Эрямос совамо/Стака иетнестэ/1
[ 3 ]
| СТАКА ИЕТНЕСТЭ |
I
СУНДЕРЬГАДСЬ. Чокшнесь лембе. Менельганть уить чопуда пель пангст. Опаня. Лейсэнть моры ведь унжа. Вайгелезэ, прок чаво боцька кургсто кайсети леенть велькска. Ульцятнева, ломантне ютыть такода стамбарнэ, пек мелявтозь. Сынь мольсть кашт молезь, мерят прок кортавсть весе кортамост, евтневсть весе евтнемаст, ансяк эрьвась эськанзо моткодсь: „Одов нельксесызь“. Кувакасто укстыть ды таго: „мезе ули ды се...“
Игаев лиссь орта лангс, пешнякс пезнавтынзе пильгензэ ды ве сельмень конязь вансь веленть кувалт. Мейле судо варяванзо стакасто лекстязь пшкадсь:
— Да-а... сэтьме. Энгамсь коммунистэнь пизэсь. Эрямо кундамс одов, а ули сынст койсэ, — прянзо нолдызе пильге алонзо ды велявтсь кардазов. Сон ютыньзе каладо кардазонть уголонзо. Лотксесь ды кувать вансь, косо ульнесь кекшезь сырьнезэ, одижанзо, сюрозо. Апак корта, стакасто укстазевсь, машнетезь совась кудов.
— Чорт мезе кардайсэнть! Шайтян пильгензэ синьдсы! — Трокс варштась роботницанзо Аганянь лангсь. — Ломань кирьдть, ант, орчак, питне пандт... Мезе лезэсь? Кодамо толк?.. Эряви сиведемс од роботник ды тевтнень нолдамс виде киява...
[ 4 ]Моткодезь, машнетезь совась козейканзо мельга кудов. Аганя чатьмонезь кадовсь кардаз куншкантень, вакссонзо очкиненть кандызе тувонь кардов, сорновтызе рунгонзо, ды лись орта лангов.
Чувтомсь ортанть лангс. Мерят прок мезек емавтсь ды те емавтось саизе сонзэ эрямонзо. Сон эзь арьсе течинь сизевтедензэ, эзь арсе исень чиденть, эзизе маря опаня чокшненть паронзо. Сэтьместэ вансь тов, ков якстерестэ валгсь чизэ.
Виренть нучк, пандонть прясто ацавсь велентень ки. Виренть чирестэ те кинть лангс появась ломань. Сон стамбарнэ, прок нузяксто валгсь велентень. Аганя неизе те ломаненть ды учось, кода юты икельганзо, штобу содамс, кие сон.
Ломанесь яла шаштсь малав. Аганя бажась ве ендо содамс. Вансь сельмень апак коншта. Эзь содав. Эзь моле эсь велень ломань еновгак. Сонзэ лангсо ульнесь каладо пальта, бокав чавовт кочкаря кемть. Кирга лангозонзо новольсть прячерензэ. Нусманя чамасонзо мень бути седейс токиця ризкс.
Ансяк пачкодсь, лоткась Аганянь видес. Пейдезь варштась лангозонзо. Аганя абунгадозь аштесь икелензэ ды мик дивазевсь.
— Вай авакай, вере пас корминець, — эсь сельмезэнзэ апак кеме пшкадсь Аганя ды кедензэ вачкодинзе, — Астакан, тонь косто кандыньзеть вере пазось?
Астакан мольсь Аганянь вакс, виздезь веньстизе кедензэ, пшкадсь:
— Уфимской кантонсто. Эринь Романовской куторсо, — столыпинецень кедьсэ. Ломантне пек сюпавт, можна ульнесь эрямс, но родной шачома велентень седеесь терьди. Коть тетясь сыре, яла теке жаль маряви.
— Тетят кулось... — евтась Аганя. Мейле прок сонсь янксесь, мейсь евтызе.
