Эрямос совамо/Стака иетнестэ/6
VI
Игаевень тевензэ меельсь шкастонть пек тусть икелев. Тундонть, теленть Игаев ютавтызе вейке алаша марто ды ульнесь рудазов пуло скалозо. Ней кильдема колмо алашанзо ды эщо айгорозо. Кавто породистой скалонзо. Тёссо вельтязь кудозо. Балкононть лангсо икеле ладсо живиясь пианинань струна вайгельтне, иредьстэ ломанень вайгельть. Тапардавсь [ 27 ]синтрезь янгазь кардазозо чувтонь од заборсо. Якамо кизэ пекставсь од чанной ортасо, ортась тулодевсь кшнинь эчке нежесэ.
Игаевень садсо топольтне прясо чокшне ланга чоледи цеков, валске марто кукорды куко, — веселгавтыть Игаевень, витить мелензэ. Ды мельс паросо Игаев лиясто лиси кустим лангс, мельс паросо пшкади:
— Куко, куко, евтыка зняро иеть масторонть лангсо эщо карман эрямо?
Кукось стамбарнэ, чуросто кукорды. Игаев радовакшнось. Лиясто кукось либорк ливти, секе неевтезэ, Игаевгак носкозь сови мекей кудов.
Истяжо течияк. Лись кустим лангс, вадишкавтызе пекензэ Кукось икеле ладсо кукорды. Игаев учи кочкомо сиведезь аватнень, тейтертнень. Алкукскак, ашолгадозь кармась промомо народось.
Игаев келес панжизе калитканзо, пеедезь васты.
— Совадо кардазов, учосынек остаткатненьгак.
— Нузяксост ламо, — раказь пшкадсть аватне.
— Удомаст а явить.
— Коната а моли — прича а сайсы, учнемс эщо!..
— Илядо пане, чись кувака, — корты эйсэст Игаев. — Вана рангстадо моро, сыргозтинк веленть седеензэ. Те ули, паро.
Аватне варштасть вейкест-вейкест лангс, пурнавсть кругс. Вейкесь ушодсь:
— „Адядо ялгай, якамо... —
Дружна рангстасть мельганзо остаткатне. —
„Горнипов цецькань, ялгай, кочкамо.
„Цецянь прясурень,
„Ялгай плетямо...
— Истя. Ташто койсэ, ават, ташто койсэ! — рунгонзо витезь шнась аватнень Игаев. Аватне яла морасть. Нина Ивановна панжизе вальманть, веселасто вансь. Экше коштось кутморясь чаманзо.
— Нука, Мигай, аватнень во фронт ды марш паксяв кочкомо, — Игаев раксезь нерькстызе Мигаень.
[ 28 ]Аватне раказевсть. Мигай виздезь ладсо музолдсь.
— Весела ава марто роботамось, вечкан.
— Лаузнявдан лангозот, понксот каявтсынек. — Пеедькшнэсть лангсонзо аватне. Мигай прянь шназь витизе картузонзо.
— Тынь савсынкак, — пшкадсь Мигай. Сонсь месть бути сокарясь кардазганть. Чийни, — тев арась.
— Мезе теевсь, Мигай? — Чевте кортавт валсо пшкадсь Игаев.
— Вана, апак прядо тевть ульнесть, — капшазь отвечась Мигай.
— Адя, чийть аватне марто. Мезе кадовсь — минсь тейсынек Аганя марто, — ильтясь эйсэнзэ Игаев.
Вейке бойка ава мольсь, каподизе каволалдо Мигаень ды уски мельганзо.
— Адякая, сяткинем. Мезть непутнойте марто полалеват.
— Илямак ветя визькс чамас, — пшкадсь Мигай, снартнесь потамо удалов, но аватне виест маштозь ракасть ды тулкадсть эйсэнзэ удалдо. Раказь, эльнезь, ихильдязь тусть веленть кувалт.
