Эрзянь Мастор/2008/11/Од Пурнясо покшчи!

←А где, "ФУГ", мониторинг???

Эрзянь Мастор, № 11 (283), 18 июня 2008 редактор Нуянь Видяз, Кшуманцянь Пиргуж Од Пурнясо покшчи! сёрмадызе Кшуманцянь Пиргуж

Фонд "Пургаз"→

Статья на сайте газеты: № 283, 18.06.2008, Од Пурнясо покшчи!

 

Од Пурнясо покшчи!

Од Пурнясо ломантне тешкстызь веленть чачомачинзэ. Сонзэ ютавтызь панжиковонь 31 чистэ оймсемань кудонть вакссо. Ушодовсь 11 чассто. Пурнянень топодсть 150 иеть. Тешкстамо пурнавкшность аволь ансяк тесэнь эрицятне. Сакшность лия ёндояк, сеть, кинь «почост керязель» те велесэнть ды кить ней сравтневсть масторонь келес, сеть, конатне кадовсть седейсэст чачома велест марто. Кенярксчинть ютавтоманть кемекстызь те велень «эйдетне», конатне ульнесть те чинтень лездыцякс. Те — Василий Иванович Вельмискин ды Устинов Сергей Николаевич. Покш, сындест башка, вий путсть те эрявикс тевентень Качкаев Александр Анатольевич, велень прявтось, ды Бояркина Мария Дмитриевна, кона анокстызе покшчинь сценариенть ды лездась лия тевсэяк. Важодсть истя жо Адмайкина Нина Федоровна, аштемкудонь, ды Жидкина Александра Федоровна, библиотекань прявтнэ. Неть ломантне мазылгавтызь вастома тарканть. Рацяня килей алга ды сиренень куракш юткова путнесть зярыя стуворт. Эьванть лангсо ульнесть балягань покш пусмот, путозь эрьва мезень прякинеть, чапамо ловцо, эрзянь брага, пачалксеть, кши ды медь…, ансяк нармунень ловцо арасель. Аштемкудось мазылгавтозь: понгавтнезь стенаванзо мазый оскат, пирявкстнэнь ланга кайсезь мазыйдеяк мазый покшт пацят. Пек берянесь — понгавтозь плакатось сермадозель рузокс: «С праздником села!» Стуворонть ваксска ютамсто сыцятне, кинь ульнесь мелезэ, варчнесть танстест стувор лангс путнезь ярсамопельтнень.

Мон васенцекс сынь аштема кудонть ваксс. Аламо шкань ютазь кармасть само азортнэ. Нолдызь Бакич Видяень моронзо. Веленть кувалма срадсь церанть мазый вайгелезэ. Мон арсезевинь: кодамо мазый минек келенек, ды зяро талант ёмсить эрзятнень ютксо, мекс аламо мель явить эрзянь культуранень. Ванстовольгак эрзятнень масторост, а улевелть истят зыян тевть! Зяро касовольть ине эрзянь ломанть! Неть арсематнеде новольсь прям, нусманьгадынь, седеем рангозевсь, а арсематне тусть ледстнеме покштядон-бабадон, Тюштянь-Пургазонь, эрзятнень эрямо пингедест.

Апак редя ваксозон сась те велень Федя ялгам, умонь содавиксэм греко-римской пелькстамосо. Ушодовсь веледензэ кортамось, раськедень арсематне тусть веёнов. Карминь содамо, велесь покш, ветесядт кудот, пелест — чавот, эрицятне кадовсть ансяк ниле сядодо эль ламо. Ламотне тукшность эрьва ёнга важодемань вешнеме. Колхозось яжазь, школась пекстазь. Тонавтницятнень усксить Кочкурвелень школав. Велень школанть кувалмозо 70 метра малава, сон допрок од, но чаво. Мезеяк эйсэнзэ а теееви. А муеви превей, тевень теиця велень ломань, кона сонзэ тевс нолдавлизе. Ней школась ашти теке кадалька. Зярдо ардынь автобуссо Пурняв, вальмава ванозь редия: Пурнянь модась пек раужо, теке сёрмода. Арсезевинь, тесэ парсте эряват, веленть тарказо пек мазый, кецнинь тесэнь эрицятнень кис. Фатинь, од ломантне кармасть рузыямо, манкуртокс теевеме. Зярдо валгинь автобуссто, ульнесть аштицят — Пурнясто туицят. Од тейтертнень кевкстнинь: мекс истямо покшчистэнть оргодтядо? Ёвтасть, минь ансяк мекев-васов. Ансяк се тейтеренть седе тов эзия нее.

