| نازک نەمامان، نەوچە نەوهاڵان
|
ڕەند ڕەوێڵان، بەزم ڕواڵان
|
| دەوردان نە دەورش ناز نزارە
|
سەنجەقدان نە دەور مەهـ چون ستارە
|
| مدران بە ئەدەب نە دیدار دین
|
سوجدەی سووجوود دان نە دەور شیرین
|
| شیرین بە شیوەن دیاش بە یاران
|
ئەسرین ڕێزنا چون سەیل باران
|
| بە دەنگ دڵگیر جەرگەی قەڵەم کێش
|
چڕیش یاوەران یەکایەک بە پێش
|
| ئامان بە پابۆس بەرگوزیدەشان
|
یەکایەک بۆسا دەس و دیدەشان
|
| یەکایەک یاران بە زاری تەمام
|
وەم نیان نە دەم گۆنای جەمین جام
|
| واتش یاوران مزاندێ چێشەن
|
شۆر شین من دەستوورێ پێشەن
|
| یاران یاوەران، تاج کاکۆڵم
|
هامڕاز ڕاگەو ڕەفیق چۆڵم
|
| نازار و نازکێش یاگەی نازمەن
|
مەحرەم سۆز و هەم گودازمەن
|
| دۆست دڵپەزێر یار و غەمخوارم
|
سەبووریی سەفای سەبا و ئێوارم
|
| تەبیب دەرمان، ئەنیس دەردم
|
ئاینەی دەروون جەمین زەردم
|
| سەر حیساب سەر خەفت و خاوانم
|
قەدیمی ساڵان بانووی باوانم
|
| نەوا بواچان شیرین وەششەن
|
دمای کەیخوسرەو عەیش و نۆششەن
|
| بەرگ قەڵاخی کەندەنش نە وەر
|
پۆشانش بە تەن کاڵای بۆ عەنبەر
|
| شەفاف شەوهەر نەو زەروورشەن
|
شادیی سۆز وساز دەرد شوورشەن
|
| بە سۆز ساڵان سیاسەتگەرەن
|
ئاخر پەرێ من چۆپی چەمەرەن
|
| دمای کەیخوسرەو نامانوون بە شاد
|
بگێڵوون نە دەور، سەر نەدەون وە باد
|
| شەرت بۆ من جە داخ شێرۆس زیناکار
|
بدەون جەرگ وێم بە تێغ ئابدار
|
| شادەن خاترش بنیشین وە هەم
|
شەرتەن شکۆفەم نەوینۆ وەچەم
|
| واتش یاوەران خارەن خەیاڵم
|
پەی گەردەن ئازاد بکەن حەڵاڵم
|
| خەیلێ چەنی من بەردەنتان جەفا
|
کێشانتان پەی من چەند ڕەنج و عەنا
|
| هەنی مەحاڵەن بنیشین وە هەم
|
دیدار شیرین بوینن وە چەم
|
| ها دیدارمان گەردوون بەرد وە سەر
|
مەر ڕۆی قیامەت نە دەشت مەحشەر
|
| داخۆ دمای من ئەسیر کێ بن؟
|
وەردەی دەربەدەر، دەسگیر کێ بن؟
|
| دڵ ڕێش کێ بن بە زاری و زگار؟
|
کێ جە دەردتان ببۆ خەبەردار؟
|
| کێ بۆ بە ئومێد یاگەی ڕازتان؟
|
کێ بۆ بکێشۆ چون من نازتان؟
|
| یاران، یاوەران ڕۆژ ئیمانەن
|
ڕۆژ ڕەستاخێز جیاییمانەن
|
| بەیدێ بوزمێ دوو دەس نە گەردەن
|
حەڵاڵم کەران، مشوون وە مەردەن
|
| نیەن زیندەگیم دمای کەمەر لاڵ
|
بنمانوون جە یام دنیام بۆ بەتاڵ
|
| مبۆ بنیەروون بۆ وە شەدا
