Эрзянь Мастор/2003/22/Муезь ине Эрьзянь скульптуранзо

←Вести из Украины. Конференция порабощённых народов.

Эрзянь Мастор, № 22 (173), 4 декабря 2003 редактор Нуянь Видяз, Кшуманцянь Пиргуж Муезь ине Эрьзянь скульптуранзо

Открывали страницу "ЭМ" в Интернете→

Статья на сайте газеты: № 173, 04.12.2003, Муезь ине Эрьзянь скульптуранзо

 

Муезь ине Эрьзянь скульптуранзо

Аволь умок Московонь скульпторось Михаил Ильяев ульнесь Аргентинасо, косо вешнесь Степан Эрьзянь произведениянзо. Сонензэ муевсть зярыя скульптурат, конатне зярс арасть минек каталогтнесэ ды Россиянь, Европань искусствоведтнэ зярс эзть содаяк эйстэст.

Ильяев пингензэ перть тонавтнесь Эрьзянь творчестванзо, ветясь корязонзо пропаганда. Зярыяксть ульнесь Аргентинасо. Колоньгемень иень перть сон пурнась скульптордонть пек сюпав архив, конань алтызе куломадонзо мейле кадомс Мордовиянь изобразительной искусствань музеентень.

Меельцеде Ильяев ульнесь Аргентинасо тедедень кизна, вастневсь Россиянь посолонть Евгений Астаховонь марто, конась макссь тензэ Эрьзянь произведе-ниянь а умок ютавтозь выставкастонть каталог, ламо коллекционерэнь адрест. Ды кода дивазевсь Ильяев, зярдо кармась содамо: выставкасонть седе ламо произведениятнеде Россиянь культурной мирэсь ды искусствоведтнэ, мезеяк а содыть.

Ильяев вастневсь пек ламо эсест коллекциянь азортнэнь марто, тагояк мусь кедьстэст Степан Эрьзянь 6 роботат. Сынь арасельть Астаховонь максовт каталогсонтькак. Вейкесь эйстэст «Косец» — (тикше ледиця), скульптурась валозь бронзасто 1909-це иестэ. Эрьва скульптурась — алкуксонь произведения, питнест лововить ламо тыщат долларсо.

Московонь скульпторонть М. Ильяевень ули покш мелезэ самс Саранов ловномо ине Эрьзядо лекцият, евтнемс Мордовиянь эрицятненень сонзэ коряс весемеденть, мезе таштась пингензэ перть.