Эрязденть арсезь (2010)/Театрасто - колхозов
[207]
| Театрасто — колхозов |
СУДОНЬ тевть, пелеведе мейлес ульцясо морамот-киштемат, ашолгадома ланга вечкемам марто явовомат... Эрямось ашти кавто пельксстэ: неявиксстэ ды анеявиксстэ. Удем сормсевкстнэсэ, мертяно, кашкить, сыть-туить эрьва кодат мельть [208] ды кевкстемат: мезе монь учи? мезе эряви анокстамс седе васоло ёнксонь чинтень? ков ки кирдемс? Сынст, арсеман — эрямонь пельксэнь, кияк а несынзе. Анеявикстнэнь эйстэ ломаненть вень эрямозояк.
Театрань шаршавом пекставсь. Весе. Зярдояк одс а панжови. «Артистэкс» ульнинь. Седе икеле «художникекскак». Кадык «Боярыня Морозова» эли «Сестрица Алёнушка» одс тень эзть вельмевтеве, ялатеке мартост вастневинь. Ней ков? Таго теке кевкстемась, таго ёнксонь полавтнема, таго од тештень вешнема... Инешкипаз, мекс тон теимик сёвонень кондямо чевтекс?! Мекс, авай, трицям-кастыцям, чачтымик свал ков-бути бажицякс? Мекс а ойман? Мезе тень а сатны? Мезе вешнян?
Сталинэнь куломадо мейле ламо мезесь полавтовсь. Масторонь од прявттнэ кундасть эль лексиця колхозтнэнь, велень хозяйстванть пильге лангс стявтомо. Васняяк нардызь трудочитнень. Важодицятненень теезь тевест кис аламонь-аламонь ушодсть ярмаксо пандомо. Лиякс лемдизь МТС-тнэнь. Максовтызь вейсхозтнэнень техниканть. Московонь ды тескень прявттнэ топавтсть «товарищ Сталинэнь», ине ветиенть, валонзо: «Жить стало лучше, жить стало веселее». Эрьва газетасонть покштояк покш буквасо сёрмадовсь велень хозяйствань течинь ды вандынь тевтнеде. Программат, Плант, Постановленият, Уставт, Указт... Истямо шалт — марявсь, иень-кеменень ютазь велетне теевить чипаень валдосо пештязь, сюпавдояк сюпав, ояксчисэ эрямо таркакс. Кода а кемемс?!
Минек велень Калинин лемсэ вейсхозонь тевтне седеяк камажкадокшность. Ковгак эзть маштово. Карязт ломантне яжасть стякодо. Трудочинть питнезэ — ведьгемень граммат розень сюро. Сеяк ансяк зярыя ковонь перть теезь «читнень» лангс. Колхозникесь сюротнень кенеремас нерьги пельиеде ламо — пандома питнезэ кескавсо кандови.
«Берянть прявттнэ! Симить, салыть, а арсить, ламо тевтнеде а содыть. Эряви тонавтнемс ды кундамс, зяро виеть, колхозтнэнь кепедеме. Саты ботамс аразьчисэ, сюпавчись совазо эрьвань кудос, эрьвась эрязо ломанькс. Улить, мерема, паро хозяйстват, сельметь сявадыть...» — истят мельтне а весть совсесть превезэнь. Аволь ламо шкань ютазь, монськак эзия редя, кода сынь теевсть тень эрямонь зэмекс. Муия, марявсь, тештенть, кона тердсь верев!
[209] Ды меринь эстень: «Карман агрономокс! Туян тетянь киява. Поладсынь войнасонть сезезь тевензэ. Карман кастомо сюпав, ламодояк ламо центнерэнь менть-норовт, пештямо сюросо утомтнень-кавтнень, пе путан симемантень ды саламонтень, маштсынь пес асатыкстнэнь, тейса Орданьбуенть агроошкекс!».
Прязонгак эзь валгоне мелесь: «Партиядонть ды Правительствадонть» башка лездась тень муемс ды стямс агрономиянь кинть лангс тетям.
...Эчке, теке покш мокшнашка тодовне, книгась усксевсь тетянь путовт утомнесэнть ташто горобиясо. Зярыяксть сайния кедезэнь, велявтнинь лопинензэ ды ваннынь эйсэст розень, товзюронь, кснавонь ды минень-сюнонь эмежень рисункатнень. Те книганть лемезэль «Растениеводство». Сёрмадыцязо Якушкин. Понгонесь пиже ланго брошюра — «Конопля». Войнадо икеле ды войнань шкасто вечкилинь ванномо «Сельхозмашины» энциклопедиястонть картинкатнень.
...Тетям весть кизэнь маней чистэ усксь пешксе крандаз апак пивсэ розень, пинемень, товзюронь пултт. Мон, вете-кото иесэ цёрабайне, муинь налксема: кузнян, нолажтнян, кеверькшнян, кутякснян лангаст.
Авам редимим:
— Лоткак, акирдевикс, лоткак! Товост весе певердьсыть, — панжизе вальманть, сеери тень, тандавтни сурсонзо.
Мон элякалян, кодаяк а оймавтован.
Эзинь сода. Киеяк эзь ёвтне, кодат, косто неть сырнекс цивтордыця пулттнэ. Содамо карминь ламо иень ютазь. Апробация... Мезе те истямось, а содылинь. Валонтькак эзия марсе. Сынст ускокшнынзе тетям сондензэ мейле.
...Тетям тейсь кавто-колмо квадратонь метрань покшолмасо пандине. Изызе-ангоризе — видсь, эрьва товненть нерьгстызе башка, товзюро. Пандиненть пиризе — нерьгстнесь перьканзо мандонепеть. Истя сон, трицям-кастыцям ды кода а кода тонавтыцям, путсь мель кастомс, Лысенкань теориянзо ды кармавтоманзо коряс, тарадов товзюро.
Косто тень ульнесь содамс, чижк юты эйкакш шкам, ютыть иеть ды тетянь «Растениеводство» тонавтнема книгазо тееви тонавтнема книгакс монень. Институтонь колмоце курссо сёрмадса «Конопля» рефератонть, а мейле, зярдо прядса институтсо тонавтнеман, ютавтан апробация — сюротнень ёжодост-кирдадост [210] ваннома-ловома.
Вана истя, аволь ансяк партиясь ды, аволь ансяк сонзэ пропагандань ды агитациянь отделэнзэ лездасть тень улемс тетянь киява ды тетянь мельга молицякс, сонзэ тевензэ поладыцякс.
Ушодовсь эрямосон покш, икелень коряс кувака, ламо иень од пелькс.
* * *
Од шкасто, зярдо арасть теть комськак, зярдо эрямованть ветиця суресь маряви певтемекс, эйстэнек малав эрьвась романтик ды Дон Кихот, эрьвась эрямонть лангс ваны якстерестэ артозь суликань пачк. Истямокс ульнинь монгак. Превскак эзь сакшно: теевить-арась эрьва кода сеть шкатнестэ шназь агрооштне?