Эрзянь ёвкст (М. Е. Евсевьев, 1928)/39
ОВТО МАРТО РИВЕСЬКЕТЬ.
Тейсь овто кудо вирь кунчкас и эри эснензэ. Ульнесь сонзэ кудо потмарсо кекшезь медь парьнезэ.
Сась тензэ ривеське и мери: „Овтыне, а овтыне, нолдамак моньгак кудозот эрямо”. Овто нолдызе.
Чокшнэ овто маць кашланкс, ривеське — вальмалов, эземс.
Пелеве шкане ривеське нолдызе вальмава пулонзо и „стук, стук, стук” стуки вальмастень. Овто маризе стукамонть и мери ривеськенень: „Ки тосо стуки?”
Ривеське мери: „Монь эснэ кумакс терьдить, та молемс, та а молемс?”
Овто мери: „Мейсь а молят? азё, коли терьдить!”
Тусь ривеське, куйсь кудо-потмарс, муизе медь паренть и давай ярцамо медьтенть. Ярцась, ярцась, валксь кудо-потмарстонть, совать кудостень и маць тарказонзо.
Овто кевстизе: „Я! кода эйкакшонть лемзэ”.
— Ушоткске!
Омбоце чокшнэ таго ривеське пулосонзо вальмас стуки.
Овто кашланксто таго кевстизе: „Ки тосо стуки?”
Ривеське мери: „Таго кисэнь састь, кумакс терьдить, та молемс, та а молемс?”
Овто мери: „Азё, коли терьдить.”
Ривеське таго куйсь кудо-потмарс и пелезэ медь парень сэвизе.
Кудосо овто таго кевстизе ривеськень: „Я, кода лемзэ эйкакшонть?”
— Кунчкакске!
Колмоце вене ривеське таго пулосонзо вальмас стуки.
Овто кашланксто таго кевстизе ривеськень: „Ки тосо стуки?”
[ 122 ]Ривеське мери: „Таго монь эснэнь кумакс терьдить, та молемс, та а молемс?”
Овто мери: „Азё, коли терьдить!”
Ривеське таго куйсь кудо-потмарс, медь парень потмаксос сэвизе и сась мекев кудов.
Овто кевстизе: „Я, кода эйкакшонть лемезэ?”
— Потмакске!
Нилеце чистэ таго ривеське пулосонзо вальмас стук! стук!
Овто таго кашланксто: „Ки тосо стуки?” Ривеське мери: „Монь эснэ кумакс терьдить, — та молемс, та а молемс, мелем-гак мольсь яказь!”
Овто мери „Азё ино оштё весть, мейле саты”.
Ривеське таго куйсь кудо-потмарс. Меденть весе сэвизе, парьнесть шлизе, нардызе да лазнэ ланкс комавтызе. Сонсь совась кудос ды маць тарказонзо.
Овто кевстизе: „Я, кода лемзэ эйкакшонть?”
— „Шлявкске, нардавкске — лазнэ ланкс комавкске!”
Овтыне мери: „Вай, кодамо мазы лемсь!”
Аламос эрязь овто куйсь кудо-потмарс медензэ вачамо. Ваны медь парьзэ шлязь, нардазь ды лазнэ ланкс комавтозь.