Якстере теште/1924/31/Наркомпросонь Центрань эрзянь-мокшонь бюронь работанзо кувалма
| ←Месть кортась Луначарский Ялгась эрзянь мокшонь промксцо | Якстере теште, № 31, 15 октября 1924 г. редактор Глухов, Пётр Семёнович Наркомпросонь Центрань эрзянь-мокшонь бюронь работанзо кувалма |
Эрзятнэ якасть Ленинэнь→ |
| Якстере теште. Еженедельный орган Мордовской секции при Ц. К. Р. К. П. (б.). — № 31, 15 октября 1924 г. — с. 2—3 |
| Наркомпросонь Центрань эрзянь-мокшонь бюронь работанзо кувалма. |
Васеньцекс тейсь доклад Сайгушкин ялгась. Сайгушкин ялгась кортась кода молить минек тонафтума тевенек. Тевесь моли пек берянстэ. Зняро минек учительнек, зняро школава тонафтнить эрзянь—мокшонь эйкакшт, зняро тонафтнить эрзянь од ломать покш учебной заведениява и бюро те шкамс парсте а содасынзе. Не сведениятнэнь бюро, губернятнэнь эйстэ кода эзь вейшть, те шкамс вадрят сведеният эсть кучт.
Минек аламо эрзянь—мокшонь учительнек. Секс школава тевесь те шкамс лац эзь нолдавт. Школава эрзянь-мокшонь учительтнеде весемезе 103 ломань. Педтехникумонок косо анокстатанок эсинек учительть аламо. Педтехникумтнэнь эйсэ эсинек преподавателть а сатыть. Сайгушкин ялгась корты: кодамо стака ней эщо панжомс миненек педтехникумт. Эрявить эрьва таркас ярмакт, ярмаконок арасть. Секс эщо беренстэ мольсь минек тонафтума тевесь — араселть эрзянь кельсэ а кинигат, а учебникт. Анцяк те иестэнть бюро анокстась колмо учебникт мокшонь школас ды кавто эрзянь школас. Икеле иетнестэ учебникт араселть. Ульнесь анцяк „Тундонь чи“ эрзянь букварь, кона умок, уж—весе миезь, ды кона ней таштомсь уж.
Сайгушкин ялгась кортась, што бюронь роботась мольсь аволь истя, кода эряволь но сетыки кой мезе теезь. Те иестэнть анокстазь вете учебникт, терьдезь ульнесть таркава промкет, пурназь вана те промксось, ульнесть содавтозь таркава эрьзянь педтехникумтнэ..
Икелев миненек эряви седе парсте путомс тевенть. Эряви весе вийсэ паролгафтомс педтехникумтнень материальной положенияст. Эряви седе парсте путомс учебникень сермадума ды печатамо тевенть. Эряви сы иестэнть кодаяк саемс седе ламо таркат покш учебной заведениятнэнь эйса.
Сайгушкин докладонзо прядызе кемень чассто. Прениятнэнь кадызь валацкесе.
| Валскень заседания. |
| (Сентябрянь кавксоце чи). |
Валске промксось кармась роботамо 10 чассто. Васня Сайгушкин максь ответ кевкстиматнэнь ланкс. Сон ефтась, што. В толкаень педтехникумоньть арьцесть саймензе Самаров — кадовсь таго В—Талкайсэ ярмаконь а сатумань кис.
Покш учебной заведениятнэнь эйс Вуз‘сь командировкат од ломатненень те иестэнть максыль аволь НКПрос — максылть командировкат партиянь секкият. Ламо ульнесть ощо кевкстимат, конатнэнь ланкс Сайгушкин максь ответ.
| Преният Сайгушкинэнь докладонзо кувалт. |
Ламо ульнесть кортамот центрань эрзань—мокшонь бюронь роботадонзо. Аволь ламо муевсть ялгат конатнэ бюронь роботанть эзизь сялдт. Весе делегатнэ конат кортасть Ссйгушкин докладонзо кувалт весе сынь чумондеть бюронть берянь роботанзо кис.
Чурин — Татреспубликань делегат кортась Сайгушкинэнь докладонзо кулцонозь, мон арцян, думсян, што бюро а соды эрзянь—мокшонь эрямо чиденть. Бюронь роботась пек берянь. Таркатнень марто паро связь арсель. Кода эряви губернянь роботниктнэнь роботамс бюро знярдо як а невтиль. Минь роботынекь минць, кода содынек, кода маштынек Центрань нефтимат а учовилть.
