| وەختێ شای شیرین مەشریقی بە جەخت
|
وێنەی خوسرەو نیشت نە فەیرۆزەی تەخت
|
| بە دێبای زەڕڕین شۆڵەی سەبز و زەرد
|
وێنەی نەو عەرووس سوب ئارایش کەرد
|
| شا پەی عورووسی شیرین ئەرمەن
|
کۆ کەرد موشک و عود عەنبەر بە خەرمەن
|
| فەرماش هەزار ئەسپ ڕەخش پۆڵا سم
|
پەڕڕانتەر جە تیر شەهاب ئەنجوم
|
| گشت بە دوکدوکی سورمە بافەوە
|
بە ڕەخت و ڕەحشەی تەڵای سافەوە
|
| هەزار هەم ئوشتور بۆر و بۆر باهوو
|
تاوسیی پا زەرد چەم وێنەی ئاهوو
|
| گشت بار جە سەندووق شاخ نەبات و قەند
|
جە نوقڵ و بادام قورس دڵپەسەند
|
| هەزار پەرستار نەوڕسیدەی نۆ
|
گشت بۆ عەنبەر زوڵف، موعەتتەر لیمۆ
|
| هەزار هەم غوڵام خارا و ئەتڵەس پۆش
|
تەنگ بەند، دانە بەند، دانەی دوڕ نە گۆش
|
| چەنی چەند تەپڵەک موجریی زەڕنیگار
|
ئاگەندە جە موشک لوولووی شاهوار
|
| سەندووق و مەفرەش خەیمەی بۆ عەنبەر
|
نۆسەد تا هەزار بەڵکم زیاتەر
|
| گشت پڕ جە دێبای خارا و خەتایی
|
جە پارچەی گوڵخار زەمین تەڵایی
|
| تەخت «موکەللەل» جە یاقووت زەرد
|
پەیکەر زەڕفشان لاڵ و لاجیوەرد
|
| بە موشک و عەنبەر ئامادەش کەردن
|
خاسە پەی شیرین ئەرمەن ئاوەردن
|
| وەختێ بە مەتڵەب ئەو جەمین چون جام
|
ئەسباب هەرچی بی یاوا بە ئەنجام
|
| شا فەرش تا ساز عورووسی ژەندن
|
دانە و جەواهێر بە گەوهەر شەندن
|
| پۆل پۆل پەرێ ڕوح بەرقەی ناز نە فەرق
|
جە سەر تا وە پا جە گەوهەردا غەرق
|
| تا شنەفتن دەنگ پڕ خورۆش ساز
|
وێنەی چەرخ تەور کەردشان پەرواز
|
| هەر یەک یەک تەبەق جە ئەشرەفی و زەڕ
|
جە شەمامەی موشک، جە عەبیر تەڕ
|
| هۆرگرتن پەی بەزل، شیرین بێ ئەندێش
|
جە گێسوو کەردن مۆشکین مار بە کێش
|
| شین وە پای تەختش کەردن نیسارش
|
حەیران بین بە شەوق شەمع ڕوخسارش
|
| نیشتەبێ پڕ زەوق ئەو زوڵف بۆ گوڵاب
|
چون تەخت زەڕڕین قورس ئافتاب
|
| دەوڵەت سەرای شا جە بۆی زوڵف چین
|
کەردەبێ پڕ عەتر چون نافەی موشکین
|
| ئاخر ئەو خوسرەو لاڵ بەخش لاڵ پۆش
|
وات بە بزورگان ساحێب عەقڵ و هۆش
|
| شیرین شەخسێوەن پڕ تەمکین و سام
|
جە نەسڵ شاهان جەم جای جەم مەقام
|
| وێش هەم جە ئەرمەن کەردەنش شاهی
|
خەتمەن بە نامش عیسمەت پەناهی
|
| من دەرکارمەن بکەرووش نیکاح
|
ئەگەر بزورگان بوینان سەڵاح
|
| واتن: ئەی حەرفە خەیلێ سەجیدەن
|
پەسەندیدەی شا هەر پەسەندیدەن
|
| بکەرۆش نیکاح بە فەڕڕ ۆ ئیقباڵ
|
موبارەکش بۆ تا بە هەزار شاڵ
|
| چونکە بەی دەستوور شا بی سەڵاحش
|
بە ڕەسم وێشان بەستن نیکاحش
|
