Эрямос совамо/Стака иетнестэ/12
XII
Валерьян велесэ ламо марто теевсь ялгакс. Ютко шканзо сон свал ютавтсь ялганзо кедьсэ Сех пек ялгакс теевсь Андрей марто, кона ансяк сась армиясто. Сон гражданской войнань васень читнестэ эсь мельсэнзэ тусь фронтов. Ды ансяк ней, Колчаконь тапамодо мейле сась эсь велезэнзэ. Сон икелевгак кундась велень тевтненень ды сеске неизе, што тевтне аволь ванькст. Эрявсь малав одс тевтнень ладямо кундамс, панжомс ки велень беднотантень, средняктнэнень икелев эрямонтень. Эрявсь одыявтомс вельсоветэсь, секс сынь вень перть, вень перть аштекшнэсть тень лангсо Пурнасть перькаст кеме ломанть. Те тевентень аламонь-аламонь таргавсь Аганяяк.
Валерьян истяжо кеместэ сюлмавсь Аганя марто. Васня прок ялга ладсо, но мейле апак фатя потмозонзо кирвайсь вечкема мель. Весть Валерьян чокшне лись ульцяв. Чокшнесь ульнесь лембе, чопуда ды вармав. Менельганть уйсть тусто пельть. Те ульнесь петровонь чинть каршо. Сон мольсь се заборонть ваксс, косо Аганя ютко шкане эрьсекшны озадо. Аганя арасель. Валерьян аштесь аламос ды сыргась кардонтень, косо удси Аганя. Ютась пирявксонть трокс, эскельдсь кардазонтень.
[ 56 ]Валерьян ваннось перть-пельга — кияк а маряви. Аштесь аламос ды састо совась кардонтень.
Аганя уш кеместэ удось. Вельтямонть алдо кепедсь лембе кошт. Валерьян кирвайсь спицька. Аганянь штекатне цитнесть якстересэ, сэрейстэ кепсевсь мештезэ ды сизевть рунгозо аштесь апак чирька.
— Аганя, — пелезь пшкадсь Валерьян. Аганя панжинзе сельмензэ, зярдо уш мадсь спицька толось ды эзь содав тензэ ломанесь. Сон тандадозь кирнавтсь ды озась таркантень.
— Кие тесэ?!
— Мон, мон, Аганя, Валерьян, — ды кирвайсь омбоце спиця. Аганя кувакасто таргизе оймензэ.
— Озак. Тандавтымик... Течи сизекшнынь. Эзинь листь ульцявгак, прынь тарказон ды вана матидевинь.
— Мейсь тандадыть? — пелезь ладсо кевкстизе Валерьян.
— Думинь кияк лия... Месть тон якат? Эли мезеяк теевсь? — тарканзо витьнезь кевкстнесь Аганя.
Валерьян эзь сода мейстэ ушодомс кортамонть. Но лездась чопуда кардось ды оконики пшкадевсь:
— Аганя, минь тонь марто те шканть ютавтынек вейсэ. Монь ней уш саты вием тонеть панжомс потмом... Тон чистэ чис кирвастят монь седеем пициця вечкема толсо ды арьсян, кеман, што те толось а мади монь потмосто куломазон. Васня сон ченярдозь ченярдсь, седе тов виензась ды гувкадсь... — Валерьян лоткась.
Аганя кашт мольсь, ансяк сеедьстэ таргсесь оймензэ.
— Мезе... — Аганя эзинзе прядо валонзо.
— Вечктян... Арьсян урьвакстомо, — отвечась Валерьян.
Аганя кирвайсь. Рунгованзо тусть кельме сардт. Превганзо ендолкс ютась Астакан. Мезе бути стака матрась седеензэ.
— Адя тень козейкакс. Астакан сермадсь, што [ 57 ]заводонок курок карми роботамо. Мольдян тетиденень. — Сорновт вайгельсэ кортась Валерьян.
Те ульнесь а васенце кортамо. Валерьян улко эщо кортась тензэ, кодамо паро вейсэнь эрямось, што од порась юты. Аганя арсезь нолдызе прянзо. Састыне таргсесь оймензэ. Чатьмонсть кавнест. Марявсть ансяк кода чавить седеест...
