دیوانی مەولەوی/س
سەرداری زومڕەی موسیبەت کێشان
edit| سەرداری زومڕەی موسیبەت کێشان | فەرمانفەرمای موڵک دەروون پڕ ئێشان |
| بادەی خەم وەردەی مەرگی ناکامان | زام ناسۆر کەفتەی دەروون پڕ زامان |
| پەردەی دڵ وە نێش مەودای خەم پارە | چار نەبەردەی دەرد دڵەی بێچارە |
| وەختێ سەیلی چەم دەروون پڕ خاران | تاو مەوەست چون تاو ئەوەڵ بەهاران |
| بۆی کزەی کەواو جەرگم چون جاران | هەم، وەی، تەم مەوست ئەو ڕووی ستاران |
| بۆ پڕووزی جەرگ قرچەی پارچەی دڵ | بۆی هوونی جۆشیای دەروونی پڕ چڵ |
| ئێد چون تۆفی سەخت تەم وست ئەو کوان | ئەو وێنەی لافاو باڵای تۆ ڕەوان |
| هەناسەی سیای سەردی دڵسۆزی | بەرد مدا وە بەرد برد العجوزی |
| یانێ نامەکەی خەم ئینشا کەردە | مەرقوومی قەڵەم وە خەم شەق وەردە |
| شۆڵە دا وە گڕ شەرارەی نارم | دەمیا و جۆش دا دڵەی خەمبارم |
| من وەر جە ئامای نامەی زگاریت | زووتەر جە خەبەر کۆسی دیاریت |
| خاترم چەند ڕۆ خەستەی خەمان بی | چەمانم چون تاف سافی چەمان بی |
| جە ئامای نامەت چەمەریم بەرز بی | شادیم شێویا، شینم سەد تەرز بی |
| شەمعی شامی شووم ماتەم هورگڕیا | تای تەلی سەمتوور شادی و زەوق بڕیا |
| شای شادیم شکیا، سوپای خەم جەم بی | بەیداخی دەماخ شێوەی ماتەم بی |
| دەخیل بیم وە نوتق خەمان لاڵ کەردەم | لاڵام جە خەیاڵ خەم غارەت بەردەم |
| نامەرد، یە وادەی شینی بێشۆمەن | هیچ کۆسم نییەن، یە کۆسی نۆمەن |
| سا دەی، هەی پەی کەی هەر یەک جە لایێ | باوەرین ئەو ساز شیوەن سەدایێ |
| خەیاڵ غەمگین بی، نوتق ئاما وە دەنگ | ئێد موات وە سۆز زایڵەی سەد ڕەنگ: |
| ناکامی ئەییام کامەرانیم ڕۆ | بەر نەوەردەی باغ نەوجوانیم ڕۆ |
| شابی شێخی عەشق یەکتای فەردم ڕۆ | وە ناکام مەردەی دڵ پڕ دەردم ڕۆ |
| کەنگەرەی ئەیوان کاخی دینم ڕۆ | توڕەی لای تەڵای ڕای یەقینم ڕۆ |
| حەللالی عوقدەی ڕاگەی شەرعم ڕۆ | ڕەهنومای تەریق جادەی وەرعم ڕۆ |
| کێ نە تەفاسیر قورئان بدۆ دەم | کێ بۆ ئەحادیس ڕەسوول کەرۆ جەم |
| کێ وە صرف و نحو خاتر کەرۆ مەحو | کێ وادەی تاعەت دەم بدۆ نە صَحو |
| هەنی کێ آداب وە ئاداب وانۆ | کێ عیلمی مَنطِق جە مەنتق زانۆ |
| مُطَوَّل پەی کێ توول دۆ عیبارەت | با مُختَصَر بۆ وە بێئیشارەت |
| کێ وە قووەی عیلم زەکای حەق بینی | دەم بدۆ نە «کونە» عیلمی «چەقمینی» |
| فەقێ بێتەدریس، مەدرەسە بێزەوق | مزگی بێئیمام، جەماعەت بێشەوق |
| عالمان بێفکر، شاعیران ماتەم | نازک خەیاڵان غەرقی دەریای خەم |
| میرزام چون بێوەخت وە ناکامی دڵ | وەر جە من تەشریف بەردی وە تۆی گڵ |
| شاد بی وە حووران خاسەی جینانی | تەمەننای وێت بی لەقای سوبحانی |
| مەنزڵ موبارەک، بێهەمتات یار بۆ | شەفاخوات ڕەسوول خاسەی موختار بۆ |
| بێزەحمەت جە هەوڵ مەحشەر ئازد بی | وە لوتفی ئیزەد ڕەحمانی شاد بی |
سەرشاری سەهبای بەزمی موناجات
edit| سەرشاری سەهبای بەزمی موناجات | مەلجەی ئیلتیجای ئەربابی حاجات |
| جای ڕجای جەرگەی پادشا و دەروێش | بارەگا و پەنا، پەی بێگانە و خوێش |
| ئاهووی خوتەنی فەیزی ئیلاهی | نافەی ناف ڕاهی جە مەهـ تا ماهی |
| شکۆفەی وەشبۆی ڕەیحانەی ڕەسوول | نەوباوەی نەمام طَیّبەی بەتوول |