Григошин — Наркомпросонь эрзянь—мокшонь бюро берянстэ теиль учебниктнэнь сермадомсто. Сынест сермадомо эряволь максомс аволь вейке ломаннень. Эряволь те тевстень терьдемс губернява роботыця эрзятнэнь. Истят ломать, конат кундаволть бу те тевентень муевелть. Бюро таркава школатнэнень а максыль указаният, кода ушодомс эсинек кельсэ тонафтуманть
Лямкин: Мон нейса бюро аволь анцяк берянстэ роботась эрзянь бюронть мельза як арасель роботамо. Саемс хоть сведениятнэнь. Сайгушкин ялгась ефтась минек улить весемезэ эрзянь—мокшонь учителть 103 ломань. Косто сон саизе те цифранть. Минек вейке Пензань губернясо эрзянь учительтнеде седе ламо.
Прокаев. Ней минекь школасо сави эйкакшткэнь эйсэ тонафтомо эрзянь эсинек кельсэ Наркомпросонь бюро кодат как указаният те тевенть ланга эзь максокшно.
Ульнесь кучозь школава эрзянь букварь „Тундонь чи“, но арасель кодамояк указания, кода сонзэ кувалт тонафтомо.
Желтов Ц. Комитетэнь эрзянь мокшонь секциянь секретарь. Тесэ весе ялгатне пек салдыть Наркомпросонь бюронть роботазо. Сялдумадо, икеле эряволь ялгатнэнень ваномс кодамо
Тевенть ушодынек анцяк 1921 иестэ. Таркасо эрзятнэ помога а максыльть. Бюронтень савсь роботамо од экономической политикань пинкстэ, знярдо пек стака ульнесь получамо кодат как ярмакт. Стака ульсь панжомс од педтехникумт и лия тонафтнимань заведеният и школат. Вана не условиятнэнь лангс эряви ваномс ды а эряви центрань бюронь роботазо эстянек сялдомс ды роботниктнэнь а эряви чумондомс.
М. И. Кручинин. Тесэ ялгатне пек чумондыть центрань бюронь роботыцятнэнь. Миненек тевенть эйс эряви неемс аволь анцяк берянь енксозо, эряви ваномс паро енксозояк. Неень центрань бюронь роботникнэ роботасть анцяк вейке не. Минь те иестэнть, анокстынек вете учебникт. Панжовтынек аволь вейке педтехникумсо эрзянь—мокшонь отделения. Бюронь роботанть сялдумстонзо а эряви стуфтомс, што васенце иетнестэ таркава эрзятнэ ды мокшотнэ лездасть пек аламо. Роботамс ульнесь стака.
Деров — Ульяновск. губ. Вансынек, ялгат, кода тонафтуманть тевесь моли лия нациятнэнь минек эрзянь бюронть коряс. Саемс хоть чуваштнэнь. Сынст тевест моли парсте. Минек, эрзетнэнь, роботась ков гак а маштови. Ульяновский губернясо эрзянь учительтнень таркастост пансть чуваштнэнь жо таркастост а токить. Истя ульсь секс, што минек бюрось Московсто те тевенть кувалт мезеяк эзь серматт. Минэк ялгатнэ удость Наркомпросонь трокс эряви хлочамс штобу пекстазь эрзянь школатнэнь одс панжовлезь.
Эряви хлопочамс. Алатырень рузонь педтехникумонть теемс эрзянь педтехникумс — те ено эрить ламо эрзят, а тонафтнемс тенст а косо.
Московкин. Сайгушкинэнь докладонзо ды вана весе ялгатнэнь кортамост кувалт миненек неяви, кода берянстэ роботась минек Наркомпросонь эрзянь мокшонь бюрось. Сон а соды зняро минек од ломатнеде тонафтнить ВУЗ‘-тнэнь эйсэ. Пензань губернясо эрить весемезэ 20% эрзят ды мокшот. Сынст эйстэ покш учебной заведениятнэс тонафтнить анцяк вейке процент, мокшонь цератнэнь таркасо тонафтнить руст. Те тевенть ланс бюронтень эряви варштамс седе парсте.
Ламо эщо ялгат кортасть центрань бюронть роботанзо кувалт. Прениятнэ лоткасть позда чокшнэ.
Прениятнэде мейле Сайгушкин ялгась ефтась заключительной вал.
Сондензэ мейле таркасто сазь делегатнэ ефтнесть кода тевесь моли эрьва губернясо.
Седе мейле промксось центрань бюронь робота и таркав роботанть кувалма тейсь истямо резолюция.