Эрязденть арсезь (2010)/Чачома Масторов само
[265]
| Чачома Масторов само |
...1985-це ие. Таштамков. Те шкань эмежпирень тевем прядынь. Мезе таштамкан — таштынь. Модамарен таргазь, мельгаст «паксясь» чупонезь. Помидорон-мезень банкават. А лепштявтано теть, теле! Иля снартнеяк.
Мелявксонь апак сода ардан университетэнь биостанцияв. Сон Мордовиянь Покш Березникень буень Симкина веледенть аволь васоло. Пачкодинь. Вастымизь «финнэнь» зярыя кудот. Ютксост келей латалкс. Те — лембе шкасто ярсамо тарка. Каршост, чинть лангс ванозь, сиякс кувтолды, теке кончни тень, терди эйсэнь эрьке. Эйзэнзэ аловпандт чии, тей-тов менчевезь, чувардонть ожо яннэ. Чопода сельме эрькенть томбале — Сурась. Ков а варштат — вирь, вирь... Пичеть, пойть, укшторт, овтумарть...
Студенттнэнь практикань коволост прядовсь. Таргозонзо весть сакшны эсь велестэнзэ, колмошка-нилешка вайгельпень ютко, хозяйстванзо «содавтомо» ванстыцясь. Кияк лия маласо а эри. Ськамон. Бути а ловомс каштмолеманть. Сон ялгам. Истямокс лован, сондензэ башка, кудом велькссэ сэрей, перьканзо васов неиця пичентькак. Лиясто пачколи тень, совси инжекс каштонть вецакавтниця вармась.
Чикуншкас якан-пакан вирьга. Вастневемат мазычи ды асодавиксчи, умонь-умонь ды неень шка марто. Пачколян каштан, «ку-
[266] Прядома малава __гость букват: «Надькин Дмитрий Тимофеевич»
вака пильге» Сура пирескак. Ков сон истя капши? Мерят бажи седе курок пачкодемс кодамо-бути седе оля таркас эли туемс седе васов покордыцянзо, эрьва мейсэ бутравгавтницянзо эйстэ. Кить истятнэ? Свал сёвновиця «бояртнэ»? Весе минь. Эрьвась.
Зепсэнь конёвпанкске ды карандашке. Сынтемест превей мельтнеяк сювакс теевить, саласынзе, «вайк» мереме а кенерят, шкань вармась. Секскак неть кедьёнкскетне свал улезт мартот. Лиясто сайнян кшикочомгак. Мезть а эрсить! Кадовиндерят? Лытан, ваннан, кецнян, кавтолдан, абунгалян... Совси мештезэнь сюморкс ёжо якстерьсэ, ожосо артозь, мельде-валдо ды нусманясто прыця лопатнень лангс ванозь. «Вана истя, кода сынь, састо, каштмолезь чиньгак эрямостон певерить...» — а весть тешкстния эсь пачкам.
...Совинь лытамодон мейле покш. теке Ине ломанень, кудозон, кандынь эрькстэнть кавто ведрасо ведь. Лакавтынь чай. Ярсынь-симинь ды озынь валсо мунямо конёвдо пешксе стувором экшс. «Вирень ёвкстнэнь-моротнень ютавтомат конёвс» — кирдян мельсэнь. Ды ютавтан — пурнан книга. Зярс лемдия «Сиреневая луна».
Рузонь кельсэ.
Рузан?
Лисни...
Шказо чары чокшнень малава. Стувтынь якавтомс часон. Лоткасть. Кинь кевкстят? Кудом вакссо пиже почаня пря сэрей пильге пиченть? Чувтосто чувтос толкельнекс кивчкаиця урнэнть?
Совинь шабра нупальс, залс. Тесэ телевизор. Вестькак эзия нолдтне. Шкам арась микшнемс вановтт икелензэ. Конёвтне, лангозост эциця, ойместэ лисиця, мелень витиця валтнэ тертязь кирдить эйсэнь.
Нолдыя невтнемкаенть.
Ёвтызе шканзо. Аравтынь часон.
Эзинь кенере стямо, лиссь икелень кавшаня, менчевезь черь, [267] муюконь кандтний, карксамга невтевиця цёра. Ёвтни мезде-бути, сеске эзинь чарькоде, эрзякс. Ёвтни апак пупорькшне, мазыйстэ, товнень пес чарькодевиксстэ. Кургстонзо рузонь вал вейкеяк эзь пра! «Чипаз, те косто истямось, истя ваньксстэ кортыцясь саевсь?»
Эзинь стяво. Кунсолыя-ваныя невтевксэнть педе-пес. Прядома малава лиссть букват: «Надькин Дмитрий Тимофеевич». Кие те истямось? Костонь, косо важоди?
