Эрязденть арсезь (2010)/Анокстамонь канст
[270]
| Анокстамонь канст |
Кундынек инекужонь анокстамо.
Валось те эзь марсеве. Стувтовкшнось. Каня истятнэде сон ськамонзо? Ульнесть шкат, содылизе — мезе те истямось — эрьва пакшась. Сестэ неень паксятнень таркасо варматнеде лопасост каштордсть, раськсесть узереде асодыця тусто чопода вирть. Эрицятнень тевест-валост, эрьмест ды эрямост ламо ёндо ды ламонь кирда-кувалма сюлмавозельть сынст марто. Ков а варштат, — вирь! Тумонь, пичень, пекшень, човор... Секскак кужотне, конат ней теевсть, ризкс сайтянзат, «полянакс», лововсть башка-башка, максневсть тенст натой эрьва кодат лемть: Чирькужо, Валдокужо, Мазыкужо, Пангокужо... Ульнесь Промкскужояк. Эйзэнзэ велень атятне эли весе эрицятне пурнакшновильть вейсэнь тевтнеде арсеме-кортамо: каявкстнэде, ознома читнеде, стадань-[271]жабардань ливтема чиденть, ваныцятненень питнень пандомадо... Каня аламо эрьва кодат тевть велесэнть-сядосонть?
Инекужось — те покштояк покш промкс. Неень чартьсэ — парламент. Сергедевильть ды сакшныльть эйзэнзэ кочказь ломанть эрьва буестэ, Масторонь эрьва ёндо. Инекужосо кортавтовсть-ванновсть Раськенть ды Масторонть эрямодонзо тевть: ят ушмодо-раськеде масторонть ванстомадо, те эли тона буентень лездамодо, каявкстнэде, модань явомадо. Пурнавкшность сынь, веленсетнень коряс, чуросто — кемень, комсь иес весть.
Сынек, «Масторавань» теицятне, мельс: тердемс ламо-ламо ёнкска-таркава срадозь эрзятнень ды мокшотнень пельде кучозь ломанть Инекужос. Кучневсь истямо конёв.
Культурно-просветительское общесгво «Масторава»
430000, Мордовская АССР, г. Саранск, ул. Пролетарская, 39, каб. 22. Дворец культуры профсоюзов, тел. 9-05-55,7-45-20. Расчётный счёт № 001700408 в Мордовском отделении Жилсоцбанка 28 июня 1990 г.
«Масторава» приглашает принять участие в работе Учредительного сьезда мордовского (эрзянского и мокшанского) народа, который состоится 3-5 августа 1990 года в г. Саранске Мордовской АССР во Дворце культуры профсоюзов.
Началов 10 часов.
Просим командировать от 2 до 10 человек представителей исполкома сельского совета народных депутатов, руководителей школьных и дошкольных учреждений, директоров Домов культуры, зав. клубами.
Командировочные расходы за счёт «Масторавы».
Регистрация делегатов: г. Саранск, ул. Пролетарская, 39, каб. 22 и 23.
Председатель общества «Масторава» Доктор филологических наук, профессор Надькин Д. Т.
Конёвсонть, кода неяви, тешкстазель: Инекужось карми арсеме-кортамо 1990-це иень умарьковонь 3—5-це читнестэ.
Шкадонть аламо. Колмо ковт. Тевтнеде вана — аволь ве улав. Эряви печатамс-ламолгавтомс Уставонть ды Программанть, тердематнень, вешнемс ярмакт, пурнавома кудо, анокстамс концертэнь программа, кучнемс эрьва ков сёрмат, печатамс-педявтнемс ошканть яволявтомат, сюлмавомс финнэнь-угрань [272] республикатнень-округтнень ды лия мастортнэнь марто...
Тевть, тевть, тевть...
«Штабонок» Профсоюзонь культурань кудосонть. Нупальненек моли коткудавонь пизэ ёнов. Совить-лисить. Ускить-совавтнить. Кевкстнить. А лоткси дильнемадо, а соды оймсема телефонось. «Начальникесь» «коткудавонь те пизэсэнть» Грачёва Елена Сергеевна, тесэнь, Культурань кудонь важодиця. Чии, ков эряви, сонсь, кучи, кармавты, канды, энялды, сёвны... Лездыцят улить. Пеняцямс а савкшны. Шкась кизэнь, ёжось — тундонь. Маряви, морави эль марямга та-косо васоло-васоло валтомо кувака лужаня моро. Мезде сон? Олячис бажамодонть?.. .Мекс аволь марш?
