دیوانی مەولەوی/د
دڵەی دڵ وە مەی مەیلی لەیلێ کەیل
edit| دڵەی دڵ وە مەی مەیلی لەیلێ کەیل | مەحرەم وە ڕازان خەڵوەتخانەی لەیل |
| لانە حەڵقەی زوڵف عەنبەر بۆی شەو ڕەنگ | هامدەمی جای تەنگ ئەڵحەدسەرای سەنگ |
| پەروانەی مەزار ئەو ئاوات واستەم | تەرجەمەی حاڵات پەشێویی جەستەم |
| عەرز کەر وە لەیلا وە سەد خەمەوە | چەم وە نمەوە، دڵ وە تەمەوە: |
| دێوانەکەت دیم بڵێسەش بەرز بی | بەرزی بڵێسەش هەر سات سەد تەرز بی |
| وە هەر تەرزێ لەیل ملاوناوە | دڵەی سەنگی سەخت متاوناوە |
| گا گۆیا مەویەرد ئیند مەویەردەوە | گا مەوات وە دەم ئێشی دەردەوە: |
| ئای جە ئێشی تەن جە گیان جیای من | ئای جە لوای تۆ و ئەو شۆن دیای من |
| سەختی ئێش دەرد بەدحاڵیم لایێ | وای بێتۆ مەنزڵ گشت خاڵیم لایێ |
| وە هەر مەنزڵدا و هەر ڕاگوزەردا | هەر دەستی حەسرەت مدا وە سەردا |
| چێشەن موینوون مەنزڵ بێتۆ بۆ | بێهۆشم، خەو بۆ، ڕاس بۆ، درۆ بۆ |
| گا تێکەڵ مەکەرد چەنی دەردی وێش | فەردی هامفەردش چەنی فەردی وێش |
| موات: فیداش بام یە جای شیرینەن | گوزەرگای ئەو شۆخ زوڵف عەنبەرینەن |
| جە باڵای ئەی سەنگ پا ئاوەردەوە | بەرقەی ناز جە ڕووی ئەو شەنگ کەردەوە |
| جەو جاسووسگاوە، بەو خەدەنگەوە | دڵ تلنا وە زام هەزار ڕەنگەوە |
| جەو سەردەشتەوە گوڵاو ڕێزان کەرد | سارا بۆی عەنبەر سارا هەرزان کەرد |
| چۆگە جەلای جام جەبهەی جەماڵ دا | بەرگەشتی وە بەخت بەدری کەماڵ دا |
| چێگە حوقەی ڕاز شیرین کەردەوە | تامی تاڵیی دەرد دووری بەردەوە |
| گوزەرگەی جیلوەی لەیل بێحەد بەو تەرز | زایەڵەی مەجنوون جە عەد ڕەد بەو تەرز |
| چۆن کەروون تەقدیر پەی سەر کاری تۆ | نە تۆ بژنەوی نە دۆسداری تۆ |
| مەعدووم چون قەزا ئاما جە ناکاو | دانا چون نادان وزۆ وە گەرداو |
| عیرفانەکەت کۆن، فامت کۆ شییەن | ئای پەی جیلوەی دۆس نیهایەت نییەن |
| ئارۆ یەک جیلوەش ها نە ڕووی کاردا | فەردا چێش ئەو یەک جیلوەش دیار دا |
| لا، بەڵ ئەو جیلوەی ڕوو نە پەنهانی | نەوعە زوهوورێن، زاناش ویجدانی |
| چ ماتەمێوەن پات بییەن پێوە | دانا و مەخشووشی کێ دیەن پێوە |
| ئەو جیلوەکەردەن ئەر شی وە تاقی | ئێد جیلوە کەردەن سوراحی و ساقی |
دڵ تەم کەردەوە گرتەوە کاوان
edit| دڵ تەم کەردەوە گرتەوە کاوان | دیسان دووی نامەی تۆش وەلا یاوان |
| مەزموون: هەوای مەرگ، زامداری تیرت | پەنهانی قاتیل، دەوا و تەدبیرت |
| لاڵ بوون پەی مەینەت جەستەی خەستەکەت | بمروون پەرێ زام جێ نەڕەستەکەت |
| من و تۆ بەڵاو زاممان ئاوەردەن | نە چەشمەی حەیات ئاومان وەردەن |
