| گۆش بدەن بەکار چەرخ چەپی واز
|
هەنگامەی عەزیم جەنەو مەبۆ ساز
|
| گۆش بدەن بەراز زەمانەی وەرین
|
جەنەو بشنەوین جە نۆش ئافەرین
|
| فەرما چەشمەی نۆش پڕ سەفا کەردن
|
شای نۆش ئافەرین بەو چەشمە بەردن
|
| چەنی کەنیزان زوڵفان عەنبەرین
|
ڕەفێق موشفێق شای نۆش ئافەرین
|
| لوان بەهەمڕاز بە سەرچەشمەی نۆش
|
بە دەماغ دڵ ماهـ قەسەب پۆش
|
| سەدای زیل و بەم چەنگ چەقانە
|
سۆز مەهوەشان شەیدای زەمانە
|
| بەسەد نازەوە ماهـ قەسەب پۆش
|
داخل بین بە ناز بەسەرچەشمەی نۆش
|
| یاوا بە چەشمەی زوڵاڵ بێگەرد
|
ئیرادەی هەوەس غوسڵ بەدەن کەرد
|
| پەڕەندەی پڕ گوڵ بەست نەرووی کەمەر
|
داخڵ بی بەتاب نازدار دوڵبەر
|
| وێش دا نەرووی ئاب شای پەری سیفەت
|
مەنمانا وێنەی بەت نەرووی شەت
|
| زەنجیرە زوڵفان پەخش مەداشەوە
|
زینەت دا بە تاب چەشمەی نۆشەوە
|
| پەڕچین زوڵفان سیای لوول بەستە
|
نەدەور گۆنای گوڵ بەستەن دەستە
|
| نە جەرگەی پەری تا حۆری پێوە
|
کەس نەدییەن وە چەم مەحبووب وەی شێوە
|
| مەکەرد شستوشوو باڵای نازپەروەرد
|
چون عەکس خورشید ئاب چەم مەوەرد
|
| ئاب ڕێزا وە بان گۆنای گوڵناری
|
پەخش بی وەدۆشدا وێنەی مرواری
|
| بەرئاما نە ئاب جە سەرچەشمەی نۆش
|
نۆش مەحروومیی وێش ئاما بە جۆش
|
| نیشت نەرووی مەڕمەڕ وێنەی دوڕدانە
|
بەشانە کەردش زوڵفانش شانە
|
| بە پەنجەی نازک توغرای خۆش ئاهەنگ
|
زوڵفان خاو مەکەرد بە مەودای چل جەنگ
|
| شانە دا نەزوڵف توعزای سیاوە
|
پەی شەهریاران دامش نیاوە
|