Аганя пекстызе ортыненть, чувтомсь кардаз куншкантень, кувакасто укстазевсь. Сон соньськак эзь сода мезень кувалт истя кери тошнась, потяты седеезэ. Аштесь ве таркасо, эзь чирькаяк, аштесь прянь нолдазь. Мейле прок тандадозь ертовсь таркастонзо. Фатясь, скалтнэ апак потавто, стаданть эль-эль пансызь. Сон капшезь каподизе ведранть, чийсь скалтнэнень. Ансяк кенерсь озамо скалонть алов, мольсь Игаев. Сон конянзо улга кежейстэ ванозь мезть бути моткодсь ды малав Аганянь велькссэ мерсь:
— Целакт! Апак кармавт тев а муить! Нерькстасыть, ансяк сестэ кундыть тевентень!
— Мезе теевсь? — пелезь кевкстизе Аганя.
— Сезе! Пси-каратка разди потмосонк. Теке чочк, а велявтневдяд. Эх! — Чикордсь пейсэнзэ Игаев ды стака молевтьсэ тусь кардонть икельде.
[ 29 ]Васолдо, покш сэдь пестэ цярадсь локшо. Лиссь пастухось. Аганя кармась седеяк капшеме.
Аламо шкань ютазь, ведра марто аварьдезь лиссь Игаевень тейтерезэ Тамара. Тамара мольсь прок терьтязь сораз пупурькшнезь. Нузяксто езась уды сельмензэ. Се шканть Аганя нолдыньзе потявтозь скалтнэнь. Тамара вастсь каршост. Скалось яходсь прясонзо, рогазонзо понгавтовсь ведрась. Тамара пиже ожо вайгельсэ пижакадсь:
— Сисем велень курва! Сардошка арась мельде пелемат. Веньберть злыдарьди, мейле удомазо а яви, тейть теензэ. Тфу, таскушка! — Тамара емболк совась кудов.
Аганя ильтинзе скалтнэнь, уштомс кандсь пенгт. Уштызе каштомонть ды вешкеземсэ озадо аштемстэ бульдерьгадсть бисер сельведензэ. Нарьтимкс сэпесэ сэпшкадсь кургозо. Пици тол невельдсь мештензэ. Ченярды тонолкс ченярдсь седейнезэ. Виев пиземек прасть сельведензэ. Ливти сяткинекс ливтясь мелезэ.
Се шканть икельце кудостонть лиссь Тамара. Прок мезеяк арасельгак, веселасто пшкадсь:
— Иля машнеть, иля аварть. Мон аволь седейшкава. Скалонть лангс кежен сакшность, тонь лангс ютавтынь. Тетямгак истя корты: ломантне пингстэ а кирьдевема саизе Мигай лангс. Паньдя, — Тамара снартнесь дроцнеме лавтовга. Аганя эйстэнзэ шашсь ве енов.
— Вана эщо кодамо ордакш, — ды тусь горницяв. Панжадо кенкш крайганть марявсь:
— Нать пеняцямо пурны-сэрьни. А ладсеви. А кортыяк. Турвазо теке латякарь новолезь.
— Почодонзо верев а криньдявты, — марявсь эчке вайгель. Игаев нать кортась.
— А паро жо эрямо сась, — кортазевсь Нина Ивановна. — Прислуганть ладсек, батраконть ладсек. Ульця чирес листь — ансяк теке кургсосткак: „сюпавтнэнень пе сакшны“... Сельме крайсэн аволинь вано истямо [ 30 ]пайстомо эрямонть лангс! — пижнезь ладсо кортась Нина Ивановна.
— Рузтнэ кортыть: „Терпи казак, атаманом будешь“...
— Тетяй, лия бу сиведемс? — Пшкадсь Тамара. Игаев яходсь кедьсэнзэ.
— Весе ве колоткасто.
— Огропина овси лия ульнесь.
— Аволь Огропина, шкась лия ульнесь. Теяк бу штерекс велявтневель, кабу улевель ташто шкась...
— Тетяй, ней кода, таштось а велявты?
— Стака содамс. Пек кеместэ сусксть подлецтнэ, но...
— Но может велявтомо? — кенярдозь пшкадсь Тамара, — сестэ минек кутортнэнь, улинэк-паронок максовлизь бу?
Игаев нусмакадсь, пезнавтызе алов вановтонзо, кашт мольсь Мейле вачкодинзе кедензе кумажазонзо ды пшкадсь.