| خەیاڵی خامەن ئینە تۆ کەردەن | پەیما نمەبۆ جیایی وە مەردەن |
| ها چەند هەوات دا وە گێجی بێپەی | بمری و بناڵی گیان تەسلیم نەکەی |
| تازە وارگەی عەشق مەنزڵ کەردەنی | هەوەسیای هاژەی باڵی دەردەنی |
| خوسووس بەو جەستەی خەستەی مەهجووری | کەفتەنی نە پێچ ڕای دوەی دووری |
| هۆشت نە تۆی کاخ دەماخ فیرارەن | وەرنە چ خێرەن قاتیل دیارەن |
| کێ بۆ چون خەدەنگ ناز هەوا دەرۆ | هەریەند بزانی جەوپەڕ بویەرۆ؟ |
| کێ بۆ بەو جەمین نەزاکەت چون گوڵ | خەیمەش هوربدا نە پای دەشتی دڵ؟ |
| کێ بۆ پێکۆ دڵ زامی نەسرەفتەش | یەکێو کوشتەش ئێد ئەو زەمین کەفتەش؟ |
| ئەر ڕستگاریت جەو دەرد ئومێدەن | دەوای خەلاسی و تەدبیرت ئێدەن |
| مەبۆ وەختی سەخت زامان ئاوەردەت | ڕەما و پەلەپەل هەردەو هەرد کەردەت |
| پەی چێش تا ئیسە لێت مەعلووم نییەن | سەیاد جە واکوژ درێغش نییەن |
| بەڵام یە ڕەویەی ئیبتیدای مەشقەن | خیلافی شێوەی تاویای عەشقەن |
| دەخیل سەر سەخت بەر هەر بکەر بازی | نازی دڵ سەرد بۆ جە تیرئەندازی |
| نە دڵەی پڕ زەوق کۆنە نەچیردا | های لەزەت دارۆ تیر وە شۆن تیردا |
دڵە ڕاگەکەت خەیلێ تاریکەن
edit| دڵە، ڕاگەکەت خەیلێ تاریکەن | پردەکە سەختەن، خەیلێ باریکەن |
| سارای هیدایەت تاریک مەوینوون | ڕای نەجات یەکجار باریک مەوینوون |
| چۆڵە چراوێ پەرێ وێت ساز دەر | وە قەد توانای وێت باربەندی کەر |
| ئەر گونا ڕای ڕاس بەردەنی جە ویر | شۆنی پای کردار هامفەردان هورگیر |
| بەڵ لەو دیواندا دێوانەی سەرشێت | خەجاڵەتی بەزم یاران نەیۆ پێت |
| بارێ ئەر غەفڵەت دام تەندەن نە ڕێت | نییەنی وە تەنگ شەرمەساریی وێت |
| یادی ئەو سەروەر وە دەروون باوەر | ئەر واچان پەنەش نەو بەزمی مەحشەر |
| یە مەنسووبی تۆن ئینە کردەشەن | چەنی توانای سەر هوردەردەشەن |
| ئەو بە شەرمەوە مدیۆ بە وەردا | من مشیۆ کام خاک کەروون وە سەردا |
| ئیسە موینی چێش پەنەم ئامان | هانا هاوارەن های نەیچی ئامان |
| جفتی مەعسیەت، جە تاعەت تاقم | ڕوو سیای مەجلیس جەرگەی عوشاقم |
| بینای وجوودم خەجڵەت ئەساسەن | بەختم موخالیف، نامەدیم ڕاسەن |
| سەبای هەناسەم نە دەروون سەد تەرز | کەردەن کڵپەی نار ئیبراهیمی بەرز |
| پەنجەت بەو نەغمەی بین وە تینەوە | باوەرە ئەی بەیت وە حەزینەوە: |
| سەهلەن من ڕووزەرد سەر نە وەرەنان | ئای مایەی تەسدیع پەیغەممەرەنان |
دڵ دیار نییەن های نەکەردەبۆ
edit| دڵ دیار نییەن های نەکەردەبۆ | وە خزمەت ئازیز تەشریف بەردەبۆ |
| جەو دما من داد وە لای کێ بەروون | نا بەڵەد تەنیا ڕا چۆن دەر کەروون |