Астакан нолдызе прянзо, кедезэ нолаштсь Аганянь кедьстэ. Сонсь теке кельмень чавовт лопа рипакадсь Аганянь икелев.
[ 5 ]— Кудо юртозонк кадовсть ансяк палозь кирьпець пелькст. Усадьбасонк касыть марчт, нартемкст.
— Косо жо лелям, уряжом? Косо лелянь эйкакштнэ?
— Тетят кулось вачо иенть, каштом лангсо кувать ульнесь апак калма. Уряжот эйдензэ марто кулось омбоце недлянть ды тетять марто ве шкасто калмизь.
— Ней косо жо лелям?
— Лелят теск, велесэнть. Сась вачо иеденть мейле ды урьвакссь. Мезес кенерьсь, сень мись, пурнась сэрьнясь одс эрямо.
— Ков ней молемс?.. — Астакан а мельсэ варштась веленть лангс. Ды родной велезэ неявсь тензэ кадозь, кельмевкс велекс.
— Лелянтень, — жалязь отвечась Аганя.
— Кода молят тензэ? Сон жо кадынзе весень: тетяньгак, козейканзояк, эйкакшонзояк... А сы седеем молемс, ды кода эщо варшты лангозон, — укстась Астакан, мериксэль эщо мезть бути, но чатьмонезь нолдызе прянзо.
— Нужась кармавтынзе, — пшкадсь Аганя. Мейле аламос арьсезевсь ды виздезь ладсо пшкадсь:
— Кадовт течес монь кедьс. Мон ливтян нулат-валат, — кардс мадят. Азортнэ содамо а кармить.
Астакан шождынестэ таргизе оймензэ, чевтестэ варштась Аганянь сельмес, ды прок эстензэ мерсь: „бути можна, кадован“...
Весь пандонть прясто новольсь веленть лангс, чопудантень ематодсть паксятне, вирьтне. Велесэнть тия-тува кирвастнесть толт. Аганя састо совавтызе Астаканонь Игаевень кардос ды чевте вановтсонзо варштазь кадызе кардонтень.
Омбоце чинь валскенть эщо чинзэ лисемадо икеле Астакан вастызе Аганянь ды пек кеместэ кутмордызе. Аганя эзь нельге прянзо, ансяк визьдезь сорнось Астаканонь беремасо. Сынь кувать кашт мольсть. Те шкастонть мелезэст ледсь умонь эщо вейсэнь вастнемаст, ды те тенст марявсь прок исяк. Вана Аганя истямо жо [ 6 ]якстере умарь чама, черензэ истя жо новольсть лавтовонзо ланга. Астакан састо ютавтызе кедензэ Аганянь черьтне юткова.
— Кунсолок, — мерсь сон, — мезе эщо эряви поладомс тенень, — сеске жо сонсь отвечась, — кши! — Ды таго сювордызе мештезэнзэ. Астаканонь мельсэ ульнесь содамс, кода эрясь, ды эри Аганя ней. Кевкстизе, но Аганя нусманясто нирькенестэ отвечась:
— Ярсамс ломань кшиде... но ломанень кши сускомось седейс а педи.
— Минек улезэ кшинэк эсинек, бути минь арьситяно эрямо. Минек улезэ эсинек хозяйстванок, бути минь арьситяно улеме эсь масторсонок азорокс. Минек улить эрямо праванок ды миненек эряви эрямс...
— Праванок улить... ансяк ломанень кисэ эрямс ды ломань лангс роботамс. Уш нать кодамокс ульнинек, истямокс кадовдано. — Аганя укстась кувакасто, варштась якстере чи лисема енов ды таго пшкадсь:
— Вана вант: курок чизэ лиси. Тонеть эряви туемс, монень кундамс тевс. — Сон евтыньзе не валтнэнь пелезь, а мельсэ. Сонсь неждясь седеяк малазонзо ды мелезэ овси арасель явомс умок апак нее ялганть вакссто. Аганя кеместэ палызе Астаканонь ды энялдсь а стувтомс вейке-вейкень ды сынь явсть.