| سا کە شەهەنشای بەزم بۆ عەبیرین
|
شنەفتش بەی تەور فەریاد شیرین
|
| هەرچەند کە نەدی ئەو شێوە و ڕەنگش
|
بەڵێ دەرساعەت شناسا دەنگش
|
| فەرماش تا جە بەزم خەرگەی بۆ عەنبەر
|
نامەحرەمان گشت بەرکەوان وەبەر
|
| شا وات بە شاپوور: نەمەندەن هۆشم
|
چمان ئاما دەنگ شیرین نە گۆشم
|
| عەرز کەرد وات: بەڵێ دەنگ شیرینەن
|
مەرهەم نومای زام دڵەی خەمینەن
|
| شا فەرماش شیرین ڕشتەی ئیلاهی
|
ئاوەردەن تەشریف بە خەرگەی شاهی
|
| وێنەی عەییاران ئەو پەروین پایە
|
کەفت نە خاکپای خوسرەو چون سایە
|
| سا وەختێ شا دیش ئەو نادیرەی دەور
|
کەفت نە خاکپاش چون شیرین بەی تەور
|
| جە شادیی ئەو شۆخ شیرەی شەکەربار
|
یاواش بە فەرقەد فەرق ئیفتیخار
|
| جە سوبوک ڕۆحی و بوردەباریی ئەو
|
زیاتەر جە حەد مەمنوون بی خوسرەو
|
| چون شیرین بەی تەور بی بە هامڕازش
|
کێشا بە سەد دڵ فراوان نازش
|
| شا کەرد جە دمای ئەو دڵنەوازی
|
تەقازای بازی، ماچ و دەستبازی
|
| جەناب عولیای کڵاف سۆسەنی
|
شاباز شەش دانگ شۆخ ئەرمەنی
|
| پێ نەبی ڕازی، ڕوو ئاوەرد بەهەم
|
پڕ کەرد جە ئەسرین جوی بەحرین چەم
|
| عەجەب مەند خوسرەو جەو دیدەی سێوەنگ
|
ئەووەڵ جار شاد بی، ئاخر خاتر تەنگ
|
| عەرز کەرد بە خوسرەو نیهانی شاپوور
|
واتش: چون شەمع شۆخ شا دەستوور
|
| هیچکەس نە باخش نۆبەر نەکەردەن
|
چون گوڵ نە گوڵزار عیسمەت پەروەردەن
|
| مەحرەمێ چون باد بۆ موشک سەحەر
|
نە حەڵقەی زوڵفش نەکەردەن گوزەر
|
| ئیسە ئەو دڵپاک جون حۆریی بەهەشت
|
جە دراز دەستیی شا متەرسۆ سەخت
|
| پەی چێش؟ تا ئیستە چون شاسواران
|
بە عەرز و سیرەت دنیاش ویاران
|
| شا چون پێ زاناش شیرین بێ نیکاح
|
ساحێب عیسمەتەن، نمەبۆ سەڵاح
|
| خوسرەو بە سەوگەند عەهد و وەفا بەست
|
بە میوەی باخش نمەکێشوون دەست
|
| تا جەم نەکەروون شاهان بە ئیعزار
|
ناوەرووش بە عەقد ویم بە عیزز و ناز
|
| بەڵێ چەنی هەم ئیمشەو تا بە ڕۆ
|
بنۆشیم شەراب شیشەی عەنبەر بۆ
|
| پەی چێش؟ ئەی دنیا هەرچەند ڕەنگینەن
|
فائیدەش نیەن، مەرگ نە کەمینەن
|
| یەک شەو دنیا بویارمێ بە شاد
|
نە کەی ممانۆ سوب، نە کەیقوباد
|
| ئەی عەهدە شنەفت جە شا چون شیرین
|
پڕ تەبەسسوم کەرد غونچەی عەبیرین
|
| دەس بەرد پەی چارشەو هۆردادا جە سەر
|
دەرخشان چون قورس دوو هەفتەی قەمەر
|
| نە فەرق قوللەی موشکین جە سەردا
|
وەردا چون ئەژدەر وە ڕووی کەمەردا
|
| نە پای ئەو قوللەی موشکین بێز ئەو
|
مدرەوشا حوسنش وێنەی شەمع شەو
|
| نەخش وەنەوشەش نە ڕووی یاسەمەن
|
مبەخشا بۆی موشک مودبیرەی خوتەن
|
| شەهەنشا سا دیش شیرین بەو ڕەندی
|
بەو شێوە شیرین، بەو دڵپسەندی
|
| جە نەشئەی مەیگوون لەبانش چون مەست
|
بەسەر غەڵتیا، جامش کەفت نە دەست
|
| خێزنا شۆخیش بەو تەور ڕەستخێز
|
کەفت جە ئیختیلات خوسرەو پەروێز
|
| وەختێ مکەردش بە خۆش ئەندازی
|
موعەنبەر زوڵفش وە پێدا بازی
|
| هەرکەسێ مدی مکەرد تەماشا
