовить тосо эрзяткак, а Чечнянть теизь покш тюрьмакс. Кинень те эряви? СМИ шныть “мордватнень” — парсте воевить Чечнясо. А кинь кис ды мезень кис сынь валыть верь? Арсян, а эрзя раськенть ванстоманзо кис ды масторонзо кис.

Раськень тевтнеде. Тевенек пек берять, прынек домка отьмас. Минь, эрзятне, чиде-чис аламолгаттано. Седеяк покш кажось — емавтанок эрзянь ежонть, лиякс меремс, емавтано эсь прянь эрзякс марицякс, эсь раськень вечкицякс. Кода улемс? Мезе теемс? Ламот монь энялдсть: те чистэнть илязан эцне политикас, ютавтомс ансяк покшчи. Витькстан: тунь арась мелем эрзятнень ансяк киштевтемс–моравтомс, симдемс брагадо ды каванямс сывель ямдо. Мон путан вием стякодо, бажан лездамс эрзя раськентень стямс кумажа лангсто, а прамс калмс. Лездан эрзятненень чарькодемс Россиянть политиканзо. Сонзэ политиказо ульнесь ды кадовсь — мерькамс-рузыявтомс а рузонь раськетнень, кирдемс сынст урекс. Россиясо мелявтыть ансяк рузонь кельденть ды рузонь раськеденть.

Модамасторось сайсь вете приаритетэнь енкст. Теде кортась Меркушкин Николай, Мордовия Республикань прявтось. Вететнень ютксо вейкесь — ванстомс Модамасторсонть эриця весе раськетнень ды сынст культураст. Арсезевиде, эрзят! Россиясь тень топавты? Путингак мерсь: “Если не сохраним малые народы, Россию не сохраним”. Прявтнэ кортыть ламо, тевесь жо Россиясо моли мекевланг. Куловтыть “инородецтнэнь” кода ансяк маштыть.

1. Эйдень кужотнесэ эрзянь велетнесэ эйкакштнэнь трить-кастыть рузокс. Кадык рузонь велень эйдень кужотнесэ кармить эйдетнень кастомо англань эли япононь кельсэ! Сестэ, кеман, шовинистнэнь кургост потлявольть.

2. Ансяк вейке лавкасо Россиясо микшевить книгат эрзянь кельсэ. Те — Сарансо “Масторава” лавкасо. Лиси, косо илязо эря эрзясь, сонензэ эряви ардомс книга мельга Саранов, те лавкантень. Эрзянь велетнесэ, косо ули книгань лавка, микшневи ансяк рузонь литература.

3. Весе эрзянь эйкакштнэнь эйстэ тонавтнить чачома келест ансяк 10 процент малава.

4. Те шкас апак совавто школань программас “Масторава” эпосонок.

5. Эрзянь буетнесэ газетатне, журналтнэ, радиось, телевидениясь “чоледить” ансяк рузокс ды руздо.

Зярдо эрзятнень ульнесь эсест масторост, эрзятне тейсть: сермадомань лув, ловомань лув, эпос, маштсть кавксо вайгельсэ морамо, 1900 иестэ Парижсэ авань оршамкась весе масторонь конкурссонть сайсь сырнень медаль. Кодамо мазый, логичной кель тейсть! Эрзятненень эряволь эрямс сюпавсто ды каштанчисэ. А ней мезес пачкодинек?

Эряви весенень содамс: лия раське ало кодамояк раське а ванстови. Эрзятненень эряви содамс, мезе те религиясь, христианствась, православиясь. Православиясь те неже, юр рузыявтомантень, секс эрзятнень весе вийсэ пансть ды таго панить те религиянтень. Ламо ульнесть царень указт: седе куроконь рузыявтомга эряви нельгемс эрзянь кезэрень религиянть ды совавтомс эрзятнень пряудемс православиянть. Кить эзть маняво, эзть паневе, сынст чавсть, пултасть, озавтнесть тюрьмава, а кить пряст миизь, сынст налогто нолдылизь.

Казанень губерниясо, зярдо эрзятне ванстокшнызь кемемаст Инешкипазонтень, ютксост 48-ксть седе аламольть колсицят-салсыцят (преступникть) православиянь ды мусульман ломантнень коряс.

Меельце иетнестэ православиясь баяга чавсь: Ленинэнь уловонзо валямс модас, калмамс христианствань койсэ. Медаленть те вейке енксозо, омбоцесь — таргсить модасто ломанень ловажат ды теньсэ спекулировить — бизнэс теить. Теизь святоекс А.Невскоень, Ф.Ушаковонь, II Николаень, Серафим Саровскоень, ламо верень лия валсицятнень.

Косот сестэ эрзянь “святоенек”?

Ней ламот эрзятне а чарькодить, кодамо раськень сон эйде, кодамо раськень культура вансты ды касты. Сонзэ те а талновты. Эряви содамс, паро ломань кастовтови патриотизмань вельде, лиякс мерезь, эсь раськень вечкезь, коень-кирдань, авань келень ванстозь. Кие тень а топавты, лиси, сельгсь покштянзо-покшаванзо лангс — раскензэ лангс, эсензэ лангс. Тень чарькодемс превензэ а сатыть. Сюпавсто эри оймесэ сюпав раськесь, конань ломанензэ ванстыть ялгаксчинть эсь раськень, васняяк, ломатнень ютксо.

Минь нолдатано эсенек вийсэ “Эрзянь Мастор” газета, ковкерькст, пачтятано эрзятненень книгат, кассетат, ютавтано Эрзянь келень Чить, ютавтано покшчить, якатано эрьва кува, косо арсетяно лезэ максыть минек раськентень. Ламот чатьмонить, аштить ве ено. Чатьмонемась — те теке жо раськень микшнема. Мукшновить истят эрзят, конатне мезеяк а теить, ансяк тонавтыть ды сялдыть, сынсь вал а пшкадить эрзянь кис. Пек берянесь — арась, ловт, эрзянь интеллигенция. Интеллигентэсь се, кона вансты раськензэ вийсэ таштазь сюпавчитнень, эри сонсензэ превсэ, максы паро питне ломантненень превень ды паро обуцянь кис, ней жо ламот максыть питне должностень кис.

Минь пшкалинек эрзятненень: райононь главатненень, предприятиянь прявтнэнень “ЭМ” газетань лангс подпискадо — чаво тевть. Мон эзинь редя вейкеяк эрзянь патриот чиновниктнестэ райононь главань полавтыцясто саезь ды седе верев. Империясь путни эрзятнень ютксто “покш таркатнес” истят, кить топавтыть сонзэ задачанзо.

Прядомсто евтан: эрявиндеряй содамс мезе карми ломантнень марто седе тов, 3-4 тежань ютазь, эряви содамс мезе ульнесь 3-4 тежадо седе икеле. Эрзятне те шкане уже ульнесть. Лиси, эрзятнень кувалт кой-мезе содави, мезе ульнесь. Секс модамасторонь раськетне мелявтост, кода ванстомс эрзя раськенть.

Пингеде пингес эрязо Эрзя Раськесь!

Эрямо! Эрямо! Эрямо!

Кшуманцянь Пиргуж,
Кортамось мольсь Ташто Кшуманцянь Озксо 2003.06.12