| قافڵە سالار گەوهەر فرۆشان
|
غەوواش لوججەی بەحر خورۆشان
|
| بە ڕەحشەی موشکین موعەنبەر قەڵەم
|
ئەی نامەی نامی بەی کەرد ڕەقەم
|
| خوسرەو جەم قەدر هومایوون ئەختەر
|
ئاما نە خاوش سالار مەحشەر
|
| دیش نیشتەن نە پشت بوراقێ چون بەرق
|
سەر تا پاش جە شەوق شوعلەی نووردا غەرق
|
| لەب پڕ تەبەسسوم چون غونچەی نەوخێز
|
جە ڕای مەرحەمەت فەرماش بە پەروێز
|
| بۆ هەی جەوانمەرد جەی نادروستی
|
جە ڕای ناپەسەند ئاتەش پەرستی
|
| بتەرس جە ئاهیر سۆزندەی سەقەر
|
ئاتەش پەرستی خاس نیەن، مەکەر
|
| جەی فیعل شەنیع شەرتەن شەهریار
|
بکەرۆ بە سیدق تەوبە و ئیستیغفار
|
| خوسرەو دا جەواب سەیید موختار
|
عوزر خوای مەحلووق جە «یوم القرار»
|
| وات: ئەر مکەرام پارە بە خەنجەر
|
جە ئایین وێم نمەشووم وەبەر
|
| ئێد وات خوسرەو، دیش یەک نێزەدارێ
|
وست نە ئەبرۆ چین، چاپوک سوارێ
|
| تاودا بە توندی چون باد پێش یاوا
|
بە حەربەی خوون ڕێز جەرگش شکاوا
|
| بێدار بی دەرلاد شای فەڕڕوح سیەر
|
زایف بی جە زەرب سالار مەحشەر
|
| ئەو شەو بە خەڵوەت تەڵەب کەرد شیرین
|
بە مشکۆی بۆ موشک پەیکەر عەبیرین
|
| وات: شیرین ئیمشەو یەک خاوم دیەن
|
جە خۆف ئەو خاو عومرم کەم بیەن
|
| بۆ هەر دوو بشمێ بە کونج خانەی گەنج
|
پەی دەفع ئەی خاو مەینەتیی دڵ ڕەنج
|
| چند دانە یاقووت، چەند لاڵ و گەوهەر
|
چەند دورج عەبیر، چەند تەبڵەی عەنبەر
|
| کاڵا هەرچی هەن جە خاس تا بە کەست
|
ببەخشیم بە ئەهل فوقەرا و تەهی دەست
|
| شیرین ئێد شنەفت هۆرێزا بە دەو
|
شی بە گەنج خانە ئەو چەنی خوسرەو
|
| نیگا کەردن دین چەند هەزار دەستە
|
خەریتەی زەڕباف بەزەنجیر بەستە
|
| دیشان نە چەند جا چەند گەنج نایاب
|
مەر هەر خوداوەند بزانۆش حیساب
|
| چەند جا هەم جە گەنج، جە دوڕڕ شەهوار
|
مەحکەم گشت بە قوفڵ پۆڵای زەڕنیگار
|
| ئاوەردش کلید نەخشان گەنجوور
|
سپەرد بە شیرین شای والا دەستوور
|
| هۆرگرتن دەرگای ئەو گشت خەزێنە
|
ئەو خەزێنەی گەنج سەد هزار وێنە
|
| چۆگە شەهەنشای تاج و کەمەر زەڕ
|
دیش یەک سندووقێ جە سەنگ مەڕمەڕ
|
| گەنجوور «حسب الامر» پەروێز خوسرەو
|
کەردەوە قوفڵش بە دەوان دەو
|
| دیشان تەلیسمێ جە سیم سادە
|
ئاو بەفر نە تۆی قرمزی دادە
|
| خاستەر جە سەرمەشق مانیی گوهەربار
|
مونەققەش بە خەت ڕەیحانی غوبار
|
| ئاوەردن پیرێ فراوان دانا
|
نام ئەو تەلیسم پەرێشان وانا
|
| دیش کە ئەردەشێر بابەکان دەور
|
نویسان نە ڕووی ئەو تەلیسم بەی تەور
|
| بە ئیرادەی زات بەخشندەی بێچوون
|
یە چەندێ قەڕنەن نە دەور گەردوون
|
| شەخسێ عالی قەدر عەزیز سەروەر
|
شەفا خواری خەڵقەن نە عەرسەی مەحشەر
|
| نامەی ڕیساڵەت خەتمەن بە نامش
|
میعراجەن پایەی کەمتەر مەقامش
|
| ئیسمش ئەحمەدەن ئەو عالی نەسەب
|
ئەسڵش هەن جە نەسل قەبیلەی عەرەب
|
| سەڵاح هەر ئێدەن نە دەور ئەییام
|
چ شا، چ دەروێش، کاففەی خاس و عام
|
| بە ڕیسالەتش باوەران ئیمان
|
وەرنە جە دارەین مبان پەشیمان
|
| خوسرەو چون بە شکڵ ئەو خەت نیگا کەرد
|
نە پەردەی دەروون کێشا ئاهـ سەرد
|
| وات: شکڵ ئەی خەت شۆخ بۆ گوڵاو
|
چون ئەو سوارەن من دیەن نەخاو
|
| پەرسا جە شەخسێ نادیرەی ڕووی دەور
|
کەس دیەن شەخسێ بەی شکڵ و بەی تەور؟
|
| واتن: شەخسێ هەن ساحێب تەدارەک
|
عەنبەر بۆ کەردەن مەککەی موبارەک
|
| خودا کیاستەن بە پەیغەمبەری
|
نیان نە فەرقش تاج سەروەری
|
| موحەممەدەن نام، عەزیزەن نامش
|
حەق بە فەزڵ وێش کەردەن ئیکرامش
|
| شا کە ئێد شنەفت تەمام بی دڵ تەنگ
|
چمان نە فەرقش دریا پارەی سەنگ
|
| وەختێ دیش شیرین شۆخ بێ ئەندێش
|
شا پەرێشانتەر جە تای زوڵف وێش
|
| واتش بە خوسرەو هەی شای جەم نیهاد
|
بەرازەندەی تاج تەخت کەیقوباد
|
| ئەی هوو چەند ساڵەن جە ئێمە وەرتەر
|
وێنەی ئەردەشێر شێر هونەروەر
|
| ئەر نەبیا بە ڕاس نە ڕووی عەرسەی دەور
|
پەی چی تەلیسێ منویسا بەی تەور؟
|
| ئەڵبەت ئەو شەخسە ساحێب حیشمەتەن
|
ڕەهنومای کاففەی موڵک و میللەتەن
|
| بیللا ئەر مشی نە ڕای دین ئەو
|
خوسرەوی تاسەر وێنەی کەیخوسرەو
|
| نە ڕووی سەرزەمین کامگار مبی
|
بەرگوزیدەی زات کردگار مبی
|
| خوسرەو وات: شیرین حەرف تۆ ڕاستەن
|
ئەو شەخسە ئێزەد بە حەق کیاستەن
|
| چۆن بکەروو تەرک، بەڵێ واچە پێم
|
ڕەویەی خوسرەویی ئابا و ئەجدای وێم؟
|
| جە ڕەسم شاهان دەستوور دێرین
|
شەرم مانیعەن هۆرگێڵوون شیرین
|
| ڕازی نیم جە تەرک دین ئابای وێم
|
هەرچی پێم بەیۆ بڵا بەیۆ پێم
|