| پای دڵ سفتەی دەرد سەر هەردان سەختەن | وێت یاونەوە های نەسیم وەختەن |
| بکیان پەرێ من دڵ ئەو دماوە | وێت، وێت ئاسایی بشۆ وە ڕاوە |
| مسپارووت وە دەس کزەی تاسەی وێم | وە دووی گێجەلوول سوب هەناسەی وێم |
| چون یاوای وە لای باڵا عەرعەر تەرز | پەرساش جواو دەر وە زایەڵەی بەرز |
| گلاراوش بێ چەنی ئێشی چەم | مەوات و مەوەرد خەم وەکووزەی خەم |
| چەم جە ئێشی دەرد مەحروومیی پاڵات | نمەنمانۆ عەکس خەیاڵی باڵات |
| پەردەی لێڵایی گرتەن دوو دیدە | خەڵوەتەن سا بۆ هەی بەرگوزیدە |
| دیدەم تاوی سەیل هووناوان وەردا | ها ئاو بە دەردا ئاما جە سەردا |
| دڵ یەند جۆشی گەرم خەمان دان پێدا | سەمەندەر لانەش مەگێرۆ تێدا |
| فیدات بوون ئازیز جەمین پەڕەی گوڵ | دووریت کارێ کەرد ئانە چەم، ئێد دڵ |
| حاڵ چینە تەنگتەر نییەن پێم ئامان | قەدەم ڕەنجە کەر ئامان سەد ئامان |
| چون جەستەی خەستەی مەینەتان مایە | بەڵکم دیدە و دڵ نەشان وە زایە |
| دیدە سورمەی تۆز پاڵاکەت ناسەن | دڵ جای دەردتەن مەندەیشا خاسەن |
دەرمانی زامان دەردەکەی کاریم
edit| دەرمانی زامان دەردەکەی کاریم | هامڕازی ناڵەی شەوان بێداریم |
| ڕاحەتیی جەستەی مەینەت بارەکەم | تەسکینیی دڵەی پڕ جە خارەکەم |
| نامە و هەدییەی دۆسانەت یاوا | تەسدیعت کێشا خەیلێ ماڵئاوا |
| ڕەویەی بوزورگیت وەجا ئاوەردەن | غەریب نەوازیت وە پیشە کەردەن |
| بەڵام بیناییم، من دۆسی گیانیم | نەک چوون بێشەرتان نانی و زوبانیم |
| دڵم وە مۆبەت مەیلی تۆ شادەن | ئەی تەعاروفە جە لام زیادەن |
| خوسووس من سەرعی و لێوە و وێڵی تۆم | سەودایی خەمبار ئەڕاگێڵی تۆم |
| پەی تۆ خاترم پڕ نێش و خارەن | پەی تۆ زیندەگیم چون ژاری مارەن |
| دەروونم دایم جە هوون کەیلی تۆن | حەیاتم وە شەوق هەوای مەیلی تۆن |
| هەرگا دیم وە چەم شێوەی باڵاکەت | بۆسام خاکی پا و گەردی پاڵاکەت |
| ئانە گرد مایەی کامەرانیمەن | ئانە گرد وەشی و شادمانیمەن |
| وەرنە ئیسە من هوونی دڵ وەردە | قامەت سەنگیبار خەمان خەم کەردە |
| دەروون وە مەودای دووریت بییەن ڕێش | هەی خاکم وە سەر سەوقاتم پەی چێش |
دڵە وەردەی نەفس گوناهـ ئاوەردە
edit| دڵە، وەردەی نەفس گوناهـ ئاوەردە | سیفەت نەڕووی زات وە پەردە کەردە |
| جە ڕووی بێشەرمی پەردەت دڕدەوە | هیچ نەویت وە تەنگ ئەودیم پەردەوە |
| «سەتار»ی لاو دا وە یانەتەدا | «کەریم»ی شوومی وە شانەتەدا |
| کردم وە عامیی ڕەحمەتەکەی وێش | وادەی بەزمی گەرم خزمەتەکەی وێش |
| ویەرد، نەزاناش سیوای ئەو هەنی | ئاخ زانایی ئەو چێش کەری چەنی |
