Эрзянь Мастор/2011/17/Гипноз

←Татарт парсте ванстыть келест. Эрзят тонавтнеде пельдест

Эрзянь Мастор, № 17 (361), 15 сентября 2011 редактор Нуянь Видяз, Кшуманцянь Пиргуж Гипноз сёрмадызе Нуянь Видяз

Чачома чи марто, Татьяна Фёдоровна!→

Статья на сайте газеты: № 361, 15.09.2011, Гипноз. Нуянь Видяз

 

Гипноз.

Нуянь Видяз

Театрань покш залось пешксе. Ламот аштить стядо, стенас нежедезь. Истямо спектакля, истямо финал марто, арасель аволь ансяк од ломанень Горькоень лемсэ театрасонть, Бакусо, арасель, арсеват, Мода-масторлангсояк. Секень вант, зярдояк. Састь аволь ансяк одт эли эйкакшт, састь сыреть, цёрат, ават, азербайджант, рузт, армянт... Марявить тошкамонь, пилес эль пачколиця вайгельть, носкомат, козкстнемат.

Учить.

Окойники, трибунанть экшс лиссь театрань Мустафаев директорось, покш, келей лавтов цера. Сиясо токазь кувака раужо черензэ валанясто судрязь удалов. Лангсонзо раужо костюм, алганзо раужо панар. Витинзе, седе ёнсто путынзе сельмукшонзо судонзо лангс, козкстась коморозонзо ды валтнэнь таргсезь, апак капша, путнезь нусманясто яволявтсь: «Вчера, то есть третьего марта 1953 года умер вождь мирового пролетариата, Генералиссимус, Генеральный секретарь ЦК ВКП (б), наш вождь и учитель, дорогой товарищ Сталин. Прошу почтить память верного ленинца, гениального зодчего строительства социализма в нашей стране минутой молчания...»

Лодор-лодор стясть весе. Нурькине, талакадомань каштмолема, ды сядот пештизь залонть лайшемань вайгельсэ. Авардсть ильсезь, авардсть ниреждезь, авардсть вайгельтеме ды вайгелень нолдазь. Кой-кить вал марто. Марявсь, секундат, ды увттонть лондады потолокось. Сталинэнь куломадо пачтиця ризксэв промксонь ветицясь энялдсь оймамс ды озамс эсь таркаваст. Стяжо. Залось лажнось. Савсь тензэ пшкадемс зярыяксть.

Окойники пурнавозтне озасть. Энгамсть. Ансяк тестэ-тосто марсевсть вайкстнемат ды авардемань ильсемат.

Ризксэв промксось поладовсь.

...Омбоце чистэнть театранек, ванстыцясто саезь директорс, саимизь Азербайджанонь Кирдийкуронь кудонть икельга сравтовозь келей-покш площадентень. Те ламо этажонь, Сталинэнь стильсэ, ашо-якстерть ракушкасто вачказь кудось ваны чилисема ёнов, шержей Каспиентень. «Содамс, ульнесь-арасель эйсэнзэ Сталин ялгась?» — сась превзэнь апак учо. Сонзэ азорозо товарищ Багиров, Сталинэнь малавикс ялгазо, азербайджантнэнь ды лиятнень коммунизмас ветицяст, аштесь президиумсо. Ломантнеде — иневедь, авасоло сэтьме шкасто сэнь сельме Каспиесь.

Митингенть панжизе сонсь Багиров. Сон ды прявт ялганзо-оянзо аштесть, неявсть васолдо, пряс путомавтомо, стядо омбоце этажонть сэрьсэ кепедезь трибунасонть. Икелест микрофонт.

«Позавчера, то есть третьего марта 1953 года скончался товарищ Сталин, Генеральный секретарь ЦК ВКП (б), наш дорогой товарищ, вождь и учитель, продолжатель дела великого Ленина, строитель нового, социалистического общества. Прошу почтить память товарища Сталина минутой молчания» — радио-виевгавтницятнень вельде сравтневсть кортыцянть валонзо кунсолыцятнень пряст велькска площаденть келес.

Општ. Теке кияк эрийкс эзь кадово. Кулость.

Ансяк прядовсь ризксэнь минутась, зэрькстасть ламо зэртьсэ пушкат. Залп мельга залп. Леднемась седеяк виевгавтызе седей апаронть. Зярыя тёжань кургсто лиссь вейсэнь лажамо. «У-у-у...» Прок кепететсь ды лажнозевсь апак учо виевдеяк виев варма. Авардсть, сельведть валсть сыцятне, теке эрить меельце чи, теке течи-ванды весень паньсызь чопода латко чирес ды... Эли, мерят, ванды лондады менелесь.

 

*  *  *

Теке минута мельга минутат эскелясть иетне. Марявсь, Сталинэнь пингстэ топавтозь якстере ды раужо тевтне, кенярксонь ды седеяк ризксэнь сельведтне зярдояк а стувтовить. Свал кармить кирдевеме мельсэст. Истя эзь лисе. Ломантне кадовсть ломанекс: кода сестэяк, эрьва валонтень кемицякс ды «ветявицякс». Ков мерить, тов эскелить. Лиси, шожда сынст саемс гипнозонь коморс. Берянь. Визькс кисэст. Исяк «советской ломантне» ульнесть Пазнэнь а кемицякс, ней, некетне вана — прамозост озныцят. Ламот кандтнить крест. Исяк Президентэсь церьковатнень прясто баягат ёртнесь, течи — поптнень кедест палси. Ды таго тензэ кемить, кода кемсть Джугашвилинень. Мекс урокось а урок? Мекс ломанесь а эряви ветицявтомо, эсензэ превсэ эрицякс? Лисни, арасть сынь, превтне! Содамочинь зепензэ, ловт, чавот. Улевельтькак, верень валоматне — мезень кис? — Авгансо, Ичкериясо, Будапештсэ, Прагасо, Кандопогсо, Дагестансо... зярдояк авольть кирвазе. Лисни, стяко ламонь содыйтне ломаненть лемдизь «Арсиця ломанекс».

 

*  *  *  *  *

Саезь «Эрязденть арсезь» книгастонть.

Микшневи сон редакциясо, питнезэ 200 цел.