| ئەی چەرخ غەدار شەرمێ نییەن پێت
|
خەجاڵەت نابی تۆ جە کردەی وێت
|
| کەی چەنی کەس بە میان بەستی
|
کەردی ڕەفیقی تۆ بە دروستی
|
| تۆ کێت نەپێچا بەدام بەڵاوە
|
کێت ناوەرد بە تای ڕشتەی جەفاوە
|
| با بەرکەنار بۆ ئەو جە فام سادە
|
بشین بەسەر وەخت کار شازادە
|
| زەهرش نەدەروون بەو تەور کار کەرد
|
ڕەنگش چون خەزان زەعفەران بی زەرد
|
| ئەندام لەتیف وێنەی گوڵ تەبەق
|
ئەعزای پاکیزەش تەمام بی شەق شەق
|
| قەترەی زۆخ زەرد جە بەدەن سەرواز
|
جارییەن جە تەن وێنەی مارانگاز
|
| مەوج جواناو تەڕ کەردەن ئازاش
|
یاونان وە سەر ویەرد هەم جە پاش
|
| چەم پڕ جە ئەسرین خەیاڵات مەکەرد
|
پەی پەی مەکێشا هەناسان سەرد
|
| خان محەمەد جە دەنگ ناڵین بێ شۆ
|
ئاما نە گۆشش دەنگ ڕۆ هەی ڕۆ
|
| جەو زاری و شیوەن نەخاو بی بێدار
|
دیش کە شازادە مەناڵۆ بە زار
|
| بەتاو و تەعجیل جەڵد و ئامادە
|
شی گۆش دا بەدەنگ ناڵەی شازادە
|
| نیگا کەرد خەیلێ پەشێوەن حاڵش
|
زەرد بییەن چون بەی شێوەی جەماڵش
|
| ئاهی سەرد کێشا شی بە تاسەوە
|
کەفت نەدەریای بەحر بە وەسواسەوە
|
| هەرچەند هاوار کەرد بەزاری و فەریاد
|
جەلای شازادە هیچ سەدا نەداد
|
| خان محەمەد دی سەردا وە بەردا
|
بەهەر دوو دەستش بدا وە سەردا
|
| مەوات ئەی بەدبەخت یە چێش ئامان پێت
|
مەگەر نەزانای تۆ جەکار وێت
|
| خەیلێ کەردشان شین بێ سامان
|
ئاخر وات حەمید دەستم بە دامان
|
| یەزاری و شیوەن سوود نەدارۆ پێش
|
کاری کەر بە حاڵ شازادەی دڵڕێش
|
| حەمید ئێد شنەفت بەدڵەی پڕ جۆش
|
پەڕ مورغ ئاوەرد دا بە ڕووی ئاتەش
|
| دەرسات حازر بی مورغ وەفادار
|
نیگا کەرد بە ڕووی شازادەی سالار
|
| دیش کە شازادە کەفتەن وە ڕووی خاک
|
ئەندام پاکش یەکسەر بییەن چاک
|
| ڕوخ وات خان محەمەد یەکار زەهرەن
|
شازادە بەی تەور نەزدیک وەمەرگەن
|
| من بشوەم وەلای عەبدورەحمان شا
|
بەڵکم حەکیمێ باوەروو و ئەی جا
|
| سا کە ئێدش وات پەرواز کەرد نەوجا
|
یاوا بە خدمەت عەبدورەحمان شا
|
| شا واتش ئامان ئەی مورغ گوزین
|
پەی چی ئامانی بەدڵەی حەزین
|
| مورغ واتش ئەی شا دەروونم تەنگەن
|
شازادە هەلاک زەهر فەرەنگەن
|
| سا کە ئێد شنەفت عەبدورەحمان شاهـ
|
هەوادا جە سەر تاج و هەم کولاهـ
|
| مەیموونە خاتوون شنەفتن بە گۆش
|
بدا وە سەردا دەردەم بی بێ هۆش
|
| هەم ئاما بە هۆش بانگش نەدەردا
|
خاک ڕووی زەمین کەردش وە سەردا
|
| نەسروڵای حەکیم حازر بی نەو جا
|
خاتوون وات حەکیم بابشین وە ڕا
|