Омбоце чинть Аганя арьсизе весе эрямонзо. Арьсесь Астаканонь кувалткак, кона мик серма тензэ эзь кучне. „Нать стувтымим, — мерсь Аганя. — Од шкась жо яла юты... Валерьянгак ломанесь а берянь, вечкевияк...“ — неке арьсематне марто Аганя вастызе течи чокшне Валерьянонь
— Кода, Аганя? Мон таго секе кевкстеманть марто, — Аганянь сельмес ванозь кортась Валерьян.
— Молян... Ансяк кода тень теемс... — веселасто отвечась Аганя.
— Мольдян вельсоветэв ды распишемся. — Радувазь отвечась Валерьян. Истя ладястькак.
* * *
Омбоце чись ульнесь ненастия, састо поцердсь сиземе. Вармась яла виензась, пельтне яла тустомсть.
Аганя марто Валерьян аштесть вельсоветсэ. Учость, кода сы председателесь ды путсы печатенть. Обеднядо мейле ламо од ломанть промсть советэв, ваномо одирьванть, женихенть. Сехте дива се, — лисить мирденень, урьвакстыть апак венча. Те кулясь куроксто срадсь веленть келес. Конат пеедсть, конат кежейстэ вастызь те событиянть.
— А учови Макин, сон обиднясо. Мейле ярсамо моли, — кие бути пейдезь пшкадсь народонть ютксто.
Валерьян чаравсь прясонзо. Саизе кедьте Аганянь ды лиссть вельсоветстэнть. Лиссь мельгаст народоськак. Ансяк валксть кустем пестэнть, церькува икелев пурнавсть ломанть. Сынь талнозь тылкаест вейкест-вейкест. Аламо шкань ютазь церькувастонть сяворсь [ 58 ]народ ды човорявсь нетнень юткс. Марявсть кувсема, охаема вайгельть. Зярдо Аганя марто Валерьян пачкодсть малав, Валерьян ве таркас лоткавозь пижакадсь
— Аганя, маштыть Мотаень...
— Ах! — серьгедевсь Аганя ды кундась Валерьяннэнь.
— Нолдымак. Тон чик Инкинэнь кисэ Бойка! — Аганя кижнэзь напустясь ульцянть кувалт. Валерьян чопавтсь туриця ломантнень юткс
— Месть тейнитядо, ялгат! — Рангстась Валерьян.
Васня чувтомсь народось. Мейле куця ломань комась, кепедизь Мотаень ды варцодизь масторов. Мекев ланк меньдясть суронзо, но Мотай уш эзь пижне, сон ансяк кувсесь ды охаесь. Валерьян ансяк арыксэль вельксэзэнзэ, удалдо колмо ломанть каподизь ды ливтиксылизь юткстонть. Сон путызе весе моцензэ, меньсь ды чийсь Мотай вельксэс.
— Арасть прават маштомс ломань, — азаргадозь вановтсо варштась весеме лангс.
— Орт ванстат!.. — Каятоць ламо вайгельть.
— Вейсэ салатад! — Рангстась Макин цы лоштизе Валерьянонь. Валерьян эзь пра. Ансяк варштась председателенть лангс, се шканть вачкодизь човонсь. Валерьян комась. Прась кедензэ лангс. Ансяк снартсь стямо, лаузнявсть лангозонзо. Майшсь паметезэ.
Те шкастонть чийсть таго ломанть. Андрей марто чийсть знярыя ломанть. Андрей пижакадсь:
— Оргодеде, леднитядызь! — Андрей каподизе зепензэ, мезеяк арась. Чаво зептне вачкоевсть кедезэнзэ. Ломантне явовсть. Аганя вановтсонзо кармась вешнеме Валерьянонь, — эзь неяв. Зярдо эцесть ломантне юткс, Валерьян стакасто лексесь, аштесь сезнезь прок чавонь пулт. Аганя уракадсь, майшсь паметезэ ды прась Валерьян лангс.
Андрей кашт молезь ваньсь перьканзо народонть [ 59 ]лангс. Председателесь Макин, Игаев марто аштесть ожань илиштязь, верьсэ пурксезь.
— Ах, верень симить! — Андрей ды лият саизь Мотаень, сон уш кельмесь — кулось. Валерьян раздязь стясь пильге лангс.
Чавицятне ды лия народось кармасть срадомо. Икелевгак ношкстасть Макин ды Игаев.