| نەو دەمدا جە یاد کردەی ویەردەم | جە حاڵەتی سەخت وە دۆزەخ بەردەم |
| هەر دەلالەتێش مەلالەتێوەن | هەر لوتفێش پەرێم خەجاڵەتێوەن |
| هەوای وەش نەسیم وەسڵ و حوزووری | سەموومەن پەرێم چون شنۆی دووری |
| های نایی نایێ، موتریب مەقامێ | موغەننی تەرزێ، ساقییا جامێ |
| تا دەماخ نەی بەزم نەشئەیێ سانۆ | مانۆ، تا ئەبەد وە جیا مانۆ |
| شنۆش نەی دەمدا، نەی دڵەی تەنگدا | ڕێشەی ویری غەیر بدۆ وە هەمدا |
| بەڵ دڵەی چەند ساڵ ئینتیزارەکەش | لەزەتێ بەرۆ جە دیدارەکەش |
دڵە پڕ چینەن پێشانیی شەوقت
edit| دڵە پڕ چینەن پێشانیی شەوقت | پۆس مەردەن وە بان ڕوخساری زەوقت |
| شادیت مواچی ئازیزش مەردەن | کەیفەکەت ماچی لەیلش گوم کەردەن |
| گومانم وەی ڕەنگ زامت نەسرەوتەن | کۆچی خێڵخانەی ئەحمەد دوور کەوتەن |
| نەواتم دەخیل ئامان سەد ئامان | وێت مەدەر وە مەیل نەو تووڵ نەمامان |
| وەس وە تەمای وەسڵ مەزاقت شاد بۆ | ژاری ماری دەرد دووریت وە یاد بۆ |
| نەژنەفتی چەنەم سەد جار دادم کەرد | ئیسە های گەردش گەردوونی چەپگەرد |
| وە تای قەڵماسک تنیای سەردیی مەیل | ئەو هوردا پەی حەی، تۆ پەی کۆی دوجەیل |
| سا خاسەن ئەمجار شوومی سیا بەخت | تۆ ئالوودەی دەرد، من زامانی سەخت |
| ساقی گەردی کۆچ یاران دیارەن | هاوماڵان پەرێم نە ئینتیزارەن |
| من خۆ تەنیا ماڵ، وامەندەی دڵتەنگ | بێکەس، بار سەنگی، پای بارەبەر لەنگ |
| مەرتۆ وە هەی هەی نەشئەی جامی مەی | نەی ڕای پلەی سەخت فەریادڕەسیم کەی |
| سا پێم دەر جامێ منیچ چون یاران | هەی کەروون ئەو کۆچ تا سەر هەواران |
دڵە چەند مەستیت جەم بی نە سەردا
edit| دڵە چەند مەستیت جەم بی نە سەردا | چەند کاری ئارۆت وستەو ڕۆی فەردا |
| شەرتێوم نییەن جە بێشەرتیی تۆ | ڕوو سیای تۆبەی سەد فەردا نەبۆ |
| نەکەفتی ئەو ڕا پەی حەق پەرستی | تا بی وە هەمتای مەستی پای سستی |
| پیری حەڵقەسان خەم پەنەم وەردەن | پەی دەرگای عەدەم ئامادەم کەردەن |
| سەروەختی ئەدای ئەمانەتمەن | نەشری سیاهەی خیانەتمەن |
| موغەننی، تەنخوای من وە نەوایێ | وەی چەند فەردەوە هوردەر سەدایێ |
| یا ڕەبی نەی شەو تاریکەی فانی | هەر تۆ وە کردەی بەدیم مزانی |
| ئای سوبحی مەحشەر سەر ئەفگەندە وێم | شەرمندەی حوزوور خودا و بەندە وێم |
| بە ڕەحمەکەی وێت فەردی تەنیای تاک | بەشقی مەشقی عەشق دڵپاکانی پاک |
| بەو فەسڵی فیراق خاتر پڕ خاران | بەو دیای دمای یەکتری یاران |
| ئەر سەد تاوانم جە حەد ئەودەرەن | دەفتەرم جە ڕووی وێم سیاتەرەن |
| تۆ بویەر جە من جە پڕ ئینسافی | من ڕوو زەردی وێم کافییەن کافی |