— Эсист киськестэ колмо рашкосо локшо кодавлинь ды сень эйсэ валставлия бу лангстост ули-паронть. Эх! Потеха теевлинь бу! — Игаев стясь стулонть лангсто, кармась кудованть якамо. Тамара мельс паросо вансь тетянзо мельга. Нина Ивановна вансь зеркалава, мызолдозь витнесь черензэ.
Аганя стукадизе кенкшенть.
— Совак! — рангстась Нина Ивановна.
— Самоварось кенерсь, — евтась Аганя.
— Туик! — отвечась Игаев. Аганя кандызе самоваронть, сонсь озась ярсамо удалсе кудонтень, косо икелеяк ярснесть Мигай марто.
Нина Ивановна чаень нурьтнемстэ кортазевсь:
— Монь койсэ ошсо ней пек седе чождыне эрямось. Рынкатне панжадо. Эрьва кодат товартнэ молить оштнэнень, — пицневезь кирдст стаканонть. Игаев чаравсь прясонзо, путызе чашканзо.
— Мезе минек ули, сень эйсэ ошсо кувать а [ 31 ]эряват. Васняткеяк доход саемс а косто, росходось карми молеме...
— Эли ней пингезэнэк карматано улеме шукш прясо? — покордавозь кортазевсь Нина Ивановна.
— Содамс шка. Сави зярс улемс велень ломанькс. Вана думака, бути аволь ванстов те кудось, сестэ мезть кармавлинек тейнеме? Эряк велесэ, тосо карми неявомо... — Игаев пувазевсь чашказонзо, корчнезь кармась симеме.
Аганя икеле ладсо нусманясто аштесь удалсь чаво кудосонть. Налкстазь седейть нардамосо нартнесь вилкат, пенчт. Стакасто укстазь арьсесь седе, мезес бажи эрьва од ломанень седеесь. Васняткеяк мольсь мелезэ ломанень мелень ваномадонть, ломанень коронь кирьдемадонть. Ламо эцить пря потмозонзо. Но мейстэ ушодомс, козонь икелевгак кундамс?..
— Пурнык столенть, Аганя, — сергедсть тона кудостонть.
Игаев мадсь конек лангс, мерсь:
— Кавто-колмо часонь ютазь стявтымизь. Молян васодян кочкицятненень.
— Ладна, тетяй, моньсь стявттан, — пшкадсь Тамара.
Чизэ уш вере. Тополь сулеесь прась ортатнень трокс. Аганя тия-тува маштынзе тевензэ, лиссь орта лангс. Чись налксезь прась чамазонзо тополь лопатне юткова. Малазонзо мольсь Астакан.
— Празднуват? — Пшкадсь Астакань, ды капшась туеме.
— Вай, кода теть а визькс! Тон ков капшат?
— Мотай марто робота ладинек. Аганя, тошна, евтык зярдо вастатан?
— Монень, тейтернень думат седе шождыне. А кие марто кортамс. Потмо а кинень чамдамс...
— Чокшне вастатан?
Аганя эзь кенерь отвечамо. Игаев мольсь ортатнень панжомо. Астакан тусь.
[ 32 ]Аганя Игаев мельга пекстыньзе ортатнень, ды арьсезевсь Астакандо: „Васьня прок вечкинек вейкенэк-вейкенэк, ней кода бути а ледстияк. Мень бути мелявкс тензэ“. Истя кортась эсь потмованзо ды таго пиштяка урозокс кундась кардайсэ тевс.
Паксясонть лиссь севнома. Лиссь истя: кочкицятне ладямсто арьсесть, што андсынзе азорось. Азорось пиштя эзь пачтя. Кода аватне куродызь Мигаень, сон нирькинестэ отвечась:
— Минь кедьсэнзэ роботатан, ито а анды.
Мейле аватне лаузнявсть Игаевень лангс. Кода ледстизь Мигаень валтнэньгак, Мигай ниле пильге лангс прась.
— Чипазось чавомам, эзинь корта.
Игаев алтась кучомо ярсамо пель ды тусь. Аватне кармасть Мигаень визьделгавтнеме.
— Эщо мери церан. Советской власть защищал. Эх, кискань пуло...
— Кадымизь ради бога, — яходсь кедьсэнзэ ды тусь уманть тона пев.