|
عەقڵ و سەبر و هۆش لێش مکەرد حاشا
|
| ئاخر جون خوسرەو بێ جەنگ و دەوا
|
چون زوهرەو وە بورج موشتەری یاوا
|
| خێزا چەنی ئەو ڕشتەی سوبحانی
|
شورووع کەرد ئەو شەو بە میهرەبانی
|
| هۆشش پێ نەمەند، جە شەوقش بی مەست
|
گا مبۆساش پا، گا مبۆساش دەست
|
| گا عەنبەر جە چین زوڵفش مماڵا
|
گا لیمۆش مگەست، گا لێش ملاڵا
|
| گا دەستەی نەرگس مدا بە دەستش
|
گا سورمە منیا جە دیدەی مەستش
|
| گا ماوەرد وەبەر جە دەس بازوانەش
|
گا مبۆسا خاڵ پای لووتەوانەش
|
| گا منیاش کڵاوزەڕ نە کەللەی سەر
|
گا خرخاڵ نەپاش بەر ماوەرد وەبەر
|
| گا مگرت وە دەس شەمامەیی لیمۆش
|
گا گا مکەرد واز یەخەی عەنبەربۆش
|
| گا زوڵفش جە لوول خاو مکەردەوە
|
گا تافتەی قرمز لێش مدڕدەوە
|
| گا ماوەرد نە وەر شەم پەی تەماشاش
|
گا مکەرد زەریف سەیر جە سەر تا پاش
|
| ئەو شەو ئەو خوسرەو ئەو شای دەریاکێش
|
بەی تەور کەفتەبێ گلاراوی پێش
|
| مکەردش خەیاڵ سەراسیمە تەور
|
هەردەم مواتش ئەو نادیرەی دەور
|
| یانێ بە شیرین جەمین گوڵ بێز بۆ
|
یە ئەو دلارام ساوای نەوخێز بۆ
|
| ئید موات موست نە گەردوون گێسووش
|
دەم منیا نە دەم، بۆ منیا نە بۆش
|
| مواتش: شیرین شۆخ شەکەرڕیز
|
یە تۆنی فیدای باڵات بۆ پەروێز
|
| ئاخر ئەو دوو شۆخ ئاڵای شۆخ و شەنگ
|
شەقەی ماچشان مشی بە فەرسەنگ
|
| ئەمما کە شیرین ڕاگەی حەقشناس
|
پاس دوڕ مکەرد جە مەودای ئەڵماس
|
| هەرچەند کە خوسرەو لێش لاڵە مکەرد
|
شیرین جە لالەی ئەو بازی نەوەرد
|
| ئەو شەو تا بە سوب هەر مژەندن ساز
|
خوسرەو ملاڵا شیرین مکەرد ناز
|
| سا بەی تەور هەفت ڕۆ شیرین و خوسرەو
|
کەردن بە هەم عەیش هەر ڕۆژ و هەر شەو
|
| بێ پەروا جە دەرد ئەی دنیای بادی
|
ویاردشان عومر شیرین بە شادی
|
| جە دمای هەفت ڕۆ شای دارا نەبەرد
|
ئاما ئیرادەی موراجەعەت کەرد
|
| فەرماش کەژاوە جە چۆی سەندەل ساف
|
ئاموودەی گەوهەر، ناو پەردەی زەڕباف
|
| کەردشان وەش بۆ بە موشک و عەنبەر
|
پەی ئەو گوڵ ڕوخسار شۆخ لەب شەکەر
|
| خەراما شیرین چون مای دوو هەفتە
|
شی نە کەژاوە چون گوڵ شکوفتە
|
| چون ماهـ مکەردن چۆگە حیسابش
|
سوپا چون کەوکەب کەفت نە ڕیکابش
|
| جەودما خوسرەو دارای لاڵ کەمەر
|
وێنەی جڵەودار کەفتەبێش نە وەر
|
| خاسەی غوڵامان سەمەن بۆی سادە
|
هەمڕاهش چەنی چەند کەس شەهزادە
|
| چون ڕیکاب شاتر چەنی کەژاوە
|
پیادە بی ئەسپ مشین بە ڕاوە
|
| تا چەندی بەی تەور شەهەنشای جەم کێش
|
یاوا بە مشکۆی موشکین عەتر وێش
|
| دڵشاد بە شیرین نیشت وەبان تەخت
|
مونەججیم باشی تەڵەب کەرد بە جەخت
|
| تا کەرۆ حیساب پەرێ تەدارەک
|
کامین ڕۆ نەحسەن، کامین موبارەک
|
| شایەد کە ئەو شۆخ شیرین غەمزە و ناز
|
باوەرۆش وە زەبت وەسڵش بە ئیعزاز
|
| مونەججیم بە حوکم زیج و ئوستورلاب
|
پەی سەعد و نەحسش ساعەت کەرد حیساب
|
| وات: چون شەهەنشا فرە بە سۆزەن
|
ڕۆی فەردا سوبحش تەمام فەیرۆزەن
|