دڵە تەبخاڵەت وە لێو مەوینوون
edit| دڵە تەبخاڵەت وە لێو مەوینوون | حاڵاتت یەکجار پەشێو مەوینوون |
| کەردەنیش وە تەیر هەڵۆ هۆش بەردە | ناکەردە کەردە، کەردە نا کەردە |
| ڕجات، گا بەیدیم، گا بەودیمەدا | ها نە گەردەلوول بادی بیمەدا |
| ها نەکەردەبۆت تۆ یەت کەردەبۆ | پێچی عەقیدەت وە دڵ بەردەبۆ |
| پەی چێش هەرکۆ وەسف وەش نیگارانەن | چەنی عەقیدەی دڵ ئەوگارانەن |
| تۆ زەننت چێشەن ئەویچ بەو تەورەن | ئەر مەیلەن، مەیلەن وەر جەورەن، جەورەن |
| ستارەی ڕجات هەر دەم دارۆ سوو | دەماخ شاد، وە بۆی وَ لا تَیْأَسُوا |
| ویەردە ویەرد، هەوڵێ پەی باقی | ئەمجار یە دەروێش، یە نەیچی و ساقی |
| هۆش وە سەدای دەف، گۆش وە نەوای نەی | دەس وە شیشەوە، لێو وە جامی مەی |
| سەفات جەفا دۆ وە قەفای هەستی | نۆشا نۆشت بۆ دەواچەی مەستی |
| وە کردە وە فام ئەر گا ناوەردەن | باک نییەن وەفام وە باوەڕ کەردەن |
دەرد وە بانی دەرد زامانی کاری
edit| دەرد وە بانی دەرد زامانی کاری | گرد جە لام جەم بی، یە تەشریف ماری |
| ئای یە چێشت کەرد تەشریفت ناوەرد | دەردت دا وە دەرد، منت ماتەم کەرد |
| ئیسەیچە دیدەم چەم ها وە ڕاوە | هەڵای سەروەشم بەو تەمەنناوە |
| ئەمرت موتاعەن أَطَعْنا وەندم | دوعای چەمەزەخم جە پیران سەندم |
| تەعویزبەند ڕیشەی دڵەی سەد پارەم | بەرگش پەڕەی جەرگ وە دەرد ئاوارەم |
| حافیز بۆ وە عەشق مەستانی یاهوو | بپێچەش نە دەور باهووی بێئاهوو |
| ئینە عادەتێن وە زاهیر ئامان | وەرنە هەی سەرخێڵ نازک ئەندامان |
| تۆ ئیند نازکیت جە حەد ویەردەن | بینایی خەیاڵ ڕاگەش گوم کەردەن |
| سەفات خەجاڵەت دان وە جامی جەم | دیدەی بەد مەر عەکس وێش بدیۆ وە چەم |
| دیدەی بەد دەردش نا دیاری بۆ | جە کۆ موینۆت تالێت کاری بۆ؟ |
دەورێ دەر ساقی وە لای مەحزووندا
edit| دەورێ دەر ساقی وە لای مەحزووندا | لەیل ئاسا بویەر وە لای مەجنووندا |
| جامێ جە سەهبای دیای باڵاکەت | ئالوودەی غوبار تۆزی پاڵاکەت |
| بەو ناز و عیشوە وێت پێمدەرەوە | جەستەی پەژموردەم ئیحیا کەرەوە |
| جەی قلب الأسد تاوسانی دووری | فێنک کەرەوە جەستەی مەهجووری |
| بەڵکەم شەرارەی نائیرەی فیراق | نەسۆچنۆ تەمام سەوزەی ئیشتیاق |
| بەڵام بەو شەرتە مەیلت مودام بۆ | منیچ بەو مەیلە دنیام وەکام بۆ |
| نەک غەزاڵ ئاسا دیا و ڕەمت بۆ | گا مەیلی شادی، گا ماتەمت بۆ |
| ئیتر کافی بۆ جەور و جەفاکەت | بەڵ تا وە سەر بۆ مەیل و وەفاکەت |
| ئەر چەند هەفتەیێ عومرم مەندەبۆ | بەڵکەم دووریی تۆ لێم نەسەندەبۆ |
