Эрямос совамо/Стака иетнестэ/14
XIV.
Декабрянь меельсь читнестэ заводонть кардайс промсь народ. Сынь шешксть куцясо, радовазь тошкасть вейкест-вейкест пилес: „вана азоронть таркас директор сась“. Сынь невтнесть трибунанть лангсо аштиця а сэрей, човине ломаненть лангс. Ломанесь ваннось народонть лангс мызолдозь. Сон ульнесь оршазь кедень пинжаксо, истямо жо картузсо.
— Ялгат, заводонть роботамо нолдамодо икеле ютавтано митинг, — директорось кортась кеместэ, путнезь путни валонзо эйсэ. Сон евтнизе, кодат задачат аштить икелест, мезе кармить тееме, кодат од машинат ладясть.
— Кери, — кортасть народонть ютксо.
Астакан аштесь Раиса марто удало. Астаканнэнь марявсь те од тевекс, конань сон эщо эзизе вастне. Сон яла вансь, кортыцятне полавтневсть.
Пижакадсь гудокось, налксезевсь духовой оркестрась. Верев-алов кепсевсь коштось. Кепедевсть знамятне. Ламо вайгельть рангстасть моро. Заводонть кардайсэ митингесь теевсь ошонь вейсэнь ламо ломанень демонстрациякс.
Астакан Раиса марто валковойстэ мольсть вейсэ народонть марто. Сынь ульнесть кедьсек кундазь. Кенярдома мелесь пештизе потмонзо.
Демонстрациядонть мейле Астакан Раиса марто састо мольсть кудов.
Сынь пачкодсть кудов сизезь. Вачсть пекест. Ярсамс ульнесь а мезьде. Заводось алтась максомо паек, теяк ули ансяк валске.
— Учосынек, — пшкадсь Астакан. Раиса пейдезевсь. А ков молемс, сави учомс.
Кудост икелев лоткась крандайс кильдезь алаша. Улавстонть валгсть кавто ломанть.
[ 66 ]— Прок Валерьян, — пшкадсь Раиса. Астакан нузялдозь стясь, комась вальмантень.
— Ды те алкукскак Валерьян, — мерсь Астакан ды сынь Раиса марто ёртовсть ушов.
Те ульнесть Аганя марто Валерьян.
Васодсть Аганя марто Астаканонь сельмест, аламос чатьмонемадо мейле Астакан венстизе кедензэ ды пшкадсь:
— Шумбрат.
Аганя езь ёвта валгак, прок кундатоць келезэ. Чувтомозь вансь Астакан лангс. Сон эзь сода месть кортамс, эзь сода кода сыргамс таркастонзо.
— Ну, соватан кудов, — веселасто, прок мезеяк арасельгак пшкадсь Астакан. — Раиса, совадо, минь перьгавтсынек алашанть.
Аватне совасть. Валерьян теевсь прок алкуксонь сокицякс, капшазь чарась алашанть перька.
— Давай, совавсынек, брат, мешоконть. Арась ведь сюрот, — пеедсь Валерьян.
— Арась аля, — отвечась Астакан.
Кудосонть ушодовсть кавто ендонь евтнематне. Раисань самоварозо уш кенерсь, ниленест озасть перьканзо ды сынь раксезь-пейдезь евтнесть эсь эрямодост.
Те шкастонть авардезь совась Раисань авазо. Кодак неизе Валерьянонь, каявсь киргазонзо.
— Пандя, авай. Ней а мейсь аварьдемс. Вачо иесь прядовсь. Велесэ покш урожай, ламо сюро, — Валерьян ладсесь аванзо ды кутморясь эйсэнзэ.
— Тон варштак минек лангс. Минь шумбратан, минь карматан парсте эрямо.
— Монь мелезэн паро, тынь муиде эстенк эсинк ялгат, ансяк тетянк кодаяк а ойми, а муи тарка эзем. Яла машнити, мезе бути вешни. Беда мартонзо. Ней максь вана кши ды „азе келя, кант тест“. Сонсь уш а сы.
[ 67 ]— Авай, минь минсь мольдян тензэ ниленек, — пшадсь Астакан.
— Илядо уш церам, пек машнити... — Авась путызе столенть лангс кшинть ды молсь Аганянень.
— Кода дугам эрятадо?
— Парсте, авай, — отвечась Аганя.
Авась лоткась аварьдемадо. Сон ульнесь покш мельс паросо. Сонензэ эрьва ендо евтасть паро, чевте валт.
— Алкукс адядо, — кенярдозь пшкадсь Валерьян ды куроксто сыргасть мирем.
Вальмалга ютамстост Станислав абунгадсь.
— Кодавсть пулозонзо! — моткодсь ды мадсь цюланс.
Неть ветенест совасть.
— Косо тетям, — рангстась Валерьян.
— Велесэ! — Кежевстэ отвечась Станислав.
Авась мольсь, пульзясь икелензэ ды энялдсь, штобу простявлиньзе. Станислав кашт мольсь. Мейле стясь таркастонть стака, кежев эськелькссэ лиссь цюланстонть, нусманясто совась кудов.
— Тетяй, мезе теевсь мартот? Шумбрат. — Валерьян мольсь малазонзо. Станислав коня алга варштась церанзо лангс.
— Тетяй, тетяй... — ниленест тапардавсть перьканзо.
— Минек вейс сюлмимизь нужась, нужань кши сускомось пурнымизь вейс. Минь ве порькссэ пешкелинек, ве вельтямосо эжилинек, ве лаз лангсо оймселинек Сельведьсэнэк шлинек чаманок, ве ойме коштсо лекселинек... — Валерьян прядынзе валонзо ды Астакан марто кутмордызь Станиславонь. Станислав нолдызе прянзо.
— Эрядо. Мезе теят мартонк... Монь сыре превсэн простимизь... Мон ведь арьсинь... — Станиславонь цитнезевсь штекастонзо сельведь. — Эрядо, кастадо эйкакшт. — Седе ламо Станислав эзь корта, озась столь пентень.
[ 68 ]— Богатырь минек кармить улеме! — Пшкадсь Валерьян.
Авась кандызе лакиця самоваронть. Ды весе кенярдозь ойсесть столенть экшка...
Валске ошонть велькссэ зэрнезевсь заводонь гудокось.