Эрязденть арсезь (2010)/Арсезевинь...
[262]
| ЧАЧОМА МАСТОРОВ ВЕЛЯВТОМА |
| Арсезевинь... |
ИЕТНЕ талайде эскельдясть сизьгементнень трокс. Стакалгадсть. Кеверить аловпандт. Аламо кадовсь алксонтень. Пачкодить ды лоткить. Прядовить кецнематне, ризкстнэ, мелявкстнэ, мадить чипаесь, ковось, лепиить нармунень моротне... Карминдерят ёвтнеме пандонть тёкшкезэнзэ куземадо ды мейле валгомадо седе келейстэ-кувакасто, сёрмадома аволь вейке том. Эрязь иетнестэ весемеде нардевстэ ванстовить превсэнть эйкакшонь ды одксчинь налксематне, кеняркстнэ, тевтне-мельтне. Седе мейле апак учонь тамашатнень тюсост ушодыть оламо, панжиковонь эрязкалиця мазычист ютамо. Теке марто, самай сынст эйстэ, аволь «тундонсетнестэ», ламо иень перть чапови покш шкань, эсь олясо ды эсь вийсэ эрямонь кудось. Сон путови урьвакстомасто, ни марто эрямосто ды эйдень трямонь-кастомань мелявкстнэстэ; кочказь тевсэть чинь-чоп важодемасто ды лиясто.
Мелявкст-тевть, тевть кудоютконь, кардазонь... Кеняркст, ризкст, майсемат... Сынст эйстэ ашти сонсь эрямось. Ламонь кургсто марсинь: «Кудораськеденть башка ломаненть эрямосо седе оймень эждиця, чанстень кандыця, седе эрявикс мезеяк арась». Эрияк, келя, сон эйкакшонзо, нуцьканзо пильге лангс кепедеманть кис. Секскак малав эрьвась бажи ванстомс Пазонть пельде казезенть — кудонь лембенть.
Эстень истя эзь тееве. Эзь лисе те коенть коряс: максомс ушодксто-пес эрямо пингем те, алкукскак, Верде максозь тевентень. Кудонь-кардазонь, кудораськень, паряк, седе виде — пувозонь, тевтнеде башка свал бажинь теемс мезеяк лия: мель путынь седе ламо содамс, кунсоломс музыка, пурнамс ламо масторонь картинань репродукция марто картынеть, сёрмалемс газетас, чинек-венек стомамо книгатнень велькссэ, ветямс паксясо ды лабораториясо анализт-[263]экспериментт, сёрмадомс-идемс диссертация, важодемс — колоньгемень малава иеть — университетсэ, максомс превть одтнэнень... Арась, од шкасто серьгедезь мором педе-пес тень эзь прядово.
«...Лисян пенсияс. Оймсеме. Кундан кудоютконь тевтнес. Оршнян ламоксть пандтнезь оршаминеть ды тундосто саезь телень самс апак капша карман поксарямо, прок сараз, умарь ды эмежпиресэ. Коштось ванькс, пиче чине марто. Лексят — лексевлить. Умарть-эмежть эрьва кодат. Ярсак нильтякадомазот. Мезе теть теде башка эряви?! Мезень берянесь?! Телесь сы — чомболк диван лангс, атяка псакинекс лужалеме. Лембе, чевте. Полгарьгавтнек, тетъксек сельметь, ящикенть лангс ванозь, чинек-венек, куш ярсамояк иля стякшно. Кодамо теть лия эрямо?! Лисемс ушов — ули мезе лангат каямс. Ярсамс? Ледстнемскак теде а мезть! Сюкпря, Инешкипазонтень, ушосонть аволь 1944-це ие. Аволь 46-цеяк», — састь весть превзэнь та-кодат идем арсемат икелечидень. Мик визделгадынь. Каня тень кис макссь тень эрямо авам?
Арась-арась! Те аволь монь. Аволь.
Пазось тень макссь лия ки.
1985—1988-це иетнестэ сеедьстэ «човсевсть» «перестройка», «плюрализм», «демократия» ды лия томбалькс ёнксонь валтнэ. Ветердсть, эйсэст налксезь, радиось ды сонзэ ялаксозо телевидениясь оймень апак таргсе, кургонь апак пекстне. Курок «Правда» газетастонть эрямом перть васенцеде маринь «русификация» ды «дискриминация» терминтнэнь. Сынь ульнесть потсон, кадык леместкак а содылинь, эрясть эйсэнь, лиснемс вана эзть лисне. Пряст эзизь невтне. Учость. 1980-це иетне панжизь оймень кенкшем, ды лушсо совасть эйзэнзэ валтнэ раськетнень ютксо аволь мазый тевтнеде, макссть вайгель.
Арсезевинь...
