Эрзянь ёвкст (М. Е. Евсевьев, 1928)/40
КАТКА, КОЙМЕ ды ЛЕВШ.
Эрясть атя ды баба. Сынст ульнесть колмо цёраст. Сынь эрясть вельть беднойстэ. Сынст ульнесть ансяк каткаст, коймест ды левш-тапавкскест. Атясь прась — кулось, бабаськак мельганзо. Кадовсть цёратьне ськамост. Покш цёрась саизе каткасть и тусь кудосто. Мольсь, мольсь — сась кудос. Совась кудостень, кудосость пек ламо чеерть. Цёрась нолдызе катканзо масторов и каткась весе чеертнень повсиньзе. Куд-азорось мери тензэ: „Миик каткат”.
Цёрась мери: „Рамик”.
[ 123 ]Азорось: „Зняро вешат?”
Цёрась: „Давай тышча целковой”.
Азорось максь тензэ тышча целковой и саизе каткасть, цёрась тусь кудов.
Омбоце цёрась саизе койместь и тусь маронзо. Мольсь, мольсь, сась пире. Пиресэсть понжавтыть сюро кецэ пувсезь. Цёрась мери атястень: „Азёдо тынь кудов, мон сюронк понжавца.” Атясь семьём тусь кудов, цёрась кармась понжавтомо. Кода весе сюронть понжавтызе, сась атясь и мери: „Миик те штукасть монень, зняро вешат?” Цёрась мери: „Давай тышча целковой.” Атясь максь тышча целковой и саизе койместь, цёрась тусь кудов.
Вишкине цёрась саизе левш-тапость и тусь мартонзо. Мольсь, мольсь, сась сэдь. Совась сон сэцть алов и кармась пиксэнь понамо. Шайтян левкснэ чийнить сэтьсть алга ды пижнить: „Дедай, мезе понат? Дедай, мезе понат?”
Цёрась мери: „Пикскеть понан шайтян левксэнь повсемс”.
Шайтян левкснэ пижнить: „Дедай, илимизь повсе! Дедай, илимизь повсе!”
Цёрась мери шайтян левкснэнень: „Пештинк шляпам ярмакто, а повситядызь.”
Цёрась карась покш латко, шляпазонзо пельсь варя и ладизе латкость ланкс. Шайтян левкснэ пештизь шляпанзо и мерить цёрастень: „Ну, дедай, ней а повсесамизь?”
Цёрась мерьсь: „А повситядызь”. Хрёстыньзе ярмакнэнь и тусь кудов.
Мольсь кудов и мери лелянстэнь: „Давай, леляй, сисемь алашат, молян ярмаконь ускомо”.
Лелязо мери: „Саик, оно синьдезь пильгесть”.
Вишкине цёрась мери: „Монень синьдезь пильгесь а эряви, — сень эйсэ а усковить”.
Лелязо максь тензэ сисемь алашат. Сон мольсь вачкиньзе ярмакнэнь и сась кудов. Мейле кармасть колмонесь братиники сюпавсто эрямо.