Эрязденть арсезь (2010)/Ушодкс
[28]
| ВОЙНАНЬ ТОЛСО КИРТАЗЬ |
| Ушодкс |
__ЗЭНЬ потмура чи. Сувтни-петерди прок аволь кизэньгак човине пиземе. Шкань-шкань виевгали. Лостерь-лостерь каяты лиясто. Чоподасэнь пельтненень пе а неяви. Уить алга. эрязкалезь. Маряви, тандавтынзе чивалгома ёно пукштордыця, оймень саиця толось.
Ванан, педявтыя судом суликантень, вальмава. Курок-аволь прядови те начко сельме чись?
Васолдо каятотсь тракторонь эль марявикс урнома. Аламонь-аламонь яла виевгадсь, ды курок цярнозь цярнозевсь. Пачкодсь минек видьс. Икельганок ардомсто зэрттензэ соракадсь кудо-потмоськак, вальматне вайкстазевсть суликань човине, ванькс гайтьсэ. Мештезэнь совась нусманя, ризксэв ёжо, неезденть-марязденть эль эзть туе сельведень. Истя пезеря, нильтякавтыця пизементь алга Пичепестэ Алопев таргавозь раужо рудазов кияванть меельцеде ютась колхозсонок весемеде покш, виев «кшнинь лишмесь» — «ЧТЗ» тракторось. Тусь фронтов, «оёвамо», та-кодамо вардо марто тюреме.
* * *
Велень сыргозтиця зэрть, сюмора валске, алга уиця, апак лотксе авардиця чопода пельть... Истямокс совась превзэнь ды кадовсь ледстнемакс войнань ушодовома чись.
Кортыть, 1941-це иень аштемковонь 22-це чись допрок лияталь: манеель ды псидеяк псиль. Паряк. Монь седейс вана сон кадовсь истямокс. Сонзэ, ойменть, эсензэ вановтозо перькат эскелиця-ютыця тевтнень лангс.
«Верде», ветийтнень пельде пачколить кармавтомат: «Илинк токше Ине Отечественной войнанть историянзо. Кадовозо истямокс, кодамокс сёрмадозель куроксто войнанть прядомадо мейле». Те а виде. Эрьвась эйстэнек эрямонзо перть те «историянть» [29] ловны зярыяксть ды эрьваксть лиякс. Од пингстэ чарькодьсак истямокс, мейле, сыречисэ, ванат лангозонзо допрок лия ёндо, лия сельмсэ.
Тамашань тев: «отечественнойкс» кармавтыть сонзэ ловомо кавтосядт малава раськетненень. Те кенгелема менельстэ-модас, педе-пес. «Отечественноекс» войнась лемдеви сестэ, зярдо раськесь тюри эсь Масторонзо, эсь Моданзо, эсь Келензэ ды эсь тетянзо-аванзо кис. Грузинэсь — Грузиянь кис, узбекесь — Узбекистанонь, комись — Комимунь, эрзясь — Эрзянь Масторонть кис ды истя седе тов. Мода-масторонь Омбоце войнась ульнесь «отечественноекс» СССР-ть ёндо ансяк рузтнэнь, украинецтнэнь ды белорустнэнь туртов. Лиятнень туртов, кода эрзятнененьгак, сон, видестэ меремс, ульнесь Мода-масторонь Омбоце войнакс.
«Родина»... Зяро те валонть перька киткав кенгелемат, валозь верь ды зяро чумовтомо маштовозь ломанть...