دووریت دیارەن چەند ساحیب نێشەن
edit| دووریت دیارەن چەند ساحیب نێشەن | تۆی دەروون وە خار نێشێوتەر ڕێشەن |
| هەرچی بوینوون شێوەی تۆ پێشەن | دڵ وە هەتیتەی حەسرەتدا کێشەن |
| هەر ماهێ نەو بۆ حاڵم پەشێوەن | چون هیلال شێوەی ئەبرۆی تۆش پێوەن |
| نە شەو ڕاحەتم، نە ڕۆ دڵشادم | شەو زوڵف و ڕۆ ڕووت مەوزۆ ئەو یادم |
| شمشاد و نەرگس وەنەوشەی چەمەن | سەیرشان ئازار بینایی چەمەن |
| ئاد مارۆ بە ویر تەرزەکەی باڵات | ئەو دیدەی مەستت، ئێد خاڵی ئاڵات |
| سۆچنۆم حەسرەت دەردی جیاییت | نەک چون بڵێسەی یادی تەنیاییت |
| وە مەرگت، دیدەم، هام نە گوزەردا | منیچ لام لای تۆن ئارۆ یا فەردا |
| موتریب مەقامێ دەردم ناچارەن | ساقیا جامێ دۆس ئینتیزارەن |
دەلیلی وادەی سەر سەراوەکەم
edit| دەلیلی وادەی سەر سەراوەکەم | بینایی دیدەی شەو بێخاوەکەم |
| ڕەفێقی سەرحەد ئەقلیمی دەردان | ناخودای کەشتیی بەحرەکەی هیجران |
| ئوستادی تەعلیم دەرسی مەجنوونیم | دەسگیری ڕاگەی سەختی و زەبوونیم |
| شەمعی بەزمگەی مەهجووری و دووری | میعماری ئەساس پایەی سەبووری |
| مەسقەڵچی سەواد ئایینەکەی دڵ | غەواسی دانەی دەریاچەی موشکڵ |
| خەم نە وەختی بەزم فەرمانفەرماشەن | شادیم ئەلوەدای جە لەیل جیاشەن |
| من خۆ پای خەمان سامانسام کەردەن | دەک بمرم هانات بەمن ئاوەردەن |
| وە مەرگت دایم زامم هەر بەسۆن | دەردی وێم کەمەن ئەمجار نۆبەی تۆن |
| پێسە مزانی هیچم کەم نییەن | وێران یانەکەم وێت وە چەم دیەن |
دەخیلم خاڵۆ زەدەی زامی سەخت
edit| دەخیلم خاڵۆ زەدەی زامی سەخت | حاڵ شێوێنەکەی مەعدوومیی بەدبەخت |
| ڕاز ڕێزەی شەکەر، شای شەکەر ڕازان | فتێڵە پەی زام کەسێ مسازان |
| وەختێ دڵ وە تیر مەینەتان ڕێش بۆ | جەو دما تەمای ساڕێشی پێش بۆ |
| خۆ جای پەیکانان ژار وەردەکەی تۆ | تا بەر پەڕەی دڵ پەی کەردەکەی تۆ |
| وەختێ فوارەی هووناوان پێشەن | زوخاو جۆش بدۆ، ئانە ساڕێشەن |
| دەرگای مەینەتان جای نەدامەتەن | ناسۆریش یادئار ڕۆی قیامەتەن |
| فتێڵە پەی چێش ڕۆ وە یانەم ڕۆ | یەک جار داد نە دەس ئیستیغناکەی تۆ |
| تۆ پیرت بازەم دڵ وەشیی دڵەن | غەمزەدەی زامان وەشیش موشکڵەن |
دیاکەی وە شەرم جە پەنجەرەی ناز
edit| دیاکەی وە شەرم جە پەنجەرەی ناز | تاتا ڕیشەی جەرگ بەراوەرد وە گاز |
| پەترۆی زامەکەم هەم لابەردەوە | وەخت بی ساڕێش بێ تازەش کەردەوە |
| تیرێ هەوادا وە پەنجەی بێگەرد | دا نە پەڕەی دڵ تا سۆفار ویەرد |
| لاوی هوون گۆلاو دەروونم کەرد کەیل | سەرواز کەرد جۆشا نە دیدەم چون سەیل |