«Вай, кодамо чольдердиця чачома келем! — ёндолнекс ютась эзгам мелесь эсень нупальс ютамсто. — Кода чевтестэ, кода шольнезь ёвтавить валтнэ!»
Арсезевинь...
Зярыя чить вирьга шатамстон кандтнинь мештьсэнь ёжонть эрзянь келенть мазычидензэ, сеедьстэ ледстневсь экрансто неезь ванькс эрзякс кортыця цёранть чачозо.
«... Паряк, саты, цёра, а? Ульнить «артистэкс», «клубарекс», малав колоньгемень иеть вешнить видечинь ёнкст паксясо-лабораториясо, ламо иень ютазь вельмесь «сёрмадомань толгат». Якак, азгондть вирьга-латкова, паксява-лугава! Якак, ваннок ды сёрмадт перькат мазычитнеде, ливтнек верьга-менельга. Ульть Пришвин Мишань кондямокс! Мезе теть таго а саты? Сёрмадт рузокс, мейсэ берянь те келесь! Ёртыть превстэть-прястот неть «арсематнень»! Саты, саты, оймак, котьмак кудоютксо, чарак нить перька, каштордт конёвсот. Кодамо теть седе паро эрямо?! Эли арсят теевемс Роденэнь «Арсицянзо» кондямокс?..» — кадык чуросто содавтнить каштордыця, эсь прянь эрьбамонь мельтне.
Арась. «Перестройкань» коволось, сонзэ мелензэ-валонзо кудоютко, стувор экшс озамонь ким киртизь. Ды пек паро! Панжовсь икелень истямо келей-келей, истямо мазый, сюпав Мастор, косо... эринь ды конань эзия нейне онстонгак.
1989-це ие. Эйзюрков. «Чилисема» журналонь нупальне. Кеменьшкадо ламо ломанть эйзэнзэ а кельгить. Азоравазо те «ашкиненть» самай се, кона «лаксекшнымим» эсь шкастонзо ношка, «мерьказь-синдтрезь» келем кис — Маризь Кемаль. Сондензэ башка, абунгадынь, панжизе кенкшенть, совась юткозонок экрансто неезь муюконь кандтний, менчевезь черь цёрась, профессорось Надькин. «Оно сон, эрзякс викшнезь кортыцясь, кодамо!» — ютась пряван сонзэ васенцеде неезь. Вакссонзо Мусалёв Григорий, мейле погононь кандтницясь, ушмодеесь Анисимов Анатолий, Грачёва Елена, Шарононь Сандра...
[268] «Монь койсэ, лемдема эйденек «Масторавакс»... Лиссь Шарононь Самарань мелензэ лувсо
Пурнымизь-серьгедимизь мелесь: кода таргамс эрзянь келенть чопода кельме отьмастонть, шумбралгавтомс ды максомс сонзэ мельганок сыця эрицятненень.
Кортамось текеде.
— Пек паро, прынек мельс — теемс вейсэндявкс ды кундамс ёмамодо келенек идеме, — яволявтсь кенярдозь Маризь Кемаль, стядо аштезь стуворнэнзэ экшсэ.
— Эряви лем путомс, — ёвтызе мелензэ Мусалёв.
— Виде, виде, — каятотсть вайгельть.
— «Вельмема», — мерсь апак арсе та-кие.
— А берянь... — шнызе меленть Надькин, — ансяк...
Мезе — ансяк — эзизе ёвта.
...Ютась шка. Кабинетэсь теке. Пурнавинек некетне. Кой-кинень озамо таркаяк эзь сато.
— Вана мезе, — эзинек кенере ойсеме, гайгезевсь Шарононь Сандрань
гайгиця, верьга ливтниця вайгелезэ, — «Вельмема» лемесь ковгак а маштови. Зярс эзинек куло. Мезде вельмема? Монь койсэ, эйденек лемдяма «Масторавакс». Эйсэнзэ покш зэме: кортамо Мастордонок, Паздонть, эрзянь озномань койтнеде, моротнеде, эрямодо...
Лиссь Шарононь мелензэ коряс.
1989-це иень ожоковонь 25-це чистэ Сарансо «Масторава» эрзянь ды мокшонь вейсэндявксось кемекстазель тень туртов пурназь промкссонть.
... 1989-це ие. Ацамковонь 17-це чи. Саран ош. Профсоюзонь культурань кудо. Кирдийтнеде пельскекшнезь ютавтови конференция. Кочказельть зярыя чиде икеле кавто таркат: кардасамизь ве таркасо, пурнавтано лиясо. Мерема, малав истя лиськак, савсь пурнавомс колмоце таркасо — Культурань кудонь кинозалсо.
Ветясь конференциянть Надькин Дмитрий. Эрзянь ды мокшонь историядонть ёвтнесь (рузонь кельсэ) Абрамов Владимир, [269] культурадонть — Брыжинский Василий. Кортасть лияткак. Сакшность кунсоломо-арсеме, мелест ёвтамо сядошка ломанть Сарансто ды кой-кона буетнестэ. Зняро «националистт» седе икеле зярдояк эзть пурнавкшно.
