Эрязденть арсезь (2010)/Пупордямо
[210]
| Пупордямо |
ШОЖДА меремс, ды стака тевенть теемс.
Лиясто тевесь ёвтазенть коряс сядоксть стака-калгодо эрси. Секс сеске а сусксак. Кой-зярдо куш начкомазот псилгалек, а сон кодаяк а топавтови.
...Содамочинь кевкстницясь, аволь сэрей, цитниця кокша пря атясь, велявтызе ёнон прянзо ды мерсь: «Тон, од ломань, докат, ванан, кельсэ-валсо ды сёрмадомасо, физикасо вана — аволь Ньютонат. Тонавтнема, содама сонзэ. Чарькодимик? Сат, гулькине, сы иестэ. Кенкшенек свал панжадот...».
Ютавтызе эйстэнь вановтонзо, саизе икелензэ ручканть ды путсь стуворонть лангсо аштиця экзаменэнь лопинезэнь сочинениянь кис «ниленть» ваксс раужо покш унжашка «неуд».
Од ким ушодомсто-келемстэ пупординь васень эскельксстэнть. Вана теть паксянь азор, вана колхозонь кепедемат! Кепедик... Шожда меремс... «агроош», поладса тетянь тевензэ, карман агрономокс!
Ризнынь-теинь — ойминь. Мезе ней, кувсемс, лайшемс-лырнемс а мезть. Чумось монсь. Монсь неть физикатнень-химиятнень школасо тонавтнемстэ мезекскак эзинь путо. «Мезекс сынь монень?! Монь превсэнь сценат-театрат! Тосо сынь а эрявить!» — кирдинь мельсэнь ды кортынь, потмо чамдынь яла ялганень. Вана теть мезекс!
Патям, Надяй, — велень клубонь прявт. Войнань иетнестэ [211] саезь мейсэ маштынь лездынь тензэ. Пидезь модамарьсэ педявтнизь газетань лехат ды чевксэнь «койминесэ» сёрмалинь лангаст тердемат-лозунгт: «Всё для фронта, всё для победы!» эли «Первый хлеб — государству!». Лиясто чинь-чоп носкилинь. Лехась пракстадо Кавксть-колмоксть кувака.
Лиссь истя: велев «неуд» марто мурдамстон патянь ютавтызь важодеме лия таркас. Клубось зярс кадовсь азортомо. Тесэ — мон. Арсян: «Мекс тень а улемс клубонь прявтокс? Плакатонь-мезень рисовамо, стихень ловномо маштан, сценань тевтнесэяк аволь чопода ломанян, од ломантнень марто кель-вал муян...».
Вельсоветэнь прявтось каршо эзь моле, мартонзо кортамодо мейле кучимим буень-райононь бояртнэнень.
— Самай вереть, цёра! — кунсолымим ды пеедькшнезь мерсь тень культурань прявтось, допрок од цёра. — Гармониясо седят?
— Арась!
— Гитарасо бринцяят?
— Арась!
— Морат?
— А... Моран! Эрзянь, рузонь, азербайджаноньгак моро содан. Рузокс, виде.
— Панжомань кандтницякс а улят?
— Арась!
— Пек паро. Кенкшень пекстницятнеде сатыть тонтеметькак.
Кудов сынь важодемадо книгинесэнь, театрань тешкскеденть башка, нурька сёрмадовкске марто: «Принят на работу заведующий Ардатовским с/клубом...». Кедьтешкс, печать. Таго, таго совинь леентень, косто лисекшнинь. Кадык васенценть коряс саразнэнь кумажа видьга, ялатеке моли ёнонзо, лисьмапряст вейке — культура.
Эрямось путсь икелень конёвонь од лопа. Пештяма тевсэ, мелявкссо, эрямонь лувсо, кеняркссо. Ризкссэяк. Ковгак теде а туят. Янксемат — тень а истя теия, тонань — илязт уле. Ёвтамс валонть — шождыне. Ды аволь свал лисни мерезенть коряс. Ялатеке бажан: ёвтык валонть — топавтык, кундыть тевентень — теик. Улезэ те эрьва чинь коекс.
Ды ушодовсть тевтне-мелявкстнэ. Концертс анокстамот, стенгазетань нолдамот, плакатонь сёрмадомат, семинарт, кинофильмань невтемат, футболсо налксемат, ловныцянь конференцият... Апак кармавто, эсь мельсэ теезь тевтне теевить — а марявить.
[212]
* * *
Умок ваясть отьмас избачонь-мезень тевень... Зярдояк уш а мурдыть, иля учо. Эйстэст ледстнезь, кевкстнян яла эсь прям: эрявкшность-эзть истят «пиже кадратне», кодамокс ульнинь мон, истямо покш тевсэ, кода культурась?
Арасельть велень клубтнень туртов парсте, эрьва ёндо анокстазь важот. Арасть, мерема, нейгак. Истят культурань ванстыцят-кастыцят эрявсть свал. Седеяк эрявить течи. Совавтомс ломаненть оймес, кшиде-салдо башка, эрямонть лангс седе келей, домка вановт, теемс, меревксэнть коряс, ломаньстэнть Ломань — каня чипаенть ало ули теде эрявикс, теде питней мель? Сонзэ топавтомга анокстама ламонь содыця, келейстэ ды домкасто арсиця, талантсо казезь важодицят. Содаст сынь литературанть, музыкань классиканть, философиянть, историянть... Эрявомс эрявить, ансяк культурань тевтне мекс-бути течинь чис лововить мельде-валдонь, меельце тевекс. Кода полавтоволь эрямось, улевельгак мекевланг!