|
وێم سەرنیگوون کەم وە گڵکۆشەدا
|
| یە زیب و زینەت خەت و خاڵمەن
|
عەزم عورووسیی کەمەر لاڵمەن
|
| زەوق و شادیمەن، خۆش خەیاڵەنان
|
ئیمشەو میهمانیی کەمەر لاڵەنان
|
| پشتان بوو چەنیش بۆ وە بۆشەوە
|
بۆ بنیەو وە خاک گڵکوی نۆشەوە
|
| با دمای خوسرەو نەبوون پایەدار
|
بوون بە هام نشین شێرۆی زیناکار
|
| بەرشوون جە دوڵاب دنیای بێ بەرین
|
چەنی کەس نەنیەون سەر وە یەک سەرین
|
| دمای کەیخوسرەو جە سۆز ناڵین
|
شیرین چەنی کەس نەبۆ هام بالین
|
| جە لەفز شیرین شنەفتن یاران
|
تواسان جە تاو تیپ تەتاران
|
| کەنیزان تەمام خورۆشان جە لاش
|
بە یەکبار کەفتن نە ڕووی خاکپاش
|
| یاران یاوەر جەمین جامانش
|
یەکا یەک بۆسان دەس و دامانش
|
| جە هیجر خوسرەو داخان دووشان
|
داخ دوود دەرد دین بانووشان
|
| بە شین وشیوەن پاڵیانەوە
|
بە شەوق شیرین لاڵیانەوە
|
| واتن: ئەی بانوو دەخیلەن ئامان
|
ڕەنج و ڕیازەت ماوەر نە ڕامان
|
| دەرر دوون مەکەر بە ناکاممان
|
مەشێونە مەقام سەرئەنجاممان
|
| شادیمان مەکەر بە زاری و زویر
|
ئێمە بە ناحەق مەدەر بە ئەسیر
|
| سیلسیلە و سامان خوسرەو مەشێون
|
دوشمنان دوون دەوران مەدێون
|
| تەرک تەدارەک تاج و تەخت مەدەر
|
ئێمە بە زەلیل ناشنەخت مەکەر
|
| نەمانیم زەلیل ئێمە بێکەسان
|
ببین بە دەستگیر دەست ناکەسان
|
| تۆ ئێمە جە موڵک ئەرمەن ئاوەردی
|
جە زێد زامن ئاوارە کەرد
|
| دەرد دوود داخ جە خوسرەو بەتەر
|
تازە مەکەر زام تۆز بەستەی خەتەر
|
| ئێمە زەدەی زام دوودیی دەرد داخ
|
بەرگ سیاپۆش قەڵاخی قەڵاخ
|
| بازەمان بە ئێش نێش جەرگەوە
|
بەی سۆز سفتەی سیا بەرگەوە
|
| بە زاری و زگار واتن چێش کەریم
|
دمای تۆ دەخیل وەلای کێ بەریم
|
| کێ بۆ بە ئومێد یاگەی ڕازمان
|
کێ بۆ بکێشۆ چون تۆ نازمان
|
| بە سۆز ئەسرین، بە دیدەی نمناک
|
بەرگ ئازیەتیی بەدەن کەردن چاک
|
| سیا سەوادی ئاوارە کەردن
|
بە نێش ناخوون سەد پارە کەردن
|
| بە ئاو ئەسرین ئەشک شین و شۆر
|
ئاوەردن بە سۆز زامان ناسۆر
|
| کڵاوچەی زەڕڕین تاقیی تەڵا ڕێز
|
نیان نە یاگەی خاک و خوون ئامێز
|
| کەردن ڕەستاخێز چون ڕۆژ مەحشەر
|
بە شین و شیوەن جە خوسرەو بەتەر
|
| هەرچەند لاڵیان بە سۆز ئەسرین
|
فائیدەش نەکەرد پەی حاڵ شیرین
|