1990-це ие. «Покштнень» мелест арась ловомс-кемекстамс «Масторава» вейсэндявксонть. Таргсить шканть. Куш обкомтне-райкомтне кельме латко пиресэть, сынсь а содыть кода тенст седе тов улемс, кенкшенть тензэ а панжить. Пелить илязт ушодо «масторавеитнэ» почаксамо лембе таркаст. Надькин Дмитриень аволь ве час «човсесть» важодема таркасонзо, пединститусо, вансть те «човсеманть» мельга обкомонь ломантькак. Тевест эзь лисе — профессорось, поэтэсь, патриотось Надькин эзь менд яво, раськензэ эзизе мие, кадовсь кисэнзэ аштицякс.
Шкась мольсь. Вейсэндявксось кодаяк а кемекстави.
Сынек мельс: кучомс сёрма «верев», Московов, Конституциянь судс. Тов пшкадицятне Республикасонть содавикс лем марто ломанть, «заслуженнойть»; сёрмадейть, артистт, тонавтыцят... Пурнынь «лемень»-орденэнь кандтницятнеде ниленьгеменде ламо, эрьвась эйстэст аволь покшке сёрманть алов апак пеле, мезде эзь арсевгак, путызе кедь тештявксонзо. Чийнинь, пилыть чавинь, неть тешкскетнень мельга, вешнинь сынст важодема таркава, квартирава-кува аволь ве чи, аволь кавтояк. Кода илязо уле, пшкадемась ильтязель ков эрявсь.
1990-це иень якшамковонть сасызе даволков, сонзэ полавтызе латотнень пева сельведень нолдтниця тундонь ковось. Курок сась сэнь вармасо элякалиця, шалныця чадыковось. Шкань-шкань Мусалёв Грига марто совсетяно Саран ошонь депутатонь Советэнь кудос: кевкстнетяно ды кармавттано капшавтомс «Масторавань» кемекстамонть. Васня якинек, безардевтинек ве адресэнь коряс, мейле лиянь — косо свал эрсесь ды эри нейгак те самай, кадык лемензэяк умок полавтызь, Советэсь. Зяроксть совсинек, а лововияк. Вай, теде седе паро а ледстнемскак!
«Ниленьгеменень сёрмась», конань кулокшнынек Московов, илизь кунда, ломань вельде, эсь тевензэ теизе. Окойники, ниле-вете ковонь перть яксемадонок, мекев-васов сёрмань-уставонь кучнемадонок мейле 1990-це иень чадыковонь 28-це чистэ, пижестэ оршневема шканть каршо, «Масторава» вейсэндявксось, кемеманок, кецневтимизь, кемекстазель. Учовсь, учовсь!
[270]
* * *
Вейке промкскес, кона ютавтовсь «Чилисема» журналонь нупальнесэнть, састь Цыганкин Д.В. университетэнь профессорось ды доцентэсь Мосин М.В. Чачомасткорясэрзят. Кавонест лангсо, сельмс каятокшнось, кедень раужо курткат. Сестэ чуросто ки истя оршнесь. Секскак мольсть сынь неть курткатнесэ, лангс ванозь, мейсэ-бути Гражданской войнань шкань маузер марто комиссартнэнь ёнов.
Састь ды ёмасть. Аволь ламо шкань ютазь, тейсть, маряви, арсизь калавтомс чачиця «Мастораванть», эсест, келень содыень вейсэндявкс — «Кель». Тевть те «Келесь» кодаткак эзь топавто. Эрясь ансяк конёвсо. Сень кис путозель Ине тевентень «пильге», покш зыян.
Пазонть кинзэ, келя, а содавить. Седеяк ломаненть. Содык азё, кодамо кирькс теи, ков кирнявты валске ды валскеде мейле, Мосин... Кие арсесь: 1989-це иестэ те сэнь сельме, валдо тюсчама, аволь сэрей ломанесь карми прявтокс эрзянь келенть куловтома тевсэнть? Кияк эзь. Лиссь истя. Сеске Надькин Д.Т. куломадо мейле кирдийтне-власттне сонзэ аравтызь «мордовской движениянь» прявтокс ды моросо-киштемасо, эрьва кодамо промкссо-лабордомасо, «мордвасонть» сэредьксэнь марямга лавсаи эрзянь келенть ды сонзэ кис аштицятнень. Меельце рицягазо Мосин «ялганть» — ЕМЯ-сь.
Сеедьстэ марсеви: «Тонавтыця, тонавтт эседеть виев тонавтыця!» Цыганкин Д.В. истямо тонавтыця трясь-кастась. Мосин ламоксть икельдизе тонавтыцянзо.