Эрямос совамо/Стака иетнестэ/9
IX
Роботанть прядомадонзо мейле, сюронть весе кото пондтнэнь получизь. Коть азоронть марто ютксост ульнесь покш севнома, яла теке савсь азоронтень максомс эщо пондо, куцяс кирпецтнень вачкамост кисэ. Астакан Валерьян марто ниле пондтнэнь каизь башка — ошов ускомс. Астаканонь лелясь коть пек апаргалесь, яла теке кудостонть эйсэст эзь пане. Ней сынь ярсасть эсист кшиде. Кшись сехте эрявикс. Остаткась мольсь эсь кияванзо. Берянь ульнесь секе: чистэ чис Астакононь сельтне виензасть кинетеме, чулксетеме.
Кода бути весть, кие бути шнызе орожия Катянь. Ды кемевсь, сон васолга паро куля канды, сон уш виемсыньзе. Астакан согласясь васодеме. Валскенть стясь тарка лангсто, эль-эль лутыньзе сельме кертнень, коцкеризе нулконть, лись орта ушов. Чи лисемась кирвайсь а мадстявиця толсо. Менелесь ульнесь ванькс, теке сулика. Васолга кепетедсь тусто, раужо, чопуда пель. Чись кекшевсь пеленть экшес. Сыргась пиземе пель.
Астакан мельс паросо варштась перьканзо ды тусь ульцянть кувалт. Сон прок ваясь, эли чопавтсь валскень чевте коштонтень. Перьканзо ульнесь сэтьме.
Орожия Катянь кудось такода лекшкадсь, кукорьгадсь. Ве уголось новольсь мода ежонтень. Пельс конявозь вальма сельтнева валдось прок сувонь пачк прась кудо потмонтень.
Кудо потмостонь Астаканонь вачкодизе стака, тусто а нилевиця кошт. Катя баба аштесь столь песэнть — вальманть каршо, мезть бути котьмась салмукссо. Нерезэ мик токась одижа нулантень. Кудо кияксось эзь содав: модань сон эли лазонь. Катя баба кирмецявозь, меньстизе кечказонзо, видемсь, стамбарнэ кукорьгадозь мольсь Астаканонь малав.
— А содават, — пшкадсь Катя баба ды штюпизе Астаканонь.
[ 45 ]— Мон Алякань веженьцексэсь, — отвечась Астакан.
— Я-я, паро, — ушодсь карамо нулков сельмесэнзэ, — месть якат?
— Вана, сельмен ормалгадсть.
— Я-я, паро. Озак, — Катя баба каясь коморозонзо пенчешка ведь ды нардыньзе мень бути сэнь нуласо. Путсь элезэнзэ сэксэв тодов ды пшкадсь:
— Путык прят.
Астакан новольсь бабанть элес. Бабась илештинзе сельме керьтнень ды мерсь:
— Осодявсть, тякам. Тозонь теевсть уш пуполькат. Минь сынст меркасынек сахор поколень пштисэ. Валскес теск удат. Рана мольдян ведь чирес, кортавтсынек, валскень оймавт ванькс ведьнесэ шлясынек, юты. — Катя баба кортась, сонсь коцькерясь сахорсонть сельме кертнестэ сыявкстнэнь. Астакан аштесь ды а кирьдевема саизе. Седеезэ скирязь скиряты. Сельме чирькензэ мик кармасть чулксетеме.
Катя баба витизе сюва мешоконть ды мерсь:
— Мадть, тякам. Иляк невте прят чи валдонтень.
Астакан силой нильсь сэпей сюва пуленть, нильсь коник алдо кепедевть туво начконь чиненть.
Валскенть Астакан сыргойсь зорянь кирваземадо икеле. Яла теке Катя баба ульнесь уш пульзядо ды ознось, мезть бути моткодсь турвасонзо, сеедьстэ сюконякшнось. Мейле стясь. Ознозь, молитвань моравтозь мольсь Астаканнэнь.
— Стяк тирям, — пшадсь бабась ды таго ознось.
Сынь мольсть ведь чирентень.
— Осподи сусе христе... — ды бабась комавтызе Астаканонь, ойме коштсонзо пувазь моткодсь орожиямо валт ды шлясь Астаканонь чаманзо кельме ведьсэнть. Меельсь пелев бабась сайсь кургозонзо ведь, кепедизе Астаканонь прянзо. Астакан ансяк панжинзе сельмензэ, варштась бабанть лангс, бабась се шканть пургась видстэ сельтненень, сонсь капшазь кортась:
— Иля пель, тякам, иля, — нартнесь турвастонзо [ 46 ]слюнанть. — Азе ды сельтнень нартнить коцт пангссо, ашо седе а пры, — бабась дроцизе Астаканонь ды ильтясь эйсэнзэ окольцянтень.
Астакан кудов пачкодсь чопонь пелев. Валерьян кенярдозь вастызе.
