| کردارش پەوسەن ئەی چەرخ کەچباز
|
ڕۆژێ هەزار فەند فەریب مەدۆ ساز
|
| گاهێ مەدۆ کام بەناز و نیعمەت
|
گاهێ مەدۆ دەرد پەژارە و میحنەت
|
| خانا، نیعمەتش کامدار نییەن
|
«نەرێزەش» تاسەر پایدار نییەن
|
| گوش بدەر بە ئەو ناپۆختە و ناخام
|
جە ئەمیر سەلیم دێوانەی کەم فام
|
| ئەویش گرفتار نۆش ئافەرین بی
|
دایم جە داغش ماتەم نشین بی
|
| ئەو ناموافێق دێوانەی دەغەڵ
|
زەهرش پەنهان بی دایم نە بەغەڵ
|
| دایمە نەپەی فرسەت و فەریب
|
تا یاوان یاران بەکۆی سەرئەندیب
|
| شەو ئاما ناپاک ڕووسیای کەم فام
|
کەس حازر نەبی شی بەلای تەعام
|
| زەڕەیێ نەو شیرەی زەهر بێ ئەمان
|
بە مەخفی ڕیزا نە ڕووی تەعامان
|
| شازادە دەست بەرد پەی جیب بەغەل
|
نیگا کەرد نەرووی ساعەت بێ خەلەل
|
| هۆش دا بە ساعەت بە نیگا، کەردەن
|
دیا چوار ساعەت نەشەو ویەردەن
|
| شازادە دەست بەرد خەیلێ تەعام وەرد
|
زەهر هەلاهەل جە تەن ئەسەر کەرد
|
| زبانش جە ڕاز گفتوگۆ لەنگ بی
|
ڕەوشەنیی دیدەش چون شەوە زەنگ بی
|
| سەلیم دی وەی تەور ئەو شێر خوونخوار
|
نە ڕووی خاکدا مەناڵۆ بەزار
|
| هۆرێزا وە پا بە تەعجیل و تاو
|
دیش نۆش ئافەرین ها نە شیرین خاو
|
| دارووی بێ هۆشی ئاوەرد دا بە نۆش
|
نۆش نەخاو دا تەمام بی بێ هۆش
|
| سەلیم ناپاک دڵ پڕ ژ تەشویش
|
نۆش ئافەرینش وست نەتەرک وێش
|
| «قەترە» دا بە تاو چەند ڕۆژ و چەن شەب
|
تا مەنزڵ بەردش بەماوای حەلەب
|