| خاشاکی هەستیم هورگرت جە ناو بەرد | وستش نە گێجاو تەنوورەکەی دەرد |
| ئیسە ها نە تۆی بەحرەکەی بێپەی | ساقی جەو جامە، یا، ها دات بە کەی |
| وە قەترەی منیچ ئاویاری کەر | مەست بوو تا مەحشەر سەر باروو ئەو بەر |
دیدەم وە دیدەت شای شیرین چەمان
edit| دیدەم وە دیدەت شای شیرین چەمان | فیراقت قامەت کەردەن وە کەمان |
| مەزاق یەند تاڵی دووری تۆ چەشتەن | هووناوەکەی چەم سەرزەمین ڕەشتەن |
| سەر پەیکانەکەت بڕیەن ڕشتەی دڵ | وە ناسۆر کەفتەن دایم مدۆ چڵ |
| سەمتووری سینەم وە زایەڵەی بەرز | مەژەنۆ نەوای دووریت وە سەد تەرز |
| بڵێسەی کوورەی دەروون گرتەن تاو | نە بۆتەی خەمدا دەروون کەرد وە ئاو |
| گلاراوەکەی جە تۆ جیامەن | وەختی لواکەی ئەوە نامامەن |
| پووشەکەی هەستیم، گیاکەی پای چەم | وای نیستیی فەنا بەردش پەی عەدەم |
دڵەی خەم خەیاڵ جۆش ئاوەردەوە
edit| دڵەی خەم خەیاڵ جۆش ئاوەردەوە | مەعدووم هەم هەوای زەهاو کەردەوە |
| زرنگەی سەدای ساز جە ڕیشەی ئەعزام | کەمانچە دەستوور ماوەرۆ مەقام |
| بانگی ڕسواییم جە عاڵەم بەرزەن | زیندەگیم زیاد، مەردەنم فەرزەن |
| لەت لەتی جەرگم عومانی عەینەین | پڕ کەردەن، بڕیان بوخاری بەحرەین |
| بەو تەور تەن غەرقەن نە گێجی هووندا | ماچی موورێوەن هانە جەیحووندا |
| ئیمشەو وە هەر حاڵ شەو وە ڕۆ بەروون | ئەی خودا سا مەرگ سەحەر چێش کەروون |
دنیا نە گێجاو تاریکە شەو بی
edit| دنیا نە گێجاو تاریکە شەو بی | جەلاو ڕۆشنیش جە لا چون خەو بی |
| ناگا شۆڵەی خۆر سوب فەردا، فەڕ دا | وە سەر بەرزی هەرد وە دەشت و دەردا |
| تەک دا تاریکی ئەو لای تەریکی | ئاڵەم چەنی نوور کەرد هامشەریکی |
| دنیایێ مەویەرد وە عەیشی شیرین | ساحیب دین دیدەش بی وە ساحیب دین |
| ئەو شۆڵە دیسان مەیل ئاوەردەوە | ئەو لای پەردەوە تەشریف بەردەوە |
| دڵ پەی تەئریخ وات وە دەم دەردەوە: | ئەی وای وەی دنیاش تاریک کەردەوە |
دیدەم نەو نەمام نەوتووڵی ساوا
edit| دیدەم نەو نەمام نەوتووڵی ساوا | نامەت پەی خەرجی وە لا من یاوا |
| ئەمرت دڵگیرەن، فەرموودەت خاسەن | بێشک ماهەنی ماهانەت ڕاسەن |
| بەڵام جە دووریت هۆشم ڕەم کەردەن | ئاگاهیم نییەن چەن ڕۆ ویەردەن |
| هەر ئێد مزانوون ئازیز گیانی تۆ | نەدیەنم وە چەم هەڵای ماهی نۆ |
| شیرین ڕایەتم، خاسەی سەر کارم | بێوادە زوڵمەن بدەی ئازارم |
| هەرگا دیم هیلال ئەو ئەبرۆی سێوەنگ | یە سیمی ئەسرین، یە ئەشرەفی ڕەنگ |
دەروێش ئەهلی خەم هەر یەند جەم مەبۆ
edit| دەروێش ئەهلی خەم هەر یەند جەم مەبۆ | پای کاوی دەروون هەر یەند تەم مەبۆ |
