Эрязденть арсезь (2010)/Мекс истя теекшнынь?

Эрязденть арсезь (2010) by Нуянь Видяз, edited by Разгуляева Т. В.
Мекс истя теекшнынь?

Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 26—27

[26]

Мекс истя теекшнынь?

Книгат пазава икеле, стувор лангсо, эземсэ, книгат кудопотмарсо. Тетянсетнестэ весемеде вечкеви покш, лапужа, чопода-пиже ланго книгась. Сельгень лисемс ванкшнан эйсэнзэ рисовазь машинатнень. Кодат ансяк арасть! Тракторт, эрьва кодат комбайнат, жнейкат, изамот, покш тракторсо пивсэвтевиця пивсэмат... Велявтан лопа, мельганзо омбоце, колмоце... Мазыйть картинынетне! Вечкеви, судоварят кутьки книгань, мезе вакскак а путовиця, чинесь.

Патям тонавтни кавксоце классо. Сонзэ эсензэ книганзо. Сынст эйскак пачколян. Велявтнян сельгсэ начтозь сурсон лопатнень, вешнян мезе-бути мельстуиця. Мезе? Монськак а содан. Вейкень эйсэ покшосто печатазь портретт: Ленин, Сталин, Ворошилов... Башка невтезь сэрей-сэрей башня. Прясонзо стядо ашти кизэкс оршазь Ленин. Вить кедезэ венстезь верев-икелев. Невтни та-ков. Ков? Мезе тосо?

Вай, те мезе?! Ленин ды Сталин марто книгасонть вейке алянть сельмензэ каразь пачк. Те мекс, кода истя? Цёрась од, мазый, лавтовонзо ланга ушкс нолдазь кшнанькаркс, мештьсэнзэ «якстере» ордент. Патям, книгань истя ванстыцясь, кода тень нолдызе? Паряк, аволь сонгак истя нарьгизе героенть?

Велявтынь лопа, омбоце. Злыдардян ёнкскетнева. Я, таго теке мазысь! Кие, мекс тесэ портретэськак сэнынть-якстере черниласо черькстнезь ушкс-трокс? Истя, бешоконь, эрявсь. Патянь апак кевкстне, муия ручканзо, чернилань кедьгинензэ ды, покштнень лангс ванозь, ваднинь черниласо черькстнезь алянть сельмензэ. «Сокоргавтыя».

* * *

Школасо тонавтнемстэнь нарьгазь, книгатнесэ каразь сельме ломантнеде тонавтыцятне кортамот эзть ушоле, орденэнь кандтницятнень лемест копачазельть сувсо. «Раськень ятт». Седе [27] нурькинестэ а ков. Истяяк эзть ледстне. Мезе тейсть, мезень чумост — а куш а каш. Эрявсть иеть, эрявсь пачкодемс сыречис, чарькодемга, мезе кекшевсь «раськень ятт» валтнэнь ало.

Веенстнэ понгсть асфальтонь лепштиця машина алов — илизь айге таркастонзо Сталинэнь. Сынь «вожденть» малавиксэнзэ: Тухачевский, Блюхер, Бухарин, Троцкий, Каменев... весе, ловт, еврейть.

Омбонстнэ — лия, аволь рузонь, «инородецэнь» раськень сёрмадейть, тонавтыцят, келень содыцят, историкть, журналистт... Сыненст понгавтнесть аламнеде лия лемть — «буржуазиянь националистт», «террористт». Сталиннэнь пелемс эйстэст ульнесь а мезде. Эно мейсэ сынст чумост? Леднизь сынст чачома масторост, сонзэ культуранзо кастоманть кис. Сталинмезть толдо пек пельсть — илязо каладо, кода эсь шкасто Римесь, Индиясь, мейле Югославиясь, Советской, иневедьстэ иневедьс сравтовозь масторось.

Сындест башка ламо-ламо «кулакт», «антисоветчикть», «контрат», конатнень ютксо седе ламо эрзянь велень эрицят, лишме мельга якицят, ванстыцят ды лиятат «чумондозельть» ды ульнесть панезь вирень керямо, шахтасо-косо важодеме пелеве ды эрицявтомо лия чаво ёнкстнэв.

Советскоесь каладсь. Полавтызе Россиясь. «Раськень яттнэ», «террористтнэ», седе неень кельсэ ёвтазь, «бандиттнэ» кадовсть, эрить ютксонок нейгак, вейкесь эйстэст...

Мекс эно мезеяк мартон а теить?

Саты теяк, мезе тейсть.