سینۂ پر سوز یکسو چشم گریاں یک طرف
سینۂ پر سوز یکسو چشم گریاں یک طرف
دل بچے کیا یک طرف آتش ہے طوفاں یک طرف
دام سبزے کے سے بچنا طائر دل ہے محال
سبزۂ خط یک طرف زلف پریشاں یک طرف
مستعد ہیں اس بت طناز پر بہر نثار
یک طرف صبر و دل و دیں جان و ایماں یک طرف
کس پہ شب خوں مارنے کوں کی صف آرا فوج ناز
یک طرف سیاہی مسی کی سرخی پاں یک طرف
پھر بہار آئی جو باہم مستعد جنگ ہیں
یک طرف دست جنوں جیب و گریباں یک طرف
ٹک سما کر اے جہاں دارؔ آج اس کوچے میں جا
تیغ بر کف ہے وہ یکسو اور رقیباں یک طرف
|
This work was published before January 1, 1929, and is in the public domain worldwide because the author died at least 100 years ago. |