— Мекс кувать? Содат мезе, минь тонь лелянть марто кортынек, ладинек истя, мон карман сексес роботамо кедьсэнзэ, сон максы кемгавтово пондт сюро. Кототнень макссыньзе нейке. Мон меринь тензэ тонеть эряви молемс ошонь больницяв. Сон согласясь максомо теть ниле пондт сюро. Азе, брат. Тонь сельмсэ виев киргамот. Ошсо лечасызь. Колмо-ниле ковт эрят минек кедьсэ. Истя: саик сюронть, азе лечить сельмет Мейле тевесь ули лията. Валерьян пек кеместэ кундась ладсеманзо, штобу Астакан седе курок туевель. Усковлиньзе сонзэ сюротнень вачо семиянстэнь ды лечаволь. Астакан согласясь. Туема чинть аравтызь валске.
— Вана мезе, Астакан. Тон туят, монень ськамон ули тошна ды эрямскак а косо. Ветимак киненьгак.
— Ули содавикс эсинек ялга тейтерь, — Астакан лоткась кортамодо. Сон арьсесь евтамо потсо валонзо, што тейтеренть вечксы, умок уш ашти седейсэнзэ, эзь евта.
— Адя сонензэ, — Астакан евардыньзе сельмстэнзэ. нулгтнэнь ды яла евтнесь орожия Катядо ды кода эйсэнзэ лечась. Валерьян жалязь мурнесь лечамонть кисэ.
* * *
Чокшнесь ульнесь сэтьме, лембе. Чокшнень чевте коштсонть ульнесь шождыне ды весела. Косто бути ве пельде каятоць морыцянь вайгельть. Пире удалдо, нать киньгак роботник лиссь алаша вакс, лужанясто кайсевсь морозо:
Когда я был мальчик свободный, — Бывало спашень пашеньку, |
Астакан марто Валерьян мольсть чатьмонезь. Зярдо пачкодсть Игаевень кудонть икелев, Астакан пшкадсь:
— Вана Аганянь азоронть кудозо.
— Сюпавт кудонзо... Виев, значит... — Дивазь чаравсь прясонзо Валерьян. Ды сынь кавнест лоткасть Аганянь учомо.
Аганянь кувать учомс эзь сав. Сон, кода эрьва чистэ, тевензэ прядомадо мейле аштесь озадо заборонть бокасо, косо вастызе Астаканонь Сибирьстэ самсто пы стамбарнэ, курго потсо морась.
Кодак Аганя неизе Астаканонь, сон радувась, кирвайсь. Сонзэ ульнесь мелезэ Астаканнэнь меремс, што сон те шканть пек тошнаясь кисэнзэ. Сон арьсесь кортамо, — эзь сато смел-чизэ, виздсь ломаньдентькак.
Сынь колмонест ушодсть кортамо. Евтнесть икеле пелев эрямо чиденть, кие кода арьси. Евтнесть вейсэ Сибирьга якамодост ды мезе сынст роднякстомтыньзе. Тень Астакан Аганянь икеле эзизе евтне, ды секс Аганя кунсолось паро мельсэ.
Чокшнесь ютась эзь марявояк. Валерьян састо тусь вере пе енов — кудов. Астакан кадовсь Аганя ваксс.
— Сяткинем, Астакан, тон сокоргадат. Сельмет овсе комасть.
— Валске туян ошов. Те ялганть тетязо робочей. Ули эрямо таркаст. Сюро тест ускан. Тосо лечасамизь. Сон кадови теск, монь лелянтень роботамо. Штобу илязо тошная, мук тензэ однасум, — Астакан [ 48 ]вачкодизе Аганянь лавтов ланга ды мериксэль: „ульть монень видекс, виеман — ульдян вейсэ“... Мезеяк эзь мере. Кеместэ кутмордызе, палызе штекас ды явсть.
Омбоце чинть, зярдо Астакан кармась пурнамо ошов, Пилай допрок отказась Астаканнэнь сюронь максомо. Те секс, што сонензэ ульнесь пачтязь куля буто Астакан лангозонзо макссь судс ули-паронь явомадо. Алаша яла теке максь. Алашантькак максызе аволь Астаканонь кис, вана роботникентень. Астакан истя растроявсь, — мик арьсесь течи ошов а молемеяк.
— Астакан, азе пожалыста. Монень жаль маряват. Минек тонь марто улить нажувазь сисем пондт сюронок. Эйстэдест тонь сех ламо ды неть кото понтнэ. Тыненк сатыть, — Валерьян аштесь Астаканонь икеле, ды тонгсь коморозонзо серма. Се шканть Пилай ливсь эщо пондо сюро, путызе улавонтень ды мерсь:
— Валерьян, те тонеть спицят кисэ, — сонсь совась кудов. Астакан а мельсэ озась улавонтень, саиньзе ождятнень. Мартонзо тусь уряжозо.
— Виемть. Велявт шумбрасто! — пижнесь мельганзо Валерьян. Пилай кашт молезь тулодизе ортанть.