Эрязденть арсезь (2010)/"Тетянк сы!.."
| ←Варчамс се меденть танстензэ... | Эрязденть арсезь (2010) by , edited by Разгуляева Т. В. «Тетянк сы!..» |
Пазонь видьме→ |
| Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 22—23 |
[22]
| «Тетянк сы!..» |
Чийнетяно мельцек-мельцек, чаратано лелят-ялакст, теке велямот, кияксонть куншкасо. Кие седе эрязасто, кие-кинь седе курок сасасы-икельдясы. Эльнемань шалтось кудонть келес. Саты челькедентькак. Сон седеяк неяви вальматнева совиця чинь налтнэсэ.
— Лоткатадо-арась, сезякат! — бажи кардамонок покшпатям.
Минь — марикскак а тейтяно. Шкань ютазь таго каяты патянь вайгелезэ.
Содатано эсенек. Кардамотнеде седеяк сыреми чийнемань мелесь-ёжось.
Дубор-дубор, тук-тук-тук, — кайсети кудонь келес.
— Ванодо, тетянк сы! — эзь кирдеве, каштомикельде лиссь оймавтомонок авамгак.
Видеяк, вальмалганок прок кие-бути ютась. Куроксто глянк-глянк мерсь кудыкелькс кенкшень циндересь.
Кудосонть општ. Сеедьстэ лексезь, лоцьк-лоцьк озынек стуворонть пес. Чаманок элякалемадонть кувтолдыть. [23] Чатьмонтяно. Учотано.
Чикорк панжовсь тюжасто артозь кудонь стака кенкшесь, ды тарчксонть трокс эскельдясь тетям. Сэрей, аламнеде мендявозь, тутора кутьмере. Лангсонзо раужо-тюжа костюм. Меште зепсэнзэ, керш ёно, — част. Кенериця товзюронь тюс муюконзо ало шкань-шкань чачни мизолкс. Малавиксэнзэ ютксо, кудосо, мекс а улемс мельспаросо?
— Ну кодат тевенк, чомболкст? — икелев ютамсто пшкадсь миненек.
— Вад-я-ат! — икельдимим, каятотсь Колянь чольдеркай вайгелезэ.
Тетянок лоткась стуворонть ваксос, почаксынзе вить кедьсэнзэ прячеренек ды потмакстомо покш портфельстэнзэ путсь «чомболкстнэнь» икелев тюжа куво, келей чама калаця...
* * *
Тетям лангозонок вайгель эзь кепсе. Машнетеманзояк эзинек нейне. Эйсэнек эзь тандавтне. Пакшатнень элякалемаст, лийнемаст, кутякалемаст берянекс эзь лово. Авань марто зярдояк эзть сёвно. Паряк, кирвазтневстькак кой-зярдо истят тевтне, ансяк аволь эйкакшост пингстэ. Сон — вечксь, вечксь нинзэ-эйдензэ, вечксь эрямонть. Теде, тень кувалма, маряви ней тень, тетянок ульнесь аволь тандавтницякс — мелень ваныцякс. Эйкакшонзо, аволь ансяк покштнень, ловсь ломанекс. Секс истя ванынек мелензэ. Тень эйсэ ветясь кудораськень венченть. А стяко авань кардамонь валонзо текельть: «Ванодо, тетянк сы!»