| کام زامەت مەندەن دڵ پێش نەئێشۆ | کام خەفەت مەندەن جەسەم نەکێشۆ |
| هەنی چێش واچوون چۆن مەکەرۆ چوون | گەردی ئاردەشان ئاسیای گەردوون |
| یەند تۆزی مەینەت جە دڵ جا کەردەن | بینایی خەیاڵ باڵاش گوم کەردەن |
| سا دەی سەر پەنجەت پەی دەف بەرەوە | ڕووی یادی باڵاش مەخسەڵ دەرەوە |
دیارەن دیدەم هەم دەرد نۆمەن
edit| دیارەن دیدەم هەم دەرد نۆمەن | ئەمجاریش جە نۆ ئارەزووی تۆمەن |
| جە گۆشەی مزگیی تەنیایی پڕ دەرد | نیشتەبێم خەیاڵ دەرمانم مەکەرد |
| ناگا مەیلەکەت عەودش کەردەوە | دیسان نێشی دەرد دا وە دەردەوە |
| هیجرانت دەردان جە لام جەم کەردەن | هەر جوزوێم پەی وێش خەریکی دەردەن |
| دەردی کۆنەو نۆ یەکسەر جەم بییەن | سەر تاپام جە دەرد هیچ خاڵی نییەن |
دەک فەڵەک چون من دەردت کاری بۆ
edit| دەک فەڵەک چون من دەردت کاری بۆ | زامت پڕ نە ئێش نادیاری بۆ |
| جەفای نەونەمام سەفات هورکێشۆ | خاترت وە نێش حەسرەتان بێشۆ |
| ساتێ بێخەم بی جەستەی جەفاکێش | ویارا وە شاد چەنی یاری وێش |
| وەخت بی لێڵاویت بگێرۆ چەمان | تا ئاخر دووریت وست نە بەینمان |
دڵ یەند وە ئایر دووریی تۆ تاوان
edit| دڵ یەند وە ئایر دووریی تۆ تاوان | سا ڕاسەن کزەش وە لات نەیاوان |
| وەی من پەی سەفای یارانی هامدەم | ئای پەی ئەو سەیران ماردم و کەڵڕەم |
| یاران گردین شین وە توونای تووندا | هەر خەیاڵ مەندەن نە تۆی دەرووندا |
دڵ ئەرچی شەماڵ قەدیمی یارەن
edit| دڵ، ئەرچی شەماڵ قەدیمی یارەن | پەی شنۆی زلان یار جە نزارەن |
| بەڵام کۆن تاقەت دینی دڵدارم | ئەو مەهـ چیهرەسان، من کەتان وارم |
داخۆ چەند وە دەس نازک نەوهاڵان
edit| داخۆ چەند وە دەس نازک نەوهاڵان | ئامۆشۆت کەردەن پەی دلێ ماڵان |
| ئیسە ها چون من پەشێوت بی حاڵ | کەفتەنی نە خاک مەکەرات پاماڵ |
دڵ بییەن وە دار سەرکەلی لای وەشت
edit| دڵ بییەن وە دار سەرکەلی لای وەشت | لافاوان ئامان ڕیشەش وست وە دەشت |
| چەمەڕای وایێن نەسیم بدۆ لێش | ڕیشەکەنش کۆ ساکن بۆ پەی وێش |
دیسان دەسی چەرخ هەم هانە کاردا
edit| دیسان دەسی چەرخ هەم هانە کاردا | تای تانتەی دووریش وستەن وە داردا |
دیدەنی دیدار غەزاڵەی وەرمن
edit| دیدەنی دیدار غەزاڵەی وەرمن | چیدما یاران وەرمەن پەرێ من |
دەفتەری لەوحی قەزات لە بەرە
edit| دەفتەری لەوحی قەزات لە بەرە | خەفەتت جەهلی خاوەن دەفتەرە |
دزەکەی زەهاو زاوزۆ کەردەن
edit| دزەکەی زەهاو زاوزۆ کەردەن | هەر دزێ حەو دز پەی وێش ئاوەردەن |
دیدەم رێژاوە ڕوخسارم زەردەن
edit| دیدەم رێژاوە ڕوخسارم زەردەن | جە داخی «یاران»، «پیران»م کەردەن |