Шкань ютазь, та-кодамо велий лембе варма кандымим «Сятко» журналонь редакцияв. Сон сестэ эрясь печатень ниле этажсо, ютазь пингень колоньгеменце иетнестэ путозь кудосо. Ней эзь кадово эйстэнзэ кирьпецькеяк. «Бачкатне» яжизь эрзянь культуранть чачома-касома пизэнзэ тюшумбар. Тарказонзо — каня те а мускулямо! — вачкасть — эйзэнзэ кельги весе Саранось — рузонь церькова. «Собор» тензэ мерить. Улевельгак видечинь кирдиця Паз, тень кис стявтыцянзо «казевлинзе» пурьгинень пси кевсэ. Тапизь ютазь шканок! Сонтемензэ кувать сави учомс, бути учови, чиньстямонть.
...Совинь. Стуворонть экшсэ аволь сэрей-аволь алкине, валдо [264] кавшаня черь, колоньгеменьшка иесэ тейтерьава. Сельмензэ сэнть, кирьксанят, покшт. «Оржакс сельме!» — мерить истятнэде. Варштась лангозон та-кода чирялт ды кармавтозь мерсь озамс стенанть ёжосо каршонзо стулонтень.
Кортазевинек.
— Тон эрзя-аволь? Мекс зняро рузонь валт кортамсто нолдтнят? — кевкстимем зярыя мелень-вал онь ёвтазь казямосто ды сельмезэнь пштистэ ванозь. Мик талакадынь.
— Эрзя.
— Эно мекс мерькат-синдтрят валтнэнь? — седеяк сыремсь гайгиця ванькс вайгелезэ, лепштясь эйсэнь озамо таркантень.
— Лиякс эзимизь тонавто... — меринь сэредицянь лавшо вайгельсэ. Идинь пря, прок чумо теинь.
— Ха! Муевсь какинесь! Эзизь тонавто... Эстеть каня а ёртовить рузонь лукш валтнэ?! — тетькинзе покш сельмензэ лангозон ванозь асодавикс авась, учось мезе мерян. — Сайть койме ды понжавтыть! Эли варма теть а сатны?!
— М-ды, мон, эзинь арсеяк... — кокнозевинь, нолдыя прям.
— Япононь кель тонавтнить! Тонеть чачома келеть а валакавтови! — седе сэтьмелгадсь вайгелезэ, педясь тонавтомон стуворонзо экшсэ аштицясь.
— Варчаса.
— Аволь «вар-ча-са». Сы самстот истямо кальдерькай келеть марто кенкшэм маласкак иля сакшно! — кардымим, сурсонзо тандавтнезь, нупалень азоравась.
— Паро, паро, сы самстон лиякс карман кортамо, «понжавтозь» валсо.
Корты авась псистэ, кедьсэнзэ ахолязь, эрьбаи эйсэнь сэредьксэнь марямга. Стясь мик стуворонзо экшстэ. Сельмензэ палозь палыть. «Ну и пача... — арсезевинь эськан, — содавиксэкскак, ловт, эзинек тееве, сэвтни эйсэнь...»
Эзинь покордаво. Тевень кис пансесь эйсэнь. Видсть валонзо. Чиде-кавтодо икеле сайнинь кедезэнь «Эрзянь-рузонь валкс». Сельмсэ ютынь «к» буквасто ушодовиця валтнэнь ланга. Ютынь — абунгадынь ды визделгадынь. Келем, чачома келем, алкукскак, ковгак а маштови! Чикор-лакор крандаз ёнов моли. Те кода истя? Мекс беряньстэ сонзэ содаса? Мейсэ тувталось?
Арсезевинь...
«Лаксимем» — теевинек содавиксэкс — Кемайкина Рая. [265] Аламос аштезь, прок арасельть ёвтазь чапамо валткак, ёвтызе эрзянь лемензэяк — Маризь Кемаль. Мартонзо вастомась ульнесь штатолнэкс, конадо кирвазсь потсон чачома Келень, чачома Масторонь вечкема толось.
* * *
Ютасть иеть. Ней уш комсте ламо. Превскак сестэ, се шкастонть, ды талай мейлеяк, эзь сакшно: сельмень панжицям, валдос тердицям шашты эрзянь келенть Тов ветиця кинть чирес, шкадо икеле кадсы эсензэ превсэ-мельсэ ушодозь-эждезь тевенть. Туемадонзо икеле зярыяксть тень мернесь: «Эрзятне — кулозь нация. Минек пстылямонок — кулыцянть кутьмерьс летьке, лембе путовкскеть». Паряк, теде, акемемадо, тусь, паряк, мезде лиядо. Тусь, тувталтнэнь саинзе мартонзо. Виев, седеяк пек пиземе-цярахман марто варманть каршо эскелямсто вайгельпетне кувалгадыть ламоксть.