11 чассто панжизь покшчинть. Рузокс. Рузокс кортась эрзянь авась, Кочкурбуень отделэнь культурань прявтось. Мейле максть вал велень прявтонтень А.А.Качкаевнень. Сон ледстинзе веленть эрямо пингензэ, лемест паро ломатнень, ёвтась лембе валт спонсортнэнень, кортась 1941-1945 иетнеде, кить те войнасонть кармасть маралякс.

Сон яволявтсь: «Ванодо, коштсонть минек земляконок, самолётсонть Устинов С.Н». Сергей Устинов, алкукскак, кецневтинзе весень: 20 минутань перть ливтнесь велензэ велькска ды невтсь ливтнемань ёрокчинзэ, весе кецнесть, цяпасть ды рангсть тензэ. Монгак, теке эйкакш, сееринь тензэ покш мельсэ. Чарькодеви, од ломантнень сельмест сявадсь Сергеень лангс, сыретнень седеест кенярдсть сонзэ кувалма. Ламот учость сонзэ велявтоманть те покшчинтень. Монгак арсинь кедензэ сювордамс ды кутмордамс. Эзь саво. Бульчом, пельсь само, палсесызь сонзэ од тейтертне ды кежиявты полазо.

А.А.Качкаев тешкстась знярыя ломанть казнесэ, грамотасо. Мейле максть вал И.С. Бурнайкиннэнь. Сон паро валт ёвтась те веледенть, ломандензэ, казсь ламо книгат библиотекас ды мейле серьгедсь эрзянь моро. Седе тов кортась эсь веледензэ, седей ёжодонзо, покшчинь спонсорось, велензэ вечкицясь В.И.Вельмискин. Сон кортась ансяк тиринь кельсэ — эрявикс тевде. Сюкпря ёвтан велень прявтонтень, моненьгак вал максокшнось. Мейле ушодовсь омбоце пельксэссь.

Васенцекс эсь моросост ломантнень кецневтизь Кочкурбуень артистнэ. Поладызь «Келу» ансамблянь морыцятне-киштицятне. Ломатнень мельс пек тусь Теньгужонь буень патят-сазортнэнь морамост. Парсте вастызь «Ало веле», моронть, конань морызе Панишева Аня. Сон эсь веледензэ. Мейле артисткась тердинзе ломатнень мартонзо киштеме. Васенцекс чийсь колмо иень тейтерька, мельганзо эзь кирдеве 90 иесэ баба. Минь ванынек мельспаросо.

Зярдо весе прядовсь, мон пшкалинь ломатненень. Сыре ломантне кецнесть те чинть кувалма ды мелявтсть, зярдояк ды улезэ истямо жо вастовома куломадост икеле. Мон меринь, эряви кастомс паро нуцькат, истят кода В.И.Вельмискин, С.Н.Устинов, а ней эряви Пурнянь эрицятненень лездамс паро тевсэ велень прявтонтень. Те паро модась ломантеме а кадови. Карминдерятадо, эрзят, орголеме, тарказонк сыть лия раськень ломанть. Калмазыренк, Пурнянь эрицят, ёми, ёми тынк эрямо пингенкак. Секс эрядо эрзянь превсэ, эрязнь мельсэ, эрзянь тевсэ!

Кшуманцянь Пиргуж, Саран ош