| دەسدان نە گەردەن، ئامان بە هەمدا
|
کەردن زایەڵە و زاری بە چەمدا
|
| فوغان و فەریاد بێداد بێحەد
|
زاری و شۆر و شین جە حەد کەردن ڕەد
|
| شین و ڕەستاخێز کەردشان بەتاڵ
|
شیرین جە خدمەت کەردشان حەڵاڵ
|
| شیرین وات یاران فائیدەش نیەن
|
تەقدیر تەدبیر موقەددەر بیەن
|
| جە دەس دەوران ڕەنگ ڕۆزگار
|
مبۆ بنۆشیم نۆشانۆش خار
|
| کەسێ نە سایەی چەرخ چەپی واز
|
جە دام و دوونش نیەن سرفراز
|
| خوسرەو خەمینەن جە تەنگیی مەزار
|
پەی دین شیرین ها نە ئینتزار
|
| بشوون بیاووون بە خاک گڵکۆش
|
بۆ بنیەوەن بە خاک یانەی قەبر نۆش
|
| بیاووون وەلاش بوینوون ڕەنگش
|
سەر بدەون نە سای سەراچەی سەنگش
|
| پشتان بوون وە بەژن زووخ زامانش
|
بۆسە دەم گۆنای جەمین جامانش
|
| هەنی جە شادی نیەن قەرارم
|
پەی ڕاگەی لوان نیەن مەدارم
|
| ئێشەو میهانیی خەم خەیاڵمەن
|
جە نەو عورووسیی کەمەر لاڵمەن
|
| نەداروون مەدار، دێرەن درەنگەن
|
خوسرەو خەمینەن، خاترش تەنگەن
|
| یە دین ئاخر دنیا و دینمەن
|
یە شۆر شیوەن ئاخرینمەن
|
| فائیدەش نیەن یاران، یاوەران
|
لوانم فەرزەن، مەرکەب باوەران
|
| هەنی دنیای دوون نیەن مەنزوورم
|
بە دین دیدار خوسرەو زەروورم
|
| موکەممەل بە زین باوەران بە دەو
|
سەرێ بکێشوون بە خاک خوسرەو
|
| بوینوون دیدار دین دۆس وێم
|
تەن بدەون بە تێغ هەرچی مەیۆ پێم
|
| ڕواڵان بە ڕەم یاوەران بە شین
|
بە تاو و تەعجیل مەرکەب کەردن زین
|
| بە زین زەڕڕین تەکەڵتووی تەڵا
|
مینا و مورەسسەع خاس پڕ جەلا
|
| ڕیکاب زەڕ نیشان دانەی دیاری
|
زین پۆش زەڕکەش ڕیشە مرواری
|
| پێکان نە «کەللەش» مورەسسەع لوجام
|
مینا و مرواری تەمام سیم خام
|
| کێشان کەنیزان بە شین و ئەسرین
|
ئاوەردن وەبەر شەهباز شیرین
|
| شیرین بە شیوەن خێزا حەرامان
|
سەیل ئەسرینش ڕێزا نە دامان
|
| واتش بە یاران هیممەت ببۆ یار
|
حەڵاڵ کەن وەنەم ڕەنج ڕۆزگار
|
| جە نەو هەم بۆسا دیدەی مەستشان
|
بۆسان دەست و پای ئاوات وەستشان
|
| شیرین نە پێوار پەردەی بەرگ وێش
|
کەردش تەدارەک قەسد قەتڵ وێش
|
| دەشنەی تێغ تێز نیهانی نیهان
|
هۆرگرت چەنی وێش پەرێ قەسد گیان
|
| جە لای کەنیزان بەردش بێگومان
|
نەزانان پەنەش ئەختەر ئەنجومان
|
| جەللاد گیانش نیا نە پێوار
|
پا دا بە ڕیکاب، شیرین بی سوار
|
