Эрязденть арсезь (2010)/Пазонь видьме
[23]
| Пазонь видьме |
Т(...)А кудынень потмо. Ярсамопель марто стувор. Кокша ды тусто черьсэ копачазь цёрань прят, якстере чамат, ашо пацят... Стенанть кувалт аравтозь кувака эземсэнть ават, цёрат, эйкакшт. Кайсетить превспутомат, кортамот, паронь арсемат...
Тетям ды авам састь ков-бути васов покштянь ялаксонзо, аёвтавикс лем марто — Филаретэнь, ильтеме. Мартост саимизь моньгак. Эрямо таркань кавксть полавтомась, кода кортави, палома полавты. Курмот-кармот весе а сайсыть, а усковить. Мезеяк кадома шабратненень, мезеяк — малавикстнэнень, кой-мезе сави миемскак, седе сеедьстэ пельпитнеде.
[24] Филарет — мазый сэрей шумбра цёра — казсь тетянень газетань ставкс. Эчке, теке тодов. Монень эзь кепсдевеяк. Марявсь, эседень стака. Эрьва кодат казнеть эрсить, эрсить, лисни, истяткак.
...Кудосо, весемеде стувтозь, велявтнян шкадонть тюжалгадозь газетань лопатнень, ванкшнан эйсэст невтезь ломантнень чачост. Тамашакс тень марявить допрок витни п те. ямксошка-кансёрошка, ды седе покш, сэрей раужо тешкстнэ. Мекс истят авейкеть? Рисовазь картинынетне чарькодевить; ломанть, тракторт, лишметь, эрьва кодат чувтот... Тешкстнэ вана... Мезде сынь? Кода сынст лемест?
Велявтнян седе тов. Судоварязон пачкодсь, кутьки кодамо-бути, мезеяк лия ёнов а молиця, чине. Артовксонь? Челькень? Шкань? Кеменце лопа, комсеце, сядоце... Носкозь ванкшнан эйсэст. Удомаськак педясь эйзэнь, токши, а визди, лавтовс...
* * *
Ламо-ламо иеде икеле ульнинь эйкакшпингень мастором кенкшенть икеле. Сестэ уцяскам, ней тень маряви, тошксесь пилезэнь; «Ютыть, цёрыне, аволь аламо иеть, ды казезь те пусмось ветятанзат газетань теема курос, кармат сёрмадомо, поладсак эйсэст, газетатнесэ, эсь эрямот, ванстсак леметь. Эйзэст совавтозь мельтне-арсематне кармить верьс разедеме ды кецневтеме ойметь. Сы, цёрыне, шка. ды тонсь казят ломантненень эсь кедьсэ, превсэ ды седейсэ теезь ваздо тевс тердиця газетань покш тодовшка кувта. Кемть валозон».
Яла мерить: кияк а соды, кинь мезе учи икеле, кинь кодамо карми валскень чизэ, кодат лугат панжовить икелензэ. Монгак эзинь сода. Содась ансяк сон, уцяскам. Кодамокс цётакшнызе-некшнизе эрямопингем пензэ, мезде тошкась пилезэнь пиже эйкакшчистэм, истя лиськак.