| سەروی سایەدار نیشاندەی وەلی | یەعنی یادگار مورتەزا عەلی |
| وە ڕەوزەتانا هەر نوور واران بۆ | تا دەفعی زوڵمەت دیدەی یاران بۆ |
| هەوای سایەتان هەر مەمدوود مانۆ | سەبوون بوردەی جورم نەک زەرەر سانۆ |
| ناپوختەکاری و شەرمەساریی من | خەجڵەتی غەفڵەت گوناهکاریی من |
| کەفتەن وە هەمدا یەند زۆر ئاوەردەن | ڕووی ڕجام وە پای بارەگات کەردەن |
| تۆ چون جە ئەولاد ئەمجادی مەولای | پەی ڕجا وە جا، پەی هیممەت ئەولای |
| زاری و زگاری و زوێری کەردم | وە بارگەی پاکت پەنا ئاوەردم |
| ئامام سەر نیام وە بارەگاوە | غەریو، موو سفید، وە ڕووی سیاوە |
| تەن مەعسیەتبار، دەروون پڕ جە دەرد | دیدە تەڕ، لەب خوشک، دڵ گەرم، نەفەس سەرد |
| های چەند پلەی سەخت هانە ڕێمەدا | جە ڕووی ئیلتیفات بدیە پێمەدا |
| بەڵکم جە ڕووی ئەو ئیلتیفاتەوە | مەولام حازر بۆ وە نەجاتەوە |
| دەسی شای مەردان مەدەدکارم بۆ | پلە ئەو پلە ئەو دەسوارم بۆ |
| مەعسیەت نییەن چون هیچ سەدمەتێ | خەیلێ مەلوولم، یا پیر هیممەتێ |
| هیممەتت باعیس ڕستگاری بۆ | یار بۆ، دیار بۆ، یادگاری بۆ |
ساقی ئاوەردە و گرد کیاستێنین
edit| ساقی ئاوەردە و گرد کیاستێنین | وریا بەردێن و کردە ئاستێنین |
| حاڵ مازی ئاسا ها نە گوزەردا | موقیم موسافر ڕەنگ نە سەفەردا |
| کاروانسەرای کۆن دەوری دنیای دوون | جە بارگەی یاران وە چۆڵ مەوینوون |
| قافڵە کۆچ کەردەن، بەرزەن دەنگی زەنگ | وڕان حوجرەی خان وجوود سەنگ بە سەنگ |
| هۆسای تای شاوڵ دانش وە مشتی | بەناباشیی بورج دیواران گشتی |
| قەدەم ڕەنجەکەر وە لای کارەوە | بنچینەم وە تەرح مەی هوردارەوە |
| عەمارەتێوەن بیناش باقی بۆ | ئاو مەی، خاک دوردی، بەناش ساقی بۆ |
سەر حەڵقەی فیرقەی نازک خەیاڵان
edit| سەر حەڵقەی فیرقەی نازک خەیاڵان | دیباچەی کیتاب ساحێب کەماڵان |
| جیلوەی جەلای دۆس تەدریج پەی یاران | مبۆ، تا وە قەدر تاقەت بویاران |
| گا وە تەبەسسوم بَیْضا بێزەوە | گا وە تەکەللوم شەهد ئامێزەوە |
| تەبەسسوم وە ناز زوڵمەت زەداوە | تەکەللوم وە ڕاز وەحشەت فزاوە |
| ئەر دەس پەی نیقاب تەمام بەردەوە | جە ڕوخسارەی وێش پەردەش دڕدەوە |
| فەنا پەی عاڵەم پا منیۆ ئەو پێش | باقی ئەو مبۆ، وێش ممانۆ، وێش |
سەرلەتەرەی خەم خول ئاوەردەوە
edit| سەرلەتەرەی خەم خول ئاوەردەوە | تای کرژ یمەینەت دووباد کەردەوە |
| موقەددیمەی خەم تاڵیی مەزاقەن | دەک وە خەیر نەیۆ وادەی فیراقەن |
سەر وە بانی عەین عەینم خەم وەردەن
edit| سەر وە بانی عەین عەینم خەم وەردەن | هوون چون چەشمەی عەین نە عەین سەرکەردەن |
| یەند دەرد و ئاهم عەین کەردەن بێنوور | وەختەن هەشت کەم بۆ نە پەنجەی مەشهوور |
سیاییم ئاوەرد سفیدیم پێ ڕەشت
edit| سیاییم ئاوەرد، سفیدیم پێ ڕەشت | هەفتم کەردەوە گرێم دا لە هەشت |
سفیدیم ئاوەرد سیاییم پێ ڕەشت
edit| سفیدیم ئاوەرد، سیاییم پێ ڕەشت | هەفتم کەردەوە ڕوو نیام لە هەشت |
سازش نە مابەین ئار و پووش کەمەن
edit| سازش نە مابەین ئار و پووش کەمەن | وەرنە هانامەن نەفەس یەک دەمەن |
سەنگیی سەنگ و خاک نە سەر دۆشم بۆ
edit| سەنگیی سەنگ و خاک نە سەر دۆشم بۆ | مەر ئەوسا مەیلت فەرامۆشم بۆ |