...Полировазь кенкш. Келей-кувака кабинет. Паркетэнь киякс. Эзганзо ацазь чевте, якстере-тюжа тюсонь кумбонь кине. Стуворонть экшсэ парсте стазь чоподасэнь костюмсо, касмова кокша пря чуморкс цёра — Республикань прявт, Василий Семёнович Учайкин. Удалонзо-велькссэнзэ Владимир Ильичень мазый кундос путозь покш портретэзэ. Фамилиянь коряс содави, азорось — эрзя. Корты, а мезть сёпомс, ансяк рузкс. Те тень а вечкеви, ды мезе теят? Прявттнэнь, мик самай вишкинень пес, келест эсест — рузонь. Эйсэнзэ бажи, кадык «кумажань трокс», кортамс райкомонь кияксонь шлицяськак, обкомонседенть кортамскак а мезть. Кирдемачи, власть — кодамо вий эйсэнзэ!
Вансь-вансь «инязорось» сельмукшонзо пачка венстязь конёвонок лангс — арсезевсь, сайсь ручка ды цирь-цирь путызе кедьтештявксонзо.
— Вете тёжат, седе ламо а максови, — мерсь пеень пачка, содазь, рузкс, ды венстизе тень сёрманть. «Начальник». Сынь ламо а кортыть. Ды те виде. Сынст пельде тевть эрявить, аволь валт.
— Эрявольть седе ламо, — меринь пейдезь, — ды тень кискак сюконятано. Учотано Инекужос!
— Спасибо! — мерсь Учайкин «сюкпрянь» таркас ды путсь пе, а стакаль чарькодемс, сакшномазонок.
Сехте «покш» кудостонть Грачёва Елена марто чийтяно Саранонь куротнева лияс. Профсоюзонь. Картинась теке: покш кабинет, стенанть кувалт стулт, покш стуворонть экшсэ келей лавтов цёра. Велькссэнзэ портрет. Кинь — кевкстнемс а мезть. Сынек Слушкин Михаил Яковлевичнень. Сон — профсоюзонь прявт. Кинень кода, монень — Миша. «А кеман, Миша, кармат молеме каршо. Ве школасо, ве классо тонавтнинек. Колмо иеть.
[273] Партанок шабрацек ульнесть. Тон Кочкурвелестэ Дубинькав якить, мон — Орданьбуестэ» — кирдян превсэнь.
Азорось вастымизь мизолдозь. Натой лиссь каршонок покш-келей стуворонзо экшстэ. Сювордынек кеденек. Прок учось. Озынек. Кандовтсь чай, печеният, пильсезь сахар. Лиссь арсемам коряс: Профсоюзонь Культурань кудонть школань ялгам максызе, валгак каршо эзь мере, колмо чис стякодо. Теяк ярмакт. Ды а вишкинеть.
— Сак, кунсолосыть кодат тевенек, — меринь кеденек лепштямсто лисемадо икеле.
— Мелем ули молемс, — маринек каршо.
— Концерткак ванат эрзянь кельсэ. Истямо Сарансо зярдояк арасель. Вансак ва!
— Молян, молян, — мерсь Миша мизолдозь кенкшенть видьс ильтемстэнек.
Кирдийтне, полировкадонть цитниця кенкшень прявттнэ парынестэ а содыть кода улемскак: топавтомс «экстремисттнэнь-националисттнэнь» мелест — берянь, а топавтомс, молемс каршо — тесэяк вадрясь арась, лия вармат пувсить, илядызь шаигго тонадовозь л аталксстот. Яла учнить, ванныть, никсить, онкстнить...
* * *
Ушодат сокарямо ламо иеде икелень сеть шкатнесэ, ледстнеме, ды сат мельс: «Масторава» вейсэндявксонть чачтокшнызь, стявтокшнызь пильге лангс эрзятне. Сынь кандсть сестэ сявдиксэст лангсо сталмотнень ды весе стакачитнень. Сынь сонзэ пурнызь, сынь, зяро пирявксонь трокс-пачка ютазь, тешкстызь-кемекстызь, сынь вешнесть ярмакт, ютавтома таркат-кудот, анокстасть-печатасть документтнэнь, сынь, вий путсть, невтсть концерт...
Ней, комсте ламо иень ютазь, тень кис а мереви тенст эрямс эсест лем марто — Эрзят. Улемс Эрзякс! Прявттнэ содыть вейке: кодаткак эрзят арасть. Улить ансяк мордват ды, чарькодеви, «мардовскяй» язык. Эрзятне пурнакшнызь-теекшнызь «Мастораванть», мордватне — калавтызь. Секскак пиштяка чачома келенек эйдень кужотнесэ-школатнесэ, ловт, а ветяви. Ансяк кувси.