| دادمەن جە دەست ئەی دونیای کەچباز
|
ڕۆژێ هەزار فەن فیتنە مەدۆ ساز
|
| ئەی دونیای بێ شەرت شای نۆش ئافەرین
|
چون مەدۆ بە دەست مەلعوون بێ دین
|
| ناگا جە کردار زەمانەی کەچباز
|
جەو دەم جە ڕووی غەیب دەستێ بی دراز
|
| دەستێ پەی باهۆی دوڵبەر ئاوەردش
|
هۆرکەند نەزەمین ڕفانا و بەردش
|
| شیرین هاوار کەرد نە سەرچەشمەی نۆش
|
خەیلێ فەغان کەرد ئاخر بی خامۆش
|
| دەست بەرووی هەوا بەردش وە باڵا
|
فەڵەک جەداغش پەرێش مەناڵا
|
| کەنیزان تەمام زاری مەکەردن
|
لوان بە دما ئەی خەبەر بەردن
|
| شا خەبەر زانا دوختەر بەردشان
|
هەوا دا نەسەر تاج زەڕ نیشان
|
| جە یانەی بابۆ پەیدا بی خرۆش
|
سەدا شی بەگۆش چەرخ میناپۆش
|
| شا زاری مەکەرد پەی فەرزەند وێش
|
جە ڕیشە مەکەند تاتا ڕیش وێش
|
| ئەهل شار تەمام گردین وەیەک بار
|
گرد یەقەی وێشان کەردن پارە پار
|
| یەکسەر وەلایەت گەدا تا مسکین
|
زاری مەکەردن پەی نۆش ئافەرین
|
| یەکێ چون مەجنوون جامە کەردش چاک
|
یەکێ وێش مەدا نە ڕووی تەخت خاک
|
| یەکێ بار وە لێو هیجران کەشیدە
|
یەکێ مەرێزا ئەسرین نە دیدە
|
| یەکێ نەداخش سەر تا پا سیا
|
یەکێ جە عەشقش تەرک کەرد دونیا
|
| یەکێ غەڵتان بی نەپای ئەیوانش
|
یەکێ خاک مەکەرد وە بان شانش
|
| یەکێ نە هیجران هەردەم مەناڵا
|
یەکێ خاک بورج بە دەم مەماڵا
|
| گشت نەسەرای شا ماتەم و زگار
|
مەکەردن فەغان مەگرەوان بەزار
|
| شازادەی چین خەبەر یاوا پێش
|
تۆ واتی گیانش کەردەن ڕیشەکێش
|
| بەو تەور گڕەی نار جەرگش مەدا جۆش
|
مەشنەوا کزەی جەرگ وێش بەگۆش
|
| جە غەم مەناڵا و مەسۆزا و مەوات
|
ئەی نازەنینم ڕۆحم بۆ فەدات
|
| مەگرەوا و مەوات لەیل مەلاوان
|
واوەیلا و زاریش مەنیشت وە کۆهان
|
| مەوات فیدات بام شای نۆش ئافەرین
|
چون مداراتەن بەدەست لەعین
|
| ئیسە جەکۆ بۆ زوڵف و خاڵ تۆ
|
واجبەن پەی من ڕوو بە کەم نەکۆ
|
| تیر هیجرانت نە جەرگم تۆ تۆ
|
ڕاست و چەپ پێوە جەم بییەن کۆکۆ
|
| نەداروو تاقەت ئەی بار سەنگی
|
نەبۆ بە حاڵم پاشای فەرەنگی
|
| کێ بنیۆ شەوان دەست نەباڵینت
|
کێ گێرۆ بەدەست لیمۆی نارینت
|
| باڵای سەوڵ ئاسات نەکام دیارەن
|
جە سەراپەردەی کام شەهریارەن
|
| دەستاخ زەنجیر کام ڕەنگ ڕێوەن
|
گرفتار بەند تەلیسم دێوەن
|
| ئیسە کە تاوس کام گوڵستانی
|
عەندەلیب شەوق کامین بووستانی
|
| یا خۆ نەپەردە شیشە نشینی
|
وێت پەنهان کەردەن بە نازەنینی
|
| ئەی حەرفە مەوات دایم بە تیکرار
|
مەگێڵا بەسۆز چوار گۆشەی بازار
|
| مەشی بە ڕاوە هەر بەیانش بێ
|
هەر نۆش ئافەرین نەزوانش بێ
|
| گا جەداغ غەم گا مەلوول بەدەرد
|
گاهێ خاک نشین گا زاری مەکەرد
|
| هەرچەند مەکەردن یاران دڵداری
|
ئەو فارێغ نەبی نەگریە و زاری
|
| هەرچەند دەلالەت مەکەردن وەنەش
|
ئاهیر جەرگش فیشتەر مەبی گەش
|
| خان محەمەد وات خاترت جەم بۆ
|
ئەی کارە خەیلێ مەخفی نەمەبۆ
|
| نە هەرمەکان بۆ زوو مەبۆ پەیدا
|
شێر نیهانیش مەبۆ هوەیدا
|
| سوڵتان ئیبراهیم بەدەرد وێشەوە
|
بمانۆ پەی جای جەفاکێشەوە
|