| حەکیم دەرساعەت هۆرێزا وە پا
|
وەعدەی سێ ساعەت یاوان بە ئەو جا
|
| دیشان شازادە غەڵتان خاکەن
|
سەر تا پاش تەمام یەکسەر چاک چاکەن
|
| خاتوونە خانم وێش وست نە ڕووی خاک
|
خەیلێ لاونا شیر دەروون چاک
|
| حەکیم وات وەسەن ئەی گریە و زاری
|
ڕووکەن جەدەرگای کەریم باری
|
| ئەگەر نیم نەفەس مەندەبۆ باقی
|
دەواش مەکەرووم تەحقیق بە تاقی
|
| خاتوون وات حەکیم دەواش بکەری
|
بەڵکم عەلاجێ شازادە کەری
|
| هەرچێ مەوازی جە ماڵ دنیا
|
مەدەرووم پەنەت تەمام بەدڵخوا
|
| حەکیم وات خانم منەت وەگیانم
|
هەرچێ بزانووم وە بان چەمانم
|
| دەست بەرد کە دەوای مەعجوون بەرئاوەرد
|
چەنی نۆش داروو ئامێتە هەم کەرد
|
| جەو دەم پەیدا بی عەبدوڕەحمان شا
|
چەنی چەند حەکیم یاوان بە ئەو جا
|
| دەرلەحزە کە شا تاجش وست نە خاک
|
یەکسەر سپاوسان یەقە کەردن چاک
|
| واتشان سەد حەیف شازادەی بێ باک
|
تەلیسم زەنگوڵە یەکسەر کەردی پاک
|
| نەسروڵای حەکیم وات ئەی پادشا
|
ئەگەر شامۆهرێ پەرێم بۆ پەیدا
|
| شا کە ئید شنەفت دەست کەرد وە بەغەڵ
|
موهر سولەیمان ئاوەردش وە بەر
|
| دیشان شازادە غەلتان خاکەن
|
سەرتا پای تەمام یەکسەر چاک چاکەن
|
| داش بە نەسرۆڵا حەکیم دەردان
|
حەکیم وات بەعزێ شێر پەرێم باوەران
|
| شا فەرما دەردەم شیر حازر کەردن
|
شیر چەنی عەسەڵ ئامێتە کەردن
|
| موهر سولەیمان قاتیی شێر کەردن
|
پەی پەی تەناول شازادە کەردن
|
| تا دە ڕۆژ تەمام دەوا دادن پێش
|
دان بە شازادە ئەو مەرد دڵڕێش
|
| ڕۆژی یازدەهەم دیدە کەردش باز
|
دیش خاتوون جەلاش نیشتەن بەدڵواز
|
| گوڵاو مەرێزۆ بەرووی دەماغش
|
هەتا ڕۆشن بۆ چەشم و چراغش
|
| حەکیم و وەزیر شای عەبدورەحمان
|
گشت دەس بە دوعا بەدڵ بە زوبان
|
| بە دەرگای کەریم قازیولحاجات
|
شاهـ و شەهریار کەردن موناجات
|
| خەیلێ نیگا کەرد شازادەی سالار
|
دیش نۆش ئافەرین هیچ نییەن دیار
|
| واتش ئەی خاتوون کۆن نۆش ئافەرین
|
یە بەکۆ بەردەن سەلیم بێ دین
|
| شازادە واتش خاتوون شیرین
|
بەڵکو پەیدا کەن شای نۆش ئافەرین
|
| شای نۆش ئافەرین مەلیک گەوهەر تاج
|
سەلیم لەعین بەردەن بە تاراج
|
| تەڵەب کەردشان ئەو مورغ گوزین
|
بەڵکم پەیدا کەی شای نۆش ئافەرین
|
| مورغ وەفادار با بشۆ وەڕا
|
بشین وە سەروەخت شێر کینە خوا
|
| تا چل و یەک ڕۆژ دەوا بداشان
|
داخڵ بە حەمام شاهی کەردشان
|
| شین وە بان تەخت نیشتن بەرقەرار
|
چەنی خاتوونە خانم نازدار
|
| نیشتن چەنی هەم بە خاتر گوشا
|
تا نۆش ئافەرین چون ببۆ پەیدا
|
